Akʼo sbeiltas koktik li sKʼop Diose
«Ti acʼope yacʼoj xojobal bu ta jtecʼ batel ti coque, sac jaman noʼox echʼel ti jbe yuʼune.» (SALMO 119:105, Ch.)
1, 2. ¿Kʼu yuʼun muʼyuk staojik melel muyubajel xchiʼuk lekilal jutuk mu stekeluk li krixchanoetike?
¿MI OY van la ajakʼbe junuk velta jun krixchano bu beal skʼan cha tam batel ti bu cha kʼan cha bate? Yikʼal van nopol xa noʼox te oyot, pe mu xa naʼ lek ti bu stukʼil xkome. Xuʼ van chʼayemot ta jyalel, jech oxal skʼan van cha tam echʼel yan be. ¿Mi mu jechuk ti jaʼ mas lek ti la achʼunbe li kʼusi laj yal li krixchanoe? Jech kʼuxi un, yuʼun xojtikin lek ti bu oyote, vaʼun xuʼ skoltaot sventa xa kʼot ti bu cha kʼan cha bate.
2 Oy xa ta smilal jabil stamoj batel sbe stuk ta xkuxlejal li krixchanoe ti muʼyuk bu tsaʼ li koltael chakʼ Diose. Kʼalal muʼyuk tsaʼike, li jpas mulil krixchanoetike chʼayemik ta jyalel: mu staik li sbelel melel muyubajel xchiʼuk lekilale. ¿Kʼu yuʼun? Oy xa mas ta 2,500 jabil li j-alkʼop Jeremiase xi laj yale: «Li cristianoe [...] mu xuʼ yuʼun tspas mantal stuc li cʼusi chcʼot ta pasel ta stojole», xi (Jeremías 10:23). Skotol li buchʼu tskʼan tsbeiltas sba stuke, ti muʼyuk ta xchʼam li koltael chakʼ li buchʼu lek xtojobe mu lekuk kʼusi chkʼot ta stojolal. Jamal ta aʼibel smelolal chaʼa, ti krixchanoetike skʼanik beiltasel.
3. ¿Kʼu yuʼun jaʼ mas xtojob Jeova sventa tsbeiltas li krixchanoetike, xchiʼuk kʼusi chalbutik?
3 Li Jeovae jaʼ li buchʼu mas lek xtojob ta sjunul vinajel-balumil sventa chakʼbutik li beiltasel chtun kuʼuntike. ¿Kʼu yuʼun? Yuʼun jaʼ noʼox stuk lek xi jyojtikin. Maʼuk noʼox snaʼoj lek ti kʼuyelan ichʼay ta be li krixchanoetike, moʼoj, yuʼun snaʼ xtok ti kʼusi chtun yuʼunik sventa xchaʼtamik li lekil bee. Jech noxtok, li Jeovae jaʼ li Jpasvanej kuʼuntike, jaʼ yuʼun snaʼoj onoʼox ti kʼusi mas chtun kuʼuntike (Isaías 48:17). Jaʼ yuʼun xuʼ lek jpat koʼontontik ta sventa li kʼusi yaloj Dios ta Salmo 32:8 ti xie: «Vuʼun ta jbijubtasot; vuʼun ta jchanubtasot lec. Ta xcacʼbot lec avil bu beal tscʼan chabat; scotol cʼacʼal te oy o jsat ta atojol», xi. Muʼyuk bu xchibet skʼoplal: li beiltasel chakʼ Jeovae jaʼ noʼox stuk lek. Pe, ¿kʼuxi ta sbeiltasutik un?
4, 5. ¿Kʼu yelan tsbeiltasutik li skʼop Diose?
4 Jun jtsʼibajom yuʼun Salmoe xi laj yalbe Jeova ta orasione: «Ti acʼope yacʼoj xojobal bu ta jtecʼ batel ti coque, sac jaman noʼox echʼel ti jbe yuʼune», xi (Salmo 119:105, Ch). Li skʼop chal Dios xchiʼuk li smantale te oy ta Vivlia, xchiʼuk tskoltautik ta stsalel li vokolil kʼalal ta jnuptantike. Kʼalal ta jkʼeltik Vivlia xchiʼuk chkakʼ akʼo sbeiltasutike, chkʼot ta pasel ta jkuxlejaltik li kʼusi chal Isaías 30:21 ti xie: «Chavaʼyic oy bochʼo chascʼopanoxuc ta apatic, jech chayalboxuc: “Liʼ xabatique, jaʼ liʼ li lequil bee”, xayutoxuc», xi.
