Jtsatsubtas jbatik li ta tsobobbaile

«Ipaj svocolic li jujutsob jchʼunolajeleti[ke]. Jun xa yoʼntonic laj yichʼic ta mucʼ li Cajvaltique.» (HECHOS 9:31.)

1. ¿Kʼusitik ta jakʼtik ta sventa li tsobobbail yuʼun Diose?

LI TA Pentecostés ta sjabilal 33 ta jkʼakʼaliltike, li Jeovae la xchʼam kʼuchaʼal jun achʼ lum jtsop yajtsʼaklomtak Cristo: li «Israel [...] ta sventa Diose» (Gálatas 6:16). Li yajtsʼaklomtak Cristo ti yichʼojik tʼujel ta espiritue laj yichʼik biiltasel ta «jchʼunolajeleti[k]» ek o tsobobbail yuʼun Dios jech kʼuchaʼal chal Vivliae (1 Corintios 11:22). Jaʼ yuʼun chaʼa, ¿kʼusitik smakoj taje? ¿Kʼuxi chapanbil li tsobobbail yuʼun Diose? ¿Kʼuxi ch-abtej ta Balumil manchuk mi jelel bu nakajtik li buchʼutik tee? Jech noxtok, ¿kʼuxi ch-abtej ta jkuxlejaltik xchiʼuk kʼuxi chakʼ jmuyubajeltik?

2, 3. ¿Kʼuxi laj yakʼ ta ilel Jesús ti lek chapal li tsobobbaile?

² Jech kʼuchaʼal laj kiltik ta yan xchanobile, li Jesuse kak laj yalbe skʼoplal li slikeb stsobobbail yajtsʼaklomtak ti yichʼojik tʼujele, yuʼun xi laj yalbe li jtakbol Pedroe: «Li ta sba ton liʼe [ti jaʼ Jesucristoe] ta jvaʼan li tsobobbail kuʼune, xchiʼuk muʼyuk bu ta stsalat yuʼun li stiʼiltak Hadese», xut (Mateo 16:18, NM). Jech xtok, kʼalal liʼ toʼox oy xchiʼuk li yajtakboltake, laj yal mantal sventa kʼuxi ch-abtej xchiʼuk kʼuxi chapal li tsobobbail ti poʼot xaʼox xlike.

³ Li Jesuse laj yakʼ ta ilel ta kʼusitik la spas xchiʼuk ta skʼopojel ti oy buchʼutik tsbeiltas li tsobobbaile, ti chtunik ta stojolal li buchʼutik te oyike. Xi laj yale: «Xanaʼic cʼu xʼelan ta spasic li ajvaliletic yuʼun yanlum cristianoetique. Jaʼ noʼox ta spasvanic ta mantal. Li banquilaletic yuʼunique jaʼ noʼox ta xʼutsʼintavanic. Li voʼoxuque mu me jechuc xapasic. Li bochʼo tscʼan banquilal ta xcʼot avuʼunique, acʼo spas sba ta avajtunelic. Li bochʼo tscʼan ichʼbil ta mucʼ avuʼunique acʼo cʼotuc jech chac cʼu chaʼal amozo acotolic», xi (Marcos 10:42-44). Jamal ta aʼiel chaʼa, ti tsobobbail yuʼun Diose maʼuk me krixchanoetik ti chʼakajtik o ti mu sventauk sbaike, moʼoj, yuʼun jaʼ krixchanoetik ti lek chapalike xchiʼuk ti jmoj tsobol tskolta sbaike.

4, 5. ¿Kʼuxi chvinaj ti skʼan chanubtasel ta mantal li tsobobbaile?

⁴ Li buchʼu Jolil chkʼot ta tsobobbail yuʼun Diose laj yalbe yajtakboltak xchiʼuk yantik yajtsʼaklomtak ti oy kʼusitik tsbainik spasel tee. ¿Kʼusitik? Jtos ti toj tsots skʼoplale jaʼ ti chchanubtasik ta mantal li buchʼutik tee. Jvules ta joltik li kʼusi laj yalbe Pedro li chaʼkuxesbil Jesuse, xi laj yalbe ta sat li yan jtakboletike: «Simón, xnichʼonot Juan, ¿me [...] chacʼanun[?]», x-utat. Xi la stakʼ li Pedroe: «Jech, Cajval, xanaʼ onoʼox ti lec jcʼanojote», xi. Li Jesuse xi laj yalbee: «Macʼlinbun me li bicʼtal chijetic cuʼune. [...] Chabibun me lec li mucʼtic chijetic cuʼune [...]. Macʼlinbun me lec li mucʼtic chijetic cuʼune», xut (Juan 21:15-17). ¡Jun abtel ti toj tsots skʼoplale!

