VIVLIOTEKA TA INTERNET yuʼun Watchtower
VIVLIOTEKA TA INTERNET
yuʼun Watchtower
tsotsil
ʼ
  • ʼ
  • VIVLIA
  • VUNETIK
  • TSOBAJELETIK
  • wt kap. 8 paj. 70-78
  • Ta jpastik kʼop xchiʼuk li pukujetike

Muʼyuk svideoal.

Paso perton, mu stij li videoe.

  • Ta jpastik kʼop xchiʼuk li pukujetike
  • Kichʼtik ta mukʼ li jun noʼox melel Diose
  • Subtituloetik
  • Yan vunetik ti xkoʼolaje
  • Ajvaliletik ta sjunul balumil ti chanavik ta ikʼe
  • Li pʼijil loʼlaeletik chakʼ li pukuje
  • Chapalutik sventa tstsal kuʼuntik
  • Jkontraintik li Diabloe xchiʼuk li kʼusitik manya tspase
    ‹Te oyanik-o li ta kʼanelal yuʼun Diose›
  • Kʼelo me aba li ta spetsʼtak Satanase
    Li Jkʼel osil ta toyole Yakal chalbe skʼoplal li Ajvalilal yuʼun Jeovae 2015
  • Kojtikintik li kajkontratike
    Li Jkʼel osil ta toyole Yakal chalbe skʼoplal li Ajvalilal yuʼun Jeovae (sventa chichʼ chanel) 2018
Kichʼtik ta mukʼ li jun noʼox melel Diose
wt kap. 8 paj. 70-78

Kapitulo 8

Ta jpastik kʼop xchiʼuk li pukujetike

1. ¿Kʼu yuʼun toj tsots skʼoplal skʼan xkojtikintik kʼuyelan ch-abtej li pukujetike?

MANCHUK mi ep krixchanoetik chnaʼlevanik ta skoj ti mu xchʼunik ti oy pukujetike, ta melel maʼuk sventa chakʼ tseʼej. Yuʼun jech ta melel, manchuk mi chchʼunik o mi mu xchʼunik li krixchanoetike, li pukujetike oy ta melel xchiʼuk tskʼan ch-abtej yalojik ta stojolal skotol li krixchanoetike. Li buchʼutik ta xichʼik ta mukʼ li Jeovae muʼyuk bu kolemik li ta ilbajinel taje. Moʼoj, yuʼun jaʼ lek kʼelbilik. Li jtakbol Pabloe xi kak laj yalbutike: «Yuʼun maʼuc ta jpastic cʼop jchiʼuctic li bochʼo oy sbecʼtal, oy xchʼichʼalique. Jaʼ ta jtsal jba jchiʼuctic li pucujetic ti tsots tspasic mantale, ti tsots svuʼelique, ti ch-ilbajinvanic liʼ ta banamil ti oy ta icʼ osile, ti ta icʼ chanovique ti muʼyuc sbecʼtalique», xi (Efesios 6:12). Li ta jkʼakʼaliltike, solel toj tsots ch-abtejik tal li pukujetike, muʼyuk bu abtejemik-o jech, yuʼun li Satanase yichʼoj nutsel lokʼel tal li ta vinajele, ilinem ta jyalel, yuʼun snaʼoj ti mu xa jaluk ch-abteje (Apocalipsis 12:12).

2. ¿Kʼuxi van chkuch kuʼuntik li pas kʼop ta jpastik xchiʼuk li pukujetik ti toj echʼ xa noʼox tsots yipike?

2 ¿Mi chkuch van kuʼuntik li pas kʼop ta jpastik xchiʼuk li pukujetik ti toj echʼ xa noʼox tsots yipike? Tana, pe jaʼ noʼox mi jpatoj lek koʼontontik ta stojolal li Jeovae. Skʼan jchikintatik xchiʼuk jchʼunbetik li sKʼope, yuʼun jaʼ jech mu xi yilbajinutik ta jbekʼtaltik, ta jtalelaltik xchiʼuk ta koʼontontik li Satanase, jech kʼuchaʼal ta xilbajin li yan krixchanoetike (Santiago 4:7).

