Kapitulo 14

¿Kʼuxi tsbeiltas s-organisasion li Jeovae?

1. ¿Kʼusi chalbutik Vivlia ta sventa s-organisasion li Jeovae, xchiʼuk kʼu yuʼun tsots skʼoplal ta jtojolaltik?

¿MI OY s-organisasion li Diose? Li sKʼop Dios ti yakʼoj ta naʼel stuke chal kaʼitik ti oye, xchiʼuk chal kaʼitik ti kʼuyelan li jvokʼ s-organisasion ta vinajel ti toj labal sbae (Ezequiel 1:1, 4-14; Daniel 7:9, 10, 13, 14). Mu xkiltik ta jbatsʼi satik, yuʼun mu xvinaj ta kʼelel, manchuk mi jech, toj tsots ch-abtej tal ta stojolal li buchʼutik ta xichʼik ta mukʼ Jeova li avie (2 Reyes 6:15-17). Jech xtok, oy jvokʼ s-organisasion Jeova ti xkiltik liʼ ta Balumile. Li Vivliae ta skoltautik ta yaʼibel smelolal kʼusi taje xchiʼuk kʼuxi ta sbeiltas li Jeovae.

Chichʼ ojtikinel li jvokʼ ti xvinaje

2. ¿Kʼusi achʼ tsobobbail la stsob li Diose?

² Li slumal Israele jaʼ toʼox stsobobbail Dios ti jalij 1,545 jabile (Hechos 7:38). Pe ta skoj ti muʼyuk la xchʼunbeik li Smantaltake xchiʼuk ti la spʼajbeik li xNichʼone, muʼyuk lek iʼilatik yuʼun li Jeovae. Li Jesuse xi laj yalbe li judioetike: «Aʼyio avaʼiic un, jipbil tenbil ta xcom avuʼunic ti ana acʼulebique», xi (Mateo 23:38, Ch). Ta skoj taje li Jeovae la stsob jun achʼ tsobobbail, te la spas jun achʼ trato xchiʼuk. Li kʼuyepalik taje jaʼik 144,000 ta skotol ti tʼujbilik yuʼun Dios sventa chbatik ta vinajel xchiʼuk li Jesuse (Apocalipsis 14:1-4).

3. ¿Kʼusi kʼot ta pasel ta Pentecostés ta sjabilal 33 t.jkʼ. ti jamal laj yakʼ ta ilel ti achʼ tsobobbail xa ta stunes li Diose?

³ Li buchʼutik baʼyel ochik li ta achʼ tsobobbail taje, laj yichʼik tʼujel ta xchʼul espiritu Jeova ta Pentecostés ta sjabilal 33 t.jkʼ. Xi chal Vivlia ta sventa li kʼusi labal sba kʼot ta pasel taje: «Cʼalal sta scʼacʼalil ti qʼuin Pentecostese, ti jchʼunolajeletique stsoboj sba scotolic ti bu onoʼox oyique. Ta jech yepal oy cʼusi tsots xjumet lic talel ta vinajel jech cʼu chaʼal jun tsatsal icʼ ti xjumet noʼox cʼot ta na ti bu oyic ti jchʼunolajeletique. Laj yilic coʼol sʼelan leb cʼocʼ laj xchʼacan sba batel ta jujun ti cʼu yepal tsobolique. Scotol ti jchʼunolajeletique uninbil cʼotic yuʼun ti Chʼul Espiritue» (Hechos 2:1-4, Ch). Jaʼ jech lek jamal laj yakʼ ta ilel Dios ta xchʼul espiritu ti jaʼ xa tstunes li krixchanoetik taje, sventa chkʼot ta pasel li kʼusi tskʼan yoʼontone, ti jaʼ beiltasbilik yuʼun li Jesucristo te ta vinajele.

4. ¿Buchʼutik ti kʼotem ta s-organisasion Jeova ti xvinaj ta kʼelel li avie?

⁴ Li skomelal 144,000 ti liʼ to oyik ta Balumile muʼyuk xa me epik. Pe jech kʼuchaʼal chal jun albil kʼope oy to yan xchiʼilik, jaʼ li «epal cristianoetic» ti te skʼoplalik li ta «yantic [chijetike]», ti ta smiyonal xa noʼox yepalike. Jesús, li Lekil Jchabiej chije, spasoj ta jchop li chaʼvokʼ krixchanoetik taje, jun noʼox ti Buchʼu chchabiatike: jaʼ li Jesuse (Apocalipsis 7:9; Juan 10:11, 16). Skotolik taje jaʼik jun tsobobbail ti jmoj oyike, jaʼ xkaltik, li s-organisasion Jeova ti xvinaj ta kʼelele.

