Akʼo ta ilel ti achʼunoj lek li kʼusi chavale

LI KRIXCHANOETIKE chakʼik venta kʼalal achʼunoj lek li kʼusi chavale. Jaʼ jech la spas jtakbol Pablo ek kʼalal la xchol mantale. Xi la stsʼibabe batel li buchʼutik kʼotik ta jchʼunolajel ta Tesalonikae: «Maʼuk noʼox jecheʼ loʼil kʼot li lekil aʼyejetik ta jcholkutike, yuʼun [...] ta sjunul oʼontonal [chʼunbil]» xtok (1 Tes. 1:5). Ti xchʼunoj lek kʼusi chal li jtakbole laj yakʼ ta ilel ta skʼopojel xchiʼuk ti kʼu yelan kuxie, li voʼotik eke jaʼ jech skʼan xkakʼtik ta ilel kʼalal chkakʼtik estudioe.

Ti jchʼunojtik lek li kʼusi chkaltike maʼuk me skʼan xal ti jpʼel xa xkaltike, ti muʼyuk xa buchʼu xuʼ sjelbutik li kʼusi chkaltike o ti ta jtoy jbatik ta skoj ti jnaʼtik xa tajek yilele. Li buchʼu xvinaj ta skʼopojel ti xchʼunoj lek kʼusi chal Vivliae chakʼ ta ilel ti oy lek xchʼunel yoʼontone (Evr. 11:1).

Li butik xuʼ xavakʼ ta ilel ti achʼunoj li kʼusi chavale. Tsots skʼoplal ti achʼunojuk lek li kʼusi chaval ta cholmantale. Li krixchanoetike maʼuk noʼox chakʼik venta li kʼusi chkaltike, chakʼik venta xtok ti kʼu yelan chkaltike. Jech xtok, chakʼik venta kʼusi chanop ta sventa li kʼusi yakal chavalbe skʼoplale. Mas me oy yip kʼusi chaval kʼalal xvinaj ta akʼopojel ti achʼunoj lek li kʼusi chavale.

Jech xtok, skʼan xavakʼ ta ilel ti achʼunoj lek kʼusi chaval kʼalal chavetʼes mantal ta yeloval ermanoetike. Xi laj yal ta baʼyel skarta li jtakbol Pedro ti jaʼ akʼbat snaʼ yuʼun Diose: «La jtsʼibaboxuk tal sventa ta jpat avoʼontonik xchiʼuk sventa jamal chkalboxuk ti jaʼ melel li slekil yutsil yoʼonton Diose». Jech xtok, la stsʼiba ti ‹tukʼikuk-o› ta sventa li spatobil yoʼontonike xchiʼuk li kʼusi jamal albatike (1 Ped. 5:12). Li skarta la stak batel ta Roma li jtakbol Pabloe chakʼ ta ilel ti xchʼunoj lek li kʼusi la stsʼibae, yuʼun la stsatsubtasbe yoʼonton li jchʼunolajeletik te oyike. Xi la stsʼibae: «Jnaʼoj lek ti mi jaʼuk lajelal, mi jaʼuk kuxlejal, mi jaʼuk anjeletik, mi jaʼuk ajvaliletik, mi jaʼuk li kʼusitik oy avie, mi jaʼuk li kʼusi jaʼ to chtale, mi jaʼuk li kʼusi oy sjuʼele, mi jaʼuk li kʼusi toyole, mi jaʼuk li kʼusi ta olone, mi jaʼuk jtosuk li kʼusitik meltsanbil ti xuʼ xchʼakutik lokʼel li ta kʼanelal yuʼun Dios ti te oy ta stojolal Kristo Jesus ti jaʼ Kajvaltike» (Rom. 8:38, 39). Jech xtok li jtakbole laj yakʼbe xchʼunik ti skʼan xcholik mantale. Ti ta sjunul yoʼonton la xchol mantal stuke jaʼ chakʼ ta ilel ti xchʼunoj lek ti tsots skʼoplal li yabtele (Ech. 20:18-21; Rom. 10:9, 13-15). Li moletik ta tsobobbail avi eke skʼan xchʼunojikuk lek kʼalal chchanubtasvanik ta Vivliae.

