Li aʼyej ti skʼan jcholbetik skʼoplale

«ICHʼO ME TA MUCʼ LI DIOSE; CHʼUNBO SCOTOL LI SMANTALTAQUE»

KʼALAL maʼuk toʼox jkʼakʼaliltike, li Jeovae laj onoʼox yalbe li tukʼil Abraan li kʼusi tstunes Dios sventa «chichʼ bendición scotol li mucʼtic lumetic liʼ ta banamile» (Gén. 22:18). Jech xtok, laj yakʼbe snaʼ Salomon ti akʼo stsʼiba li kʼusi oy ta sbaik li krixchanoetike, xi laj yalbee: «Ichʼo me ta mucʼ li Diose; chʼunbo scotol li smantaltaque. Jaʼ noʼox jech oy ta sventa acʼo spas li cristianoetique» (Ecl. 12:13). Pe, ¿kʼuxi van chkʼot ta xchikinik li krixchanoetik une?

Manchuk mi oy onoʼox buchʼutik xchʼunojik li kʼusi yaloj Diose, li Vivliae yaloj onoʼox li cholmantal ta spʼejel Balumile jaʼ to ch-epaj li «ta skʼakʼalil Kajvaltik» ti lik ta 1914 (Apok. 1:10). Li ta Apokalipsis 14:6 xchiʼuk 7 yaloj xa onoʼox ti chichʼ cholel mantal «ta skotol lumetik, nitilulaletik, jeltos kʼopetik xchiʼuk ta skotol jteklumetik» ta skʼakʼalil Kajvaltik ti jaʼ chbeiltasvanik li anjeletike. Xi chalike: «Xiʼtaik xchiʼuk albeik smukʼulal li Diose, yuʼun kʼot xa yorail ti chchapanvane, jaʼ yuʼun ichʼik ta mukʼ li Buchʼu la spas vinajel, balumil, nab xchiʼuk li nioʼetike». Li kʼusi tskʼan yoʼonton Diose jaʼ ti xichʼ alel batel li aʼyeje xchiʼuk jaʼ jun matanal ti chijkoltavane.

«Mucʼul Dios.» Kʼalal laj yal Jeova «voʼoxuc testigooxuc cuʼun» xie, jaʼo yakal chichʼ albel skʼoplal li buchʼu sta-o xichʼ ichʼel ta mukʼe (Is. 43:10). Jaʼ yuʼun kʼalal chbat jcholbetik mantal li krixchanoetike, maʼuk noʼox chbat kalbetik ti skʼan oyuk srelijionike o ti akʼo xchʼunik junuk diose. Li kʼusi skʼan jpastike jaʼ ti jkoltatik sventa xchanik ti jaʼ noʼox stuk melel Dios li buchʼu la spas vinajel xchiʼuk Balumile (Is. 45:5, 18, 21, 22; Juan 17:3). Jaʼ noʼox stuk xuʼ xal li kʼusi chkʼot ta pasel ta jelavele. Jech xtok jaʼ jun matanal yakʼojbutik ti chkalbetik batel krixchanoetik ti kʼotem onoʼox ta pasel yuʼun li kʼusitik yaloj ta voʼnee, vaʼun jaʼ jech ta jchʼuntik ti chkʼot onoʼox ta pasel yuʼun ta tsʼakal li kʼusi yaloje (Jos. 23:14; Is. 55:10, 11).

Oy ep krixchanoetik ti chichʼik ta mukʼ yan diosetike, li yantike xtoke chalik ti mu junuk dios chichʼik ta mukʼe. Sventa oyuk ta yoʼontonik li kʼusi chavalbee, skʼan jaʼ xavalbe skʼoplal li kʼusi koʼol lek chavilike. Xuʼ jaʼ skoltautik li kʼusi chal ta Echos 17:22 kʼalal ta 31. Te chal ti manchuk mi ta slekil yoʼonton kʼopoj li jtakbol Pabloe, jamal laj yal ti chchapanatik yuʼun Dios li krixchanoetike, li buchʼu la spas vinajel xchiʼuk Balumile.

Akʼo ta ojtikinel li sbi Diose. Skʼan xkakʼtik ta ojtikinel ta sbi li melel Diose, Jeova, ti jaʼ jun biil ti skʼanoje (Éx. 3:15; Is. 42:8, TNM). Jaʼ la sbain ti teuk tsʼibabil xkom ta Vivlia mas ta vukmil ta velta li sbie, yuʼun oy ta yoʼonton ti akʼo xojtikinik li krixchanoetike. Oy ta jbatik ti xkalbetik batel krixchanoetik li sbi Diose (Deut. 4:35).

Sventa xkuxiik-o sbatel osil li krixchanoetike, skʼan xojtikinik Jeova xchiʼuk oyuk xchʼunel yoʼontonik kʼalal tskʼanbeik vokole (Joel 2:32; Mal. 3:16; 2 Tes. 1:8). Pe ep buchʼutik ti mu xojtikinik li Jeovae, taje te skʼoplalik ek li buchʼutik chalik ti chichʼik ta mukʼ ta alel li Dios chalbe skʼoplal Vivliae. Manchuk mi oy Svivliaik xchiʼuk ti tskʼelik li krixchanoetike, yikʼaluk van mu snabeik kʼusi sbi li Diose, yuʼun oy epal Vivliaetik ta jkʼakʼaliltik ti stupʼojbeik li sbi Diose. Li kʼusi noʼox snaʼojik junantik krixchanoetike jaʼ ti albilik yuʼun jnitvanejetik ta srelijionik ti akʼo mu stunesik li sbi Diose.

