Kapitulo 11

Jsaʼulantik batel baʼyuk li Ajvalilal yuʼun Diose

1. 1) Li Jesuse, ¿kʼu yuʼun laj yalbe li buchʼutik te chaʼiik mantal ti akʼo saʼik batel baʼyuk li Ajvalilale? 2) ¿Kʼusi skʼan jakʼbe jbatik ta jujuntal?

OY XA mas ta 1,900 jabil, ta jun mantal ti laj yal Jesús ta Galileae, xi laj yalbe li buchʼutik te chaʼiik mantale: «Tscʼan baʼyuc chavacʼ abaic ta ventainel yuʼun li Diose, xchiʼuc ti chapasic cʼusi tscʼane». Pe, ¿kʼu yuʼun skʼan xa noʼox saʼel? ¿Mi mu epuk toʼox siglo skʼan xichʼ sjuʼel sventa ch-ajvalilaj li Jesuse? Ep toʼox skʼan, pe li Ajvalilal yuʼun Mesiase jaʼ chichʼ tunesel yuʼun Jeova sventa chchaʼta yav li ajvalilal yuʼune xchiʼuk sventa chkʼot ta pasel yuʼun li kʼusi labal sba tskʼan yoʼonton ta sventa li Balumile. Skotol li buchʼu ta xaʼibe smelolal ti toj tsots skʼoplal taje jaʼ me baʼyel ta xakʼ ta xkuxlejal li Ajvalilale. Mi jech la spasik ti leʼ ta baʼyel sigloe, mas to me tsots skʼoplal li avie, yuʼun li Cristoe chotol xa ta Ajvalil. Jech oxal chaʼa, li kʼusi skʼan jakʼbe jbatik ta jujuntale jaʼ liʼe: «¿Mi xvinaj ta jkuxlejal ti jaʼ baʼyel ta jsaʼ batel li Ajvalilal yuʼun Diose?» (Mateo 6:33).

2. ¿Kʼusi yakʼojbeik yipal ta saʼel jutuk mu skotoluk li krixchanoetike?

² Li avie, ta smiyonal noʼox krixchanoetik ta spʼejel Balumil jech ta spasik, yakal ta saʼik batel baʼyuk li Ajvalilal yuʼun Diose. Chakʼik ta ilel ti yakʼoj sbaik ta stojolal li Ajvalilal kʼalal jaʼ batem ta yoʼonton ta xkuxlejalik li kʼusi tskʼan yoʼonton li Diose, ti jaʼ te yakʼoj xkuxlejalik ta stojolale. Pe jutuk mu skotoluk li yan krixchanoetike jaʼ batem ta yoʼontonik li kʼusitik oy ta balumile. Yakʼojbeik yipal ta saʼel stakʼinik, kʼusitik tskʼan chuʼuninik, kʼusitik tskʼan tskʼupinik xchiʼuk batem ta yoʼontonik stael lek yabtelik. Li kʼuyelan li xkuxlejalike chakʼ ta ilel ti jaʼ noʼox tsvul yoʼonton ta stukike, ta sventa li kʼusitik tskʼanike xchiʼuk ta sventa li skʼupinel kʼusitike. Jaʼ tsʼakal to yakʼoj ta xkuxlejalik li Diose, ti mi yuʼun van oy ta yoʼontonike (Mateo 6:31, 32).

3. 1) ¿Kʼusi kʼulejalil laj yal Jesús ti akʼo saʼik li yajtsʼaklomtake, xchiʼuk kʼu yuʼun? 2) ¿Kʼu yuʼun mu persauk ta jvul tajmek koʼontontik ta sventa li kʼusitik ta jkʼantike?