5 Pe kakʼtik venta ti Salmo 119:105, chalbutik chaʼtos ti snitoj sba kʼuyelan ch-abtej li sKʼop Diose. Li baʼyele jaʼ ti yakʼoj xojobal bu ta jtekʼ batel li koktike. Mi chkakʼ akʼo sbeiltasutik Vivlia kʼalal ta jnuptantik vokoliletik jujun kʼakʼale, lek me kʼusitik chkʼot ta nopel kuʼuntik xchiʼuk mu me yaleluk chbat jsaʼtik li petsʼetik xchiʼuk li kʼusitik xibal sba ta balumile. Li xchibale jaʼ ti tsakubtas jbetik li smantaltak Diose; tskoltautik ta stʼujel li kʼusitik jmoj skʼoplal xchiʼuk li spatobil koʼontontik ta sventa li kuxlejal sbatel osil ta Paraiso ti yaloj chakʼ Diose. Kʼalal lek sakjaman li jbetike, xuʼ xkakʼtik venta mi lek chkʼot ta pasel o mi muʼyuk ti kʼusi ta jnop ta jpastike (Romanos 14:21; 1 Timoteo 6:9; Apocalipsis 22:12). Jkʼelbetik batel mas smelolal ti kʼuyelan yakʼoj xojobal bu ta jtekʼ batel koktik xchiʼuk ti sakjaman noʼox jbetik yuʼun li skʼop Jeova te ta Vivliae.
«Xojobal bu ta jtecʼ batel ti coque»
6. ¿Kʼuxi xuʼ chakʼ xojobal bu ta jtekʼ batel koktik li skʼop Diose?
6 Skotol kʼakʼal oy kʼusitik ta jnop ta jkʼan ta jpastik. Junantike mu toj tsotsuk skʼoplal yileluk, pe oy bateltike ta jnuptantik ti kʼusi chakʼ ta preva li jlekil talelaltik ta mantale, li jtukʼilaltike xchiʼuk ti kʼalal muʼyuk ta jtikʼ jbatik ta spasel kʼusitike. Sventa tstsal kuʼuntike, skʼan me oyuk kuʼuntik li «xchan[el leke], ti cʼun xa ta tʼujel [chkaʼitik] li cʼusi leque xchiʼuc li cʼusi chopole» (Hebreos 5:14). Kʼalal chkojtikintik lek li sKʼop Diose xchiʼuk ti chchʼi batel kuʼuntik li yaʼibel smelolal ta sventa li beiltasel chakʼe, yakal ta jchanubtas jol koʼontontik sventa jaʼ jech chkʼot ta nopel kuʼuntik ti kʼusi lek chil Jeovae (Proverbios 3:21).
7. Albo skʼoplal jun yajtsʼaklom Cristo ti yikʼaluk oy ta yoʼonton chbat ta elov xchiʼuk xchiʼiltak ta abtel ti maʼuk yajtsʼaklomtak Cristoe
7 Jnopbetik junuk skʼelobil. ¿Mi mukʼta krixchanoot xa ti oy ta avoʼonton ta melel cha kʼan cha muyubtabe yoʼonton li Jeovae? (Proverbios 27:11.) Taje toj lek. Pe nopo avaʼi jlikeluk, jlom achiʼiltak ta abtele cha yakʼboxuk jun voleto sventa cha yikʼoxuk batel ta elovajel ta junuk tajimol. Li stukike lek chaʼiik ti xa bate xchiʼuk kʼupil sba chaʼiik ti jmoj oyoxuk kʼalal maʼuk xa yorail abtele. Yikʼaluk van jpʼel-o chaval ti jaʼ lekil krixchanoetike. Jech noxtok, lek onoʼox van jutuk stalelalik. ¿Kʼusi van cha pas? ¿Mi oy van kʼusi chopol chkʼot ta pasel ti xa bate? ¿Kʼu yelan cha skoltaot li sKʼop Dios sventa jaʼ xkʼot ta nopel avuʼun li kʼusi leke?
