Kapitulo 7
Li kʼusi xuʼ jchantik ti yakʼoj to akʼo oyuk choplejal li Diose
1, 2. 1) ¿Kʼusi van kʼot ta pasel ta jtojolaltik ti lajuk onoʼox yichʼik lajesel yuʼun Jeova li Adán xchiʼuk Eva kʼalal la stoy sbaik te ta Edene? 2) ¿Kʼusi laj yakʼbutik ta slekil yoʼonton li Jeovae?
«TI CʼU xa yepal jabil jchʼiele, oy onoʼox ep jvocol», xi laj yal li moltotil Jacobe (Génesis 47:9). Jech laj yal li Job eke li krixchanoe «comcom noʼox yorail, xchiʼuc ta vocol noʼox chcuxi», xi (Job 14:1). Jech kʼuchaʼal li viniketik taje, li voʼotik eke kiloj jvokoltik, ilbajinel xchiʼuk kʼusitik chopol chkʼot ta pasel ta jtojolaltik. Pe ti jech li j-ayanutike, mu xuʼ xkaltik ti muʼyuk tukʼ ti jech laj yakʼ jkuxlejaltik li Diose. Jech ta melel, li jnopbentike xchiʼuk li jbekʼtaltike muʼyuk tukʼ, jech noxtok muʼyuk bu nakalutik ta jun nichimal balumil kʼuchaʼal akʼbatik toʼox li Adán xchiʼuk Evae. Pe, ¿kʼusi van kʼot ta pasel ti lajuk yichʼik lajesel yuʼun Jeova ti kʼalal la stoy sbaike? Chʼabal chamel ti jechuke mi jaʼuk kʼux-ip mi jaʼuk li lajelale, pe jech noxtok un chʼabalutik ti jechuke. Muʼyuk li j-ayanutik ti jechuke. Ta xkʼuxul yoʼonton li Jeovae, laj yakʼ ti akʼo xil yalab xnichʼnabik li Adán xchiʼuk Evae, manchuk mi yichʼojik tal li mulile. Ta stojolal Cristo, li Jeovae laj yakʼ ti akʼo jtatik li kʼusi la xchʼay li Adane: kuxlejal sbatel osil ta jun paraiso Balumil (Juan 10:10; Romanos 5:12).
2 Chakʼ jmuyubajeltik ti oy spatobil koʼontontik ta sventa kuxlejal ta sbatel osil ta jun achʼ balumile, ta jun nichimaltik ti bu chʼabal xa chamele, vul oʼonton, kʼusitik kʼux chkʼot ta jtojolaltik, lajelal xchiʼuk noxtok ti bu chʼabal xa chopol krixchanoetike (Proverbios 2:21, 22; Apocalipsis 21:4, 5). Li Vivliae ta xchanubtasutik ti toj tsots skʼoplal chkaʼitik li jkolebaltike, jech tsots skʼoplal ta xil ek li Jeovae, manchuk mi jech, oy to kʼusi mas toj tsots skʼoplal.
Ta skoj li smukʼta bie
3. ¿Kʼusi tsakal skʼoplal xchiʼuk ti chkʼot ta pasel li kʼusi tskʼan yoʼonton Jeova ta sventa li Balumile xchiʼuk li krixchanoetike?
3 Li sbi Diose tsakal skʼoplal xchiʼuk ti chkʼot ta pasel li kʼusi tskʼan yoʼonton ta sventa li Balumile xchiʼuk li krixchanoetike. Li biil Jeovae, jaʼ smelolal «Jaʼ Tspas akʼo Kʼotuk ta Pasel», taje chalbe skʼoplal kʼuchaʼal Ajvalil ta vinajel-balumil ti chkʼot onoʼox ta pasel yuʼun li kʼusi yaloj ta melele xchiʼuk ti jaʼ Dios ti chal kʼusitik melelike. Ta skoj ti jaʼ Mukʼta ajvalile, skʼan xichʼ chʼunbel smantal, jech noxtok skʼan xichʼ ichʼbel ta mukʼ li sbie xchiʼuk li kʼusitik tsakal skʼoplal li ta biil taje, sventa oyuk lekilal ta vinajel-balumil.