¿Kʼuxi xuʼ lek xkakʼbetik yojtikin krixchanoetik li sbi Diose? Jaʼ ti xkakʼbetik yil ta Vivliae, mas to lek mi jaʼ chkakʼbeik yil ta Svivlia stukike. Li ta junantik Vivliae ta smilal noʼox ta velta te chalbe sbi li Diose, pe li junantik xtoke jaʼ noʼox te chal ta Salmo 83:18 o ta Éxodo 6:3 kʼalal ta 6, o mi moʼoje, jaʼ noʼox te chal ta tsʼib ta yok vun ta Éxodo 3:14 xchiʼuk 15 o ta 6:3. Kʼalal lik sjelubtasik ta yantik kʼop li Vivlia orijinale, lik sjelbeik li sbi Diose, jaʼ xa noʼox laj yiktaik «Ajvalil» o ‹Mukʼul Dios› ti ta mayuskula tsʼibabile. Mi stupʼojbeik sbi Dios ta Vivlia li jelubtasej kʼopetik ta jkʼakʼaliltike, jaʼ lek ti jtunestik li yan Vivliaetik ti mas xa voʼneik sventa xkakʼtik ta ilel ti jaʼ to la stupʼbeik lokʼel li sbi Diose. Jech xtok, oy ta yantik lumetik ti xuʼ van xichʼ akʼel ta ilel ti tstabeik ta alel sbi Dios kʼalal chkʼejinik ta srelijionike o ti te tsʼibabil ta kʼusitik svaʼanojik o spasojik li krixchanoetike.

Li ta Jeremías 10:10 kʼalal ta 13 ta Traducción del Nuevo Mundo xuʼ xkoltaatik li buchʼutik chichʼik ta mukʼ jecheʼ diosetike, yuʼun maʼuk noʼox te chalbe sbi li Diose, te chal xtok buchʼu jaʼ ta melel.

Mu me xamukbe sbi Dios ti jaʼ xa noʼox chaval «Ajvalil», ‹Mukʼul Dios› o yantik jech kʼuchaʼal tspasik li buchʼutik tskuy sbaik ta yajtsʼaklom Kristoe. Akʼo mi jech, mu me persauk ti jaʼ xa baʼyel chaval kʼalal chalikes aloʼil jujun veltae. Yuʼun mi chaval noʼox ta anile, xuʼ van mu xa skʼan xloʼilaj mas ta skoj ti chopol chaʼi li krixchanoe. Jaʼ to xuʼ xatunesbe sbi Dios kʼalal mi lik xaʼox lek aloʼilike.

Li ta Vivliae ep ta velta chalbe sbi li Diose, jaʼ mu sta li yantik kʼuxi chichʼ albel jech kʼuchaʼal «Ajvalil», ‹Mukʼul Dios› o yantik. Li jtsʼibajometik ta Vivliae lek tajek la skʼelik ti butik la stsʼibaik komel li biil Jeovae, ti bu sta-o laj yilike, ti lokʼ ta yoʼontonike xchiʼuk ti laj yichʼik ta mukʼe. Taje toj lek ta chanel ti kʼu yelan la spasike.

Ta sbi chichʼ ojtikinel li Diose. Oy kʼusi tsots skʼoplal chakʼ jchantik ti oy sbi stuk li Diose. Pe taje slikebal to noʼox ti jech chkojtikintike.

Sventa jkʼantik Dios xchiʼuk ti oyuk xchʼunel koʼontontik kʼalal ta jkʼanbetik vokole, skʼan jchantik ti kʼu yelan stalelale. Kʼalal laj yakʼbe yojtikin Moises li sbi te ta Vits Sinaie, maʼuk noʼox ep ta velta laj yal li jpʼel kʼop Jeova. Li Diose laj yakʼbe yojtikin jaytosuk stalelal ti mas tsotsik skʼoplale (Éx. 34:6, 7). Jaʼ jech laj yakʼ kiltik yoʼ jech jpastik ek.

Mi jaʼ chavalbe skʼoplal li bendisionetik chakʼ li Ajvalilal yuʼun Dios kʼalal chacholbe mantal li buchʼutik oy ta yoʼontonik mantale o mi chavetʼes mantal ta tsobobbaile, alo kʼusi chchanubtasutik ta sventa Dios ti jaʼ yaloj chakʼ li bendisionetik taje. Kʼalal chavalbe skʼoplal li smantaltake, akʼbo yilik ti pʼij xchiʼuk ti chkʼanvan ti jech laj yakʼ li smantaltake. Albo lek smelolal ti jaʼ sventa jlekilaltik li smantaltake, ti maʼuk jun ikatsile (Is. 48:17, 18; Miq. 6:8). Albo yaʼiik smelolal ti yuʼun chchanubtasutik ta sventa stalelal, smantaltak xchiʼuk li kʼusi tskʼan tspas kʼalal chakʼ ta ilel sjuʼel li Diose. Albo lek skʼoplal ti snaʼ stunesel lek jujutos stalelal li Diose. Alo kʼu yelan chavaʼi aba ta stojolal li Jpasvaneje, yuʼun mi xvinaj ti akʼanoj li Diose, jech chlik skʼanik ek.

Li aʼyej ti ta anil xa noʼox skʼan xkaltik batele, jaʼ sventa xiʼtaik Dios li krixchanoetike. Jaʼ yuʼun vinajuk me ta jkʼopojeltik ti jxiʼtaojtik li Diose, jaʼ xkaltik, ti kichʼojtik lek ta mukʼ li Jeovae (Sal. 89:7). Mi jech ta jpastike, jtsakojtik ta mukʼ ti jaʼ Mukʼta Jchapanvaneje xchiʼuk ti jaʼ noʼox ta jtatik-o kuxlejal sbatel osil mi lek chilutike (Luk. 12:5; Rom. 14:12). Jaʼ svinajeb ti jkʼanojtik Dios mi jxiʼtaojtike, vaʼun jaʼ me jech oy tajek ta koʼontontik ta spasel li kʼusi leke (Deut. 10:12, 13). Mi jxiʼtaojtik li Diose, jaʼ me tskoltautik ta spʼajel li kʼusi chopole, ta xchʼunbel li smantaltake xchiʼuk ti xkichʼtik ta mukʼ ta sjunul koʼontontike (Deut. 5:29; 1 Crón. 28:9; Prov. 8:13). Jech xtok jaʼ tskoltautik sventa mu jloʼla jbatik ti chijtunutik xa yilel ta stojolal Diose xchiʼuk ti jkʼanojtik li kʼusitik sventa noʼox balumile (1 Juan 2:15-17).