⁵ Jech kʼuchaʼal chkiltike, li Jesuse la skoʼoltas ta chijetik ta jun koral li buchʼutik te oyik ta tsobobbail yuʼun li yajtsʼaklomtak Cristoe. Li manxo krixchanoetik taje —viniketik, antsetik xchiʼuk ololetik— skʼanik chabiel xchiʼuk makʼlinel ta mantal. Jech noxtok, ta sventa ti laj yalbe yajtsʼaklomtak Jesús ti akʼo xchanubtasik li yantike xchiʼuk ti akʼo spasik ta yajtsʼaklomtake, skotol li achʼ «chijetike» skʼan me xichʼik chapanel sventa spas yuʼunik li abtelal yakʼoj Diose (Mateo 28:19, 20).

6. ¿Kʼusitik chkiltik li ta loʼil ti bu chalbe skʼoplal li achʼ tsobobbail yuʼun Diose?

⁶ Kʼalal oy xaʼox li tsobobbail yuʼun Diose, li buchʼutik tee, ta me stsobilan sbaik sventa chchanik mas xchiʼuk sventa tspatbe sba yoʼontonik ta jujuntal. Li Vivliae xi chale: «Jʼechʼel la xchʼunic o ti cʼu xʼelan ichanubtasatic yuʼun yajtacbolaltac Jesuse. Lec coʼol yoʼntonic, coʼol la svoqʼuic pan, xchiʼuc coʼol yoʼntonic la scʼopanic Dios» (Hechos 2:42, 46, 47). Yan ti kʼusi chkiltik li ta loʼil taje, jaʼ ti laj yichʼ tʼujel viniketik ti xtojobik sventa tspasik jlom abtelaletike. Maʼuk laj yichʼik-o tʼujel mi toj ep xchanojik vun o mi toj chanemik ta spasel kʼusitik, moʼoj, yuʼun jaʼ «ti ventainbil yoʼntonic yuʼun Chʼul Espiritue, xchiʼuc ti oy sbijilique». Jun ti buchʼu laj yichʼ tʼujele jaʼ Esteban, yuʼun jech kʼuchaʼal chal Vivliae jaʼ «jun vinic ti oy lec xchʼunojel yoʼntone, ti ventainbil yoʼnton yuʼun Chʼul Espiritue». Li kʼusi kʼot ta pasel ta skoj ti jech la snopike jaʼ ti «jech ipuc [batel] li scʼop Diose, iʼepajic ta jyalel li jchʼunolajeletic te ta Jerusalene» (Hechos 6:1-7).

Tstunes viniketik li Diose

7, 8. 1) ¿Kʼusi yabtel la spasik li jtakboletik xchiʼuk li moletik ta Jerusalén li ta baʼyel tsobobbail yuʼun yajtsʼaklomtak Cristoe? 2) ¿Kʼusi kʼot ta pasel ta sventa li mantaletik kʼot ta tsobobbailetike?

⁷ Jech kʼuchaʼal chkaʼibetik smelole, li jtakboletike jaʼ la sbeiltasik li tsobobbail ta baʼyele, pe mu stukikuk noʼox. Li slivroal Hechose chal kaʼitik ti te van bu kʼakʼale, sutik batel ta Antioquía yuʼun Siria li Pablo xchiʼuk xchiʼiltake. Li ta kapitulo 14, versikulo 27 xi chale: «Cʼalal icʼotic ta Antioquiae, la stsobic scotol li jchʼunolajeletique. Laj yalbe yaʼyic scotol li cʼusitic tsotsic iʼacʼbat spasic yuʼun Diose». Kʼalal jaʼo te oyik li ta tsobobbail taje, te lik skʼoplal mi skʼan la xichʼik sirkunsision li jyanlum krixchanoetike. Sventa chchapanik taje, la stakik batel ta Jerusalén li Pablo xchiʼuk Bernabee «yuʼun acʼo bat scʼopanic li yajtacbolaltac Jesús xchiʼuc jcholcʼopetique» o li moletike, ti jaʼik li jtsop jbeiltasvaneje (Hechos 15:1-3).

