¿Kʼusi lekil aʼyejetik oy ta sventa li krixchanoetike?

1. ¿Kʼusi jaʼ li aʼyejetik yaloj Diose?

Li Diose tskʼan ti skʼupin xkuxlejal li krixchanoetike. Ta skoj ti skʼanoj li krixchanoetike, la spas li balumile xchiʼuk li kʼusitik oye. Li Diose poʼot xa slajes li kʼusitik chakʼ vokolil sventa xuʼ skʼupin xkuxlejalik ta tsʼakal skotol li krixchanoetike. Kʼelo Jeremias 29:11.

Mi junuk ajvalil lajem yuʼun li majbaile, li chamele mi jaʼuk li lajelale. Pe oy lekil aʼyejetik: li Diose poʼot xa slajes skotol li ajvaliletik liʼ ta balumile, vaʼun tsvaʼan li Ajvalil yuʼune. Li steklumale tskʼupinik lekilal xchiʼuk muʼyuk xa ch-ipajik. Kʼelo Isaias 25:8; 33:24; Daniel 2:44.

2. ¿Kʼu yuʼun toj tsots skʼoplal li aʼyejetike?

Sventa xlaj li vokolil liʼ ta balumile, li Diose skʼan slajes skotol li chopol krixchanoetike (Sofonias 2:3). ¿Kʼusi ora tspas taje? Li Vivliae yaloj xa onoʼox li kʼusitik chakʼ jvokoltik avie. Li kʼusitik chkʼot ta pasele jaʼ senyail ti poʼot xa slajes vokolil li Diose. Kʼelo 2 Timoteo 3:1-5.

3. ¿Kʼusi skʼan jpastik?

Skʼan jchantik Vivlia sventa xkojtikintik li Diose. Li Vivliae xkoʼolaj kʼuchaʼal jlik skarta jun jkʼanvanej totil ti chakʼbe xnichʼnabtake. Yuʼun chalbutik kʼuxi xuʼ jkʼupin jkuxlejaltik avi xchiʼuk li kʼusi skʼan jpastik sventa jtatik li kuxlejal sbatel osil ta tsʼakale. Ta melel, mu skotolikuk xmuyubajik ti chachan Vivliae. Pe mu me xavakʼ buchʼu xchibajes avoʼonton, yuʼun ta tsʼakale, chata epal bendisionetik. Kʼelo Proverbios 29:25; Apokalipsis 14:6, 7.