8. ¿Kʼusi beiltaseletik ta Vivlia tskoltautik yoʼ oyuk lek srasonal kuʼuntik ta sventa li buchʼutik ta jchiʼintike?
8 Jkʼeltik jayibuk beiltaseletik ta Vivlia. Li kʼusi baʼyel xuʼ xvul ta joltike jaʼ van li kʼusi chal 1 Corintios 15:33: «Me ta jchiʼintic li bochʼotic chopolique, chisoquesbutic li jlequil taleltique», xi. Li beiltasel ta Vivlia liʼe, ¿mi chalbutik ti mu stakʼ jkʼopontik ta jyalel li buchʼutik maʼuk melel yajtsʼaklomtak Cristoe? Li stakʼobil chakʼ Vivliae jaʼ ti stakʼe. Jech onoʼox, li jtakbol Pabloe la skʼan skotol krixchanoetik, manchuk mi maʼuk yajtsʼaklomtak Cristo (1 Corintios 9:22). Li yajtsʼaklomutik Cristoe, stalel onoʼox ti oy ta koʼontontik li yantike, manchuk mi mu jmojuk li kʼusi jchʼunojtike (Romanos 10:13-15). Ta melel, ¿kʼuxi onoʼox ta jchʼuntik li mantal ti «jpastic cʼusi lec ta stojol scotol cristianoetic» mi ta jchʼak jbatik ta stojolal li buchʼutik yikʼaluk tskʼanik koltaele? (Gálatas 6:10.)
9. ¿Kʼusi tojobtasel ta Vivlia tskoltautik sventa oyuk noʼox smelolal ti kʼu yelan chkil jba jchiʼuktik li jchiʼiltaktik ta abtele?
9 Pe kʼelavil, jelel ti kʼalal oy slekil koʼontontik ta stojolal jun jchiʼiltik ta abtel xchiʼuk ti kʼalal lek tajmek xkil jbatik xchiʼuke. Kʼalal jeche, oy yan beiltasel ta Vivlia ta sventa taje. Li jtakbol Pabloe xi la spʼijubtas li yajtsʼaklomtak Cristoe: «Mu me xapas abaic ta jun achiʼuquic li bochʼotic muʼyuc xchʼunojic Diose», xi (2 Corintios 6:14). ¿Kʼusi skʼan xal ti «mu me xapas abaic ta jun achiʼuquic li bochʼotic muʼyuc xchʼunojic [Dios]», ti xie? Jlom Vivliaetike xi tsjelubtasike: «Mu xacoʼoltas ajol avoʼntonic xchiʼuc», «mu me cʼusi coʼol xanop xchiʼuc» o «mu me coʼoluc xameltsan acʼopic», xi. ¿Kʼu yelan ti yikʼaluk jmoj jpastik li kʼusi mu stakʼ xchiʼuk jun jchiʼiltik ta abtele? ¿Bakʼin chi jkʼot ta jun jchiʼuktik li buchʼutik muʼyuk xchʼunojik Diose? ¿Bu to kʼalal xuʼ xa chiʼin li krixchanoetik taje? Li sKʼop Dios, li Vivliae, xuʼ xa sbeiltasot kʼalal chkʼot ta atojolal kʼuchaʼal taje.
10. 1) ¿Kʼu yelan la stʼuj yamigotak li Jesuse? 2) ¿Kʼusi sjakʼobiltak tskoltautik sventa lek kʼusi xkʼot ta nopel kuʼuntik ta sventa li jchiʼiltaktike?