⁸ Li Santiago, li xchaʼitsʼin Jesús ti maʼuk jtakbole, jaʼ li mol ti laj yichʼ ta venta li tsobajel kʼalal «laj svol sbaic ti jcholcʼopetique xchiʼuc ti viniquetic sbainoj ti jchʼunolajeletique, [sven]ta scomon chap[ik] ti cʼop taje» (Hechos 15:6, Ch). Kʼalal laj xaʼox skʼelik lek ta skoltaobba li chʼul espiritue, jech kʼot ta nopel yuʼunik kʼuchaʼal chal li Vivliae, vaʼun la stsʼibabeik batel karta li tsobobbailetike (Hechos 15:22-32). Kʼalal kʼot ta skʼobik mantal li ermanoetik taje, la xchʼamik xchiʼuk laj yakʼ ta xkuxlejalik. ¿Kʼusi kʼot ta pasel un? La sta spatobil yoʼontonik xchiʼuk stsatsal yoʼontonik. Li Vivliae xi chale: «Jech itsatsub lec yoʼnton li jujutsob jchʼunolajeletique; iʼayin lec xchʼunojel yoʼntonic, xchiʼuc iʼepajic ta jujun cʼacʼal» (Hechos 16:5).

9. Jech kʼuchaʼal chal Vivliae, ¿kʼusitik abtelal xuʼ spasik li buchʼutik spas xa yuʼunik li kʼusitik skʼan pasele?

⁹ Vaʼun chaʼa, ¿kʼuxi ch-abtej li jujun tsobobbaile? Kalbetik jun skʼelobil, jaʼ li tsobobbailetik ta Cretae. Manchuk mi muʼyuk lek skʼoplalik jutuk mu skotoluk li krixchanoetik tee, oy buchʼutik la sjel stalelalik xchiʼuk ipasik ta yajtsʼaklom Cristo (Tito 1:10-12; 2:2, 3). Mu ta junuk noʼox lum nakalik, jech noxtok toj nom oyik ta stojolal li jtsop jbeiltasvanej ta Jerusalene. Pe taje mu kʼusi vokol, yuʼun jech kʼuchaʼal ta yantik lume, li ta tsobobbailetik taje oy viniketik ti oy xa sjabilalike, ti spas yuʼunik li kʼusitik skʼan pasel chal Vivlia sventa xichʼik biiltasele. Li viniketik taje laj yichʼik biiltasel ta moletik o jkʼelvanejetik ti xtojobike, «yuʼun tspatbe[ik] yoʼnton yantic ec ta sventa li lequil chanubtasele, xchiʼuc jech xuʼ yuʼun tstuqʼuibtas[ik] li bochʼo[tik] tscontrainic li lequil chanubtasele» (Tito 1:5-9; 1 Timoteo 3:1-7). Li yantik viniketik ti lek oyik ta mantale chtunik kʼuchaʼal yajkoltaobba mol li ta tsobobbaile (1 Timoteo 3:8-10, 12, 13).

10. Jech kʼuchaʼal chal Mateo 18:15-17, ¿kʼuxi ta xichʼ chapanel li tsatsal kʼopetike?

¹⁰ Li kʼusi laj yal Jesús ti ta jchantik ta Mateo 18:15-17 jaʼ xa onoʼox laj yalbe skʼoplal li tsobobbail ti lek chapale. Li ta loʼil taje chal kaʼitik ti oy bateltike xuʼ van xlik kʼop ta stojolal li yajtsʼaklomtak Cristoe yuʼun van xuʼ tsaʼ smul ta stojolal yan xchiʼilik. Ti buchʼu laj yichʼ saʼel ta kʼope skʼan me xbat xchiʼin ta loʼil ta stuk noʼox li yermanoe sventa xakʼbe «snaʼ» li smule. Mi mu xchapaj jeche, xuʼ tstak ta ikʼel chaʼvoʼ o oxvoʼ ermanoetik ti snaʼojik ti kʼusitik kʼotem ta pasele sventa xuʼ ch-och ta rason yuʼunik li buchʼu oy smule. Pe mi laj xa yichʼ pasel jech xchiʼuk ti mu xchapaje, ¿kʼusi yan stakʼ pasel? Xi laj yal li Jesuse: «Me mu scʼan xaʼibe scʼopique, alo ta tsobajel yuʼun jchʼunolajeletic. Me mu xaʼibe scʼop li jchʼunolajeletique, comtsanic jech chac cʼu chaʼal yan cristiano ti mu xotquin Diose, o jech chac cʼu chaʼal jtsobpatan», xi. Kʼalal laj yal Jesús taje, li judioetike jaʼik toʼox li stsobobbail Diose, jech oxal, jaʼ skʼoplalik taje.a Pe li mantaletik laj yal Jesuse ta xtun ta mas tsʼakal ta sventa li stsobobbail yajtsʼaklomtake. Taje jaʼ yan svinajeb ti oy tsobobbailetik ti lek chapal li ta steklumal Diose sventa tstsatsubtasbe yoʼonton xchiʼuk tsbeiltas ta jujuntal li buchʼutik ta tsobobbaile.