Ajvaliletik ta sjunul balumil ti chanavik ta ikʼe

3. Li Satanase, ¿buchʼutik toj tsots chakʼbe svokol, xchiʼuk kʼuxi ta xkʼot ta pasel yuʼun?

3 Li Jeovae lek jamal chalbutik ti kʼux-elan ta xil talel li kʼusitik chlaj kʼotanuk ta pasel ta sjunul Balumile, yuʼun li stuke lek skʼeloj tal te to ta vinajel. Li Jeovae laj yakʼbe yil jtakbol Juan «jcot tsajal chon, dragón sbi»; taje jaʼ skʼoplal li Satanase, yuʼun la kʼalal mi ayan ta vinajel li Ajvalilal yuʼun sMesías Dios ta 1914, li Satanase chapal xaʼox la sventa tslajesbe skʼoplal li Ajvalilal taje. Pe kʼalaluk muʼyuk xkʼot ta pasel yuʼune, li Satanase lik yakʼbe epal tsatsal vokolil li buchʼutik liʼ chalbeik skʼoplal ta Balumil li Ajvalilal taje (Apocalipsis 12:3, 4, 13, 17). ¿Kʼuxi tspas kʼop li Diabloe? Tstunes krixchanoetik sventa chkʼot ta pasel yuʼun.

4. ¿Bu chlik tal sjuʼelik li ajvaliletik ta balumile, xchiʼuk kʼuxi jnaʼojtik taje?

4 Vaʼun li Juane laj yil jkot mukʼta chon, vukpʼej sjol xchiʼuk lajuneb xulub, taje sventainoj li «cristianoetic ta jujuchop stsʼunubal, ta jujun lum, ta jujuchop cʼop, xchiʼuc ta jujun banamile». Li mukʼta chon taje jaʼ chalbe skʼoplal skotol li kʼusitik sventa politika ta balumile. Li Juane xi laj yichʼ albele: li «dragone [li Diablo Satanase] laj yacʼbe svuʼel jech chac cʼu chaʼal svuʼel stuc. Laj yacʼbe spas mantal jech chac cʼu chaʼal tspas mantal stuc. Tsots yabtel laj yacʼbe» (Apocalipsis 13:1, 2, 7). Jech ta melel: li sjuʼelik xchiʼuk li yabtel yichʼojik li ajvaliletik ta balumile likem tal ta stojolal Satanás. Jech onoʼox kʼuchaʼal laj yal li jtakbol Pabloe, li buchʼutik «tsots tspasic mantale» jaʼik li pukujetik «ti ta icʼ chanovique ti muʼyuc sbecʼtalique», ti ch-abtejik ta stojolal li ajvaliletik ta balumile. Li buchʼutik tskʼan ta xichʼik ta mukʼ li Jeovae skʼan xaʼibeik lek smelolal li kʼusitik smakoj taje (Lucas 4:5, 6).

5. ¿Kʼu yuʼun ta xichʼik tsobel li jpolitikoetik li avie?

5 Manchuk mi ep jpolitikoetik ta xalik ti oy srelijionike, mi junuk lum ta xakʼ sbaik ta ventainel li ta ajvalilal yuʼun Jeovae mi jaʼuk ta stojolal li Ajvalil stʼujoj ti jaʼ li Jesucristoe. Skotolik taje solel tsots yakʼojbeik yipal sventa oyuk-o li sjuʼelike. Jech kʼuchaʼal ta xakʼ ta ilel Apocalipsise, li «aʼyejetik ti likemik tal ta stojolal pukujetike» jaʼ yakal ta stsobik tal skotol li ajvaliletik ta spʼejel Balumil li avie sventa li «pas kʼop ta smukʼta kʼakʼalil yuʼun Dios ti skotol xuʼ Yuʼune», ti jaʼ li ta Armagedone (Apocalipsis [Revelación] 16:13, 14, 16, NM; 19:17-19).

6. ¿Kʼu yuʼun skʼan jchabi jbatik sventa mu xkichʼtik tijbel koʼontontik ta spasel li kʼusitik yuʼuntak Satanase?