4. ¿Kʼusi to smakojbe skʼoplal ta sventa li kʼusi tskʼan tspas Dios ta sventa li Balumile?
4 Ti kʼalal laj yichʼik pasel li Adán xchiʼuk Evae, akʼbatik yuʼun Jeova jun abtelal. Li Jeovae mu jaʼuk noʼox ta skʼan ti tsventainik li balumile xchiʼuk ti tskʼatajesik ta Paraisoe, moʼoj, yuʼun tskʼan ti akʼo la snojesik batel ta yalab xnichʼnabik li balumile (Génesis 1:28). Pe taje, ¿mi te van kechel chkom ta skoj ti la saʼ smulike? Ti muʼyukuk chkʼot ta pasel yuʼun Jeova li kʼusi tskʼan yoʼonton ta sventa li balumile xchiʼuk ta sventa li krixchanoetike, ta kʼexlal chkom jechuk li sbie, yuʼun li stuke skotol xuʼ yuʼun.
5. 1) ¿Kʼusi ora chchamik li baʼyel jtot jmeʼtik ti mi la slobeik sat li teʼ ti jaʼ yojtikinobil li kʼusi lek xchiʼuk li kʼusi chopole? 2) ¿Kʼuxi kʼot ta pasel yuʼun Jeova li kʼusi laj yal ta Génesis 2:17 (NM) ti muʼyuk onoʼox kechel kom ta be li kʼusi tskʼan yoʼonton ta sventa li Balumile?
5 Li Adán xchiʼuk Evae ichamik onoʼox «ti kʼusi kʼakʼalil» la sloʼik li sat teʼ ti albilik yuʼun Jeova ti mu stakʼ sloʼike, li teʼ taje jaʼ yojtikinobil li kʼusi lek xchiʼuk li kʼusi chopole (Génesis 2:17, NM). Kʼot ta pasel li kʼusi laj yal Diose, yuʼun ti kʼusi kʼakʼalil la spas smulike, laj yichʼik chapanel yuʼun Dios, albatik ti chchamike, jech oxal chaʼa ta sat li Jeovae, li Adán xchiʼuk Evae chamik ti kʼalal la saʼ smulike. Pe sventa chkʼot ta pasel yuʼun li kʼusi tskʼan yoʼonton Dios ta sventa li Balumile, laj yakʼ akʼo xil yalab xnichʼnabik ti kʼalal mu toʼox chchamike. Li Jeovae jun kʼakʼal ta xil li jmil jabile, jech oxal kʼalal icham li Adán ti yichʼoj 930 jabile, ta stojolal li Jeovae icham noʼox ti kʼusi kʼakʼalil la saʼ smule (2 Pedro 3:8; Génesis 5:3-5). Jaʼ jech ikʼot ta pasel ti kʼusi ora onoʼox laj yal Jeova ti chchamike, pe akʼo mi ichamik, muʼyuk bu te kechel kom li kʼusi tskʼan yoʼonton Dios ta sventa li Balumile. Sventa jech chkʼot ta pasele, li Diose ta xakʼ kʼuk sjalil ti akʼo xkuxiik jmulavil krixchanoetike, jech noxtok ta xakʼ akʼo xkuxiik krixchanoetik ti toj chopolik kʼusi tspasike.
6, 7. 1) Kʼuchaʼal chal Éxodo 9:15, 16, ¿kʼu yuʼun ta stsʼik Jeova kʼuk sjalil li chopol krixchanoetike? 2) Li Jeovae, ¿kʼuxi laj yakʼ ta ilel sjuʼel ta stojolal li Faraone, xchiʼuk kʼuxi laj yakʼ ta ojtikinel li Sbie? 3) ¿Kʼusi chkʼot ta pasel kʼalal mi laj yichʼ lajesel li kʼusitik chopol ta jkʼakʼaliltike?