11. ¿Kʼusi skʼan spasik li moletik kʼalal chlik kʼopetike?

¹¹ Li moletik o li jkʼelvanejetike jaʼ tskʼelik li tsobobbaile, jech oxal chchapanik li kʼopetike o tskʼelbeik skʼoplal li muliletike, yuʼun jaʼ jech staʼo kʼuchaʼal chal Tito 1:9. Jech ta melel, jpas mulil viniketik onoʼox jech kʼuchaʼal li Tito ti laj yichʼ takel batel yuʼun Pablo sventa «acʼo [xchapan] li cʼusi scʼan chapanele» (Tito 1:4, 5). Li avi kʼakʼal eke, li buchʼutik ta xichʼ albel skʼoplalik ti xuʼ ch-ochik ta mole skʼan me baʼyel xakʼik ta ilel xchʼunel yoʼontonik xchiʼuk ti yichʼojik ta mukʼ Diose. Jech oxal chaʼa, li buchʼutik ta tsobobbaile xuʼ me spat yoʼontonik ti chbeiltasatik yuʼun li moletike.

12. ¿Kʼusi oy ta sbaik spasel li moletik ta tsobobbaile?

¹² Li Pabloe xi laj yalbe li moletik ta tsobobbail ta Efesoe: «Kʼelo me abaik li voʼoxuke xchiʼuk skotol li chijetike, ti te la avichʼik biiltasel lokʼel yuʼun chʼul espiritu sventa cha kʼotik ta jkʼelvanejetike, sventa cha chabiik li tsobobbail yuʼun Diose, ti jaʼ la sman ta xchʼichʼel xNichʼone» (Hech. 20:28, NM). Jaʼ jech li avi eke, li moletike ta xichʼik biiltasel «sventa [ch]chabiik li tsobobbail yuʼun Diose». Skʼan spas ta slekil yoʼontonik, maʼuk me jpasmantaletik ta stojolal li chijetike (1 Pedro 5:2, 3). Skʼan xakʼbeik yipal ta stsatsubtasbel xchiʼuk spatbel yoʼonton «skotol li chijetike».

Mu me xkiktatik li tsobobbaile

13. ¿Kʼusi xuʼ xkʼot ta pasel bakʼintik ta jun tsobobbail, xchiʼuk kʼu yuʼun?

¹³ Naka jpas mulilutik li ta tsobobbaile, jech li moletik eke, jaʼ yuʼun bateltike oy chlokʼ loʼil ti mu jechuke, chlik kʼopetik, jaʼ jech kʼuchaʼal kʼot ta pasel ta baʼyel siglo kʼalal oy toʼox jtakboletike (Filipenses 4:2, 3). Xuʼ van oy kʼusi laj yal jun mol o yan ermano ti mu ta slekiluk yoʼonton laj yal kaʼitike, ti chopol ikʼopoje o ti mu meleluk skotol chkaʼitike. Jech xtok xuʼ van chkaltik ti muʼyuk ta xichʼ chʼunel li beiltaseletik ta Vivliae xchiʼuk manchuk mi snaʼojik xa li moletike muʼyuk noʼox bu chchapanik yileluk. Ti kʼusie, xuʼ van yakal xa chichʼ chapanel o yakal xa chichʼ kʼelel kʼuchaʼal chal li Vivliae, jech noxtok xuʼ van oy kʼusi mu jnaʼtik ta sventa taje. Veno, pe mi yuʼun onoʼox jech ti kʼusi chkaltike, jvules ta joltik ti kʼusi kʼot ta pasel ta Corintoe. Li ta tsobobbail taje la stsʼikik kʼuk sjalil jun tsatsal mulil, pe ta sventa ti kʼelbil yuʼun Jeova li tsobobbaile, lek tukʼ xchiʼuk ta yorail noʼox la xchapan (1 Corintios 5:1, 5, 9-11). Xuʼ xi jakʼbe jbatike: «Ti teuk oyun li ta voʼneal Corintoe, ¿kʼusi van la jpas ti jechuke?».