6 Skotol kʼakʼal li krixchanoetike ta xil svokolik ta skoj li kʼopetik tslikes ajvaliletike, ta skoj ti jeltos kʼuyelan ta xchapan skʼopike, ti jeltos kʼuyelan ta saʼ stakʼinike xchiʼuk li kʼopetik chlik ta skoj relijione, skotol taje chakʼbe ep tajmek svokol li krixchanoetike. Li ta kʼopetik taje, xuʼ van ta xlik utbail, o yan-o kʼusi tspasik, kʼalal jech taje li krixchanoetike jaʼ chbat skoʼoltas sjolik xchiʼuk li slumalike, li snitilulalike, li buchʼutik koʼol yelan chkʼopojike o ti mi koʼol jkʼulejike o ti mi jmoj povreike, jech noxtok un li krixchanoetik ti muʼyuk te tikʼilik li ta kʼopetik taje yolbaj xa chbat skap sbaik. Pe, buchʼuuk noʼox o kʼusiuk noʼox ti tspakbeik skʼoplale, ¿buchʼu oyik ta stojolal ta melel? Li Vivliae xi lek jamal chalbutike: «Oyic ta scʼob pucuj scotol li yan cristianoetic liʼ ta banamile», xi (1 Juan 5:19). Vaʼun chaʼa, ¿kʼusi skʼan jpastik sventa mu koʼoluk xi jlaj ta loʼlael xchiʼuk li yan krixchanoetike? Jaʼ noʼox mi muʼyuk bu ta jalan jbatik ta spasel li abtelal ta sventa li Ajvalilal yuʼun Diose xchiʼuk ti mi mu jsetʼuk ta jtikʼ jbatik li ta kʼopetik tspasik ta sba balumile (Juan 17:15, 16).

Li pʼijil loʼlaeletik chakʼ li pukuje

7. ¿Kʼuxi chvinaj li spʼijil Satanás ta stunesel li jecheʼ relijione?

7 Ta sjunul tal li kuxlejale, li Satanase stunesoj li chopol kʼoptaele xchiʼuk li majele o yantik kʼusitik sventa chchibajesbe yoʼonton li krixchanoetik ta yichʼel ta mukʼ ta melel li Jeovae. Pe oy to yan kʼusitik tstunes ti mu xkiltik mi jaʼ spetsʼtake: toj manya li kʼusitik tspase xchiʼuk toj pʼij li loʼlaeletik chakʼe. Toj pʼij ti kʼux-elan ta spase, yuʼun ep krixchanoetik oyik ta ikʼ osil yuʼun ta stojolal li jecheʼ relijione; jaʼ jech yakʼojbe xchʼun li krixchanoetik ti yakal chtunik ta stojolal Diose. Ta skoj ti mu xojtikinik lek li Diose xchiʼuk ti muʼyuk skʼanojik li kʼusitik melele, li krixchanoetike xuʼ ta xlajik ta loʼlael yuʼun li relijionetik ti jaʼ tspasik kʼusitik mu xichʼ aʼibel smelolale, ti ch-avanike, ti ch-okʼike xchiʼuk ti yan kʼusitik tspasike o ta skoj ti toj labal chilik li skʼelobiltak juʼelal tspasike (2 Tesalonicenses 2:9, 10). Pe jech li voʼotik ek ne, ta xkichʼtik albel ti oy to la buchʼu ta «scomtsanic» li melel yichʼel ta mukʼ li Jeovae «yuʼun jaʼ lec chaʼyic xchʼunbel scʼop li jloʼlavanejetique xchiʼuc li chanubtasel liquem ta sventa pucuje» (1 Timoteo 4:1). ¿Kʼuxi jech chkʼot ta pasel taje?

8. ¿Kʼuxi xuʼ chi jpʼajutik yuʼun Satanás li ta jecheʼ relijion manchuk mi chkichʼtik ta mukʼ li Jeovae?