6 Li kʼusi albat yuʼun Jeova li ajvalil ta Egipto ta skʼakʼalil Moisese, lek jamal chal kaʼitik kʼu yuʼun stsʼikoj to li chopol krixchanoetik li Diose. Kʼalal muʼyuk xakʼ lokʼuk ta Egipto j-israeletik li Faraone, li Jeovae muʼyuk laj yakʼbe slajeb ta ora noʼox, baʼyel la stak tal lajuneb vokolil, jaʼ jech te laj yakʼ ta ilel sjuʼel ti toj labal sbae. Ta svukubal li vokolile, li Jeovae laj yalbe Faraón ti xuʼ la laj yules ta ora noʼox jechuk xchiʼuk li slumale. «Pero liʼ to cuxulot cuʼun —xi laj yakʼbe snaʼ—, yuʼun jech chcacʼbot avil cʼu xʼelan li jvuʼele, yuʼun jech acʼo vinajuc batel jbi ta scotol banamil», xi (Éxodo 9:15, 16).
7 Kʼalal la skolta lokʼel ta Egipto j-israeletik li Jeovae, ta melel li sbie laj yichʼ pukel batel (Josué 2:1, 9-11). Tanae echʼ xa tal epal jabiletik, mas xa ta oxmil xchiʼuk oʼlol, pe nabil to ti kʼusi la spas li Jeovae. Maʼuk noʼox laj yichʼ albel skʼoplal li biil Jeovae, yuʼun laj yichʼ ojtikinel noxtok li melel ta stojolal li Buchʼu yichʼoj li biil taje. Ojtikinbil kʼuchaʼal jun Dios ti chkʼot ta pasel yuʼun li kʼusi chale xchiʼuk ti tskolta li yajtuneltake, taje vinaj me lek ti jech ta melele (Josué 23:14). Te vinaj ti mu kʼusi xuʼ chmakbat-o ta be li kʼusi tskʼan tspase, yuʼun muʼyuk spajeb li sjuʼele (Isaías 14:24, 27). Xuʼ jpat koʼontontik un chaʼa ti Jeovae poʼot xa ta skolta li tukʼil yajtuneltake, yuʼun chakʼbe slajeb skotol li kʼusitik chopol yuʼun Satanase. Ti jech ta xakʼ ta ilel li sjuʼel ti skotol xuʼ yuʼune xchiʼuk li slekilal chakʼbe li sbie, mu jutuk ta xichʼ chʼayel ta jolil, jech noxtok, li sbaliltak taje ta me xjalij ta sbatel osil (Ezequiel 38:23; Apocalipsis 19:1, 2).
¡Batsʼi muʼyuk spajebal spʼijil li Diose!
8. ¿Kʼusi chakʼ jnoptik li Pabloe?
8 Ta skarta Pablo ti la stakbe batel jromaetike, xi la sjakʼe: «¿Me chcaltic ti muʼyuc tucʼ cʼusi tspas li Diose?». Vaʼun jech lek tsots la stakʼ stuk: «¡Mu jechuc!», xi. Te une, och yalbe skʼoplal li xkʼuxul yoʼonton Diose xchiʼuk la sta ta alel ti laj yal Jeova ti chakʼ to kuxiuk kʼuk sjalil li Faraone. Jech noxtok laj yakʼ ta ilel ti xi jkoʼolaj kʼuchaʼal achʼel ta skʼob jun jpat pʼine. Vaʼun xi laj yale: «Jaʼ noʼox jech ec li Diose tscʼan ox chacʼ ta ilel ta ora ti chacʼbe stojol li mulile; tscʼan ox chacʼ ta naʼel cʼu xʼelan li svuʼele. Pero te to la stsʼicbe smulic li bochʼotic chapal scʼoplal chichʼic ilintaele, ti chapal scʼoplalic sventa tojob mulile, yuʼun jech chacʼ to ta ilel ti toj ep slequil yutsil yoʼnton ta stojol li bochʼotic chapal scʼoplal chcʼuxubinatic, ti chapal onoʼox scʼoplalic yuʼun Dios chilic lequilale. Jaʼ jcʼoplaltic ec vuʼutic ti icʼbilutic xae. Maʼuc noʼox li israeletique, jaʼ scʼoplalic noxtoc li yanlum cristianoetique» (Romanos 9:14-24).
