¿Kʼuxi xuʼ xijnopaj ta stojolal Dios?

1. ¿Mi ta xaʼi skotol orasionetik li Diose?

Li Diose chalbe skotol krixchanoetik ti xuʼ xnopajik ta stojolal kʼalal tspasik orasione (Salmo 65:2). Taje maʼuk skʼan xal ti chchikinta o lek chaʼi skotol orasionetik li Diose. Li Vivliae chal ti xuʼ ‹xmak ta be s-orasion› li buchʼu mu xichʼ ta mukʼ yajnile (1 Pedro 3:7). Kʼalal nopolik noʼox la spasik kʼusitik chopol li j-israeletike, muʼyuk chikintabat s-orasionik yuʼun li Diose. Akʼo mi jech, chchikintabe s-orasion li buchʼutik spasojik toʼox tsatsal mulil mi sutesoj yoʼontonik ta melele. Kʼelo Isaias 1:15; 55:7.

Kʼelo li video ¿Mi ta xaʼi skotol orasionetik li Diose?

2. ¿Kʼu yelan skʼan jpastik orasion?

Kʼalal ta jpastik orasione, jaʼ jtos ti kʼu yelan chkichʼtik ta mukʼ li Jeovae, jech oxal jaʼ noʼox stuk skʼan jkʼopontik ta orasion (Mateo 4:10; 6:9). Jech xtok, ta skoj ti jsaʼmulilutike, skʼan jpastik orasion ta sbi Jesus, yuʼun jaʼ cham ta skoj jmultik (Juan 14:6). Li Jeovae muʼyuk lek chil mi jaʼ noʼox chkalilantik li kʼusi jkomesoj ta joltik o jtsʼibaojtik ta vun li orasion ta jpastike, yuʼun tskʼan ti ta koʼontontik xlokʼe. Kʼelo Mateo 6:7; Filipenses 4:6, 7.

Li Jpasvanej kuʼuntike chaʼi j-orasiontik akʼo mi ta koʼontontik noʼox ta jpastik (1 Samuel 1:12, 13). Jech xtok, chalbutik ti akʼo jpastik orasion skotol orae: kʼalal tsakube, kʼalal chmal kʼakʼale, kʼalal chijveʼe o kʼalal ta jnuptantik vokoliletike. Kʼelo Salmo 55:22; Mateo 15:36.

3. ¿Kʼuxi tskoltautik li stsobajelik yajtsʼaklomtak Kristoe?

Nakalutik ta jun balumil ti noj ta krixchanoetik ti muʼyuk xchʼunel yoʼontonik ta stojolal Diose xchiʼuk ti mu xchʼunik mi chichʼ talel lekilal ta balumile. Taje xuʼ xchibajesutik sventa mu xkakʼbetik yipal ti xijnopaj ta stojolale (2 Timoteo 3:1, 4; 2 Pedro 3:3, 13). Jaʼ yuʼun, skʼan jtsob jbatik xchiʼuk yan yajtsʼaklomtak Kristo sventa spat koʼontontik. Li stukike tskʼanik patbel yoʼontonik ek. Kʼelo Ebreos 10:24, 25.

Kʼalal ta jtsob jbatik xchiʼuk li buchʼutik skʼanojik Diose, mas me nopol chkaʼi jbatik ta stojolal. Li stsobajelik stestigotak Jeovae tstsatsubtas koʼontontik ta skoj li xchʼunel yoʼontonike. Kʼelo Romanos 1:11, 12.

4. ¿Kʼuxi xuʼ xanopaj ta stojolal li Diose?

Sventa xanopaj ta stojolal li Diose, skʼan xanopbe lek skʼoplal li kʼusitik achanoj xa ta Vivliae. Nopo skʼoplal li kʼusitik spasoje, li tojobtaseletik yuʼune xchiʼuk li kʼusi yaloj tspase. Mi ta jnopbetik lek skʼoplal xchiʼuk mi jpastik orasione, jaʼ tskoltautik sventa xkaʼibetik smelolal kʼu to yepal skʼanojutik li Diose xchiʼuk ti mu albajuk spʼijile. Kʼelo Josue 1:8; Salmo 1:1-3.

Jaʼ noʼox xuʼ nopol oyot ta stojolal Dios mi oy xchʼunel avoʼonton xchiʼuk mi apatoj avoʼonton ta stojolale. Li xchʼunel oʼontonale xkoʼolaj kʼuchaʼal jpets tsʼiʼlel. Jech kʼuchaʼal nopolik noʼox skʼan atʼesel li jpets tsʼiʼlele, skʼan nopolik noʼox xanopbe skʼoplal kʼusitik achʼunoj sventa stsatsub li xchʼunel avoʼontone. Kʼelo Mateo 4:4; Ebreos 11:1, 6.

5. ¿Kʼusi sbalil ta jtabetik mi chijnopaj ta stojolal Diose?

Li Jeovae oy ta yoʼonton li buchʼutik chtunik ta stojolale. Jech xtok, oy ta yoʼonton tskʼel ti muʼyukuk kʼusi skʼunibtas li xchʼunel yoʼontonik xchiʼuk li spatobil yoʼontonik ti xuʼ xkuxiik sbatel osile (Salmo 91:1, 2, 7-10). Tspʼijubtasutik ti kʼusi xuʼ xij-ipaj-o yuʼune xchiʼuk ti kʼusi muʼyuk chijmuyubaj-o yuʼune. Chalbutik xtok kʼuxi xuʼ lek xijkuxi. Kʼelo Salmo 73:27, 28; Santiago 4:4, 8.