Li sbi Diose jaʼ jech kʼuchaʼal jun «tayal kʼelob osil ti tsotse». Chichʼ chabiel lek yuʼun Jeova li buchʼu chojtikin leke. Pe taje maʼuk noʼox ta skoj ti tstunesbe li sbie o ti snaʼojbe jaytosuk li stalelaltake, moʼoj, jaʼ ta skoj ti spatoj tajek yoʼonton ta stojolale. Li Proverbios 18:10 ta Traducción del Nuevo Mundo xi chal ta sventa li Diose: «Li sbi Jeovae jaʼ jun tayal kʼelob osil ti tsotse. Jaʼ te chbat ta anil li buchʼu tukʼe xchiʼuk ta xichʼ chabiel».

Kʼalal chachiʼin ta loʼil li yantike, tijbo me yoʼontonik yoʼ spat yoʼontonik ta stojolal li Jeovae (Sal. 37:3; Prov. 3:5, 6). Mi jpatoj koʼontontik ta stojolale, jaʼ svinajeb ti oy xchʼunel koʼontontike xchiʼuk ti jchʼunojtik li kʼusi yaloj tspase (Evr. 11:6). Jamal chal ta Skʼop Dios ti tsta skolelik li buchʼutik tskʼanik vokol ta sbi Jeovae, jaʼ noʼox venta mi xchʼunojik ti jaʼ Mukʼul Jpasmantal ta vinajelbalumile, mi skʼanojbeik li kʼusi tspase xchiʼuk mi xchʼunojik ti jaʼ noʼox stuk chkoltavane (Rom. 10:13, 14). Kʼalal chachanubtas yantike, koltao me ti jechuk xakʼ ta ilel xchʼunel yoʼontonik ta skotol li kʼusi tspas ta xkuxlejalike.

Oy ep krixchanoetik ti tsots tajek staoj svokolik ti mu xa stsal yuʼun chaʼiike. Tojobtaso ti akʼo xchanik li kʼusi tskʼan yoʼonton Jeovae, ti akʼo spat yoʼontonik ta stojolale xchiʼuk ti xakʼ ta xkuxlejalik li beiltaseletik yuʼune (Sal. 25:5). Albo ti akʼo skʼanbeik koltael li Jeovae xchiʼuk ti stojbeik ta vokol li bendisionetik yuʼune (Filip. 4:6, 7). Mi laj xaʼox yojtikinik lek li Jeovae, maʼuk noʼox ta skoj ti la skʼelik junchibuk tekstoetike, jaʼ ta skoj ti yiloj xa ta xkuxlejalik ti chkʼot ta pasel yuʼun li kʼusitik yaloje, vaʼun tstaik me jun oʼontonal ta skoj ti laj xa yaʼibeik smelolal li sbi Diose (Sal. 34:8; Jer. 17:7, 8).

Kakʼtik me persa ta skoltael krixchanoetik sventa xakʼik venta ti jaʼ mas toj lek ti xiʼtaik li Jeovae, li melel Diose, xchiʼuk ti xchʼunbeik li smantaltake.

«XCHOLBEL SKʼOPLAL LI JESUSE»

KʼALAL chaʼkuxiem xaʼox xchiʼuk kʼalal muʼyuk toʼox batem ta vinajel li Jesukristoe, xi laj yalbe mantal li yajchankʼoptake: «Vaʼun chavalik batel jkʼoplal [...] kʼalal to ta namal balumil» (Ech. 1:8). Li Vivliae jamal onoʼox yaloj ti tukʼil yajtuneltak Dios avie «yichʼoj yabtelik ta xcholbel skʼoplal li Jesuse» (Apok. 12:17). ¿Bu to kʼalal avakʼojbe yipal spasel li abtelal taje?

Oy epal krixchanoetik chalik ti xchʼunojik la li Jesuse, pe mu snaʼik ti te xa onoʼox kuxul kʼalal muʼyuk toʼox chtal ta Balumile xchiʼuk ti echʼ kʼuchaʼal jun krixchano ta melel ti kʼalal ay ta Balumile. Mu xaʼibeik smelolal kʼusi smakojbe skʼoplal ti jaʼ Xnichʼon Diose xchiʼuk li yabtel yichʼoj sventa xkʼot ta pasel li kʼusi tskʼan tspas Diose. Mu snaʼik kʼusi yakal tspas li avie xchiʼuk ti kʼuxi te tsakal skʼoplalik li kʼusi tspas Jesus ta jelavele. Yikʼal van tsnopik ti muʼyuk bu xchʼunojik Kristo li stestigotak Jeovae. Jaʼ yuʼun tsots tajek skʼoplal ti xkakʼtik ta ojtikinel li melel ta sventa li Jesuse xchiʼuk jaʼ jun matanal jtaojtik.

Li yantik xtoke chalik ti jecheʼ noʼox la loʼil ti ay liʼ ta Balumil li Jesus ti te chalbe skʼoplal ta Vivliae. Yantike chalik ti jaʼ noʼox la jun vinik ti tsots skʼoplale xchiʼuk mu xchʼunik ti jaʼ Xnichʼon Diose. Jaʼ yuʼun skʼan xkakʼbetik tajek yipal, oyuk smalael kuʼuntik xchiʼuk oyuk slekil koʼontontik ta «xcholbel skʼoplal li Jesuse».