³ Li Jesuse snaʼoj onoʼox ti muʼyuk bu chjalij sbatel osil li kʼusitike, jaʼ yuʼun xi la stojobtas li yajtsʼaklomtake: «Mu me xatsob acʼulejalic liʼ ta banamil». «Jaʼ lec tsobo acʼulejalic te ta vinajel», xi laj yal, taje jaʼ to chichʼ tael kʼalal chi jtun ta stojolal li Jeovae. Li Jesuse laj yalbe yajtsʼaklomtak ti «lec[uk]» li satike, ti akʼo batuk ta yoʼontonik xchiʼuk xakʼbeik yipal ta spasel li kʼusi tskʼan li Diose. «Mu xuʼ chatunic yuʼun Dios me jaʼ batem avoʼntonic yuʼun acʼulejalique», xi laj yal li Jesuse. Pe ¿kʼu yelan skʼan ta stsakik ta venta li kʼusitik chtun yuʼunike, jaʼ xkaltik, li sveʼelike, li skʼuʼ spokʼike xchiʼuk li smakob sikike? «Mu me xloʼilaj avoʼntonic», xi albatik yuʼun li Jesuse. Vaʼun, laj yalbe ti akʼo skʼelik li mutetike, ti chmakʼlinatik yuʼun Diose, xchiʼuk laj yalbe ti akʼo jechuk xchanbeik li nichimetike, ti jaʼ ch-akʼbat skʼuʼik yuʼun li Diose. ¿Mi mu jechuk ti jaʼ mas toj ep sbalil li pʼijil yajtuneltak Jeovae, ti jaʼ xkom to li kʼusitik yichʼojan pasel taje? «Jaʼ yuʼun tscʼan baʼyuc chavacʼ abaic ta ventainel yuʼun li Diose, xchiʼuc ti chapasic cʼusi tscʼane —xi laj yal li Jesuse—, jech chayacʼboxuc scotol li cʼusitic ta xtun avuʼunique.» (Mateo 6:19-34.) ¿Mi jech chvinaj ta akuxlejal ti jech achʼunoj taje?

Mu me xavakʼ chamuk li melel ta sventa li Ajvalilale

4. ¿Kʼusi xuʼ chkʼot ta pasel mi toj tsots skʼoplal chkaʼitik li kʼusitik ta jkʼantike?

⁴ Lek ti ta jvul koʼontontik ti akʼo oyuk kuʼuntik li kʼusi chtun kuʼuntik xchiʼuk li kʼusi chtun yuʼun li kutsʼ kalaltike. Pe mi toj echʼ noʼox ta jvul koʼontontik ta sventa li kʼusitik chtun kuʼuntike xuʼ toj chopol kʼusitik chkʼot ta pasel ta skoj. Manchuk mi chal ti lek tsots xchʼunel yoʼonton ta sventa Ajvalilal yuʼun Dios li jun krixchanoe, mi jaʼ batem ta yoʼonton yan kʼusitike, li melel ta sventa li Ajvalilale ta me xcham (Mateo 13:18-22). Jech kʼuchaʼal liʼe, jun veltae jun jkʼulej kerem ajvalile xi la sjakʼbe li Jesuse: «¿Cʼusi ta jpas ti xuʼ chicuxi o sbatel osile?», xi. Li kerem ajvalile muʼyuk kʼusi chopol ta xkuxlejal xchiʼuk lek yichʼoj ta venta li xchiʼiltake, pe jaʼ batem ta yoʼonton li kʼusitik oy yuʼune, solel mu xkom chaʼi sventa tspas sba ta yajtsʼaklom Cristo. Jaʼ jech la spʼaj li matanal ti xuʼ ch-ajvalilaj ox ta vinajel xchiʼuk li Cristoe. Xi laj yal li Jesús ta sventa taje: «Toj vocol ta xʼoch yoʼ bu tspas mantal Dios li jcʼulejetique», xi (Marcos 10:17-23).

5. 1) Li Pabloe, ¿kʼusi laj yalbe Timoteo ti akʼo junuk-o yoʼontone, xchiʼuk kʼu yuʼun? 2) Li Satanase, ¿kʼuxi ta sjoypʼin ta jun jlajesvanej petsʼ «li scʼupinel taqʼuine»?