8 Li Diabloe toj pʼij ta saʼel ti bu ta anil noʼox chi jpʼaj chile. ¿Mi ta to jxiʼtatik li krixchanoetike? Mi jeche, yikʼaluk van chchibajesutik li kutsʼ kalaltik o li jlakʼnataktik kʼalal chalbutik ti akʼo jpastik kʼusitikuk ti lokʼemik tal ta jecheʼ relijione. ¿Mi jtoybautik? Vaʼun bi yikʼaluk van chopol chkaʼitik kʼalal oy buchʼu tstojobtasutike o kʼalaluk mu jechuk tsnop chkiltik kʼuchaʼal ta jnoptike (Proverbios 15:10; 29:25; 1 Timoteo 6:3, 4). Xuʼ van mu jaʼuk ta jchanbetik snopben li jchanubtasvanej kuʼuntike, li Cristoe, xuʼ van «jaʼ lec [chkaʼitik] li cʼusi tscʼan» koʼonton jtuktike, yikʼaluk jaʼ xa van ta jkʼantik albel liʼe: «Jaʼ noʼox skʼan xa chan li aVivliae xchiʼuk ti lekuk li akuxlejale», ti xi j-utee (2 Timoteo 4:3). Li Satanase mu sventauk mi chi jbat ta yan relijion o mi jaʼ noʼox ta jpasilantik-o li kʼusitik jchanojtik ta jrelijiontike, li kʼusi tskʼane chaʼa, jaʼ ti akʼo mu xkichʼtik ta mukʼ li Jeova ti kʼuyelan chalbutik ta sKʼope xchiʼuk li ta s-organisasione.

9. Sventa chkʼot ta pasel li kʼusi tskʼan yoʼonton li Satanase, ¿kʼuxi pʼij ta stunesel li lutsʼbail ta vayele?

9 Pʼij chloʼlavan li Satanase, yuʼun tstijbe yoʼonton xtok li krixchanoetik ta spasel li kʼusitik stalel onoʼox stakʼ pasele, pe jaʼ noʼox ti mu lekuk ti kʼuyelan tspasike, jech kʼuchaʼal li lutsʼbail ta vayele. Li krixchanoetik ta balumile nopem xaʼiik ti muʼyuk ta xchʼunik li kʼusi chal Vivlia ta sventa li lekil talelale, jech noxtok li krixchanoetik ti chchiʼin sbaik ta vayel ti muʼyuk bu nupunemike jaʼ la jtos ti kʼusi oy sderechoik ta spasele, o jaʼ la jech chakʼik ta ilel ti staoj xa svaʼlejalike. Pe ¿kʼusi xuʼ xkaltik ta stojolalik li buchʼutik nupunemike? Ep krixchanoetik ta xchiʼinik ta vayel yan ti maʼuk snup xchiʼilike. Manchuk mi muʼyuk buchʼu mulivajem li ta jun nupunele, ta xtuchʼ snupunelik ta registro civil o ta xchʼak sbaik sventa noʼox xchiʼinik ta naklej yan krixchano. Li pʼijil loʼlaeletik chakʼ Satanase, tstikʼbe ta yoʼonton krixchanoetik ta spasel li kʼusitik jlikel noʼox tskʼupinike, jech noxtok jaʼ chakʼ akʼo mu snopik lek ta sventa li kʼusitik xuʼ chkʼot ta pasel ta mas tsʼakal ta stojolalik o ta stojolal yantik ta skoj li kʼusitik tskʼupinanike. Pe mas to muʼyuk ta stsakik ta venta ti kʼuyelan oyik ta stojolal Jeova xchiʼuk ta stojolal li xNichʼone (1 Corintios 6:9, 10; Gálatas 6:7, 8).

10. ¿Kʼusitik tstunes Satanás sventa tsokes li jnopbentik ta sventa li mulivajele xchiʼuk li majbaile?