Skʼan xojtikinik lek Jesukristo li buchʼutik chaʼibutike, kʼusuk noʼox ti xchʼunojike, taje jaʼ sventa staik li matanal kuxlejal sbatel osil yaloj chakʼ Diose (Juan 17:3). Li kʼusi tskʼan yoʼonton Diose jaʼ ti skotol krixchanoetik «akʼo yalik ta jamal [...] ti jaʼ Kajvaltik li Jesukristo[e]» xchiʼuk ti akʼo stsakik ta venta ti tsots yabtel yichʼoje (Filip. 2:9-11). Jaʼ yuʼun, mu me jmukbetik skʼoplal Jesus ta skoj ti ta jtatik ta chiʼinel ta loʼil krixchanoetik ti mu jechuk li kʼusi xchʼunojike o ti muʼyuk lek kʼusi tsnopik ta jtojolaltik ta sventa li kʼusi jchʼunojtike. Bakʼintike kʼalal sba to velta ta jcholbetik mantal li krixchanoetike, xuʼ van x-albej noʼox skʼoplal kuʼuntik Jesus ta jun noʼox velta. Pe bakʼintik xtoke skʼan oyuk jpʼijiltik ti oyuk to kʼusi xkalbetik sventa jech kʼunkʼun chchanbe batel skʼoplal ta sventa li Kristoe. Yikʼaluk van jaʼ lek ti oyuk to kʼusi xkalbetik sventa jchantik kʼalal chbat jvulaʼantik ta yan veltae. Mu onoʼox xlaj kalbetik skʼoplal skotol ta anil ta sventa li Jesuse, yuʼun jaʼ to te chaʼibe batel lek smelolal mi lik kakʼbetik estudioe (1 Tim. 2:3-7).

Tsots yabtel yichʼoj Jesus ta sventa li kʼusi tskʼan tspas Diose. Skʼan jkoltatik krixchanoetik sventa xakʼik venta ti jaʼ to lek chkil jbatik xchiʼuk Dios mi oy xchʼunel koʼontontik ta stojolal li Jesuse, yuʼun jaʼ ‹be› kʼotem li Kristoe xchiʼuk ‹muʼyuk buchʼu xuʼ xtal ta stojolal li Totile, jaʼ noʼox ta sventa li Jesuse› (Juan 14:6). Mu me xaʼibeik smelolal kʼusi chchanubtasvan Vivlia mi mu xaʼibeik smelolal ti yakʼojbe tsots yabtel li Sba Xnichʼon Jeovae. ¿Kʼu yuʼun? Yuʼun li Jeovae jaʼ yakʼojbe ta yok skʼob Xnichʼon sventa xkʼot ta pasel yuʼun li kʼusitik tskʼan tspase (Kol. 1:17-20). Li albil kʼopetike jaʼtik onoʼox chalbe skʼoplal li yabtel tspas Jesuse (Apok. 19:10). Li Jesuse jaʼ chichʼ tunesel sventa xichʼ lajesbel skʼoplal skotol li vokolil ta skoj li la stoy sba li Satanase xchiʼuk li mulil ta skoj Adane (Evr. 2:5-9, 14, 15).

Sventa oyuk sbalil xilik krixchanoetik li kʼusitik tspas Kristoe, skʼan snaʼik ti kʼu yuʼun oy jvokoltik liʼ ta Balumile xchiʼuk ti mu xijkolutik ta jtuktik noʼoxe. Jkuchojtik xa onoʼox mulil kʼalal chijvokʼe, jelajtik kʼu yelan jtaoj jvokoltik ta skoj li mulile xchiʼuk ta persa onoʼox chijchamutik (Rom. 3:23; 5:12). Koltao li buchʼutik chacholbe mantal sventa xaʼibeik smelolal ti jsaʼ mulilutik jkotoltike, mi laje, akʼbo yil ti ta slekil yoʼonton Jeova tspojutik lokʼel li ta mulil xchiʼuk ta lajelal mi laj kakʼ xchʼunel koʼontontik ta stojolal li matanal laj yakʼ li Jesukristoe (Mar. 10:45; Evr. 2:9). Mi laj yakʼ xchʼunel yoʼontonike, xuʼ xkuxiik sbatel osil ti bu chʼabal xa mulile (Juan 3:16, 36). Yuʼun muʼyuk xa bu yan xuʼ jtatik li koltaele (Ech. 4:12). Pe mu me nakauk noʼox xavalbe skʼoplal kʼalal chajelubtas aparte ta tsobobbaile o kʼalal chachol mantale. Oyuk smalael avuʼun xchiʼuk oyuk slekil avoʼonton kʼalal chakolta yoʼ stojik ta vokol ti jech la spojutik li Kristoe. Mi tstojik ta vokol li matanal taje, jaʼ chkoltaatik sventa sjel li stalelalike, li kʼusitik tspasike xchiʼuk li kʼusitik oy ta yoʼontonike (2 Kor. 5:14, 15).

Manchuk mi jun noʼox velta laj yakʼ ta matanal xkuxlejal li Jesuse, oy-o sbalil li avie xchiʼuk ta sjunul yoʼonton yakal-o tspas yabtel kʼuchaʼal Mero Bankilal Pale (Evr. 9:28). Koltao me li buchʼu chachiʼin ta loʼil ti akʼo yaʼibe lek smelolal kʼusi smakoj li yabtel ta paleale. ¿Mi yakal van chil svokol, mi staoj loʼlael o mi muʼyuk tstsakat ta mukʼ yuʼun li yantike? Jech laj yil svokol Jesus ek kʼalal echʼ ta Balumile, jaʼ yuʼun snaʼ kʼu yelan chkaʼi jbatik kʼalal chkil jvokoltike. ¿Mi chkakʼtik venta ti skʼan jkʼanbetik vokol Dios ti akʼo xkʼuxubinutik ta skoj ti jsaʼ mulilutike? Mi la jkʼanbetik perton Dios ta skoj ti oy sbalil ti laj yakʼ ta matanal li Xnichʼone, li Jesuse jaʼ «jkoltavanej kuʼuntik ti te oy xchiʼuk Totil» xchiʼuk «jaʼ tsvaʼan sba ta jtojolaltik» (1 Juan 2:1, 2; Rom. 8:34). Koliyal ti laj yakʼ sba ta matanal li Jesuse xchiʼuk ti chtun kʼuchaʼal paleale, xuʼ xijnopajutik «li [ta] chotlebal sventa ajvalilal ta sventa li slekil yutsil oʼontonale» yoʼ ta yorailuk noʼox skoltautik li Jeovae (Evr. 4:15, 16). Manchuk mi jsaʼ mulilutik, xuʼ skoltautik Jesukristo ta skoj ti jaʼ Mero Bankilal Pale kuʼuntik sventa lek sak jol koʼontontik xijtun ta stojolal li Diose (Evr. 9:13, 14).