⁵ Echʼ van jayibuk jabile, li jtakbol Pabloe la stsʼibabe batel jun karta li Timoteoe, te ta Éfeso (jun lum ti bu lek xpʼolmaj krixchanoetike), xi la svulesbe ta sjole: «Yuʼun muʼyuc onoʼox jcʼulejaltic ti cʼalal lijvocʼutic liʼ ta banamile. Jech noxtoc muʼyuc cʼusi ta xquichʼtic batel ti cʼalal chijchamutique. Me oy jveʼeltic xchiʼuc jcʼuʼ jpocʼtique, cuxetuc noʼox coʼntontic o». Sventa «oy jveʼeltic xchiʼuc jcʼuʼ jpocʼti[k]» xchiʼuk li kutsʼ kalaltike lek me ti chi abtejutike. Pe li Pabloe xi ipʼijubtasvane: «Yan li bochʼo tscʼan tspas ta jcʼuleje, te ta sujat yuʼun cʼusi chopol, jech te chucbil ta xcʼot o. Ep cʼusi chlic svovil cʼupin. Muʼyuc lec cʼusitic chlic snop, jech te ta soc o yoʼnton, jech chʼayel ta xbat o xchiʼuc». Toj manya li Satanase. Ta kʼunkʼun chlik sloʼlabe yoʼonton li jun krixchanoe, mi laje xuʼ chlik suj mas; xuʼ van jaʼ ta sventa ti tskajtsaj ta yabtele o mi tsjel yabtel sventa tspas kanal mas ep takʼin, pe jaʼ ta sten komel li kʼusitik ta sventa Diose, jaʼ mu xa xokob ta spasel. Ta skoj ti jaʼ mas tsots skʼoplal li Ajvalilal yuʼun Diose, skʼan me jchabi jbatik lek ta skoj li «scʼupinel taqʼuine», yuʼun mi mu jchabi jbatike xuʼ me xcham ta koʼontontik li kʼusitik ta sventa li Ajvalilale. Li Pabloe xi laj yale: «Oy jayibuc ipichʼaj yoʼntonic yuʼun taqʼuin, jech la scomtsanic xchʼunel Cajvaltic. Jech la staic ep svocolic» (1 Timoteo 6:7-10).

6. 1) ¿Kʼusi skʼan jpastik sventa mu xi xjochutik batel ta saʼel li kʼusitik ta jkʼantike? 2) Ta skoj ti chʼabal lek takʼin ta spʼejel Balumil li avie, ¿bu skʼan jpat koʼontontik?

⁶ Ta skoj ti skʼanoj tajmek li Timoteoe, li Pabloe xi laj yalbe mantale: «Vocʼo me aba ta sventa scotol leʼe. [...] Acʼo me persa xchʼunel li Cajvaltique, tsotsan me», xut (1 Timoteo 6:11, 12). Skʼan me tsots xkakʼ jbatik sventa mu xi xjochutik batel ta skʼanel li kʼusitik ta jpat jxokontik liʼ ta balumile. Mi chkakʼbetik yipal ta spasel jech kʼuchaʼal tskʼanbutik li xchʼunel koʼontontike, li Jeovae muʼyuk me bu ta xiktautik. Ta me xakʼbutik li kʼusitik chtun kuʼuntike, manchuk mi toj tsots li kuxlejal ta skoj ti chʼabal lek takʼine xchiʼuk ti chʼabal lek abtelale. Li Pabloe xi la stsʼibae: «Mu me xbat avoʼntonic yuʼun taqʼuin. Cuxetuc noʼox avoʼntonic ti cʼu yepal oy avuʼunique. Yuʼun jech yaloj li Diose: “Muʼyuc chaquictaot, muʼyuc chajcomtsanot”, xi. Jech ta sjunul coʼntontic xuʼ jech jamal chcaltic: “Jaʼ Jcoltavanej cuʼun li Cajvale, jech muʼyuc chixiʼ. ¿Cʼusi xuʼ yuʼun chispasbicun li cristianoetique?”, xuʼ xijchi», xi (Hebreos 13:5, 6). Jech noxtok, li ajvalil Davide xi la stsʼibae: «Queremun toʼox, pero tana chimalub xa. Muʼyuc bu laj quil ti oy tscomtsanat stuc li bochʼo tucʼ yoʼntone; muʼyuc bu laj quil ti ch-ochic ta cʼan limosna li yalab xnichʼnabe» (Salmo 37:25).