Li totil meʼiletike skʼan xakʼik ta ilel ti xchʼunojik lek kʼusi chalik kʼalal chchanik Vivlia xchiʼuk yalab xnichʼnabike, xuʼ jech spasik xtok kʼalal tsloʼiltaik li kʼusitik sventa mantale. Sventa spas yuʼunik li totil meʼiletik taje, tsots me skʼoplal ti skʼanojikuk li Diose xchiʼuk li smantaltake. Vaʼun xuʼ jech xakʼik ta ilel ti xchʼunojik lek li kʼusi chalbe yalab xnichʼnabike, ‹yuʼun jaʼ chlokʼ ta yeik li kʼusitik oy ta yoʼontonike› (Luk. 6:45; Deut. 6:5-7). Mi jech tspas li totil meʼiletike, jech chakʼbe yil yalab xnichʼnabik ti «melel oy xchʼunel yoʼontonike» (2 Tim. 1:5).

Jech xtok, tsots skʼoplal skʼan xkakʼtik ta ilel ti jchʼunojtik lek kʼusi chkaltik kʼalal chichʼ akʼel ta preva li xchʼunel koʼontontike. Xuʼ van labal sba chil jchiʼiltik ta chanun, jmaestrotik o jchiʼiltik ta abtel kʼalal muʼyuk ta jtikʼ jbatik ta spasel jtosuk kʼine. Li kʼusi xuʼ jpastik sventa stsak ta mukʼ li kʼusi jchʼunojtik ta Vivliae jaʼ mi chijrasonaj leke xchiʼuk mi muʼyuk xijnaʼet kʼalal chkaltike. ¿Kʼusi ta jpastik mi oy buchʼu tsujutik ta spasel li kʼusi chopole, ta sjutel kʼop, ta slajesel droga xchiʼuk li mulivajele? Jpʼeluk me avoʼonton xaval ti jaʼ noʼox chakʼan chachʼunbe smantal Jeova ta sjunul akuxlejale xchiʼuk ti muʼyuk buchʼu xuʼ sjelbot li kʼusi oy ta avoʼontone. Jaʼ yuʼun ta sjunuluk me avoʼonton xaval ti muʼyuk chachʼun li kʼusi tsujoxuk spasele. Li Josee jpʼel yoʼonton muʼyuk tsʼuj kʼalal loʼlabat sjol yuʼun li yajnil Potifare, xi laj yale: «¿Cʼu yuʼun ta jpas li cʼusi toj chopole, xchiʼuc ti jaʼ sventa ta jta o jmul ta stojol Diose?». Kʼalal te xvulvun tajek li antse, jatav lokʼel li Josee (Gén. 39:9, 12).

Kʼuxi xuʼ xavakʼ ta ilel ti achʼunoj lek li kʼusi chavale. Te me chvinaj mi achʼunoj lek ta skoj li kʼusitik chavale. Li Jesuse ep ta velta xi laj yal kʼalal oy kʼusi tsots skʼoplal chale: «Chkalbot avaʼi ta batsʼi melel» (Juan 3:3, 5, 11; 5:19, 24, 25). Li Pablo eke laj yakʼ ta ilel ti xchʼunoj lek kʼusi chal kʼalal xi la stsʼibae: «Jnaʼoj lek», «jnaʼoj xchiʼuk kʼotem lek ta koʼonton ta stojolal Kajvaltik Jesus» xchiʼuk «melel li kʼusi chkale, muʼyuk ta jut kʼop» (Rom. 8:38; 14:14; 1 Tim. 2:7). Sventa chakʼ ta ilel Jeova ti chkʼot ta pasel yuʼun li kʼusi yaloje, xi laj yakʼbe snaʼ li yaj-alkʼoptake: «Ta xcʼot onoʼox ta pasel» (Hab. 2:3). Xuʼ jech xaval ek mi jaʼ yakal chavalbe skʼoplal li albil kʼopetik taje. Mi chapat avoʼonton ta stojolal Jeova ti maʼuk noʼox ta atojolal atuke xchiʼuk mi chavichʼ ta mukʼ li yantike, te chvinaj ti oy lek xchʼunel avoʼonton mi ta sjunul avoʼonton li kʼusi chavale.