Tsots tajek yichʼoj yabtel li Jesuse, yuʼun akʼbil yuʼun Dios ti jaʼ Jolil li ta stsobobbail yajtsʼaklom Kristoe (Mat. 28:18; Efes. 1:22, 23). Ti jech yabtele, jaʼ tsbeiltas li tsobobbail ti kʼu yelan skʼan chile xchiʼuk ti jech kʼuchaʼal tskʼan yoʼonton li Diose. Kʼalal chachanubtas yantike, koltao me sventa xaʼibeik smelolal ti jaʼ Jolil ta tsobobbail li Jesuse ti maʼuk junuk krixchanoe (Mat. 23:10). Kʼalal sba to velta chachiʼin ta loʼil junuk krixchanoe, albo ti akʼo batuk ta jtsobajeltik ti bu ta jchantik Vivlia ti jaʼ tskoltautik li vunetik ti jaʼ chakʼ li «tukʼil xchiʼuk pʼijil [mosoile]». Albo lek smelolal buchʼu jaʼ li ‹mosoile› xchiʼuk buchʼu jaʼ li yajvale sventa teuk ta sjolik ti tsots yabtel li Kristoe (Mat. 24:45-47). Akʼbo yojtikin li moletik ta tsobobbaile xchiʼuk albo yaʼi ti kʼusi skʼan spasik li buchʼutik chkʼotik ta molale (1 Tim. 3:1-7; Tito 1:5-9). Akʼbo yaʼiik ti maʼuk yuʼun moletik li tsobobbaile, ti jaʼ noʼox tskoltautik sventa jechuk jchanbetik stalelal li Jesuse (Ech. 20:28; Efes. 4:16; 1 Ped. 5:2, 3). Albo yaʼiik ti oy ermanoetik ta spʼejel Balumil ti lek tsobol ch-abtejik ti jaʼ ventainbilik yuʼun li Kristoe.

Li ta Evanjelioetike te chalbutik ti kʼalal junchib xaʼox kʼakʼal skʼan xcham li Jesuse, xi avanik li yajchankʼoptak kʼalal och batel ta Jerusalene: «Li buchʼu chtal kʼuchaʼal Ajvalil ta sbi Jeovae» (Luk. 19:38). Mi laj xaʼox yaʼibeik lek smelolal li chanubtasel ta Vivliae, te chaʼibeik smelolal ti yichʼoj tsots yabtel ta stojolal li krixchanoetik ta jujun lume (Dan. 7:13, 14). Mi chavetʼes mantal ta tsobobbail o mi chachol mantal ta naetike, koltao me sventa xaʼibeik kʼusi smelolal xchiʼuk ti oyuk sbalil xilik ti jaʼ sventainojutik li Jesuse.

Jaʼ yuʼun akʼbo yaʼi mi lek ti kʼu yelan kichʼoj jkuxlejaltike, jaʼ svinajeb ti jchʼunojtik ti jaʼ Ajvalil li Jesukristoe xchiʼuk ti ta sjunul koʼontontik chkakʼ jbatik ta ventainele. Jaʼ akʼo ta avoʼonton li abtelal laj yalbe yajchankʼoptak ti akʼo spasike, ti jaʼo laj yalbe kʼalal laj xaʼox yichʼ tʼujel kʼuchaʼal Ajvalile (Mat. 24:14; 28:18-20). Akʼbo yil kʼusi laj yakʼ ta chanel li buchʼu «Echʼem Yutsil, Jbijubtasvanej» ta sventa li kʼusi mas tsotsik skʼoplal skʼan jpas ta jkuxlejaltike (Is. 9:6, 7; Mat. 6:19-34). Akʼbo yil kʼu yelan skʼan stalelalik li buchʼutik tstsʼakliik batel li «Jʼacʼ-Jun-Oʼntonal» ti jech laj yal komel stuke (Mat. 20:25-27; Juan 13:35). Pe kʼelo me aba un ti mu me xakʼot kʼuchaʼal jun jchapanvanej ti jaʼ xa noʼox chaval ti kʼusi lek ta pasele, jaʼ lek tijbo noʼox yoʼontonik sventa xakʼik venta mi yakʼoj sbaik ta ventainel yuʼun Kristo ta sventa ti kʼu yelan tspasike. Naʼo me ti skʼan jech xapas skotol ek kʼalal chavalbe yantik li kʼusitik laj xa yichʼ alele.

Jaʼuk snakleb xkʼot avuʼun li Kristoe. Li Vivliae tskoʼoltas kʼuchaʼal chichʼ vaʼanel jpʼej na li jchankʼopetike xchiʼuk ti jaʼ snakleb na li Jesuse (1 Kor. 3:10-15). Jaʼ yuʼun skʼan jkoltatik ti akʼo yojtikinik lek jech kʼuchaʼal chalbe smelolal li ta Vivliae. Akʼo me persa ti mu voʼotuk xa xlik stsʼakliikote, ti jaʼ akʼo stsʼakliik li Kristoe (1 Kor. 3:4-7).