10 Yan ti kʼusi stalel onoʼox oy ta koʼontontik spasele, jaʼ li chʼayob oʼontonale. Li lekil chʼayob oʼontonale xuʼ ta stsatsubtas jbekʼtaltik, jnopbentik xchiʼuk koʼontontik. Veno, pe ¿kʼusi ta jpastik kʼalal pʼij tstunes Satanás li kʼusi ta jchʼay-o koʼontontik sventa tsnamajes li jnopbentik ta stojolal li snopben Diose? Jnaʼojtik ti Jeovae spʼajoj li mulivajele xchiʼuk li majbaile. Pe kʼalaluk ta xvinaj ta akʼob elov (teatro), ta pelikula, o ta televisione, ¿mi jun van koʼontontik te chotolutik sventa ta jkʼeltik-o skotol? Mu me xchʼay ta joltik ti kʼalal yantik xa xnopaj batel ti chichʼ jipel ochel ta xab li Satanase, yantik me tsok batel yuʼun li kʼusitik taje, jaʼ yuʼun ta xkichʼtik albel ti krixchanoetik lae toj «echʼem ta soquic o batel. Ta xloʼlavanic, pero jech loʼlabil stuquic ec» (2 Timoteo 3:13; Apocalipsis 20:1-3). Jech oxal chaʼa, skʼan me pʼijukutik skotol ora ta sventa li kʼusitik snopoj tspas li Diabloe (Génesis 6:13; Salmo 11:5; Romanos 1:24-32).

11. Manchuk mi jnaʼojtik li kʼusi melel ta sventa li espiritismoe, ¿kʼuxi xuʼ chi jpʼajutik ta petsʼetik ti mi muʼyuk kichʼoj jpʼijiltike?

11 Jech noxtok jnaʼojtik ti solel toj chopol ta xil Jeova li buchʼutik tskap sbaik ta espiritismoe, jech kʼuchaʼal tʼunol, akʼ chamel o ti tstaik ta kʼoponel animaetik yalojike (Deuteronomio 18:10-12). Kʼalal oy ta jol ta koʼontontik taje, ta melel muʼyuk me bu chbat jtatik ta kʼoponel junuk j-ikʼ chʼulelal mi jaʼuk chkakʼtik akʼo ochuk ta jnatik sventa tspasbeik yabteltak pukuj. Pe mi ta television o ta Internet chlokʼ tale, ¿mi ta van jchikintatik? Manchuk mi muʼyuk ta jchʼamtik li poxtael chakʼ li j-akʼ chameletike, ¿mi ta van jchukbetik no ta skʼob li kuni neneʼtik ti naka to ayane, yuʼun ta jnoptik ti jaʼ jech mu kʼusi chopol chkʼot ta stojolale? O ¿mi ta van xkakʼtik ta vayubtasel jnopbentik (hipnotizar) manchuk mi jnaʼojtik xa ti chal Vivlia ti mu stakʼ x-abtej ta jtojolaltik li j-akʼ chameletike? (Gálatas 5:19-21.)

12. 1) ¿Kʼuxi xuʼ tstij koʼontontik li son sventa lek xa chkaʼitik li kʼusi jnaʼojtik ti chopole? 2) ¿Kʼuxi chvinaj ta skʼuʼ spokʼ, ta stusel sjol o ta skʼopojel jun krixchano ti jaʼ chchanbe li buchʼutik muʼyuk lek ch-ilat yuʼun Jeovae? 3) ¿Kʼusi skʼan jpastik sventa mu xi jpʼaj ta spetsʼtak li Satanase?

12 Li Vivliae chal ti mu jaʼuk stakʼ xkalbetik skʼoplal li mulivajel xchiʼuk li kʼusitik ibalik sbae (ti chopol xa kʼusi chakʼ jnoptike) (Efesios 5:3-5). Pe, ¿ati mi oy sonetik ti lek xa chalbe skʼoplal yaʼeluk li kʼusitik taje, ti solel anil xa tstij koʼontontike o ti solel toj lek xa tajmek chkaʼitike? ¿Mi ta van xlik jtakʼtik batel kʼalal chal ti solel toj lek chalbe skʼoplal li slajesel drogae, li lutsʼbail ta vayel ti maʼuk snup xchiʼilike o ti lek chalbe skʼoplal yantik mulile? O manchuk mi jnaʼojtik ti mu stakʼ jchanbetik xkuxlejalik li buchʼutik tspasik li kʼusitik chopol taje, ¿mi nopem van xkaʼitik jech ta jlap jkʼuʼ jpokʼtik, jtus joltik kʼuchaʼal stukike o mi jech chi jkʼopoj kʼuchaʼal chkʼopojike? Li kʼusitik tstunes Satanás sventa tstikʼbe ta sjol ta yoʼonton krixchanoetik li kʼusitik toj chopol tsnope solel toj pʼij ti kʼuyelan ta spase (2 Corintios 4:3, 4). Mi mu jkʼan xi jpʼajutik li ta spetsʼtake, skʼan me jkʼel jbatik sventa mu sloʼlabutik jol koʼontontik li balumile. Skʼan me jvules ta joltik buchʼutik jaʼ ti «tsots tspasic mantal [...] ti oy ta icʼ osile» xchiʼuk kakʼbetik me yipal sventa tstsal kuʼuntik li yabtelike (1 Pedro 5:8).

