¿Kʼu yelan chichʼik chanubtasel li stestigotak Jeovae?

Jkotolkutik li stestigounkutik Jeovae nopajtik chkichʼkutik chanubtasel sventa jechuk jkuxlejalkutik kʼuchaʼal jun yajtsʼaklom Kristo. Te smakojbe skʼoplal li abtelal laj yalbe yajchankʼoptak li Jesuse, ti jaʼ skʼoplal li xcholel li lekil aʼyejetik ta sventa li Ajvalilal yuʼun Diose xchiʼuk ti xichanubtasvankutike (Mateo 24:14; 28:19, 20). Te chkichʼkutik chanubtasel li ta jtsobajelkutik jujun xemanae xchiʼuk li ta j˗asambleakutik jujun jabile. Jech xtok, li stestigotak Jeova ti oy kʼusitik mas sbainojik ta tsobobbail o li ta j˗organisasionkutike chichʼik chanubtasel mas ti ta Vivlia chlokʼe.

Ta jkʼelbetik batel skʼoplal tana liʼe:

¿Kʼu yelan chichʼik chanubtasel li stestigotak Jeovae?

Tsobajeletik. Ta jujun xemanae, li stestigounkutik Jeovae ta jtsob jbakutik ta jujuvokʼ ti tsobobbail sbi kuʼunkutike. Chib velta ta xemana ta jtsob jbakutik li ta salon ti jaʼ te chkichʼkutik ta mukʼ li Diose. Li baʼyel tsobajele ch˗echʼ ta xokol kʼakʼal, li xchibale ta savado o domingo. Buchʼuuk xuʼ xbat li ta jtsobajelkutike xchiʼuk muʼyuk chichʼ kʼanel takʼin.

Tsobajel ta xokol kʼakʼal. Te chkichʼkutik chanubtasel sventa masuk xitojobkutik xchanel vun, ti masuk xitojobkutik ta kʼopojel, ti masuk xitojob chikʼopojkutik ta yeloval krixchanoetike, ti masuk xitojobkutik ta cholmantale xchiʼuk ti masuk xitojobkutik ta chanubtasvaneje. Li ta jtsobajelkutike ch˗echʼ mantaletik, chichʼ jakʼel xchiʼuk chichʼ takel, chichʼ akʼel ta ilel skʼelobiltak xchiʼuk chichʼ akʼel ta ilel videoetik. Skotol taje tskoltaunkutik sventa masuk xitojobkutik ta cholmantal xchiʼuk ta yakʼbel chanubtasel li krixchanoetik ti oy ta yoʼontonik xchanel Vivliae. Jkotolkutik li buchʼutik chibatkutik ta tsobajele ta jtabekutik sbalil, yuʼun mas to ch˗ayan xchʼunel koʼontontik ta stojolal Dios xchiʼuk mas ta jkʼankutik li Diose xchiʼuk li jchiʼiltakutik ta chʼunolajele.
Tsobajel ta savado o ta domingo. Chaʼvokʼ kʼusi chjelav. Li baʼyele jaʼ jun mantal lokʼem ta Vivlia ti jaʼ sventa skotol krixchanoetike, li xchibale jaʼ chichʼ jakʼel xchiʼuk chichʼ takʼel jun mantal li ta revista Li Jkʼel˗osil ta toyole.a Li ta jujun mantaletik taje chichʼ albel skʼoplal beiltaseletik ta Vivlia ti tskoltaunkutik ti kʼu yelan chkichʼkutik ta mukʼ Diose xchiʼuk tskoltaunkutik ta jkuxlejalkutik.

Asambleaetik. Taje jaʼ mukʼtik tsobajeletik chichʼ pasel ti chkʼot ep krixchanoetik xchiʼuk chkʼot ep tsobobbailetike, chichʼ pasel oxib velta ta jabil. Li asambleaetike oy jun stemail ti lokʼem ta Vivliae, ch˗echʼ mantaletik, skʼelobiltak, oy buchʼutik chichʼ jakʼbel sloʼil xchiʼuk chichʼ kʼelel videoetik. Chakʼ tajek muyubajel li asambleaetike xchiʼuk tskoltaunkutik sventa xkojtikinkutik lek li Vivliae xchiʼuk ti xitojobkutik mas ta cholmantale. Buchʼuuk xuʼ xbat, muʼyuk chichʼ kʼanel takʼin te.

Liʼe jaʼ li chanubtasel chichʼik li stestigotak Jeovae

Junantik stestigotak Jeovae chichʼik takel ta ikʼel ta junantik chanob vunetik sventa masuk to xichʼik chapanel. ¿Kʼusitik chanob vunal taje? ¿Kʼusi sventa xchiʼuk kʼu sjalil? ¿Buchʼutik xuʼ xbatik?

