¿Kʼu yuʼun skʼan lek chapalik li yajtuneltak Diose?

1. ¿Kʼu yuʼun la xchapan lek Dios li jteklum Israel ta voʼnee?

Li Diose la slikes jun jteklum li ta snitilulal moltotil Abraane xchiʼuk laj yakʼbe jaytosuk mantaletik, taje kʼot ta jun jteklum ti lek chapale. Li jteklum taje Israel la sbiin, jaʼ toʼox oy ta sbaik xchabiel li melel yichʼel ta mukʼ Diose xchiʼuk li Skʼope (Salmo 147:19, 20). Koliyal li jteklum taje xuʼ stabeik sbalil li krixchanoetik ta skotol lumetike. Kʼelo Jenesis 22:18.

Li Diose la stʼuj j-israeletik sventa xkʼot ta stestigotak. Li sloʼilal j-israeletike chakʼ ta ilel ti lek kʼusitik chkʼot ta pasel kʼalal chichʼ chʼunbel li smantal Diose (Deuteronomio 4:6). Koliyal li kʼusi la spas li j-israeletike xuʼ xojtikinik melel Dios li yan krixchanoetike. Kʼelo Isaias 43:10, 12.

2. ¿Kʼu yuʼun skʼan lek chapalik li melel yajtsʼaklomtak Kristoe?

Ta jelavele, muʼyuk xa lek ilat yuʼun Dios li jteklum Israele, jaʼ yuʼun la sabe xkʼexol, jaʼ li stsobobbail yajtsʼaklom Kristoe (Mateo 21:43; 23:37, 38). Li avi kʼakʼale, jaʼ xa chtunik ta stojolal Jeova li melel yajtsʼaklomtak Kristo ti kʼotemik kʼuchaʼal stestigotake, maʼuk xa li j-israeletike. Kʼelo Echos 15:14, 17.

Li Jesuse lek la xchapan yajtsʼaklomtak ta sventa li cholmantale xchiʼuk sventa spasik ta yajtsʼaklomtak Kristo li krixchanoetik ta spʼejel balumile (Mateo 10:7, 11; 24:14; 28:19, 20). Li avi kʼakʼal ti poʼot xa xlaj skotol li kʼusitik oy ta balumile, mas xa yakal ch-epaj batel li abtelal ta cholmantale. Li Jeovae yakal tstsob ta smiyonal noʼox krixchanoetik ta skotol lumetik sventa xbatik li ta melel relijione, taje muʼyuk toʼox bu jech kʼotem-o ta pasel (Apokalipsis 7:9, 10). Kʼalal lek chapalik li melel yajtsʼaklomtak Kristoe, xuʼ spatbe sba yoʼontonik xchiʼuk xuʼ skolta sbaik. Jech xtok, koʼol li mantaletik chichʼik akʼbel ta tsobobbaile. Kʼelo Ebreos 10:24, 25.

3. ¿Kʼuxi lik li s-organisasion stestigotak Jeova ti oy avie?

Li organisasion taje lik ta sjabilal 1870. Oy jtsop jchanolajeletik ta Vivlia ti lik saʼik li kʼusitik melel ta Skʼop Dios ti jal xa ox muʼyuk nabile. Snaʼojik ti jaʼ la xchapan lek Jesus li stsobobbail yajtsʼaklom Kristo sventa xcholik mantale, jaʼ yuʼun la slikesik jun kampanya ta spʼejel balumil sventa xakʼik ta ojtikinel li aʼyej ta sventa li Ajvalilal yuʼun Diose. Ta sjabilal 1931, stestigotak Jeova la sbiinik. Kʼelo Echos 1:8; 2:1, 4, 11; 5:42.

4. ¿Kʼuxi xchapanoj sbaik li stestigotak Jeovae?

Li ta baʼyel sigloe, li stsobobbailtak yajtsʼaklom Kristo ta epal lumetike koltaatik yuʼun jtsop jbeiltasvanej, yuʼun snaʼoj ti jaʼ Jolil ta tsobobbail li Jesuse (Echos 16:4, 5). Li avi eke, li stestigotak Jeovae chichʼik koltael yuʼun Jtsop Jbeiltasvanej ti jaʼik yajtsʼaklom Kristo ti lek chanemike, ti jaʼ oy ta sbaik skʼelel skotol li Beteletik ta spʼejel balumile. Li ta Beteletik taje, te tsjelubtasik ta yan kʼopetik li vunetike, tspasik xchiʼuk tspukik vunetik xchiʼuk yan kʼusitik ti lokʼem ta Vivlia ta mas ta vakib sien kʼopetike. Li moletik chtunik ta Jtsop Jbeiltasvaneje tstunesik Vivlia sventa tspatbeik yoʼonton xchiʼuk tsbeiltasik mas ta sien mil tsobobbailetik. Li ta tsobobbailetike te chtunik viniketik ti lek chapalike xchiʼuk ti ta slekil yoʼonton chchabiik li xchijtak Diose. Kʼelo 1 Pedro 5:2, 3.

Li stestigotak Jeovae lek chapalik sventa chalik batel li lekik aʼyej ta Vivliae xchiʼuk tspasik ta yajtsʼaklom Kristo li krixchanoetike. Jech kʼuchaʼal la spasik li jtakboletike, ta xcholik mantal ta naetik ek (Echos 20:20). Jech xtok, chakʼbeik chanubtasel ta Vivlia li buchʼutik oy ta yoʼontonik tskʼan chchanik li kʼusitik melele. Pe maʼukik noʼox jun organisasion, yuʼun jaʼik jun utsʼ alalil ti skʼanoj sbaik ta jujuntale xchiʼuk ti chchabiatik ta xkʼuxul yoʼonton li Stotik ta vinajele (2 Tesalonisenses 1:3). Li yajtuneltak Diose oy ta yoʼontonik spasel li kʼusi tskʼane xchiʼuk tskoltaik li krixchanoetike, jaʼ yuʼun jaʼik jun utsʼ alalil ti stuk noʼox jech xmuyubajik ta spʼejel balumile. Kʼelo Salmo 33:12; Echos 20:35.