Chapalutik sventa tstsal kuʼuntik

13. Buchʼuuk noʼox, manchuk mi jsaʼ mulilutik, ¿kʼusi skʼan jpastik sventa tstsal kuʼuntik li kʼusitik sventainojan Satanase?

13 Kʼalal mu toʼox chcham li Jesuse, xi laj yalbe li yajtakboltake: «Pato avoʼntonic ti tsalbil cuʼun li cʼusi sventa banamile», xi (Juan 16:33). Jech, li jtakboletike xuʼ ta stsal yuʼunik ek. Li jtakbol Juane xi la stsʼiba ti kʼalal echʼem xaʼox te van 60 jabile: «Li bochʼo ta xchʼun ti jaʼ Xnichʼon Dios li Jesuse, tstsal yuʼun li cʼusitic sventa banamile», xi (1 Juan 5:5). Mi ta jchʼunbetik smantal li Jesuse jaʼ me jech ta xkakʼtik ta ilel xchʼunel koʼontontik xchiʼuk ti ta jpat koʼontontik li ta sKʼop Diose, jech kʼuchaʼal la spas li Jesuse. ¿Kʼusi mas skʼan pasel? Skʼan mu xi jnamajutik li ta tsobobbaile ti jaʼ Jolil kʼotem te li Cristoe. Mi la jpas jmultike, skʼan me jsutes koʼontontik ta melel xchiʼuk jkʼanbetik perton Jeova ta sventa li ta matanal pojelal ti laj yakʼ Jesuse. Jaʼ jech un chaʼa, manchuk mi jsaʼ mulilutik, xuʼ stsal kuʼuntik li kʼusitik chopole (Salmo 130:3, 4).

14. Kʼelo Efesios 6:13-17, vaʼun tuneso li sjakʼobiltake xchiʼuk li tekstoetik te ta yolon parafoe, taje jaʼ sventa chkakʼtik venta kʼuxi chi skoltautik li jujutos abtejebal ta mantal taje.

14 Jaʼ noʼox me lek chbat kuʼuntik mi ta jchʼuntik li mantal ti xi ta xale: «Ichʼic me scotol li amaquic, li avabtejebic yacʼoj Diose», taje skʼan me jtunestik skotol. Jamo li aVivlia ta Efesios 6:13-17, kʼelavil ti kʼuyelan ta xichʼ albel skʼoplal li abtejebal taje. Sventa chkakʼtik venta kʼuxi chi xchabiutik li jujutos abtejebale, skʼan jtunestik li sjakʼobiltak te ta olone.

«Chuquino me lec li achuquique, jaʼ li cʼusi melele»

Manchuk mi xkojtikintik li kʼusi melele, ¿kʼuxi chi xchabiutik ti nopajtik noʼox ta jchantik li kʼusi melel chchanubtasvan li Vivliae, ti jnoptik lek li kʼusi chale xchiʼuk ti chi jbat li ta tsobajeletike? (1 Corintios 10:12, 13; 2 Corintios 13:5; Filipenses 4:8, 9.)

«Aqʼuic me smac li sna avoʼntonique, jaʼ li cʼusitic tuqʼue»

¿Buchʼu chal kaʼitik li kʼusitik tukʼe? (Apocalipsis 15:3.)

Alo kaʼitik jayibuk skʼelobil kʼuxi xuʼ tsok skʼoplalik ta stojolal Dios li buchʼutik muʼyuk chanavik ta stukʼil mantaltake (Deuteronomio 7:3, 4; 1 Samuel 15:22, 23).