Kʼalal xijmuyubaj chijkʼopoj xchiʼuk tsots li yechʼomal ketike, te chvinaj ti jchʼunojtik lek li kʼusi chkaltike. Jech xtok, chvinaj ti jchʼunojtik lek kʼusi chkaltik ti kʼu yelan ta jbakʼes sjunul jbekʼtaltike, kʼalal ta jpastik senyail ta jsatike, ta jkʼobtik xchiʼuk yan senyailtake, taje jelajtik ta jpastik ta jujuntal. Akʼo mi chakʼexav chakʼopoj o mi kʼun noʼox li yechʼomal avee, mi achʼunoj lek ti melel xchiʼuk ti skʼan xaʼiik yantik li kʼusi chavale, chvinaj ta akʼopojel ti melel li kʼusi chavale.

Skʼan me xlokʼ ta koʼontontik ti jchʼunojtik lek li kʼusi chkaltike. Pe mi chakʼik venta ti ta jkuy noʼox jbatik xchiʼuk ti mu meleluk li kʼusi chkaltike, xuʼ me snopik ti chʼabal sbalil li kʼusi yakal chkalbetike. Jaʼ yuʼun tsots skʼoplal ti mu xakuy abae. Mi ep krixchano ti bu chavetʼes mantale, xuʼ van skʼan to mas tsots chakʼopoj. Akʼo mi jech, skʼan meleluk li kʼusi chavale xchiʼuk lokʼuk ta avoʼonton.

¿Kʼusi xuʼ skoltautik sventa jchʼunojtikuk lek li kʼusi chkaltike? Ta skoj ti ta koʼontontik chlokʼ tal li kʼusi chkaltike, tsots skʼoplal ti lek jchapan jbatike. Mu baluk noʼox ti ta jtsʼibatik li kʼusi chal jlikuk vun xchiʼuk ti ta jkʼeltik o chkaptatik noʼoxe. Tsots skʼoplal ti xkaʼibetik smelolal li kʼusi chkalbetik skʼoplale xchiʼuk ti jnaʼtik yalbel smelolale. Skʼan jchʼunojtik lek ti melele xchiʼuk ti tstabeik sbalil li buchʼutik chchikintaike. Jaʼ yuʼun tsots me skʼoplal ti teuk ta ajol li buchʼutik chaʼibot kʼalal chachapan abae, teuk ta ajol xtok li buchʼutik snaʼojbeik xa skʼoplale o li kʼusi tsnopik ta sventa taje.

Mi lek xcholet li kʼusi chavale, mas me kʼun chakʼik venta ti achʼunoj lek li kʼusi chavale. Maʼuk noʼox me tsots skʼoplal ti chachapan li kʼusi chtun yuʼunike, skʼan me xavakʼ persa xchanilanel. Jaʼ akʼo ta avoʼonton ti bu skʼan mas xamuyubaj chakʼopoje, mi jech chapase, muʼyuk xa mas chakʼel kʼusi atsʼibaoj kʼalal chakʼopoje. Jech xtok, kʼanbo Jeova ti akʼo yakʼbot bendision ti avakʼojbe yipal xchapanel li apartee. Mi jech chapase, chata ‹stsatsal avoʼonton ta stojolal Jdiostik› sventa xvinaj ti achʼunoj lek ti melel li kʼusi chavale xchiʼuk ti toj ep sbalile (1 Tes. 2:2).