14 Xchanobil

Kʼux-elan xchapanoj sbaik li xrextikotak Jeovae

¿Bakʼin likik li xrextikotak Jeova ta jkʼakʼaliltike? (1)

¿Kʼux-elan li tsobajeletik ti tspasik li xrextikotak Jeovae? (2)

¿Buchʼu chakʼ li takʼin chichʼ tunesele? (3)

¿Buchʼu jbabe ta jujun tsobobbail? (4)

¿Kʼusi yan mukʼtik tsobajeletik chichʼ pasel jujun jabil? (5)

¿Kʼusi abtelal chichʼ pasel ta smukʼta nail tsʼibajom xchiʼuk ta yantik snail tsʼibajometik yuʼunike? (6)

1. Li xrextikotak Jeova ta jkʼakʼaliltike, likik kʼalal echʼ sjabilal 1870. Ta slikebe sbiinojik toʼox Jchanolajeletik ta Vivlia, pe ta 1931 la stsakik li biil xrextikotak Jeova ti te oy ta Vivliae (Isaías 43:10). Li juteb jtsop ta slikebe, chʼiem xa kʼalal to ta miyonetik ta Rextikoetik ti chcholik mantal ti echʼem xa ta dosientos treinta mukʼtik lumetik.

2. Jutuk mu skotoluk tsobobbail yuʼun xrextikotak Jeovae, ta stsob sbaik oxib velta ta xemana. Ikʼbilot ta buuk noʼox junukal tsobajeletik taje (Hebreos 10:24, 25). Li chanubtasel chichʼ akʼel tee lokʼesbil ta Vivlia. Li tsobajeletike chlik xchiʼuk chlaj ta jun orasion, xchiʼuk ta jutuk mu skotoluk chichʼ kʼejintael «kʼe[j]ojetik» ti lokʼemik ta oʼontonal sventa smuyubtael Jeova (Efesios 5:18, 19). Muʼyuk tojbil li ochebale xchiʼuk muʼyuk tskʼanik takʼin (Mateo 10:8).

3. Jutuk mu skotoluk tsobobbailetik ta stsob sbaik ta jpʼej sNail Reino. Jutuk mu skotoluk sNailtak Reino, jaʼ uni naetik ti vaʼanbilik yuʼun Rextikoetik ti muʼyuk chichʼ stojolike. Tee muʼyuk cha vil lokʼoletik, krusetik mi jaʼuk yan kʼusitik kʼuchaʼal liʼe. Li kʼusitik chichʼ tunesele chichʼ tojel ta matanal takʼin. Li buchʼutik tskʼan chakʼik matanal takʼine xuʼ tstikʼik ta xkaxail matanal takʼin (2 Corintios 9:7).

4. Ta jujun tsobobbaile, oy moletik o jchabivanejetik ti jaʼ jbabeetik chchanubtasvanike (1 Timoteo 3:1-7; 5:17). Leʼike chkoltaatik yuʼun li jtuneletike (1 Timoteo 3:8-10, 12, 13). Mi junuk buchʼu toyol chakʼ sba ta tsobobbail (2 Corintios 1:24). Muʼyuk chichʼik akʼbel biil sventa tstoy sbaik (Mateo 23:8-10). Muʼyuk jelel ta slap skʼuʼik. Mi jaʼuk ta xichʼ stojolik ta skoj yabtelik. Li moletike ta yutsil yoʼontonik chalbeik smantal Dios li tsobobbaile. Chakʼik patob oʼontonal xchiʼuk chbeiltasvanik ta yorail vokoliletik (Santiago 5:14-16; 1 Pedro 5:2, 3).

5. Jech xtok, li xrextikotak Jeovae ta spasik mukʼtik tsobajeletik jujun jabil. Tee ta stsob sbaik ep tsobobbailetik sventa chchikintaik li chanubtasel tsots skʼoplal ta Vivliae. Ta skotol mukʼtik tsobajeletik taje ta xichʼik voʼ li achʼ jtsʼaklometike (Mateo 3:13-17; 28:19, 20).

6. Te oy ta Nueva York li smukʼta nail tsʼibajom yuʼun li xrextikotak Jeovae. Te oy li Jtsop jBeiltasvanej, jaʼ jtsop moletik ti lek snaʼik xchiʼuk ti chchabiik li tsobobbail ta spʼejel Balumile. Jech xtok, oy echʼem ta sien snail tsʼibajometik ta sjoylej Balumil. Li krixchanoetik ti muʼyuk chichʼ stojolik te ch-abtejike, chkoltavanik ta spasel xchiʼuk ta stakel li vunetik ti chkʼopoj ta Vivliae. Jaʼ to te chichʼ chapanel ek li abtelal chol mantale. ¿Kʼu yuʼun mu xa nop chbat avulaʼan li snail tsʼibajom bu nopol nakalote?