Organisasion ti beiltasbil yuʼun Diose

5. ¿Buchʼu ta sbeiltas li s-organisasion Diose, xchiʼuk kʼu yelan ta spas?

⁵ Li yaʼyej Vivlia ti chal «jaʼ li steclum cuxul Dios» ti xie, jamal chal kaʼitik ti buchʼu tsbeiltase. Li organisasione jaʼ ventainbil yuʼun Dios, jaʼ tsbeiltas xkaltik. Li stuke tstunes Jesús sventa tsbeiltas li slumale, yuʼun jaʼ biinem ta Jolil ti mu xvinaj ta kʼelel ta tsobobbaile, ta stunes xtok li sKʼop yakʼoj ta naʼele, li Vivliae (1 Timoteo 3:14, 15; Efesios 1:22, 23; 2 Timoteo 3:16, 17).

6. 1) ¿Kʼuxi vinaj ta stojolal li tsobobbail ta baʼyel siglo li beiltasel ti likem tal ta vinajele? 2) ¿Kʼusi svinajeb ti jaʼ to Jolil ta tsobobbail li Jesuse?

⁶ Li beiltasel ti te chlik tal ta vinajele, ep ta velta vinajem: ta Pentecostés (Hechos 2:14-18, 32, 33); kʼalaluk jun yaj-anjel Jeova la spas ti akʼo xichʼ cholel li lekil aʼyej ta yosilal Africae; kʼalaluk jel li Saulo ti likem tal ta Tarsoe laj yichʼ aʼyel mantaletik ti laj yal Jesuse, xchiʼuk kʼalaluk lik xcholbe mantal jyanlum krixchanoetik li Pedroe (Hechos 8:26, 27; 9:3-7; 10:9-16, 19-22). Ta mas tsʼakale, muʼyuk xa laj yichʼ aʼiel ti buchʼutik chkʼopojik tal ta vinajele, muʼyuk xa laj yakʼ sba ta ilel anjeletik xchiʼuk muʼyuk xa laj yichʼ pasel skʼelobiltak juʼelal ta yip chʼul espiritu. Pe akʼo mi jech, li Jesuse xi onoʼox laj yal ta melele: «Naʼic me, te me jchiʼinojoxuc o scotol cʼacʼal cʼalal to ta slajebal cʼacʼal», xi (Mateo 28:20; 1 Corintios 13:8). Li avie, li yajrextikotak Jeovae xilik ti beiltasbilik yuʼun Jesuse. Ti manchukuk taje, muʼyuk me ta xkʼot ta pasel yuʼunik xcholbel skʼoplal li Ajvalilale, yuʼun toj echʼem vokolil ta snuptanik.

7. 1) ¿Buchʼutik li «jʼabtel ti jun [tukʼ, NM] yoʼnton [...], ti lec bije», xchiʼuk kʼuxi jnaʼtik? 2) ¿Kʼusi albatik yuʼun Jesús ti akʼo spasik li «jʼabtel» taje?

⁷ Kʼalal jutuk xaʼox skʼan xcham li Jesuse, laj yalbe yajtsʼaklomtak li skʼoplal «jʼabtel ti jun [tukʼ, NM] yoʼnton [...], ti lec bije», taje ta xichʼ yabtelik ti stuk noʼox jeche, jaʼ ta xakʼ li Yajvalike, li Jesuse. Li «jʼabtel» taje oy xa onoʼox ti kʼalaluk bat ta vinajel li Ajvalile, jech noxtok tsots ch-abtej kʼalaluk mi sut tal li Yajval abtelale, taje mu me xvinaj ti kʼuyelan tsut tale ti yichʼoj xaʼox me tal yip sventa ch-ajvalilaje. Ti vaʼ yelane mu stakʼ jun krixchano ta spas li abtelale, pe li tsobobbail ti stʼujoj Cristoe chkʼot ta pasel yuʼun. Ta sventa ti la sman ta xchʼichʼel li jvokʼ krixchanoetik taje, xuʼ xal Jesús ti kʼotemik ta «jʼabtel» yuʼune. Albatik ti akʼo spasik ta yajtsʼaklom Cristo li krixchanoetike xchiʼuk ti akʼo «smacʼlin[ik]» batele, ti akʼo xakʼbeik sveʼel ta mantal «cʼalal ta sta yorail[e]» (Mateo 24:45-47, 28:19; Isaías 43:10; Lucas 12:42; 1 Pedro 4:10).