9. 1) ¿Buchʼutik ti «chapal scʼoplal chichʼic ilintaele, ti chapal scʼoplalic sventa tojob mulile»? 2) ¿Kʼu yuʼun yakʼoj ta ilel smukʼul yoʼonton Jeova ta stojolal li yajkontratake, xchiʼuk kʼusi sbalil ta stabeik li buchʼutik skʼanojik li Jeovae?
9 Ti jayvoʼ skontrainojik talel Jeova xchiʼuk li smantaltak ti lik toʼox tal ta Edén kʼalal la stoy sbaike, taje jaʼik «li bochʼotic chapal scʼoplal chichʼic ilintaele, ti chapal scʼoplalic sventa tojob mulile». Ti kʼu sjalil tal taje, li Jeovae yakʼoj ta ilel ti oy smukʼul yoʼontone, jech noxtok tsʼikem tal yuʼun chopol krixchanoetik ti chakʼik ta kʼexlal li smantaltake, ti ilbajinbil li yajtuneltake xchiʼuk ti milbat li xNichʼone. Yakʼoj ta ilel ti snaʼ spajesel sbae, yakʼoj to akʼo x-echʼ kʼuk sjaliluk sventa chakʼik lek venta li kʼusitik kuxajtik spasoj Diose, ti toj chopol kʼusi kʼotem ta pasel ta skoj li toybail ta stojolal Dios xchiʼuk ti tsventain sba stuk li krixchanoetik ti xchʼakoj sbaik ta stojolale. Jech noxtok, li slajel Jesuse yakʼojbe skolebal li jchʼun mantal krixchanoe xchiʼuk «ta slilinbe yabtel ti pucuje» (1 Juan 3:8, Ch; Hebreos 2:14, 15).
10. ¿Kʼu yuʼun stsʼikoj to talel Jeova li chopol krixchanoetik ti echʼ xa tal 1,900 jabile?
10 Ti echʼ xa tal mas ta 1,900 jabil ti laj yichʼ chaʼkuxesel li Jesuse, li Jeovae stsʼikoj to talel «li bochʼotic chapal scʼoplal chichʼic ilintaele», spajesoj to sba ta yakʼbel slajeb. ¿Kʼu yuʼun? Ta baʼyele jaʼ sventa chchapan li buchʼutik ch-ajvalilajik xchiʼuk li Cristo li ta Ajvalilaj ta vinajele. Ti kʼuyepalik taje jaʼ 144,000, ti jaʼik li «bochʼotic chapal scʼoplal chcʼuxubinatic» ti jech laj yal li jtakbol Pabloe. Ta slikebale, laj yichʼik takel ta ikʼel judioetik sventa li ajvalilal taje, ta tsʼakale laj yichʼik ikʼel tal jyanlum krixchanoetik. Li Jeovae muʼyuk bu sujoj mi junuk sventa chtal tunikuk ta stojolal, pe li buchʼutik xchʼamojik ta slekil yoʼontonik li kʼusitik alakʼ sba yakʼoj Jeovae akʼbilik mukʼta matanal sventa ch-ajvalilajik xchiʼuk li xNichʼon Dios te ta vinajele. Li avi kʼakʼale, li xchapanelik li buchʼutik chbatik ta vinajele poʼot xa stsʼaki (Lucas 22:29; Apocalipsis 14:1-4).
11. 1) ¿Buchʼutik yakal tstabeik sbalil ti oy smukʼul yoʼonton li Jeovae? 2) ¿Kʼuxi ta stabeik sbalil li buchʼutik chamemike?
11 Veno, ¿pe mi chkuxi van krixchanoetik ta Balumil? Jech noxtok koliyal ti yakʼoj ta ilel ti oy smukʼul yoʼonton li Jeovae, yichʼoj tsobel tal ta skotol lumetik «epal cristianoetic» ti ta smiyonal xa noʼoxe. Li Jeovae yaloj ta melel ta sventa li krixchanoetik taje, kuxul chkomik ta balumil ti kʼalal mi laj yichʼ akʼbel slajeb li kʼusitik chopol liʼe xchiʼuk ti xuʼ chkuxiik ta sbatel osil ta jun paraiso balumile (Apocalipsis 7:9, 10; Salmo 37:29; Juan 10:16). Mi kʼot yorail yuʼun li Diose, epal krixchanoetik ta xchaʼkuxiik tal xchiʼuk ta xichʼik albel mi tskʼanik ventainel yuʼun li Ajvalilal ta vinajele. Li sKʼop Diose xi onoʼox yaloj ta Hechos 24:15: «Jchʼunojcutic ti ta xchaʼcuxiic li bochʼotic lequique xchiʼuc li bochʼotic chopolique», xi (Juan 5:28, 29).