Chanob vun sventa abtelal ta prekursor

Ti kʼusi sventae: Li prekursoretikb ti jaʼik stestigotak Jeova ti jaʼ mas chchʼakbeik yorail li cholmantale, chichʼik chapanel sventa masuk to xtojobik ta cholmantal xchiʼuk ta chanubtasvanej ta Vivlia. Ep kʼusitik koʼol chchanbeik skʼoplal ti te lokʼem ta Vivliae, ch˗echʼ skʼelobiltak, mantaletik xchiʼuk te chakʼik ta ilel kʼuxi ta pasel li kʼusi la xchanike.
Kʼu sjalil: Vakib kʼakʼal.
Buchʼutik xuʼ xbatik: Chichʼik takel ta ikʼel li buchʼutik lokʼ xa jun jabil ti chtunik ta prekursor regulare xchiʼuk li prekursoretik ti lokʼ xa voʼob jabil ti muʼyuk ayemik li ta chanob vun taje.

Li ta chanob vun sventa prekursore, te chvinaj chaʼvoʼ ermanaetik ti chakʼik ta ilel kʼu yelan ta cholel mantale. Te skʼelojik li yantik jchanunetike.

Chanob vun sventa j˗al lekil aʼyejetik yuʼun Ajvalilal yuʼun Dios

Ti kʼusi sventae: Chichʼik to mas chapanel li prekursoretik ti xtojobik xa onoʼoxe. Li jchanunetike chichʼik chanubtasel sventa masuk xtojobik ta cholmantal xchiʼuk masuk xtojobik ta chanubtasvanej. Jech xtok, chchajbeik to mas skʼoplal junantik mantaletik ta Vivlia. Ep li buchʼutik chnel yuʼunik li chanob vun liʼe chichʼik takel batel ta yantik lumetik ti bu skʼan mas jcholmantaletike.
Kʼu sjalil: Chib u.
Buchʼutik xuʼ xbatik: Jaʼ li prekursoretik ti snojesojik jun solisitude, ti spas yuʼunik li kʼusi chichʼ kʼanele xchiʼuk ti xuʼ yuʼun chbat tunikuk ti bu skʼan mas jcholmantaletike.

Li jchanunetik li ta Chanob vun j˗al lekil aʼyejetike stoyoj skʼobik sventa xakʼ skomentarioik.

Chanob vun sventa moletik ta tsobobbail

Ti kʼusi sventae: Jaʼ sventa xichʼ koltael li buchʼutik sbainojik tsobobbaile, ti ojtikinbilik kʼuchaʼal moletikc sventa xtojobik ta spasel li yabtelike, ti xtojobik ta xchanubtasel li ermanoetike xchiʼuk ti xchabiik ta mantale. Li chanob vun liʼe chkoltaatik sventa masuk to skʼanik li Jeovae xchiʼuk li yermanotakike (1 Pedro 5:2, 3).
Kʼu sjalil: Voʼob kʼakʼal.
Buchʼutik xuʼ xbatik: Chichʼik takel ta ikʼel moletik ta tsobobbail ti achʼik toe xchiʼuk moletik ta tsobobbail ti lek chanemike xchiʼuk ti lokʼ xa voʼob jabil ayik li ta chanob vun taje.

Chanob vun sventa jkʼelvanejetik ta sirkuito xchiʼuk yajnilik

Ti kʼusi sventae: Jaʼ sventa xichʼik chapanel li jkʼelvanejetik ta sirkuitod sventa masuk to xtojobik spasel li kʼusitik sbainojik xchiʼuk ti masuk to xtojobikuk skʼelel ti jayib tsobobbail sbainojike (1 Timoteo 5:17). Li chanob vun liʼe jaʼ chkoltaat li jkʼelvanejetik ta sirkuito xchiʼuk yajnilik sventa xaʼibeik mas smelolal li Vivliae.
Kʼu sjalil: Jun u.
Buchʼutik xuʼ xbatik: Jaʼik li jkʼelvanejetik ta sirkuito xchiʼuk yajnilik ti lokʼ xa jun jabil jech yakal ch˗abtejike. Laje, chichʼik takel ta ikʼel mi lokʼ xa ox voʼob jabil ayemik li ta chanob vun taje.