Li skʼelobil laj yakʼik li baʼyel yajtsʼaklomtak Cristoe

7. Li Jesuse, ¿kʼusitik mantal laj yalbe yajtsʼaklomtak ta sventa li chol mantale, xchiʼuk kʼu yuʼun lek ti jech laj yichʼik albele?

⁷ Kʼalal laj xaʼox xchapan lek li yajtakboltake, li Jesuse la stak batel ta Israel ta xcholel li lekil aʼyejetike xchiʼuk ti akʼo xi xalike: «Sta xa yorail ta xventainvan ti Diose». ¡Toj labal sba li aʼyej taje! Jesucristo, li Ajvalil Mesiase, te toʼox oy xchiʼukik. Ta sventa ti yakʼoj sbaik ta stojolal Dios li jtakboletike, albatik yuʼun Jesús ti akʼo spat yoʼontonik ta stojolal ti jaʼ chchabiatike. Xi albatike: «Mu me cʼusi xavichʼ batel ta sventa abeic. Mu me xavichʼ batel anamteʼic, anutiʼic, aveʼelic, xchiʼuc ataqʼuinic. Mu me xavichʼ batel chaʼlic acʼuʼic. Ti bu junucal na chacʼotique te oyanic o, jaʼ to me laloqʼuic batele» (Mateo 10:5-10, Ch; Lucas 9:1-6). Li j-israeletike stalelik onoʼox ti chotes ta snaik li buchʼutik mu xojtikinike, jech oxal chaʼa, li Jeovae jaʼ tstunes li j-israeletik sventa chakʼbe li kʼusitik chtun yuʼunik li jchol mantaletike.

8. 1) ¿Kʼu yuʼun laj yal achʼ mantaletik ta sventa chol mantal li Jesús kʼalal jutuk xaʼox skʼan xchame? 2) ¿Kʼusi ti baʼyel onoʼox skʼan xakʼ ta xkuxlejalik li yajtsʼaklomtak li Jesuse?

⁸ Kʼalal jutuk xaʼox skʼan xcham li Jesuse, laj yalbe yajtakboltak ti chjel ta mas tsakal ti kʼuyelan chchʼamatik ti bu chcholik mantale. Ta skoj ti kontrainbilik yuʼun ajvaliletike, xuʼ van muʼyuk xa lek ta xkʼuxubinatik yuʼun li j-israeletike. Jech noxtok, poʼot xa me xlik xcholik ta yantik lumetik li skʼoplal Ajvalilal yuʼun Diose. Vaʼun bi skʼan me ta xichʼik batel snutiʼik xchiʼuk yav stakʼinik. Pe akʼo mi jech, jaʼ baʼyel skʼan saʼik batel li Ajvalilal yuʼun Jeovae xchiʼuk li tukʼilal Yuʼune, xchiʼuk ti akʼo spat yoʼontonik ta stojolal Dios ti chkoltaatik ta saʼel li yuni veʼelike xchiʼuk li skʼuʼ spokʼike (Lucas 22:35-37).

9. ¿Kʼuxi laj yakʼ ta ilel Pablo ti jaʼ baʼyel laj yakʼ ta xkuxlejal li Ajvalilale, manchuk mi la saʼ batel li kʼusitik chtun yuʼune, xchiʼuk kʼusi tojobtasel laj yal ta sventa taje?