14, 15. ¿Kʼu yuʼun laj yiktaik Jesús li jlome, xchiʼuk kʼusi xuʼ jchantik te?

¹⁴ Jkʼeltik kʼusi yan xuʼ chkʼot ta pasel xtok. Oy van jun krixchano ti toj tsots chaʼi ta yaʼibel smelolal xchiʼuk ta xchʼamel jun chanubtasel ta Vivliae. Xuʼ van laj xa sabe mas smelolal ta Vivlia, ta yantik vunetik ta organisasion, laj xa sjakʼbe moletik xchiʼuk yantik ermanoetik ti yijik ta mantale. Manchuk mi jech, toj tsots-o chaʼi ta yaʼibel smelolal xchiʼuk ta xchʼamel. ¿Kʼusi skʼan spas? Oy kʼusi kʼot ta pasel ti jutuk mu xkoʼolaj kʼuchaʼal taje, kʼalal jun xaʼox jabil skʼan xcham li Jesuse xi laj yale: «Vuʼun li vaj cʼotemun sventa chacuxiic oe», xi. Jech oxal li buchʼutik la tskʼan chkuxiik sbatel osile, xi albat akʼo spasike: «Chaveʼbicun jbecʼtal, vuʼun ti Xnichʼon cristiano licʼote, [...] chavuchʼbicun li jchʼichʼale», x-utatik. Ep yajtsʼaklomtak chopol laj yaʼiik li mantal taje, muʼyuk bu la sjakʼbeik smelolal xchiʼuk noxtok muʼyuk bu laj yakʼ xchʼunel yoʼontonik ta smalael, jech oxal «muʼyuc xa bu la xchiʼinic batel ta xanubal li Jesuse» (Juan 6:35, 41-66). Xi jakʼbe jbatike: «Ti teuk oyune, ¿kʼusi van la jpas ti jechuke?».

¹⁵ Li ta jkʼakʼaliltike, oy buchʼutik yiktaojik li tsobobbaile, xuʼ van chalik ti oy kʼusi chopol pasbatike, ti muʼyuk laj yichʼ chapanel jtosuk kʼope o ti mu skʼan xchʼamik jtosuk chanubtasele. Tsnopik ti xuʼ chtunik ta stojolal Dios ta stukik noʼoxe. ¿Pe mi lek van ti jech ta spasike? Manchuk mi ta jujuntal skʼan ta jkʼeltik ti lekuk oyutik ta stojolal Diose, taje maʼuk smelolal ti chkaltik chʼabal tstunes jun tsobobbail ta spʼejel Balumil li Jeovae, jech kʼuchaʼal la spas ta skʼakʼalil li jtakboletike. Li Jeovae la stunes xchiʼuk laj yakʼbe bendision li tsobobbailetik ta baʼyel sigloe, jech xtok, la sbiiltas moletik xchiʼuk yajkoltaobbatak sventa slekilal li tsobobbailetike. Ta melel, jaʼ jech tspas li avi eke.

16. ¿Kʼusi skʼan snop li buchʼu chikta yaʼi li tsobobbaile?

¹⁶ Mi oy jun yajtsʼaklom Cristo ti chal ti xuʼ noʼox ti kʼuyelan oy ta stojolal Diose, ta me spʼajbe li s-organisasion Jeova ti lek chapale, jaʼ xkaltik, li tsobobbail ta spʼejel Balumile xchiʼuk li ta jujun lumetike. Xuʼ van ta stuk noʼox chichʼ ta mukʼ Dios o xchiʼuk jtsop krixchanoetik, pe mi jech tspase, ¿kʼusi xuʼ xkaltik ta sventa ti oy moletik xchiʼuk yajkoltaobbatake? Toj lek ti xkaʼibetikuk smelolal li kʼusi albatik yuʼun Pablo ta jlik karta li buchʼutik ta Colosae xchiʼuk ti akʼo xichʼik kʼelbel noxtok li ta Laodiceae, xi albatike: «Acʼo lec avibelic, acʼo lec anaclebic ta stojol [Cristo]», x-utatik. Jaʼ noʼox xuʼ jech chaʼi sbaik li buchʼutik oyik ta jun tsobobbaile, yan li buchʼutik xchʼakoj sbaike mu xuʼ jech chaʼi sbaik (Colosenses 2:6, 7; 4:16).