Chanob vun sventa j˗abteletik yuʼun Ajvalilal yuʼun Dios

Ti kʼusi sventae: Jaʼ sventa xichʼik chanubtasel li moletik xchiʼuk siervo ministerialetike sventa masuk to xtojobik ta spasel li yabtel sbainojik ta tsobobbaile. Jaʼ chichʼ tsakel ta venta li kʼusitik chtun yuʼun xchiʼuk ti kʼu yelan li tsobobbailetike (2 Timoteo 3:1). Li chanob vun liʼe ta jayibtik to jabil chjelav.
Kʼu sjalil: Jelajtik kʼu sjalil, xuʼ van jun kʼakʼal.
Buchʼutik xuʼ xbatik: Jkʼelvanejetik ta sirkuito, moletik ta tsobobbail xchiʼuk siervo ministerialetik.

Chanob vun ta sventa li buchʼutik achʼik to ta Betele

Ti kʼusi sventae: Jaʼ sventa xichʼik chanubtasel li buchʼutik te chtunik ta Betelf sventa lekuk spas li yabtel sbainojike xchiʼuk sventa masuk to skʼanik li Diose xchiʼuk li xchiʼiltakike.
Kʼu sjalil: Voʼob kʼakʼal xchiʼuk oʼlol.
Buchʼutik xuʼ xbatik: Persa skʼan xbatik skotol li buchʼutik achʼ to chtunik ta Betele. Jech xtok, xuʼ xbatik li buchʼutik jal xa te chtunik ta Betel ti oy xa mas ta voʼob jabil muʼyuk ayemike.

Chanob vun sventa Vivlia ta Galaad yuʼun Watchtower

Ti kʼusi sventae: Jaʼ ti skʼanik mas Skʼop Dios li jchanunetike xchiʼuk chkoltaatik sventa xakʼ ta xkuxlejalik li kʼusi chchanike (1 Tesalonisenses 2:13). Li viniketik xchiʼuk antsetik ti yijik ta mantal ti chbatik ta chanob vun ta Galaade mas chichʼik tunesel li ta s˗organisasion Jeovae xchiʼuk li ta yakʼel chanubtasel ta Vivlia ta spʼejel balumile. Li buchʼutik chnel yuʼunik li chanob vun liʼe xuʼ xichʼik takel batel ta cholmantal o chbat tunikuk ta junuk Betel yuʼun stestigotak Jeova, xuʼ te ta slumalik o ta yan lum chtakatik batel.
Kʼu sjalil: Voʼob u.
Buchʼutik xuʼ xbatik: Junantik stestigotak Jeova ti chtunik ta tsʼakal ora kʼuchaʼal misioneroetik, prekursor espesialetik, buchʼutik chtunik ta Betel xchiʼuk jkʼelvanejetik ta sirkuito xchiʼuk yajnilik. Jaʼ chtakbatik talel solisitud yuʼun li Beteletike. Te chjelav ta Snail Chanob vun yuʼun Watchtower, ta Patterson (Nueva York).

Chanob vun sventa Buchʼutik Sbainojik Betel xchiʼuk Yajnilik

Ti kʼusi sventae: Chichʼik chapanel li buchʼutik chtunik ta Komite sventa Betelg sventa skʼelik li abtelal chichʼ pasel te ta yutil Betele xchiʼuk li abtelal tspasik li stestigotak Jeova li ta lume o ti jayib lumetik sbainoj skʼelel li Betele.
Kʼu sjalil: Chib u.
Buchʼutik xuʼ xbatik: Xuʼ xbatik li buchʼutik chtunik ta Komite sventa Betel xchiʼuk yajnilik ti jaʼ chtakatik ta ikʼel yuʼun li smeʼ nail abtelal yuʼun stestigotak Jeovae. Te ch˗echʼ li ta Snail Chanob vun yuʼun Watchtower, ta Patterson (Nueva York).

¿Bu tslokʼesik li chanubtasel chichʼik li stestigotak Jeovae?

Ta Vivlia, jaʼ li livro ti mas tstunesik li stestigotak Jeovae. Jchʼunojkutik lek ti jaʼ yakʼoj ta naʼel Dios li Vivliae xchiʼuk ti tskoltaunkutik ta jkuxlejalkutik skotol li chanubtaseletik yichʼoj tale (2 Timoteo 3:16, 17).

¿Mi tojbil li chanubtasel chichʼike?