«Lapo me lec li axonobique, jaʼ ti chapalucoxuc xchiʼuc li Lequil Aʼyej ti tspas ta jun coʼntontic yuʼune»

Li koktike, ¿kʼuxi chi xchabiutik kʼalal nopajtik noʼox chi yikʼutik batel ta yalbel krixchanoetik li kʼusi yakʼoj Dios sventa oyuk lekilale? (Salmo 73:2, 3; Romanos 10:15; 1 Timoteo 5:13.)

«Tsaquic me lec li amaquique, jaʼ li xchʼunojel avoʼntonique»

Mi lek tsots li xchʼunel koʼontontike, ¿kʼusi van ta jpastik kʼalal mi oy kʼusi chakʼ chibajuk koʼontontik o kʼalal chkichʼtik sibtasele? (2 Reyes 6:15-17; 2 Timoteo 1:12.)

«Aqʼuic me li smac ajolique, jaʼ ti achʼunoj ti chacolique»

Li spatobil koʼontontik sventa kolebale, ¿kʼuxi chi skoltautik sventa mu jaʼuk xbat ta koʼontontik saʼel li kʼusitike? (1 Timoteo 6:7-10, 19.)

«Tsaquic me li avespadaic chayacʼboxuc Chʼul Espiritue»

Kʼalal oy bu chkil jvokoltik ti xuʼ chchibajesutik ta mantale o xuʼ van oy krixchanoetik ti chi yilbajinutike, ¿bu skʼan jpat-o koʼontontik? (Salmo 119:98; Proverbios 3:5, 6; Mateo 4:3, 4.)

Sventa chkuch kuʼuntik li pas kʼop taje, ¿kʼusi toj tsots skʼoplal skʼan jpastik xtok? ¿Jayib velta skʼan jpastik taje? ¿Buchʼutik ta sventa ta jpastik? (Efesios 6:18, 19.)

15. ¿Kʼuxi xuʼ jpak jkʼoplaltik li ta pas kʼop ta sventa mantale?

15 Kʼuchaʼal yajsoltaroutik Cristoe, li voʼotike te jchiʼuktik epal soltaroetik ti ta jpastik kʼope, jaʼ noʼox ti jaʼ jun pas kʼop ta sventa mantale. Mi pʼij chkakʼ jbatike xchiʼuk mi lek ta jtunestik li abtejebal ti likem tal ta stojolal Diose, maʼuk noʼox me chkuch kuʼuntik li pas kʼope, moʼoj, yuʼun me ta jkoltatik ta spatbel yoʼonton li yantik yajtuneltak Jeovae. Mas to me chapalutik ta spakel jkʼoplaltik kʼalal ta jpuktik batel li lekil aʼyejetik ta sventa li Ajvalilal yuʼun sMesías Diose, li ajvalilal te ta vinajel ti solel kontrainbil ta jyalel yuʼun li Satanase.

Svulesobil ta joltik

• ¿Kʼu yuʼun mi jsetʼuk tstikʼ sbaik li ta kʼopetik yuʼun balumil li buchʼutik ta xichʼik ta mukʼ li Jeovae?

• ¿Kʼusitik jlom pʼijil loʼlaeletik tstunes Satanás sventa tsokes ta mantal li yajtsʼaklomtak Cristoe?

• ¿Kʼuxi chi skoltautik ta pas kʼop ta mantal li jmaktik, li kabtejebtik ti likem tal ta stojolal Diose?

[Lokʼol ta pajina 76]

Li lumetike yakal ta xichʼik tsobel sventa li mukʼta pas kʼop ta Armagedone

    Vunetik ta tsotsil (2001-2025)
    Lokʼan
    Ochan
    • tsotsil
    • Tako batel
    • Ti kʼu yelan chak'ane
    • Copyright © 2025 Watch Tower Bible and Tract Society of Pennsylvania
    • Ti kʼutik yelan xuʼ xichʼ tunesele
    • Política de privacidad
    • Configuración de privacidad
    • JW.ORG
    • Ochan
    Tako batel