⁹ Li jtakbol Pabloe toj lek laj yakʼ ta ilel ti kʼuyelan laj yichʼbe ta mukʼ li tojobtasel laj yakʼ Jesuse, yuʼun jaʼ baʼyel laj yakʼ ta xkuxlejal li spasbel yabtel Kajvaltike (Hechos 20:24, 25). Pe kʼalal chkʼot ta jun lum ta chol mantale, jaʼ tsaʼ stuk li kʼusitik chtun yuʼune, tstsʼisan nukul sventa karpana mi jech skʼan chile; muʼyuk bu spatoj yoʼonton mi chkoltaat yuʼun li yantike (Hechos 18:1-4; 1 Tesalonicenses 2:9). Manchuk mi jech, kʼalal chkʼuxubinat yuʼun li ermanoetike xchiʼuk ti ch-akʼbat smoton ta skoj ti kʼanbile, li Pabloe ta sjunul yoʼonton ta xchʼam (Hechos 16:15, 34; Filipenses 4:15-17). Li Pabloe muʼyuk laj yalbe yajtsʼaklomtak Cristo ti akʼo mu skʼelik li kʼusitik chtun yuʼun li yutsʼ yalalik ta skoj ti chcholik mantale, moʼoj, yuʼun li kʼusi laj yalbee chaʼa, jaʼ ti akʼo xtojobikuk ta spasel lek xchaʼtosale. Laj yalbe ti akʼo x-abtejike, ti akʼo skʼan li yutsʼ yalalike xchiʼuk ti akʼo yakʼbeik yantik li kʼusitik oy yuʼunike (Efesios 4:28; 2 Tesalonicenses 3:7-12). Laj yalbe ti akʼo spat yoʼontonik ta stojolal Diose, maʼuk ta sventa li kʼusitik oy yuʼunike, xchiʼuk ti akʼo xakʼik ta ilel ta xkuxlejalik ti xaʼibeik lek smelolal ta melel ti kʼusi mas tsots skʼoplale. Jech kʼuchaʼal ichanubtasvan li Jesuse, taje jaʼ smelolal ti jaʼ skʼan saʼel baʼyuk li Ajvalilal xchiʼuk li tukʼilal yuʼun Diose (Filipenses 1:9-11).

Jaʼ kakʼtik-o baʼyel ta jkuxlejaltik li Ajvalilale

10. ¿Kʼusi smelolal ti baʼyel ta jsaʼtik li Ajvalilale?

¹⁰ ¿Kʼu sjalil ta jcholtik li lekil aʼyejetik ta sventa li Ajvalilale? Jaʼ ti kʼuyelan li jkuxlejaltike xchiʼuk mi oy ta koʼontontik stojel tajmek ta vokole. Jnoptik ti muʼyuk xi laj yal li Jesuse: «Saʼik me li Ajvalilal kʼalal mu kʼusi cha pasike». Snaʼoj lek ti toj tsots skʼoplal li ajvalilale, jech oxal xi laj yal li kʼusi oy ta yoʼonton li sTote: «Batuc avoʼntonic ta saʼel ti ventainel yuʼun ti Diose» (Lucas 12:31, Ch). Manchuk mi jutuk mu jkotoltikuk skʼan xi j-abtejutik sventa ta jsaʼtik li kʼusi chtun kuʼuntike xchiʼuk li kʼusi chtun yuʼun li kutsʼ kalaltike, mi oy xchʼunel koʼontontike, jaʼ me chkakʼtik ta jkuxlejaltik spasel li abtelal yakʼoj Dios ta sventa li Ajvalilale, jech noxtok un, ta me jpastik li kʼusi oy ta jbatik ta sventa li kutsʼ kalaltike (1 Timoteo 5:8).

