¿Kʼu yuʼun yakʼoj to permiso Dios ti oy choplejal xchiʼuk vokolile?

1. ¿Kʼuxi lik li choplejale?

Li choplejale jaʼo lik ta balumil kʼalal laj yal baʼyel jutbil kʼop li Satanase. Li stuke jaʼ toʼox jun lekil xchiʼuk tukʼil anjel, pe muʼyuk «tukʼ laj yakʼ sba ta stojolal li kʼusi melele» (Juan 8:44). Kʼunkʼun laj yakʼ yibel ta yoʼonton ti jaʼuk xichʼ ichʼel ta mukʼe, akʼo mi jaʼ noʼox sta-o ichʼel ta mukʼ li Jpasvaneje. Li Satanase la sloʼla Eva ta jun jutbil kʼop sventa mu xchʼunbe smantal Dios, ti jaʼuk akʼo xchʼunbat smantal li stuke. Kʼalal muʼyuk la xchʼunbe smantal Dios li Evae, li Adane la skoʼoltas sjol xchiʼuk li yajnile. Ta skoj taje, jaʼ te lik tal li vokolil xchiʼuk li lajelale. Kʼelo Jenesis 3:1-6, 19.

Li Satanase la slikes toybail kʼalal laj yalbe Eva ti akʼo mu xchʼunbe smantal Diose. Muʼyuk laj yichʼ ta mukʼ li mukʼul pasmantal yuʼun Jeovae o li sderecho sventa ch-ajvalilaje akʼo mi jaʼ noʼox stuk ti toj toyol oye. Jutuk mu skotoluk li krixchanoetike yakʼoj sbaik ta stojolal Satanas kʼalal tspʼajik ti kʼu yelan tspas mantal Diose, jaʼ yuʼun kʼotem ta ‹ajvalil ta balumil› li Satanase. Kʼelo Juan 14:30; 1 Juan 5:19.

2. ¿Mi oy onoʼox xchopolil li spasbentak Diose?

Li spasbentak Jeovae lek tukʼ skotol. Li baʼyel krixchanoetik xchiʼuk li anjeletike xchʼun toʼox yuʼunik skotol li smantaltak Diose (Deuteronomio 32:4, 5). Li Diose la spasutik sventa xuʼ jtʼujtik mi jaʼ ta jpastik li kʼusi leke o mi jaʼ li kʼusi chopole. Ti jech chakʼ jtʼujtike jaʼ sventa xuʼ xkakʼbetik yil ti ta jchʼunbetik smantal ta skoj ti jkʼanojtike. Kʼelo Santiago 1:13-15; 1 Juan 5:3.

3. ¿Kʼu yuʼun yakʼoj to permiso ti oyuk vokolil li Diose?

Li Jeovae tsʼikem to yuʼun ti skontrainojbeik li mukʼul pasmantal yuʼune, pe oy noʼox me kʼuk sjalil. ¿Kʼu yuʼun ti stsʼikoj toe? Jaʼ sventa chakʼ ta ilel ti mu junuk ajvalil xuʼ chakʼbe slekilal krixchanoetik mi muʼyuk tsaʼik koltael ta stojolale (Eklesiastes 7:29; 8:9). Li vakmil jabil echʼem tal kuxlejale jamal xvinaj ti mi junuk ajvalil tupʼem skʼoplal yuʼun li kʼusitik muʼyuk tukʼe, li milbaile, li paskʼope xchiʼuk li chamele. Kʼelo Jeremias 10:23; Romanos 9:17.

Pe mi laj kakʼ jbatik ta ventainel yuʼun Diose, ta jtabetik sbalil (Isaias 48:17, 18). Li Jeovae poʼot xa slajes li ajvalil liʼ ta balumile. Jaʼ noʼox chkuxiik ta balumil li buchʼu chakʼ sbaik ta ventainel yuʼun Diose (Isaias 11:9). Kʼelo Daniel 2:44.

Kʼelo li video ¿Kʼu yuʼun yakʼoj to oyuk vokolil li Diose?

4. ¿Kʼusi sbalil xuʼ jtatik ti oy smalael yuʼun li Diose?

Li Satanase laj yal ti jaʼ noʼox la chtunik ta stojolal Dios li krixchanoetik kʼalal oy kʼusi ch-akʼbatike. Koliyal ti oy smalael yuʼun li Diose, jkotoltik xuʼ xkakʼtik ta ilel ta jkuxlejaltik ti jaʼ jun jutkʼop li Satanase xchiʼuk ti jaʼ ta xkakʼ jbatik ta stojolal li ajvalilal yuʼun Diose, maʼuk ta stojolal li ajvaliletik liʼ ta balumile. Kʼelo Job 1:8-12; Proverbios 27:11.

5. ¿Kʼuxi xuʼ xkakʼtik ta ilel ti jaʼ Ajvalil kuʼuntik li Diose?

Baʼyele, skʼan jnaʼtik kʼu yelan skʼan xkichʼtik ta mukʼ li Diose xchiʼuk ti xkakʼ ta jkuxlejaltik li chanubtasel chakʼik li melel relijion ti ta Vivlia lokʼeme (Juan 4:23). Jech xtok, mi ta jchanbetik stalelal Jesus ti muʼyuk ta jtikʼ jbatik ta politika xchiʼuk ta paskʼopetike, jaʼ jech ta jpʼajtik li ajvalilal yuʼun Satanase. Kʼelo Juan 17:14.

Li Satanase tstunes sjuʼel sventa spasik kʼusitik chopol xchiʼuk xmulivajik li krixchanoetike. Kʼalal muʼyuk bu ta jpastik li kʼusitik chopole, xuʼ van chlabanvanik li kamigotik xchiʼuk li kutsʼ kalaltike o xuʼ chakʼ jvokoltik xtok (1 Pedro 4:3, 4). Mi jech kʼot ta jtojolaltike, jaʼ mas lek ti jaʼ jchiʼintik li buchʼutik skʼanojik Diose xchiʼuk kakʼ ta jkuxlejaltik li lekil mantaletik yuʼune. Vaʼun, jech chkakʼtik ta ilel ti la sjut kʼop Satanas kʼalal laj yal ti chʼabal buchʼu chchʼunbe smantal Dios kʼalal oy vokolile. Kʼelo 1 Korintios 6:9, 10; 15:33.

Ta skoj ti skʼanojutik li Diose, jaʼ tspat koʼontontik ti tslajes onoʼox li vokolile xchiʼuk li choplejale. Li buchʼutik xchʼunojik taje chakʼ sbaik ta stojolal Dios, vaʼun chkuxiik sbatel osil ta balumil. Kʼelo Juan 3:16.