Mi laj yaʼibeik lek smelolal li buchʼutik chkakʼbetik estudioe, ta me xaʼibeik smelolal ti jech chanubtasvan komel Jesus ti skʼan «[s]tsʼaklibeik batel lek tajek li yav yoke» (1 Ped. 2:21). Sventa xchʼiik batel ta mantale, albo ti akʼo skʼelik li Evanjelioetike, pe ti maʼukuk noʼox naka loʼil chilike, albo ti xuʼ xkoltaatik ta xkuxlejalike. Koltao sventa teuk ta sjolik kʼu yelan la spas sba xchiʼuk kʼu yelan stalelal echʼ li Jesuse xchiʼuk ti kʼu yelan laj yaʼi sba ta stojolal li Stote. Jech xtok koltao sventa teuk ta sjolik ti kʼu yelan kuch yuʼun prevaetik xchiʼuk vokoliletik li Jesuse, ti kʼu yelan laj yakʼ sba ta ventainel yuʼun li Stote xchiʼuk ti kʼu yelan la xkʼuxubin krixchanoetik ti jeltos svokolike. Akʼo yakʼik lek venta kuʼuntik kʼusi abtelal bat ta yoʼonton spasel li Kristoe. Jaʼ yuʼun xi tsjakʼbe sbaik kʼalal tsnuptanik preva xchiʼuk kʼalal oy kʼusi tsnop tspas ta xkuxlejalik li buchʼutik chchanik Vivliae: «¿Kʼusi van la spas jechuk Jesus ti jaʼuk jech la snuptane? ¿Mi xvinaj van ta jkuxlejal ti ta jtoj ta vokol li kʼusi spasoj ta jtojolale?».

Kʼalal chavetʼes aparte ta tsobajele, mu me xanop ti mu xa persauk chavalbe skʼoplal Kristo ta skoj ti xchʼunojik xa onoʼox li ermanoetike. Lek me ti mi tstsatsub-o xchʼunel yoʼontonik avuʼun ta sventa li kʼusi chavale. Mi jaʼ chavalbe skʼoplal li tsobajele, alo kʼuxi te tsakal skʼoplal li yabtel yichʼoj Jesus kʼuchaʼal Jolil ta tsobobbaile. Yan mi jaʼ chavalbe skʼoplal li cholmantale, akʼo ta ilel ti kʼu yelan laj yakʼ ta yoʼonton spasel li Jesuse xchiʼuk akʼo lek ta ilel kʼusi yakal tspas li avie, ti jaʼ xa Ajvalile, sventa tstsob li buchʼutik xuʼ xkuxiik sbatel osil ta achʼ Balumile.

Jamal ta aʼiel ti oy to kʼusitik skʼan jchantik ta sventa li Jesuse. Sventa xijkʼot ta melel yajtsʼaklom Kristoe, skʼan me xkakʼ xchʼunel koʼontontik ta stojolal xchiʼuk skʼan jkʼantik ta sjunul koʼontontik. Ta jchʼunbetik smantal mi jkʼanojtik ta melele (Juan 14:15, 21). Jech xtok, mi skʼanojik Jesus li krixchanoetike, jaʼ chkoltaatik sventa tukʼ xakʼ sbaik kʼalal tsnuptanik prevaetike, jech chchanbeik stalelal Kristo xchiʼuk jech chakʼik ta ilel ti lek yijik ta mantal jech kʼuchaʼal li buchʼutik ‹lek tsʼunulik xchiʼuk te oyik li ta snakleb nae› (Efes. 3:17). Jaʼ smuyubtael Jeova mi jech tspasike, li Dios ti jaʼ Stot li Jesukristoe.

«LI LEKIL AʼYEJETIK TA SVENTA LI AJVALILAL LIʼE»

OY JAYTOS li kʼusitik laj onoʼox yal Jesus ti jaʼ senyail ti liʼ xa oye xchiʼuk kʼalal poʼot xa xlaj skotol li kʼusitik oy ta balumile, li jtos senyaile jaʼ liʼe: «Li lekil aʼyejetik ta sventa li Ajvalilal liʼe ta xichʼ cholel ta spʼejel balumil sventa xaʼi skotol li jteklumetike, vaʼun ta xtal li slajebe» (Mat. 24:14).

Ta melel, ¿kʼusi van smakojbe skʼoplal ti skʼan alel batel ta jamal li lekil aʼyejetike? Jaʼ skʼoplal li Ajvalilal yuʼun Dios ti xi la xchanubtasutik ta skʼanel ta orasion li Jesuse: «Akʼo taluk li Ajvalilal avuʼune» (Mat. 6:10). Li ta Apokalipsis 11:15 te chalbe skʼoplal «li ajvalilal [...] yuʼun li Kajvaltik [Jeova] xchiʼuk li Skristoe», li buchʼu chakʼ ta melel li abtelale jaʼ li Jeovae, jaʼ chichʼ akʼbel li Kristoe. Li cholmantal ta jpastik ta jkʼakʼaliltik ti yaloj Jesuse jaʼ mas to chpuk batel, jaʼ mu sta li ta skʼakʼalil jchankʼopetike, xi laj yalike: «Nopajem xa tal ta atojolalik li Ajvalilal yuʼun Diose» (Luk. 10:9). Ta melel te xa oy Jesus ta stojolal krixchanoetik kʼalal yichʼoj xaʼox tʼujel ta Ajvalile. Pe jech kʼuchaʼal chal ta Mateo 24:14 li Jesuse laj yal ti mas to chichʼ cholel batel mantal sventa xkʼot ta pasel li kʼusi tskʼan yoʼonton Diose.