11. 1) ¿Kʼusi lokʼolkʼop la stunes Jesús sventa chakʼ ta ilel ti mu koʼoluk yepal ta jcholbetik skʼoplal li Ajvalilale? 2) ¿Kʼu yuʼun mu koʼoluk yepal ta jcholtik mantal ta jujuntal?

¹¹ Oy mas ep ta jcholbetik skʼoplal li lekil aʼyejetik ta sventa li Ajvalilal yuʼun Diose, yantike jutuk noʼox. Pe li ta lokʼolkʼop la stunes Jesús ta sventa li bu ta xichʼ tsʼunel kʼusitike, laj yakʼ ta ilel ti buchʼu jech yoʼonton kʼuchaʼal li balumil ti toj leke ta me xakʼ lek sat. ¿Kʼu yepal? Jelel li jkuxlejaltik ta jujuntale. Jlome jelel jabilaltik, oy ip noʼox chkaʼitik xchiʼuk oy ta jkʼel kutsʼ kalaltik. Manchuk mi jech, mi ta melel jkʼanojtik li kʼusi yuʼun Jeovae, xuʼ me ep ta jpastik batel (Mateo 13:23).

12. ¿Kʼusi abtelal ta sventa Jeova ta x-akʼbat snop ti akʼo spasik li kerem-tsebetike?

¹² Lek ti kak ta jnoptik kʼuyepal chi j-abtejutik sventa x-epaj li chol mantal kuʼuntik ta sventa li Ajvalilale. Li kerem-tsebetike skʼan snopik lek jechuk ta sventa li slekil talelal li Timoteo ti laj yakʼ lek yoʼonton ta chol mantale (Filipenses 2:19-22). ¿Kʼusi mas lek ta stojolalik, mi mu jaʼuk mas lek ti tstsakik spasel li abtelal ta chol mantal ti tsʼakal yorail mi tsuts yuʼun li xchanunike? Kʼalal ta yijil krixchanoetik ta stabeik sbalil ek kʼalal ta xepajesik batel li yabtelik ta stojolal Diose.

13. 1) ¿Buchʼu ta xal kaʼitik ti kʼu yepal skʼan xi j-abtejutik ta sventa li Ajvalilale? 2) Mi ta melel jaʼ baʼyel ta jsaʼtik li Ajvalilale, ¿kʼusi chkakʼtik ta ilel?

¹³ Mu me jloʼiltatik li buchʼutik xuʼ chcholik mas mantal chkiltike, jaʼ lek ti kʼusi skʼan jpastike jaʼ ti akʼo stij koʼontontik li xchʼunel koʼontontik ti akʼo xi jtojob batel mas ta spasel li kʼusi leke, jaʼ xkaltik, ti jpasbetik batel yabtel Dios ti bu kʼalal xuʼ kuʼuntike (Romanos 14:10-12; Gálatas 6:4, 5). Jech kʼuchaʼal chkiltik ta stojolal Jobe, li Satanase tsnop ti kʼusi mas oy ta koʼontontike jaʼ la ti oyuk kʼusitik kuʼuntike, ti lekuk noʼox jkuxlejaltike xchiʼuk ti ta jkʼan jlekilaltik ta jujuntale, jaʼ xkaltik, ti jaʼ noʼox ta jsaʼ jlekilal jtuktik kʼalal chi jtunutik ta stojolal Diose. Jech oxal chaʼa, mi jaʼ baʼyel kakʼoj ta jkuxlejaltik saʼel li Ajvalilale, ta me xkakʼtik ta ilel ek ti jaʼ jun bankilal jutkʼop li Diabloe, yuʼun me te chvinaj lek ti jaʼ mas tsots skʼoplal ta jkuxlejaltik spasbel yabtel li Diose. Xchiʼuk chvinaj ta jkʼopojeltik xchiʼuk ta kabteltik ti jkʼanojtik tajmek li Jeovae, ti tukʼ koʼonton chkakʼ jbatik li ta ajvalilal yuʼune xchiʼuk ti jkʼanojtik li jchiʼiltaktike (Job 1:9-11; 2:4, 5; Proverbios 27:11).