12. 1) ¿Kʼusi jchanojtik ta sventa Jeova ta skoj ti stsʼikoj to tal li choplejale? 2) ¿Kʼusi cha nop ta sventa Jeova ti kʼu yelan chchapan tal li kʼusi laj yichʼ chibal kʼoptaele?
12 ¿Mi oy kʼusi muʼyuk tukʼ yichʼoj pasel tal taje? Ta melel moʼoj, yuʼun ti jech stsʼikoj to Jeova li chopol krixchanoetike —«li bochʼotic chapal scʼoplal chichʼic ilintaele»—, yakʼoj ta ilel slekil yoʼonton ta stojolal li yantik krixchanoetike, yakʼoj ta ilel bu to kʼalal chkʼot li slekil xkʼuxul yoʼontone xchiʼuk ti chkʼanvane, taje jmoj onoʼox batel skʼoplal xchiʼuk li kʼusi tskʼan yoʼonton tspase. Jech noxtok, koliyal ti jech echʼem xa tal li kʼakʼale kilojtik xa talel kʼuxi chkʼot ta pasel li kʼusi tskʼan yoʼontone xchiʼuk ti jchanojtik xa mas ta sventa li Jeovae. Toj labal sba chkiltik li stalelaltak ti kʼuyelan vinajem talele, jech kʼuchaʼal tukʼilal, xkʼuxul yoʼonton, ti oy tajmek smukʼul yoʼontone xchiʼuk ti toj echʼem spʼijile. Li Jeovae toj pʼij ti kʼuyelan xchapanoj tal ti chibal kʼoptabat li ajvalilal yuʼun ta vinajel-balumile —li sderecho ta ajvalilale—, ti kʼuyelan ta xchapan batele ta me xichʼ naʼel ta sbatel osil ti jaʼ mas lek ti kʼuyelan ch-ajvalilaje. Jech kʼuchaʼal tsots laj yal li jtakbol Pabloe: «Batsʼi muʼyuc spajebal scʼulejal, sbijil, xchiʼuc snopubil yuʼun li Diose. Mu stacʼ naʼel cʼusi oy ta yoʼnton li Diose; mu xlaj ta nopel cʼusi snopoj tspas», xi (Romanos 11:33).
Jaʼ yorail ti xuʼ chkakʼtik ta ilel ti chkichʼtik ta mukʼ li Diose
13. ¿Kʼusi xuʼ chkakʼtik ta ilel kʼalal chkil jvokoltike, xchiʼuk kʼusi xuʼ chi skoltautik sventa lekuk pʼij chkakʼtik ta ilel jtalelaltik?
13 Ep yajtuneltak li Diose ep vokol chkʼot ta stojolalik, yuʼun li Jeovae muʼyuk to yakʼojbe slajeb li chopol krixchanoetike xchiʼuk muʼyuk to lokʼesbil li mulil ta stojolal li krixchanoetike. ¿Mi jaʼ van chchibaj-o koʼontontik, o mi chkakʼtik van venta ti akʼbilutik to yorail sventa chkakʼtik ta ilel ti jaʼ jun jutkʼop li Diabloe? Ta me sta stsatsal koʼontontik ti mi muʼyuk ta jchʼay ta joltik li mantal liʼe: «Jnichʼon, bijan me, jech xcuxet noʼox coʼnton avuʼun; jech xuʼ ta jtacʼbe li bochʼo chopol chiyalbun jcʼoplale» (Proverbios 27:11). Li Satanase, ti jaʼ chchopol kʼopta li Jeovae, laj yal ti krixchanoetik lae ta la xakʼbeik smulin Dios xchiʼuk ta la xchopol kʼoptaik kʼalal chchʼay li kʼusitik oy yuʼunike o ti mi chil svokolike (Job 1:9-11; 2:4, 5). Jech un chaʼa, xmuyubaj me yoʼonton Jeova kʼalal tukʼ koʼontontik tstsal kuʼuntik li vokoliletike, vaʼun jaʼ jech chkakʼtik ta ilel ti jaʼ jun jutkʼop li Satanase.
