¿Mi yakal chatabe sbalil li chanubtasel chakʼ Jeovae?

1. ¿Kʼusi tsnop Jeova ta sventa li xchanubtasel yajtuneltake?

¹ Li Jeova ti jaʼ Mukʼul Jchanubtasvanej kuʼuntike, tsots skʼoplal chil ti xichʼik chanubtasel lek li yajtuneltake (Isa. 30:20). Jaʼo lik ta chanubtasvanej kʼalal spasoj xaʼox li baʼyel Xnichʼone (Juan 8:28). Kʼalal laj xaʼox stoy sba li Adane, li Jeovae ta slekil yoʼonton jech-o la xchanubtas li krixchanoetik ti jpasmuliletike (Isa. 48:17, 18; 2 Tim. 3:14, 15).

2. ¿Kʼusi kampanyail sventa chanubtasel yakal chichʼ pasel?

² Li avi kʼakʼale, li Jeovae jaʼ tsbeiltas li kampanya sventa chanubtasel ti muʼyuk jech ilbil-oe. Jech kʼuchaʼal laj onoʼox yal li Isaiase, ta smiyonal noʼox krixchanoetik ta spʼejel Balumil chbatik li ta «vits yoʼ bu oy sna Mucʼul Diose» (Isa. 2:2). ¿Kʼu yuʼun ti te chbatike? Jaʼ sventa tsaʼik li beiltasel ta sventa li smantal Diose, jech, jaʼ sventa chichʼik chanubtasel yuʼun li Jeovae (Isa. 2:3). Li ta kabteltik lik ta septiembre yuʼun 2009 kʼalal ta agosto yuʼun 2010, li yajrextikotak Jeovae la xchʼakbeik mas ta 1,600 miyon ora ti la xcholik mantal xchiʼuk ti chanubtasvanik ta Vivliae. Jech xtok, jujun xemana chichʼ akʼel chanubtasel ta mantal mas ta 105 mil tsobobbailetik ta spʼejel Balumil, xchiʼuk li j-abtel ti tukʼ yoʼonton, ti lek pʼije tslokʼes vunetik mas ta 500 kʼopetik.

3. ¿Kʼuxi skoltaojot li chanubtasel chakʼ Jeovae?

³ Toj lek chapalutik. ¡Toj ep skoltaojutik li chanubtasel chakʼbutik Diose! Yuʼun jnaʼojtik xa ti oy sbi stuk li Diose xchiʼuk ti oyutik ta yoʼontone (Sal. 83:18, NM; 1 Ped. 5:6, 7). Yuʼun chakʼbutik stakʼobil li kʼusitik tsots skʼoplal ta jakʼbe jbatik, jech kʼuchaʼal liʼe: ¿Kʼu yuʼun chkil jvokoltik xchiʼuk chi jchamutik? ¿Kʼuxi xuʼ jtatik li melel muyubajele? ¿Kʼusi stu ta melel li jkuxlejaltike? Pe maʼuk noʼox taje, yuʼun yakʼojbutik mantaletik sventa talelalil ti jaʼ tskoltautik ti lekuk xbat li jkuxlejaltike (Jos. 1:8).

4. ¿Kʼusitik chanubtasel xuʼ jtatik, xchiʼuk kʼu yuʼun skʼan xkakʼtik persa stabel sbalil li chanubtasel chakʼ Jeovae?

⁴ Jech xtok, ep yajtuneltak Jeova ti tskʼan chepajes yabtelik ta cholmantale, chakʼbe to yan chanubtasel. Li ta pajina 4 kʼalal ta 6, te talem slistail li chanubtaseletik ti xuʼ xatae. Pe mi mu xata li chanubtasel taje, ¿kʼu yuʼun mu xavakʼ persa xatabe sbalil li kʼusi xuʼ noʼox xatae? Oy bakʼintik li kerem tsebetike tsujatik yuʼun smaestroik xchiʼuk yan krixchanoetik ti akʼo xbatik ta universidade. Li voʼotik une, ¿kʼusi chkalbetik? ¿Mi ta van jtijbetik yoʼontonik ti xakʼ ta xkuxlejalik stael li kʼusi ta mantale xchiʼuk ti stabeik sbalil li chanubtasel chakʼ Jeovae? Ti chkakʼtik persa stabel sbalil li chapanel chakʼbutik Diose, jaʼ tskoltautik ta skʼupinel lek li jkuxlejaltik avie xchiʼuk li ta achʼ Balumil ta mas jelavele (Sal. 119:105; Juan 17:3).