8. 1) ¿Kʼusitik sbainoj ta spasel li j-abtel tanae? 2) ¿Kʼu yuʼun toj tsots skʼoplal ti skʼan jtsaktik lek ta venta li chanubtasel chakʼbutik ta stojolal li buchʼutik yakʼoj Diose?

⁸ Ta 1914, kʼalal mu xvinaj ta kʼelel isut tal li Yajval abtelal taje, li j-abtele tukʼ yoʼonton tspas batel li abtelal akʼbat komele, jech un chaʼa, kʼuchaʼal chkilbetik sprevailtake, li ta sjabilal 1919 akʼbat mas yabtel. Ti jayib xa jabil echʼem tale yichʼoj albel tal skʼoplal ta spʼejel Balumil li Ajvalilale xchiʼuk yichʼoj tsobel tal epal krixchanoetik ti chichʼik ta mukʼ Jeova sventa kuxul chkomik li ta mukʼta tsatsal vokolile (Mateo 24:14, 21, 22; Apocalipsis 7:9, 10). Taje skʼanik makʼlinel ta mantal ek, jaʼ chmakʼlinatik yuʼun li j-abtele. Jaʼ jech chaʼa, sventa ta jlekubtasbetik yoʼonton li Jeovae, skʼan jtsaktik lek ta venta li chanubtasel chakʼbutik ta stojolal li j-abtele xchiʼuk skʼan xkakʼ ta jkuxlejaltik li kʼusitik ta jchantike.

9, 10. 1) Li ta baʼyel sigloe, ¿kʼuxi laj yichʼ chapel li chanubtasel ti mu stakʼ naʼel leke xchiʼuk kʼuxi laj yichʼ beiltasel li chol mantale? 2) ¿Kʼuxi ta xichʼ beiltasel li abtelaletik ta slumal Jeova li avie?

⁹ Bakʼintike, mu stakʼ naʼel lek ta sventa li chanubtasele xchiʼuk ta sventa li kʼusitik skʼan pasele. ¿Kʼusi skʼan pasel kʼalal jech taje? Li kapitulo 15 yuʼun Hechose te chal kaʼitik kʼuxi la xchapanik jun loʼil ta sventa li jyanlum krixchanoetik ti ipasik ta jchʼunolajeletike. Li loʼile laj yichʼ akʼbel ta skʼob li jtakboletike xchiʼuk li moletik ta Jerusalene, ti jaʼ li jtsop jbeiltasvaneje. Melel onoʼox ti mu skotoluk lek chbat yuʼunik ta spasele, pe tunesatik yuʼun Jeova sventa chchapanik li loʼil taje. Kʼalal laj xaʼox xchanik jayibuk loʼiletik ta Vivlia ta sventa taje xchiʼuk ti laj yilbeik sprevail ti sjamoj xa be li chʼul espiritu sventa chichʼ cholbel mantal li jyanlum krixchanoetike, la snopik ti kʼusi skʼan spasike. Lek li kʼusi la spasike, jaʼ yuʼun akʼbatik bendision yuʼun li Diose (Hechos 15:1-29; 16:4, 5). Li jtsop jbeiltasvanej taj xtoke la stakik batel jayvoʼ viniketik sventa tspukbeik batel skʼoplal li Ajvalilale.

¹⁰ Li ta jkʼakʼaliltike, li Jtsop Jbeiltasvanej ta s-organisasion Jeova ti xuʼ chkiltik liʼ ta Balumile, jaʼik ermanoetik ti yichʼojik tʼujel ta chʼul espiritue, jelajtik slumalik bu likemik tal, te oyik li ta smeʼ nail abtelal (sede mundial) yuʼun yajrextikotak Jeovae. Beiltasbilik yuʼun Jesucristo, sventa ta xalik batel ti jaʼuk noʼox Jeova xichʼ ichʼel ta mukʼ ta spʼejel Balumile, yuʼun jaʼ ta skʼelik batel li abtelal ta chol mantal ti tspasik batel li yajrextikotak Jeova ta smilal noʼox tsobobbailetike. Li buchʼutik ta Jtsop Jbeiltasvanej taje jmoj snopbenalik xchiʼuk li jtakbol Pablo ti xi la stsʼibabe li yermanotake: «Mu yuʼunuc ta jcʼan vuʼun yajvalun xchʼunojel avoʼntonic chicʼot. Jaʼ noʼox ta jcʼan ta jcoltaoxuc, yuʼun jech xcuxet noʼox avoʼntonic. Yan li xchʼunojel avoʼntonic ta stojol Cajvaltique jnaʼoj ti staoj yav achʼunojic oe» (2 Corintios 1:24).