10 Jnoptik li kʼusi la spas Jesuse, li stuke la skʼan tajmek li krixchanoetik ti kʼalal lik yichʼik pasele (Proverbios 8:31). Kʼalal liʼ toʼox oy ta Balumile, lek tajmek laj yil sbaik xchiʼuk li yajchankʼoptake (Juan 13:1). Jech noxtok, «icʼuxubaj ta yoʼnton» jun vinik ti oy kʼusitik jecheʼ xchanoj ta relijione (Marcos 10:17-22). Pe jech noxtok, li Jesuse oy noʼox buchʼu la stʼuj ta yamigotak, yuʼun muʼyuk bu lek tajmek laj yil sba xchiʼuk ti buchʼu muʼyuk oy ta yoʼonton ta melel spasel li kʼusi tskʼan yoʼonton Diose. Jech ta melel, jun veltae xi laj yale: «Voʼoxuc lec jcʼopan jbatic me jaʼ chapasic scotol li cʼusitic laj calboxuque», xi (Juan 15:14). Yikʼaluk van lek xavil aba xchiʼuk junuk achiʼil ta abtel, pe xi xa jakʼbe abae: «¿Mi oy ta yoʼonton tspas ta melel li kʼusi laj yal Jesuse? ¿Mi tskʼan van chojtikin Jeova xchiʼuk chichʼ ta mukʼ jech kʼuchaʼal laj yalbutik Jesuse? ¿Mi jech van stalelal ta mantal kʼuchaʼal voʼon ti yajtsʼaklomun Cristoe?» (Mateo 4:10). Li stakʼobiltak taje jaʼ te chvinaj kʼalal cha chiʼin ta loʼil li achiʼiltak ta abtele xchiʼuk kʼalal chavil kʼuyelan chaʼiik kʼalal cha chʼunilan li mantaletik ta Vivliae.
11. Albo jlomuk skʼoplal ti bu jechukal xuʼ tsbeiltasutik li skʼop Diose.
11 Oy to butik ti xuʼ xakʼ xojobal bu ta jtekʼ batel koktik li smantaltak Jeovae. Jnoptik ti chʼabal yabtel jun yajtsʼaklom Cristoe, vaʼun ch-akʼbat jun abtel ti ta melel chtun yuʼune. Li yorail abtelale persa jech tspas ti kʼuyelan tskʼanike, tstsak li abtelal taje, vaʼun persa chchʼay ep tsobajeletik xchiʼuk chchʼay yan abtelaletik ta sventa li yichʼel ta mukʼ ta melel Jeovae (Salmo 37:25). Yan yajtsʼaklom Cristoe yikʼaluk van tskʼan tajmek tskʼel pelikula o yan kʼusitik ch-echʼ ta television ti mu jechuk ti kʼuchaʼal chbeiltasvan li Vivliae (Efesios 4:17-19). Li yane xuʼ van chopol chil ta anil ti kʼalal oy kʼusi chopol tspas jutuk yermanotake (Colosenses 3:13). Ta skotol taje, skʼan me xkakʼtik ti xakʼ xojobal bu ta jtekʼ batel koktik li sKʼop Diose. Mi ta jtamtik batel li beiltaseletik ta Vivliae, xuʼ xkuch batel kuʼuntik kʼusiuk vokolal ta jkuxlejaltik, yuʼun li sKʼop Diose jaʼ «chtun ta sventa chanubtasel, ta sventa taqʼuiel, ta sventa tuqʼuibtasel, xchiʼuc ta sventa bijubtasel ta spasel cʼusi tucʼ» (2 Timoteo 3:16).
«Sac jaman noʼox echʼel ti jbe yuʼune»
12. ¿Kʼu yelan sakjaman noʼox jbetik yuʼun li skʼop Jeovae?
12 Li Salmo 119:105 chal noxtok ti skʼop Diose tsakubtas jbetik. Jnaʼojtik ti kʼusi chkʼot ta pasel ta mas tsʼakale, yuʼun li Vivliae chalbe smelolal kʼu yuʼun ti oy vokolil liʼ ta balumile xchiʼuk ti kʼusi chkʼot ta pasel ta stojolale. Jech, jnaʼojtik ti kuxulutik ta «slajebal cʼacʼale», slajebal li kʼusitik chopol chkʼotanuk ta pasel li avie (2 Timoteo 3:1-5). Ti jnaʼtik li kʼusi chkʼot ta jelavele skʼan me xvinaj ti kʼuyelan kuxulutik avie. Li jtakbol Pedroe xi la stsʼibae: «Ta sventa ti chlaj [...] scotol li cʼusitic oye, jech tscʼan ti lec, ti tucʼ chapas abaique. Tscʼan ti jechʼel chavichʼic o ta mucʼ li Diose. Yuʼun jech jun avoʼnton chamalaic, jech chavaqʼuic taluc ta ora scʼacʼalil li Diose», xi (2 Pedro 3:11, 12).