Li j-alkʼop Daniele oy kʼusi akʼbat yil yuʼun Dios ta sventa ti mas to chichʼ cholel batel li mantale: la sta ta kʼelel li buchʼu «xcoʼlaj xchiʼuc cristiano yilel» ti jaʼ Jesukristo, ti yakal ch-akʼbat yabtel yuʼun li «Bochʼo mu snaʼ xlaj yoraile», li Jeovae, «laj yichʼ acʼbel tsots yabtel; laj yichʼ acʼbel svuʼel, xchiʼuc laj yichʼ acʼbel spas mantal. Li cristianoetic ta jujun lum, ta jujun banamil, ta jujuchop cʼope te chtunic ta stojol» (Dan. 7:13, 14). Taje kʼot ta pasel ta 1914 ti laj yichʼ yabtel li Jesuse. Vaʼun laj yichʼ jipel tal ta Balumil li Satanas xchiʼuk spukujtake (Apok. 12:7-10). Vaʼun jaʼo te lik talel li slajebal kʼakʼale. Pe yoʼ to muʼyuk chtal li slajebal kʼakʼale, ta xichʼ cholel ta spʼejel Balumil ti yakal xa tspas mantal ta vinajel li Ajvalilal Mesias ti svaʼanoj Jeovae. Skotol krixchano chichʼik cholbel mantal, jech xtok ti kʼu yelan stalelalik chchʼamik li mantale jaʼ te chakʼik ta ilel mi chchʼamik ti tsventainbe «yabtel ajvaliletic» li Buchʼu toj toyol oye (Dan. 4:32).

Ti lek xkaltike oy to onoʼox kʼusitik chkʼotanuk ta pasel. Xi ta jkʼantik-oe: «Akʼo taluk li Ajvalilal avuʼune», pe taje maʼuk skʼan xal ti muʼyuk to chventainvan li Ajvalilale, jaʼ skʼan xal ti akʼo xkʼot ta pasel li albil kʼopetik te chal ta Daniel 2:44 xchiʼuk ta Apokalipsis 21:2 kʼalal ta 4. Tskʼatajes ta paraiso li Balumile xchiʼuk te chnakiik li buchʼutik skʼanojik Diose xchiʼuk li buchʼutik skʼanoj xchiʼilike. Taje jaʼ chkalbetik batel skʼoplal kʼalal ta jcholtik batel «li lekil aʼyejetik ta sventa li Ajvalilal[e]», pe ta sjunul koʼontontik chkalbetik skʼoplal xtok ti akʼbil xa yabtel yuʼun Jeova li Jesuse. ¿Mi chavalbe skʼoplal Ajvalilal kʼalal chachol mantale?

Albo smelolal li Ajvalilale. ¿Kʼuxi xuʼ spas avuʼun li abtelal ta xcholbel skʼoplal li Ajvalilal yuʼun Diose? Skʼan onoʼox me ta ora skʼan xlik avalbe skʼoplal li Ajvalilale manchuk mi yan-o ti kʼuxi chalikes aloʼile.

Li kʼusi xuʼ jpastik ti tsots tajek skʼoplale jaʼ ti jkʼelbetik o kalbetik skʼoplal li tekstoetik ti chalbe skʼoplal li Ajvalilale. Akʼo me venta mi xaʼibeik smelolal li kʼusi yakal chavalbe skʼoplale. Xuʼ van mu baluk noʼox ti chkalbetik smelolal ti kʼusi jaʼ li jun Ajvalilale, yuʼun bakʼintike oy junantik krixchanoetik ti vokol chaʼiik ta chʼunel ti oy jun Ajvalilal ti mu xkiltike. Mi jech taje, skʼan jkʼeltik kʼuxi xuʼ jkoltatik sventa xaʼibeik lek smelolal. Xuʼ xkalbetik skʼoplal ta sventa li ikʼe, manchuk mi mu xvinaj ta kʼelel, jchʼunojtik ti oy ta melele, yuʼun jaʼ kuxulutik-o yuʼun. Manchuk mi mu xkil ta jsatik ek li Buchʼu la spas li ikʼe, jamal ta kʼelel ti oy sjuʼel li Buchʼu la spase. Li Vivliae chal ti jaʼ «Ajvalil ti oy-o sbatel osile» (1 Tim. 1:17). Yan ti kʼuxi xuʼ jkoltatike jaʼ ti xkalbetik skʼoplal krixchanoetik ti muʼyuk yilojik li skapital slumalike xchiʼuk ti muʼyuk yilojik li ajvalil yuʼunike. Jaʼ noʼox te chilik ta television, ta periodiko o ta yantik bu chilik. Jaʼ jech ek li Vivlia ti pukbil mas ta 2,600 jeltos kʼopetike te chalbutik ta sventa li Ajvalilal yuʼun Diose, buchʼu ti akʼbil yabtele xchiʼuk ti kʼusi yakal tspas li ta jkʼakʼaliltike. Li Jkʼel osil ta toyole jaʼ jun revista ti pukbil ta ep ta chop kʼopetik ti jaʼ mu sta li yantik vunetike, te chal ta baʼyel pajina ti kʼu yuʼun chichʼ pukele: «Yakal chalbe skʼoplal li Ajvalilal yuʼun Jeovae».

Oy to yan ti kʼuxi xuʼ jkoltatik li krixchanoetik yoʼ xaʼibeik smelolal kʼusi jaʼ li Ajvalilale, jaʼ ti xkalbetik skʼoplal li kʼusi oy ta yoʼontonik ti akʼo spas li ajvalil yuʼunike, jech kʼuchaʼal ti oyuk kʼuxi xlaj skʼoplal ti abol jbatik ta takʼine, li paskʼope, li milbaile, ti jkʼanojuk jba jkotoltik ti mu ventauk kʼusi jtsʼunbaltike, ti oyuk mas lek jpoxtavanejetike xchiʼuk ti oyuk mas lek bu xijchanunaje. Akʼbo yil ti jaʼ noʼox ta stojolal Ajvalilal yuʼun Dios xuʼ jtatik li kʼusitik taje xchiʼuk li kʼusi tskʼan koʼontontike (Sal. 145:16).

