Lekuk ti kʼu yelan chatsutses aloʼile

LAJ xa asabe lek smelolal li apartee, lek xa xcholet atsʼibaoj xchiʼuk laj xa achapan ti kʼu yelan chalikes aloʼil yoʼ xatijbe yoʼontonik sventa xchikintaik li kʼusi chavale. Pe oy to kʼusi skʼan xapas, jaʼ ti pʼijuk ti kʼu yelan chatsutses aloʼile. Taje toj tsots skʼoplal, yuʼun mas chkom ta sjolik li kʼusi chaval ta stsutseb aloʼile. Xuʼ me xchʼaybe sbalil li kʼusi laj xa aval ta sjunul aparte mi muʼyuk lek ti kʼu yelan chatsutses aloʼile.

Akʼo avil venta li skʼelobil liʼe. Kʼalal jutuk xaʼox skʼan xcham li Josuee, laj yalbe mantal li moletik ta Israel ti muʼyuk bu xchʼay ta sjolike. Kʼalal laj xaʼox svulesbe ta sjolik ti kʼu yelan la xkʼuxubin talel jteklum li Jeova ti te lik talel ta skʼakʼalil Abraane, maʼuk noʼox laj yal li kʼusitik mas tsotsik skʼoplal sventa stsuts sloʼile. Yuʼun xi laj yal ta sjunul yoʼontone: «Ichʼic me ta mucʼ li Mucʼul Diose; scotoluc avoʼnton tunanic yuʼun». Kʼelo ta Josué 24:14 xchiʼuk 15 ti kʼu yelan la stsutses sloʼile.

Li jtakbol Pedro eke laj yetʼes jun mantal ti te chal ta Echos 2:14 kʼalal ta 36, jaʼo te tsobol epal krixchanoetik ta Jerusalen ta sventa li Skʼinal Pentekostes ta sjabilal 33 ta jkʼakʼaliltike. Kʼalal laj xaʼox yal ti yakal xa chkʼot ta pasel li albil kʼop ta slivroal Joel ta sventa ti chakʼ xchʼul espiritu li Diose, te lik yal ti te tsakal skʼoplal xtok li kʼusi albil ta sventa Mesias ta Salmos ti chichʼ onoʼox chaʼkuxesel xchiʼuk ti chichʼ toybel skʼoplal ta sbatsʼikʼob Diose. Jaʼ yuʼun, ti kʼu yelan la stsutses sloʼile xi jamal laj yal ti skʼan xakʼik ventae: «Jaʼ yuʼun akʼo snaʼ lek sjunlej sna Israel ti Diose laj yakʼ kʼotuk ta Kajvaltik xchiʼuk ta Kristo li Jesuse, jaʼ li buchʼu la amilik ta jtel teʼe». Xi la sjakʼik li buchʼutik te tsobolike: «Viniketik, kermanotak, ¿kʼusi skʼan jpaskutik?». Xi albatik yuʼun li Pedroe: «Suteso avoʼontonik xchiʼuk ichʼik voʼ ta jujuntal ta sbi Jesukristo» (Ech. 2:37, 38). Li vaʼ kʼakʼale te van oxmiluk la xchʼunik li kʼusitik melel ta sventa Jesukristo ta skoj ti kʼot ta yoʼontonik li kʼusi albatike.

Li kʼusitik skʼan teuk ta ajole. Skʼan me snitojbe sba skʼoplal xchiʼuk stemail aparte ti kʼu yelan chatsutses aloʼile. Jech xtok, skʼan ti koʼoluk skʼoplal xchiʼuk li kʼusitik mas tsotsik skʼoplal laj avale. Voʼot chanop atuk mi chaval yan velta sjunul li stituloal apartee o mi jaʼ noʼox chaval jpʼelantik kʼop ti jaʼ chalbe skʼoplale.

Li kʼusi onoʼox oy ta avoʼontone jaʼ ti xatijbe yoʼontonik sventa xakʼ ta xkuxlejalik li kʼusi laj xa avale. Li kʼusi mas tsots skʼoplal kʼalal tstsuts xa avuʼun li apartee, jaʼ ti xavakʼbe yilik li kʼusi xuʼ spasike. Kʼalal chatʼuj li stemail aparte xchiʼuk li kʼusitik mas tsotsik skʼoplale, ¿mi anopoj xa lek ti kʼu yuʼun tsots skʼoplal sventa li buchʼutik chaʼibote xchiʼuk mi anopoj xa lek kʼusi ti chakʼan akʼo spasike? Mi jeche, xanaʼ xa li kʼusi chakʼan akʼo spasike; vaʼun jaʼ xa noʼox albo smelolal li kʼusi skʼan spasike xchiʼuk xuʼ van xaval xtok ti kʼuxi ta pasele.

Mi laj xaʼox aval li kʼusi xuʼ spasike, skʼan me xatijbe yoʼontonik kʼalal tstsuts xa li apartee. Sventa jechuk xkʼot ta pasele, skʼan xaval ti kʼu yuʼun tsots skʼoplal skʼan spasike, jtos kʼusi xuʼ xapase jaʼ ti xaval kʼusi sbalil tstabeik mi jech la spasike. Mi lek nopbil ti kʼu yelan chatsutses aloʼile xchiʼuk mi lek laj avale, mas tstabeik sbalil sjunul li apartee.