14. 1) ¿Kʼu yuʼun toj lek kʼalal jchʼakojbetik yorail li chol mantale? 2) ¿Kʼu yepal ta xcholik mantal ep yajRextikotak Jeova?

¹⁴ Mi lek ta jchapanbetik yorail li kʼusi ta jpastike, mas me lek xi jtojobaj ta stunesel li kʼakʼale. Li Jeovae «laj yacʼbe yorail cʼusi ora chcʼot ta pasel» li kʼusi tskʼan yoʼontone (Éxodo 9:5; Marcos 1:15). Ti jech taje, toj lek maʼ ti jchʼaktik jun chibuk velta ta xemana jkʼakʼaltik sventa ta jcholtik li mantale. Oy jayib sien ta mil yajrextikotak Jeova ta spʼejel balumil tunemik ta prekursor auksiliar, taje jaʼ smelolal ti skʼan xichʼ cholel chibuk ora jujun kʼakʼal li lekil aʼyejetike. Oy jayib sien ta mil noxtoke jaʼik prekursor regular, taje chib ora xchiʼuk oʼlol ta xcholik mantal jujun kʼakʼal. Li prekursor espesialetik xchiʼuk li misioneroetike mas to jal ch-abtejik ta sventa li Ajvalilale. Jech noxtok stakʼ xichʼ sabel yorail kʼuxi xuʼ xkalbetik yan krixchanoetik ti tskʼan chaʼiik li kʼusi jmalaojtik ta sventa li Ajvalilale (Juan 4:7-15). Skʼan me oyuk ta koʼontontik spasel li abtelal ti bu kʼalal xuʼ kuʼuntike, yuʼun xi laj yal li Jesuse: «Ti lequil achʼ cʼop scʼoplal ti ventainel yuʼun ti Diose, ta xichʼ puquel ta sbejel banomil yoʼ jech ta snaʼic scotolic ti oy coltaele. Vaʼi un, ta xtal ti slajebal cʼacʼale», xi (Mateo 24:14, Ch; Efesios 5:15-17).

15. ¿Kʼu yuʼun lek snup-o chavaʼi li chol mantal li kʼusi chal 1 Corintios 15:58?

¹⁵ Buyuk noʼox nakalik ta spʼejel Balumil li yajrextikotak Jeovae, jmoj tspasik batel li alakʼ sba abtelal liʼe. Ta xakʼ ta xkuxlejalik li tojobtasel ta Vivlia ti yakʼoj ta naʼel Dios ti xie: «Jaʼ yuʼun quermanotac, voʼoxuc ti lec jcʼanojoxuque, staojuc o me yav li avoʼntonique; mu me xajelilanic. Scotoluc ora abtejanic o yuʼun li Cajvaltique; naʼic me ti mu alticuc chaʼabtejic yuʼun li Cajvaltique» (1 Corintios 15:58).

Svulesobil ta joltik

• Kʼalal laj yal Jesús ti «tscʼan baʼyuc chavacʼ abaic ta ventainel yuʼun li Diose», ¿kʼusi laj yal ti jaʼ tsʼakal to skʼan xkakʼ ta jkuxlejaltike?

• ¿Kʼu yelan skʼan jtsaktik ta venta li saʼel kʼusitik chtun kuʼuntike xchiʼuk li kʼusitik chtun yuʼun li kutsʼ kalaltike? ¿Kʼusi koltael chi yakʼbutik li Diose?

• ¿Kʼusitik abtelal ta chol mantal stakʼ jpastik?

[Lokʼol ta pajina 107]

Li yajrextikotak Jeovae ta xcholik li lekil aʼyejetik ta skotol lumetik kʼalal mu to chtal li slajebal kʼakʼale