14. ¿Kʼusitik sbalil ta jtatik mi jpatoj koʼontontik ta stojolal Jeova kʼalal chkiltik prevaetike?
14 Mi jpatoj koʼontontik ta stojolal Jeova kʼalal chkil jvokoltike, ta me xi skoltautik sventa chlekub jtalelaltik ti toj ep sbalile. Li Jesuse laj yil svokol, «jech laj yaʼay cʼu x-elan ta chʼunel li cʼusi tscʼan Diose», ti mu toʼox snaʼ mi jeche. Li voʼotik eke oy kʼusi xuʼ ta jchantik kʼalal chkiltik prevaetike, ta jchantik ti oyuk smukʼul koʼontontike, ti xkuchuk kuʼuntike xchiʼuk mas ta sjunul koʼontontik ta jkʼantik li smantaltak Diose (Hebreos 5:8, 9; 12:11; Santiago 1:2-4).
15. ¿Kʼuxi ta stabeik sbalil yan krixchanoetik kʼalal oy smukʼul koʼontontik chkuch batel kuʼuntik li vokolile?
15 Ta me xakʼik venta yan krixchanoetik ti chkil jvokoltike. Ta mas tsʼakale, xuʼ van ta xakʼik venta buchʼutik ta melel li yajtsʼaklomtak Cristo li avie, kʼalal ta xilik kʼuyelan chkuch batel kuʼuntik li vokolil ta skoj ti jaʼ jkʼanojtik spasel li kʼusitik tukʼe. Kʼalal chtalik ta yichʼel ta mukʼ li Jeova eke, ta me stambeik batel sbelel ti bu ta staik li bendisionetik sventa kuxlejal ta sbatel osile (Mateo 25:34-36, 40, 46). Li Jeova xchiʼuk li Jesuse oy ta yoʼontonik ti akʼo staik bendision skotol li krixchanoetike.
16. Ti kʼuyelan chkiltik jvokoltike, ¿kʼuxi tsakal skʼoplal ti junukutik xchiʼuk li Diose, li Jesuse xchiʼuk li kermanotaktike?
16 Kʼalal chkil tsots jvokoltike xuʼ mu chopoluk chkiltik, yuʼun xuʼ te chkakʼtik ta ilel ti kichʼojtik ta mukʼ li Jeovae xchiʼuk ti ta jpastik batel li kʼusi tskʼan yoʼontone. Jaʼ me jech chkakʼtik ta ilel ti yakal chkakʼbetik yipal sventa junukutik xchiʼuk li Diose xchiʼuk li Cristoe. Li Jesuse xi laj yalbe Jeova ta orasion ta sventa li melel yajtsʼaklomtake: «Mu jaʼuc noʼox ta jcʼanbot vocol ta stojolic liʼi [li yajtsʼaklomtak te noʼox oyike]. Ta jcʼanbot vocol ta stojolic noxtoc li bochʼotic chlic yichʼicun ta mucʼ ta sventaique. Yuʼun jech jun noʼox acʼo cʼoticuc ta scotolic, jech chac cʼu chaʼal jun noʼox oyutic li vuʼutique. Jech noxtoc jun noʼox acʼo cʼoticuc ta jtojoltic», xi (Juan 17:20, 21).
17. ¿Kʼusi jpatoj koʼontontik ta jtatik ti mi tukʼ koʼontontik ta stojolal li Jeovae?