13. ¿Kʼuxi skʼan xvinaj ta jnopbetik xchiʼuk ta jkuxlejaltik ta sventa ti bu xa kʼakʼal kuxulutike?
13 Ti kʼuyelan jnopbentik xchiʼuk li jkuxlejaltike skʼan me te xvinaj ti jchʼunojtik ta melel ti «banamil [...] xchiʼuc li cʼusi chacʼ batuc coʼntontic yuʼune, ta onoʼox xlaj» (1 Juan 2:17). Li tojobtaseletik ta Vivliae ta me skoltautik ta snopel lek ti kʼusi ta jkʼan ta jtatike. Jech kʼuchaʼal ti xi laj yal Jesuse: «Tscʼan baʼyuc chavacʼ abaic ta ventainel yuʼun li Diose, xchiʼuc ti chapasic cʼusi tscʼane, jech chayacʼboxuc scotol li cʼusitic ta xtun avuʼunique», xi (Mateo 6:33). Staik-o kʼupil kʼoptael li epal kerem-tsebetik ti xchʼunojik ta melel li kʼusi laj yal Jesús kʼalal ch-abtejik ta tsʼakal orae. Yantik yajrextikotak Jeovae —sjunlej utsʼ-alalil bateltik— batemik ta yan mukʼta lumetik ti bu chtun tajmek jchol mantaletik sventa Ajvalilal yuʼun Diose.
14. ¿Kʼu yelan laj yepajes yabtel ta chol mantal jun utsʼ-alalil?
14 Jnoptik ta jun utsʼ-alalil ti chanibik ta nakleje, likemik ta Estados Unidos, ibatik ta República Dominicana yuʼun bat tunikuk ta jun lum ti oy 50,000 jnaklejetik tee. Akʼo mi te noʼox 130 jchol mantaletik li ta tsobobbaile, li ta 12 yuʼun abril ta 2006 ayik 1,300 krixchanoetik li ta sNaʼobil slajel Cristoe. Li ta lum taje, «sacuben xa ta taquijel li trigoe; jaʼ xa yorail ta tuchʼel» yuʼun ta voʼob noʼox ue, li utsʼ-alalil taje 30 chanubtaseletik xaʼox ta Vivlia oy yuʼunik ta skotol (Juan 4:35). Li totile xi chale: «Li ta tsobobbaile 30 ermanoetik talemik ta koltavanej. Te van jtobuk likemik tal ta Estados Unidos, li yantike likemik talel ta Bahamas, Canadá, España, Italia xchiʼuk ta Nueva Zelanda. Kʼalal chvulike tskʼan tajmek chlokʼik ta chol mantal xchiʼuk oy tajmek ta yoʼonton mantal yuʼunik li ermanoetik tee».
15. ¿Kʼusi bendision ataoj voʼot ta sventa ti jaʼ baʼyel chavakʼ ta akuxlejal li kʼusitik ta sventa Ajvalilal yuʼun Diose?
15 Melel onoʼox ti ep mu xuʼ yuʼunik ti chbat tunikuk ta yan mukʼta lum ti bu chtun mas jchol mantaletik ta sventa li Ajvalilal yuʼun Diose. Pe li buchʼu xuʼ yuʼunike —o ti xuʼ skʼelbeik lek smelolal kʼuxi xuʼ spasike— ep me tstaik bendision. Buyuk nakalot, mu me xchʼay avuʼun li muyubajel ta jtatik kʼalal chi jtun ta stojolal Jeova ta skotol kipaltike. Mi jaʼ baʼyel cha pas li kʼusi sventa Ajvalilal yuʼun Diose, li Jeovae jamal chal ta atojolal ti tsmal «yalel tal li bendición sventa ch-epaj cʼusitic oy avuʼun[e]» (Malaquías 3:10).
Sbaliltak ti ta jtamtik li beiltasel yuʼun Jeovae
16. ¿Kʼuxi ta jtabetik sbalil kʼalal chkakʼ sbeiltasutik li skʼop Diose?