Akʼo persa sventa chʼiuk ta yoʼontonik avuʼun ti tskʼanik ventainel yuʼun li Ajvalilale ti jaʼ kʼotem ta Ajvalil li Jesukristoe. Albo yaʼiik ti jaʼ noʼox jun senyail li skʼelobiltak juʼelal la spas kʼalal ay ta Balumile ti mas to jech tspas ta jelavele. Nopajtik noʼox xavalbe yaʼiik li yan sba yutsil stalelal laj yakʼ ta ilele (Mat. 8:2, 3; 11:28-30). Albo yaʼiik smelolal ti cham ta jkojtike xchiʼuk ti chaʼkuxesat yuʼun Dios ta vinajel ti jaʼ te ch-ajvalilaj ti mu xa snaʼ xchame (Ech. 2:29-35).

Jamal xavalbe ti yakal xa ch-ajvalilaj ta vinajel li Ajvalilal yuʼun Diose. Pe teuk me ta ajol ti ep buchʼutik muʼyuk jech yakal chil ta xkuxlejalik li kʼusitik yakal xa tspas li Ajvalilale. Jaʼ yuʼun akʼbo yojtikinik xchiʼuk jakʼbo mi snaʼik kʼusi laj yal Jesukristo ta sventa taje. Albo yaʼiik jaytosuk senyailtak ti te chal ta Mateo 24, Markos 13 xchiʼuk ta Lukas 21. Vaʼun jakʼbo yaʼiik ti kʼu yuʼun jaʼ chakʼ jchʼuntik ti ochem xa ta ajvalil ta vinajel li Kristo ta sventa li kʼusitik chkʼotanuk ta pasele, mi laje, kʼelik kʼusi chal ta Apokalipsis 12:7 kʼalal ta 10, xchiʼuk 12.

Akʼbo yaʼiik ti lek jamal xvinaj ti kʼu yelan yakal xa chventainvan li Ajvalilal jech kʼuchaʼal chal ta Mateo 24:14 xchiʼuk jamal xavalbe yaʼiik ti oy chanubtasel ta Vivlia ta spʼejel Balumile (Is. 54:13). Albo skʼoplal ti oy ep ta tos chanob vun ti yakal tstabeik sbalil li stestigotak Jeova ti naka ta Vivlia chichʼ lokʼesele xchiʼuk ta moton chichʼ pasel. Akʼbo yaʼiik ti maʼuk noʼox ta jcholtik mantale, yuʼun ta jchanubtastik krixchanoetik xtok ti ta moton ta jpastik mas ta 230 lumetike. ¿Mi oy van junuk ajvalil ti jech yakal tspas ta spʼejel Balumile? Albo yaʼiik ti akʼo batikuk ta Salon sventa Tsobobbail xchiʼuk li ta asambleaetik tspasik li stestigotak Jeovae sventa xakʼik venta stukik ti kʼu yelan tstabeik sbalil li chanubtasele (Is. 2:2-4; 32:1, 17; Juan 13:35).

¿Mi xaʼibe smelolal kʼuxi te tsakal skʼoplal xkuxlejal ta sventa Ajvalilal yuʼun Dios li krixchanoe? Jaʼ van mas lek ti xavalbe ta slekil avoʼonton ti yuʼun oy kʼusi xuʼ jtatik yuʼun li Ajvalilal ti jech chbat avulaʼane, jaʼ ti xuʼ stʼuj stuk ti akʼo xventainat yuʼun li Ajvalilal yuʼun Diose. ¿Kʼuxi xuʼ stʼujik? Jaʼ mi la xchanik xchiʼuk mi la xchʼunik li smantaltak Diose (Deut. 30:19, 20; Apok. 22:17).

Koltao me ti jaʼuk baʼyel xakʼ ta xkuxlejalik li Ajvalilale. Mi laj xaʼox xchʼunik li lekil aʼyej ta sventa li Ajvalilale, oy to kʼusi skʼan snop spas ta xkuxlejalik. ¿Mi tsots van skʼoplal chaʼi ta xkuxlejalik li Ajvalilal yuʼun Diose? Xi laj yalbe mantal yajchankʼoptak li Jesuse: «Saʼilanik me baʼyel chaʼa li Ajvalilal yuʼun [Diose]» (Mat. 6:33). ¿Kʼuxi van xuʼ xakolta ermanoetik sventa spas yuʼunik li mantal taje? Jaʼ ti xavakʼ ta ilel ti jech yakal chapas li voʼote xchiʼuk albo yaʼiik ti oy kʼusitik xuʼ jpastik ta slumal Jeova sventa xkakʼtik ta ilel ti jaʼ baʼyel chkakʼ ta jkuxlejaltik li Ajvalilal yuʼune. Jakʼbo mi oy jech snopojik xchiʼuk xuʼ xavalbe skʼoplal ermanoetik ti jech yakalik spasele. Xuʼ xavalbe skʼoplal loʼiletik ta Vivlia ti jaʼ chkoltaatik sventa skʼanik mas li Jeovae. Jech xtok, akʼbo yilik ti yuʼun oy ta melel li Ajvalilale xchiʼuk ti tsots skʼoplal skʼan xkaltik batele. Mas me lek kʼusi chkʼot ta pasel mi ta jkoltatik yoʼ oyuk ta yoʼontonik li cholmantale, jaʼ mu sta mi naka noʼox chkalbetik kʼusi skʼan spasike.

Li lekil aʼyej ti yakal chkalbetik skʼoplale jaʼ me te tsakal skʼoplal ta melel li Jeova Diose, li Jesukristoe xchiʼuk li Ajvalilal yuʼune. Li kʼusitik taje skʼan me xkakʼtik ta ilel kʼalal ta jcholtik mantal ta buyuk noʼoxe, ta tsobobbail xchiʼuk ti vinajuk ta jkuxlejaltike. Vaʼun jaʼ jech chkakʼtik ta ilel ti yakal ta jtabetik sbalil li Chanob vun sventa Kabteltik yuʼun Diose.