17 Mi tukʼ koʼontontik ta stojolal Jeovae, ta slekil me yoʼonton ta stoj li jvokoltike. Li sKʼope xi chalbutik ta melele: «Staojuc o me yav li avoʼntonique; mu me xajelilanic. Scotoluc ora abtejanic o yuʼun li Cajvaltique; naʼic me ti mu alticuc chaʼabtejic yuʼun li Cajvaltique», xi (1 Corintios 15:58). Xchiʼuk xi ta xal noxtoke: «Yuʼun li Diose tucʼ cʼusi tspas. Mu xchʼay ta yoʼnton ti lec avabtelique, ti chacʼuxubin[beik]» li sbie (Hebreos 6:10). Jech noxtok li Santiago 5:11 xi ta xale: «Qʼuelo avilic, toj lec scʼoplal ta xcalbetic li bochʼo lec icuch yuʼunic vocole. Li voʼoxuque avaʼyojic cʼu xʼelan icuch yuʼun vocol li Jobe, xchiʼuc xanaʼic noxtoc ti cʼu xʼelan laj yichʼ cʼuxubinel ta tsʼacal yuʼun Cajvaltique. Yuʼun li Cajvaltique oy slequil yoʼnton, jaʼ stalel Jcʼuxubinvanej o», xi. ¿Kʼusi la sta ta mas tsʼakal li Jobe? «Li Jobe xjelov to jech yepal iʼacʼbat bendición yuʼun Mucʼul Dios jech chac cʼu chaʼal ta sliquebe.» (Job 42:10-16.) Jech ta melel li Jeovae ta «[xakʼbe] smoton ti bochʼo ta saʼe» (Hebreos 11:6). Li jmoton jmalaojtike jaʼ li kuxlejal ta sbatel osil ta jun nichimal balumile.
18. ¿Kʼusi chkʼot ta pasel ta mas tsʼakal ta sventa li kʼusitik chopol chvul ta joltike?
18 Li abtelal tspas li Ajvalilal yuʼun Diose ta me slekubtas skotol li kʼusitik chopol kʼotem ta pasel ta stojolal li krixchanoetik ti oy xa ta jaymil jabil likem talele. Li muyubajeletik ta jtatike mu me jaʼuk xkoʼolaj xchiʼuk li vokoliletik chkiltik tanae, muʼyuk xa me chvul ta joltik li kʼusitik chopol toʼox kʼot ta pasel ta jtojolaltike. Li kʼusitik ta jnoptik xchiʼuk li kʼusitik ta jpastik jujun kʼakʼal ti toj lekik te ta achʼ balumile ta kʼunkʼun me ta stupʼ batel li kʼusitik chopol chvul ta joltike. Li Jeovae xi chal ta melele: «Ta xcacʼ ayinuc achʼ vinajel [jun achʼ Ajvalilal ta vinajel ti tsventain li krixchanoetike] banamil [tukʼil krixchanoetik]. Li pocoʼe muʼyuc xa bochʼo ta snaʼ o; muʼyuc bochʼo ta snopilan o. Cuxetuc noʼox avoʼntonic, acʼaluc noʼox avoʼntonic sbatel osil ta sventa li cʼusi achʼ ta xcaqʼue», xi. Jech ta melel, li ta achʼ balumil yuʼun Diose, xuʼ xi ta xalik li buchʼutik tukʼike: «Scotol li banamile jun xa yoʼnton chcuxic; xʼavetic xa noʼox ta qʼueoj ta sventa ti toj xcuxet yoʼntonique» (Isaías 14:7; 65:17, 18).
Svulesobil ta joltik
• Manchuk mi yakʼoj to akʼo oyuk choplejal li Jeovae, ¿kʼuxi yakʼoj ta ilel noxtok ti yichʼoj ta mukʼ li sbie?
• ¿Kʼuxi ta jtabetik sbalil li xkʼuxul yoʼonton Dios ta skoj ti stsʼikoj to li buchʼutik «chapal scʼoplal chichʼic ilintaele»?
• Kʼalal oy jvokoltike, ¿kʼusi stakʼ jnoptik-o ta sventa?
[Lokʼol ta pajina 67]
«Li Jobe xjelov to jech yepal iʼacʼbat bendición yuʼun Mucʼul Dios jech chac cʼu chaʼal ta sliquebe»