16 Jech kʼuchaʼal laj xa kiltike, li skʼop Jeovae tsbeiltasutik ta chib smelolal ti snitoj sbae. Li baʼyele jaʼ ti yakʼoj xojobal bu ta jtekʼ batel koktike, yuʼun tskoltautik sventa xi jxanav echʼel li ta tukʼil bee xchiʼuk tsbeiltasutik kʼalal oy kʼusi ta jnop ta jpastike. Li xchibale, sakjaman noʼox echʼel ti jbetik yuʼune, yuʼun jaʼ jech lek jamal chkiltik li osile. Taj xtoke, tskoltautik sventa jchʼuntik li kʼusi laj yal jtakbol Pedro ti xie: «Tojobuc ti snopbenal avuʼunique yoʼ chapaloxuc ta spasel ti cʼusi leque. Jʼechʼeluc pato avoʼntonic yuʼun ti oy cʼusi ta xaʼacʼbatic ta sventa slequil yutsil yoʼnton Dios ti cʼalal ta xtal ti Jesucristoe», xi (1 Pedro 1:13, Ch).
17. ¿Kʼu yelan tskoltautik li xchanel Vivlia sventa jtamtik echʼel li beiltasel yuʼun Diose?
17 Muʼyuk bu xi jchibet, li Jeovae ta xi sbeiltasutik. Li sjakʼobile jaʼ: ¿Mi chkakʼ jbatik ta beiltasel? Sventa xavaʼibe smelolal li mantaletik chakʼe, akʼo ta avoʼonton skʼelel jujun kʼakʼal li Vivliae. Nopo me li kʼusi cha kʼele, kʼelo me lek li kʼusi tskʼan yoʼonton Jeova ta sventa li kʼusi cha chane xchiʼuk nopbo jayibuk smelolal ti bu jechukal xuʼ xavakʼ ta akuxlejal li beiltaseletik ta Vivliae (1 Timoteo 4:15). Te une, «tucʼuc cʼusi [cha nop]» kʼalal oy kʼusi cha nop cha pase (2 Pedro 3:1).
18. ¿Kʼusitik bendision ta jtatik kʼalal chkakʼ sbeiltasutik li sKʼop Diose?
18 Mi chkakʼtik akʼo sbeiltasutik xchiʼuk akʼo sakubtas jbetik li sKʼop Diose, lek me chkʼot ta nopel kuʼuntik li kʼusi ta jkʼan ta jpastike. Xuʼ jchʼuntik ta melel ti sKʼop Jeova tsʼibabile «lec chbijub [yuʼun] li bochʼo mu cʼusi snaʼe» (Salmo 19:7). Jech noxtok, kʼalal ta jtamtik echʼel li beiltasel chakʼ Vivliae, lek sak li jol koʼontontike xchiʼuk jun koʼontontik ti yakal ta jlekubtasbetik yoʼonton li Jeovae (1 Timoteo 1:18, 19). Ta slajebale, mi chkakʼ sbeiltasutik batel jujun kʼakʼal li skʼop Jeovae, ta me xi yakʼbutik li bendision ti mas mukʼ ta skotole: li kuxlejal sbatel osile (Juan 17:3).
¿Mi xvul ta ajol?
• ¿Kʼu yuʼun tsots skʼoplal ti akʼo sbeiltas koktik li Jeova Diose?
• ¿Kʼu yelan yakʼoj xojobal bu ta jtekʼ batel koktik li skʼop Jeovae?
• ¿Kʼu yelan sakjaman noʼox echʼel jbetik yuʼun li skʼop Jeovae?
• ¿Kʼuxi tskoltautik li skʼelel Vivlia sventa jtamtik echʼel li beiltasel chakʼ Diose?
[Lokʼol ta pajina 18]
¿Bakʼin ti mu xa bu lek kʼusi ta jpastik xchiʼuk li buchʼu maʼuk yajtsʼaklom Cristoe?
[Lokʼol ta pajina 19]
¿Mi chkakʼ ta ilel ta jkuxlejaltik ti jaʼ baʼyel ta jpastik li kʼusi ta sventa Ajvalilal yuʼun Diose?
[Lokʼol ta pajina 20]
Li Jesuse jaʼ noʼox la yamigoin li buchʼutik la spasik kʼusi tskʼan yoʼonton Jeovae