Li Diose tspas jun trato xchiʼuk Abraham

TE VAN 350 jabil yechʼel xaʼox li Nojelal ta voʼe. Li Abrahame te nakal ta Ur, jun jteklum ti oy lek kʼulejale, li avie Irak sbi. Li vinik taje oy lek xchʼunel yoʼonton, pe li spatobil yoʼonton ta stojolal Diose chichʼ akʼel ta preva. Jkʼeltik kʼusi kʼot ta pasel.

Li Jeovae laj yalbe ti akʼo xikta li slumale xchiʼuk xbat ta yan lum ti Canaán sbie. Ta ora noʼox la xchʼun li kʼusi albate. Ilokʼ batel xchiʼuk yajnil, Sara, sjunichʼon ti Lot sbie xchiʼuk skotol li buchʼutik te oy ta snae. Kʼalal kʼot li ta lum Canaán sbie, naki ta karpana kʼuchaʼal jxanvil vinik. Li Jeovae la spas jun trato xchiʼuk Abraham: laj yalbe ti tstaik bendision skotol li utsʼ-alaletik ta balumil ta stojolal li Abrahame, ti chkʼot ta mukʼta lum li snitilulaltake xchiʼuk jaʼ chuʼuninik li balumil Canaane.

Li Abraham xchiʼuk Lote ayan ep xchijik xchiʼuk xvakaxik. Li Abrahame toj lek yoʼonton, jaʼ yuʼun laj yakʼ akʼo stʼuj baʼyel Lot bu jotukal osil tskʼan sventa li xvakaxtak xchiʼuk li xchijtake. Li Lote jaʼ la stʼuj li osil bu nopol ukʼum Jordane, ti mas lek yoxe, xchiʼuk te naki ta stsʼel Sodoma. Pe naka jmulivajel li jnaklejetik ta lum taje, toj chopol chil Jeova li tsatsal mulil tspasike.

Kʼalal laj xaʼox xchʼak sbaike, li Jeovae laj yalbe Abraham ti chakʼbe epal snitilulaltake jech kʼuchaʼal li kʼanaletik ta vinajele. Li Abrahame oy lek xchʼunel yoʼonton ta stojolal Jeova, pe li yajnil ti skʼanoj tajeke mu snaʼ x-alaj. Jaʼ yuʼun, kʼalal 99 xaʼox sjabilal Abrahame xchiʼuk ti jutuk xa mu 90 li Sarae, li Diose albatik ti chil jun skeremike. Jaʼ jech ikʼot ta pasel: li Sarae laj yil jun yuni neneʼ ti Isaac laj yakʼbeik sbie. Akʼo mi vokʼ yan xnichʼnab li Abrahame, li Jpojvanej laj yichʼ albel skʼoplal ta Edene te chlik talel ta snitilulal Isaac.

Yan li Lote te to nakal ta Sodoma xchiʼuk li yutsʼ yalale. Pe li stuke muʼyuk la xchanbe stalelal li jmulivajel krixchanoetik tee, yuʼun jaʼ jun tukʼil vinik. Jaʼ yuʼun, kʼalal la snop Jeova tslajes li Sodomae, baʼyel la stak batel yaj-anjeltak sventa tspʼijubtasik li Lote. Li anjeletike laj yalbeik ti akʼo xjatav lokʼel ta anil xchiʼuk li yutsʼ yalale xchiʼuk ti mu skʼel sutel spatike. Vaʼun li Jeovae laj yakʼ tal kʼokʼ xchiʼuk azufre ta sba Sodoma xchiʼuk li jteklum te nopol ti jaʼ sbi Gomorrae jech te ilaj skotol li chopol jnaklejetike. Li Lot xchiʼuk li chaʼvoʼ stsebe ikolik. Pe li yajnile la skʼel sutel spat, yuʼun van la snaʼ sutel li kʼusitik laj yikta komele. Ta skoj taje icham.

(Lokʼem ta Génesis 11:10 kʼalal ta 19:38.)