11. 1) ¿Kʼuxi ta xichʼik biiltasel li moletik xchiʼuk li yajkoltaobbatake? 2) ¿Kʼu yuʼun skʼan jkolta jbatik ta yabtelik li ermanoetik ti biiltasbilike?

¹¹ Li yajrextikotak Jeova ta spʼejel Balumile chakʼbeik ta skʼob li Jtsop Jbeiltasvanej sventa akʼo stʼuj ermanoetik ti lek xtojobike. Jech xtok, li ermanoetik taje albilik ek ti xuʼ tsbiiltasik moletik xchiʼuk yajkoltaobba moletik sventa chchabiik li tsobobbailetike. Li kʼusitik skʼan spasik sventa tstaik li abtelaletik taje te chal ta Vivlia, xchiʼuk noxtok snaʼojik ti maʼuk tukʼil krixchanoetike, ti muʼyuk tukʼ chbat yuʼunik skotole. Li moletik ti chalik ti xuʼ tsta yabtel ta tsobobbail li jun ermanoe xchiʼuk li moletik ti ta xbiiltasvanike toj tsots me yabtelik ta stojolal li Diose (1 Timoteo 3:1-10, 12, 13; Tito 1:5-9). Jaʼ yuʼun ta skʼanbeik Xchʼul espiritu sventa chkoltaatik xchiʼuk ta saʼik li koltael ta sKʼop ti yakʼoj ta naʼele (Hechos 6:2-4, 6; 14:23). Kakʼtik ta ilel ti oy ta koʼontontik stojel ta vokol li «krixchanoetik kʼuchaʼal matanaletik[e]», yuʼun jaʼ chi skoltautik sventa «jech jcotoltic coʼol oy xchʼunojel coʼntontic chijcʼot» (Efesios 4:8, NM, 11-16).

12. Li Jeovae, ¿kʼu yelan ta stunes li antsetik ti kʼu yelan xchapanoj li slumale?

¹² Li Vivliae ta xal kaʼitik ti jaʼ noʼox viniketik oy ta sbaik skʼelel li tsobobbaile. Ti jech taje maʼuk smelolal ti mu xtun ch-ilatik li antsetike, moʼoj, yuʼun oy jlom antsetike, ta xuʼuninik ek li Ajvalilal ta vinajele, ta skotolike, ep li abtelal ta spasik ta sventa li chol mantale (Salmo 68:11). Jech noxtok, kʼalal lek tspasik batel li yabtelik ta yutsʼ yalalik li antsetike, mas to tslekubtasbeik batel skʼoplal li tsobobbaile (Tito 2:3-5). Manchuk mi jech, li ta tsobobbaile jaʼ noʼox chchanubtasvanik li viniketik ti biiltasbilik ta sventa taje (1 Timoteo 2:12, 13).

13. 1) Jech kʼuchaʼal chal li Vivliae, ¿kʼu la yelan skʼan ta xil yavilik li moletike? 2) ¿Kʼusi jmotontik xuʼ jkʼupin jkotoltik?

¹³ Li ta balumile tsots skʼoplalik ilbilik li buchʼutik yichʼojik tsots yabtelike. Yan li s-organisasion Diose jaʼ stsakojik ta mukʼ li mantal liʼe: «Li bochʼo biqʼuit ta xacʼ sba avuʼunique, jaʼ banquilal ta xcʼot» (Lucas 9:46-48; 22:24-26). Li Vivliae ta xalbe moletik ti akʼo mu mukʼuk xakʼ sbaik ta stojolal li yuʼuntak Diose, moʼoj, yuʼun ti kʼusi skʼan spasike chaʼa, jaʼ ti akʼo lekuk ta chanbel stalelalik ta stojolal li chijetike (1 Pedro 5:2, 3). Maʼuk noʼox jayvoʼ li buchʼutik tʼujbilik ti oy smotonike, moʼoj, yuʼun skotol li yajrextikotak Jeovae, viniketik xchiʼuk antsetik, oy smoton yichʼojik, jaʼ ti xuʼ chakʼik ta ilel skʼoplal li Ajvalil ta vinajel-balumil ti kʼalal bikʼit ta xakʼ sbaik ta yalel batel li Sbie xchiʼuk ti ta xakʼik batel ta ojtikinel ta butikuk noʼox li Ajvalilal Yuʼune.