Muʼyuk tojbil. Skotol li chanob vunetike naka ta matanal xchiʼuk jaʼ chichʼ tunesel li matanal takʼine (2 Korintios 9:7).

a Li ta jpajinakutik ta Internet ta jw.org te chata li Vivliae xchiʼuk oy ep vunetik ti tskoltaot ta xchanel li Vivliae.

b Li prekursoretike jaʼik stestigotak Jeova ti yichʼojik voʼ ti chapbil jayib ora chcholik mantal ta jujun ue. Li viniketik xchiʼuk antsetik taje toj lek ta chanbel stalelalik.

c Li moletik ta tsobobbaile jaʼik stestigotak Jeova ti lek yijik ta mantale xchiʼuk ti naka ta Vivlia tslokʼesik li kʼusi chakʼik ta chanele. Chchabiik xchiʼuk tspatbeik yoʼonton li yermanotakike. Muʼyuk tojbilik.

d Li jun jkʼelvanej ta sirkuitoe jaʼ jun mol ta tsobobbail ti tsvulaʼan jun tsobobbail ta jujun xemanae. Tsvulaʼan skotol ti jayib tsobobbailetik sbainoj skʼelele. Chetʼes mantaletik ta Vivlia sventa spatbe yoʼonton li yermanotak ta tsobobbaile xchiʼuk chchiʼinan ta cholmantal.

e Li siervo ministerialetike jeltos abtelal tspasik sventa xtunik ta stojolal li yermanotakike. Koliyal taje, li moletik ta tsobobbaile xuʼ xchʼakbeik mas yorail sventa xchanubtasik xchiʼuk sventa xchabiik ta mantal li ermanoetik ta tsobobbaile.

f Li Betele jaʼ li bu tsbeiltasik talel abtelal li stestigotak Jeovae. Li buchʼutik chkoltavanike te xa ch˗abtejik˗o sventa skʼelbeik skʼoplal li kʼusitik tspas li stestigotak Jeova ti bu kʼalal sventainoj jujun Betele.

g Li jujun Komite sventa Betele te ch˗abtej oxib o mas ermanoetik ti lek yijik ta mantale.

¿Kʼusi sbalil tstabeik stestigotak Jeova li chanubtasel chichʼike?

«Ta skoj ti xitsʼijet no’oxe, vokol tajek chkaʼi ti jcholbeik mantal li buchʼutik mu xkojtikine. Pe li tsobajeletik ta xokol kʼakʼal ta jujun xemanae, skoltaojun sventa xlekub ti k’u yelan chichanubtasvane xchiʼuk ti muuk xixiʼe. Jech xtok, skoltaojun sventa masuk to xiloʼilaj xchiʼuk li ermanoetik ta tsobobbaile xchiʼuk li jchiʼiltak ta abtele» (Natasha, Estados Unidos).
«Li Chanob vun sventa j˗al lekil aʼyejetik yuʼun Ajvalilal yuʼun Diose skoltaojun sventa masuk to xikʼanvan, ti oyuk smalael kuʼune, ti oyuk slekil koʼontone xchiʼuk skoltaojun sventa masuk to x˗ayan jlekil talelaltak. Jech xtok, skoltaojun sventa xikʼot ta jun lekil yajtsʼaklom Kristo, ta jun lekil amigoil xchiʼuk ti lekuk xilik jtalelal li jlakʼnatake. Li chanob vun xtoke skoltaojun sventa jsabe mas smelolal li chanubtaseletik ta Vivliae xchiʼuk ti masuk to xkʼot ta yoʼonton krixchanoetik kʼalal ta jchapbe smelolal li Skʼop Diose» (Stephen, Nigeria).
«Li Chanob vun sventa moletik ta tsobobbaile skoltaojun sventa masuk to bikʼit xkakʼ jba yoʼ lekuk jpas batel li kabtel kʼuchaʼal mol ta tsobobbaile. Koliyal li mantaletik la sjelubtasik tee, la jchan ti skʼan to mas jchanbe stalelal li Jesuse» (Luca, Italia).
«Li Chanob vun sventa j˗abteletik yuʼun Ajvalilal yuʼun Diose laj yakʼ jchan ti toj tsots skʼoplal ti jtakʼuk noʼox kʼoponele xchiʼuk ti oyuk slekil koʼonton ta stojolal li yantike. La jchan xtok ti kʼalal oy kʼusi ta jpas ta stojolal li yantike skʼan ta kʼanelaluk jpas, maʼuk ti sujbil skʼan jpase» (Samuel, Reino Unido).
«Li Chanob vun sventa Vivlia ta Galaade la skoltaunkutik sventa jkʼel jbakutik ta nen xkaltik li ta Skʼop Diose (Santiago 1:22-25). Laj kakʼkutik venta ti skʼan jel jtalelalkutike xchiʼuk la jchankutik kʼu yelan skʼan mas lek xitunkutik ta stojolal Jeova. La jchankutik xtok ti skʼan jaʼuk jnopkutik li kʼusi chtun yuʼun yantike, maʼuk li kʼusi chtun kuʼun jtukutike xchiʼuk skotol li kʼusi chkalkutik xchiʼuk ta jpaskutike jaʼuk stij koʼontonkutik li kʼanelal ta stojolal yantike» (Elnathan xchiʼuk Princess, Filipinas).