«Jaʼ yoyal; jaʼ snacleb cʼotem li cʼusi melele»

17. ¿Kʼusi chalbutik 1 Timoteo 3:15 ta sventa li tsobobbaile?

¹⁷ Li ta sbaʼyel karta Pablo ti la stakbe batel Timoteoe, li mol yajtsʼaklom Cristoe, te laj yal batel li kʼusitik skʼan spas li moletike xchiʼuk li yajkoltaobbatake. Xchiʼuk laj yal xtok ti «steclumal cuxul Diose» «jaʼ yoyal; jaʼ snacleb cʼotem li cʼusi melele» (1 Timoteo 3:15). Li ta baʼyel sigloe, sjunul li stsobobbail yajtsʼaklom Cristo ti tʼujbile laj yakʼ ta ilel ti jaʼ li «yoyal» tsobobbaile. Jech noxtok, jamal ta aʼyel ti bu la xchanik «cʼusi [melel]» li yajtsʼaklomtak Cristoe jaʼ noʼox te li ta tsobobbailetike. Jaʼ noʼox te chakʼik ta chanel li kʼusi melele xchiʼuk ti tspojbeik skʼoplale, jech oxal chaʼa, xuʼ tstsatsubtasvan.

18. ¿Kʼu yuʼun toj tsots skʼoplal li tsobajeletike?

¹⁸ Jaʼ jech chkʼot ta pasel tana ek. Li tsobobbail ta spʼejel Balumile jaʼ li sna Diose, «jaʼ yoyal; jaʼ snacleb cʼotem li cʼusi melele». Kʼalal chi jkʼotilan li ta tsobajeletike xchiʼuk ti chkakʼulan jloʼiltik tee, toj tsots me skʼoplal sventa lek oyutik ta stojolal Dios xchiʼuk ti chapalutik lek ta spasbel li kʼusi tskʼan yoʼontone. Kʼalal laj yalbe batel mantal jun tsobobbail ta Corinto li Pabloe, laj yal ti kʼusi ta xichʼ alel tee akʼo lekuk jamal ta aʼyel sventa xuʼ «stsatsubic o ta stojol Dios» li buchʼutik te chkʼotike (1 Corintios 14:12, 17-19). Mi chkakʼtik venta ti xchʼamoj jujun tsobobbailetik li Jeovae xchiʼuk ti tskoltae ta me xi jtsatsub ta stojolal Dios ek.

19. ¿Kʼu yuʼun oy avil chavaʼi aba ta stojolal li atsobobbaile?

¹⁹ Jech oxal chaʼa, mi ta jkʼan chi jtsatsub-o ta stojolal Diose, jaʼ me te xuʼ jtatik li ta tsobobbaile, yuʼun voʼne xa onoʼox tunem tal kʼuchaʼal jpojobbailtik ta sventa li jecheʼ chanubtasele, jech noxtok stunesoj tal Dios sventa chichʼ pukel batel ta spʼejel Balumil li lekil aʼyejetik ta sventa li Ajvalilal yuʼune. Muʼyuk me bu xchibet koʼontontik ti toj tsots yabtel tunem tal li tsobobbail sventa tspasbe li kʼusi tskʼan yoʼonton Diose (Efesios 3:9, 10).

[Tsʼibetik ta yok vun]

¿Xvul ta joltik?

• ¿Kʼu yuʼun jech smelol ti tstunes tsobobbailetik ta Balumil li Diose?

• Manchuk mi jpas muliletik, ¿kʼusi tspasik ta stojolal tsobobbail li moletike?

• ¿Kʼuxi tstsatsubtas koʼontontik li tsobobbaile?

[Lokʼol ta pajina 14]

Li jtakboletik xchiʼuk li moletik ta Jerusalene jaʼik li jtsop jbeiltasvaneje

[Lokʼol ta pajina 16]

Li moletik xchiʼuk yajkoltaobbatake ta xichʼik chanubtasel sventa spas yuʼunik li kʼusitik sbainojik ta tsobobbaile