14. Tuneso li tekstoetik te tsʼibabile, vaʼun takʼo li sjakʼobiltak te ta yolon parafoe.

¹⁴ Toj lek ti xi ta jakʼbe jbatike: «¿Mi xkaʼibe lek ta melel smelolal kʼuxi tsbeiltas Jeova li s-organisasion liʼ ta Balumile? ¿Mi xvinaj ta jtalelal, ta jkʼopojel xchiʼuk ta kʼusitik ta jpas?». Mi ta jnopbetik lek smelolal li kʼusitik ta jchantik liʼ ta olone ta me xi skoltautik ta skʼelel kʼu kelantik.

Mi ta melel chkakʼ akʼo spasun ta mantal li Cristo, li Jolil ta tsobobbaile, ¿kʼusi skʼan ta jpas, jech kʼuchaʼal chal li versikuloetik liʼe? (Mateo 24:14; 28:19, 20; Juan 13:34, 35.)

Kʼalal ta sjunul koʼonton ta jchʼam li matanaletik ta mantal ti chtal ta stojolal li «jʼabtel ti jun [tukʼ, NM] yoʼnton [...], ti lec bije» xchiʼuk ta stojolal li Jtsop Jbeiltasvanej yuʼune, ¿buchʼutik ta xkichʼ ta mukʼ ta melel? (Lucas 10:16.)

Li buchʼutik te ta tsobobbaile, ¿kʼu yelan skʼan ta skʼelik li yermanoike, mas to li moletike? (Romanos 12:10.)

15. 1) ¿Kʼusi chakʼ ta ilel li jtalelaltik ta stojolal s-organisasion Jeova ti xkiltik liʼ ta Balumile? 2) ¿Kʼuxi chkakʼtik ta ilel ti jaʼ jun jutkʼop li Diabloe xchiʼuk ti xmuyubajuk yoʼonton kuʼuntik li Jeovae?

¹⁵ Li avie, li Jeovae ta sbeiltas li yajtuneltak ta stojolal li s-organisasion ti xvinaj ta kʼelel liʼ ta Balumil ti oy ta skʼob li Cristoe. Jech un chaʼa, ti kʼuyelan chkakʼtik ta ilel jtalelaltik ta stojolal li s-organisasione, jaʼ me te chvinaj ti kʼuyelan oyutik ta stojolal li ajvalilal yuʼun Diose (Hebreos 13:17). Li Satanase ta xal ti jaʼ noʼox batem ta koʼonton jba jtuktike. Jech un chaʼa, mi ta jkoltatik yantik kʼalal jech chtun yuʼunik chkiltike xchiʼuk ti mu yaleluk xa ta jkʼantik kʼelel li voʼotike, ta me xkakʼtik ta ilel ti jaʼ jun jutkʼop li Diabloe. Kʼalal jkʼanojtik xchiʼuk kichʼojtik ta mukʼ li buchʼutik oy yabtelik ta tsobobbaile, xchiʼuk muʼyuk jech ta jpas jtalelaltik ti lek xa chi jkʼopojutik yilel ta stojolal krixchanoetik sventa ta jsaʼtik li kʼusi ta jkʼan jtuktike, jaʼ chmuyubaj-o yoʼonton kuʼuntik li Jeovae (Judas 16; Hebreos 13:7). Kʼalal tukʼ koʼontontik ta stojolal s-organisasion li Jeovae chkakʼtik ta ilel ti jaʼ jDiostik li Jeovae xchiʼuk ti jmoj tsobolutik ta yichʼel ta mukʼe (1 Corintios 15:58).

Svulesobil ta joltik

• ¿Kʼusi jaʼ li s-organisasion Jeova ti xvinaj ta kʼelel li avie? ¿Kʼusi abtelal tspas?

• ¿Buchʼu yichʼoj biiltasel ta Jolil li ta tsobobbaile, xchiʼuk kʼusitik tstunes sventa tsbeiltasutik batel ta slekil yoʼonton?

• ¿Kʼusi jlekil talelaltik skʼan ta jtsʼitestik ta stojolal li buchʼutik te oyik ta s-organisasion li Jeovae?

[Lokʼol ta pajina 133]

Li Jeovae ta sbeiltasutik ta stojolal s-organisasion ti xvinaj ta kʼelel liʼ ta Balumil ti oy ta skʼob li Cristoe