Teuk me ta ajol ti skʼan xvinaj ta akʼopojel kʼalal poʼot xa stsuts li apartee. Tsako ta venta mi anil o mi kʼunkʼun skʼan xakʼopoj. Kʼalal mi tstsuts xa li apartee, mu toj aniluk xakʼopoj sventa mu toj aniluk xatuchʼ ta be li aloʼile, jech xtok mu toj kʼunuk xakʼopoj sventa xaʼiik to li kʼusi chavale. Oyuk noʼox lek spʼisol ti kʼu stsatsal chakʼopoje. Skʼan me xvinaj ta yechʼomal ave ti tstsuts xa li apartee, jech xtok skʼan xvinaj ti ta sjunul avoʼonton chavale xchiʼuk ti achʼunoj leke. Taje skʼan me xachanilan kʼalal chachapan abae.

¿Kʼu sjalil skʼan xjalij li stsutseb aloʼile? Muʼyuk akʼbil lek yorail. Mu xajalij, yuʼun xuʼ xchʼajubik-o li buchʼutik te chaʼiike. Sventa xanaʼ kʼu sjalil skʼan xapase, skʼan xatsak ta venta kʼuxi chtun yuʼunik li buchʼutik te chaʼibote. Toj lek onoʼox mi kʼun ta aʼiel, mi tspat oʼontonal xchiʼuk mi mu epuk kʼusi chaval ti kʼu yelan chatsutses aloʼile, pe lek onoʼox xtok mi chakʼan to chavalbe skʼoplal jlikeluk lokʼolkʼopetik ti lek anopoje. Kʼelo avil ti mas jlikel noʼox stsutseb sloʼil ta sliklej li slivroal Eclesiastese, te chal ta Eclesiastés 12:13 xchiʼuk 14, jaʼ mas jal kʼu yelan tsuts li Mantaletik ta Vits chal ta Mateo 7:24 kʼalal ta 27.

Kʼalal ta jcholtik mantale. Jaʼ noʼox ta cholmantal ti skʼan tajek xijtojob ti kʼu yelan ta jtsutses jloʼiltike. Lek me kʼusi chkʼot ta pasel avuʼun mi lek chachapan aba xchiʼuk mi oy ta avoʼonton li buchʼu chachiʼin ta loʼile, yuʼun li mantaletik laj xa kalbetik skʼoplale jtunel kuʼuntik akʼo mi jun noʼox li buchʼu ta jchiʼintik ta loʼile.

Xuʼ jlikel noʼox xachiʼin ta loʼil mi muʼyuk xokol li yajval nae, xuʼ van mu xajalij mas ta jun minuto. Xuʼ xi xavalbe mi xuʼ chavile: «Jech avaʼuk, pe yoʼ to muʼyuk chibate oy kʼusi chkalbot komel ti xuʼ spatbot avoʼontone: li ta Vivliae chal ti oy kʼusi lek tspas ta jelavel li Jpasvanej kuʼuntike, jaʼ ti xuʼ jkʼupin jkuxlejaltik sbatel osil ta Balumil ti kʼatajem xa ta nichimaltike. Xuʼ xijkuxiutik li ta nichimaltike, jaʼ noʼoxe skʼan jchʼuntik li kʼusi chalbutik Diose». O mi moʼoje, albo ti chbat akʼel ta yan kʼakʼal mi jaʼo xokole.

Xuʼ van lek kʼusi chkʼot ta pasel avuʼun manchuk onoʼox mi chtuchʼ ta be aloʼil o mi chopol chtakʼav li yajval nae. Teuk ta ajol li mantaletik chal ta Mateo 10:12 xchiʼuk 13 xchiʼuk Romanos 12:17 xchiʼuk 18. Mi lek noʼox chatakʼave, xuʼ sjel li kʼusi chopol toʼox tsnop ta stojolal stestigotak Jeova li yajval nae, toj lek mi jech kʼot ta pasele.

Jech xtok, xuʼ van la akʼupin tajek ti la achiʼin ta loʼil li yajval nae. ¿Kʼu yuʼun mu xavulesbe ta sjol li kʼusitik mas tsotsik skʼoplal la aloʼiltaike xchiʼuk ti xatijbe yoʼonton sventa xakʼ ta xkuxlejale?

Bat chaʼvulaʼano mi xuʼ chavile xchiʼuk albo ti lek kʼusi chavalbeik skʼoplal ta yan velta sventa te smalaote. Oyuk kʼusi xajakʼbe, xuʼ jaʼ xajakʼbe li sjakʼobiltak ta livro Razonamiento a partir de las Escrituras o jlikuk vun ti jaʼ sventa chijchanubtasvan-oe. Mu me xchʼay xavaʼi li kʼusi laj yakʼ jbaintik Jesus ti te chal ta Mateo 28:19 xchiʼuk 20.

¿Mi yakal xa tstsuts avuʼunik jvokʼuk chanubtasel ta Vivlia? Jaʼ chkoltaat avajchanun sventa xvul ta sjol li kʼusi la achanik mi chachaʼal li kʼusi la aloʼiltaike. Mi chatunes li sjakʼobiltak sventa svulesobil ta joltike, jaʼ chkoltaat sventa xkom ta sjol li kʼusitik mas tsotsik skʼoplale, mas to chkoltaat mi kʼunkʼun chachanike. Mi ta jakʼbetik kʼuxi tstabe sbalil li kʼusi la xchane o ti kʼuxi xuʼ xalbe yantike, mas to me chtijbat yoʼonton sventa xakʼ venta kʼutik yelan xuʼ xakʼ ta xkuxlejal (Prov. 4:7).

Mu me xchʼay xavaʼi ti kʼu yelan chatsutses aloʼile jaʼ chkoltavan sventa stabeik sbalil li kʼusi laj xa aval ta sjunul apartee.