Liʼe jaʼ jlom chanubtaseletik chakʼ li s-organisasion Jeovae

Chanun sventa skʼelel xchiʼuk stsʼibael vun

• Kʼusi stu: Jaʼ sventa xchanik skʼelel xchiʼuk stsʼibael vun li buchʼutik te chkʼotike, taje jaʼ chkoltaatik sventa xuʼ xchanik li Vivliae xchiʼuk ti xuʼ xchanubtasik yantik ta sventa li melele.

• Kʼu sjalil: Jaʼ ti kʼu sjalil xuʼ yuʼunik ta skoj ti jeltos xkuxlejalike.

• Bu ch-echʼ: Ta Salon sventa Tsobobbail yoʼ bu nakalote.

• Buchʼu xuʼ xbat: Skotol jcholmantaletik o krixchanoetik ti lek chaʼiik mantale.

• Kʼuxi ta tael: Li moletik ta tsobobbaile chalbeik ti xuʼ xbat skotolik ti buchʼutik tskʼanik chanubtasele, yuʼun jaʼ chchapanik li chanobvun ti kʼuyelan chtun chilik tee.

Chanobvun sventa Kabteltik yuʼun Dios

• Kʼusi stu: Xchanubtasel jcholmantaletik sventa lekuk xchanubtasvanik xchiʼuk ti lekuk chapalik ta xcholel li lekil aʼyeje.

• Kʼu sjalil: Jech-o.

• Bu ch-echʼ: Ta Salon sventa Tsobobbail yoʼ bu nakalote.

• Buchʼu xuʼ xbat: Skotol jcholmantaletik. Xuʼ xbatik ek li buchʼutik chkʼotilanik ta tsobajele, ti lek chaʼiik li chanubtaseletik ta Vivliae xchiʼuk ti chakʼ ta xkuxlejalik li beiltaseletik yichʼoj yajtsʼaklomtak Cristoe.

• Kʼuxi ta tael: Jakʼbo li buchʼu sbainoj li Chanobvun sventa Kabteltik yuʼun Diose.

Chanun sventa xchanel yan kʼop

• Kʼusi stu: Chichʼik chanubtasel sventa xcholik mantal ta yan kʼop li jcholmantaletike.

• Kʼu sjalil: Chanib o voʼob u. Li chanune chjalij jun o chib ora, xchiʼuk jutuk mu skotoluk veltae ta sob sabado ch-echʼ.

• Bu ch-echʼ: Jutuk mu skotoluk veltae ta Salon sventa Tsobobbail ti bu mas nopole.

• Buchʼu xuʼ xbat: Jcholmantaletik ti lek skʼoplalike xchiʼuk ti oyuk ta yoʼontonik xcholel mantal ta yan-o kʼope.

• Kʼuxi ta tael: Li Betele jaʼ chchapan li chanubtasel ti kʼuyelan chtun chile.

Svaʼanel Salonetik sventa Tsobobbail

• Kʼusi stu: Svaʼanel xchiʼuk xchaʼachʼubtasel Salonetik sventa Tsobobbail. Manchuk mi maʼuk chanubtasel, ta onoʼox xichʼik chanubtasel ta spasel jaytosuk abtelal sventa xuʼ skolta sbaik spasel li abtelal taje.

• Kʼu sjalil: Jaʼ ti kʼu sjalil xuʼ yuʼunik ta skoj ti jeltos xkuxlejalik li buchʼu naka noʼox chkoltavane.

• Bu ch-echʼ: Jaʼ ti bu smakoj li Komite sventa Svaʼanel Salonetik ta Jvokʼ Lume. Jech xtok, kʼalal oy bu chil svokolik ta skoj nikel, nojelal ta voʼ o yantike, chichʼik albel li buchʼutik naka noʼox chkoltavanik ti akʼo xbat skoltaik li ermanoetik ti chil svokolike.

• Kʼusitik skʼan pasel: Li buchʼutik tskʼan chbatike skʼan ti yichʼojikuk xa voʼe xchiʼuk ti chakʼ ye li moletik ti xuʼ xbate. Xuʼ mi vinik o mi ants, mu ventauk mi muʼyuk xchanoj spasel jtosuk abtel.

• Kʼuxi ta tael: Kʼanbo moletik ta atsobobbail li vun ti skʼan nojesel ti jaʼ sbi Cuestionario para trabajadores voluntarios en Salones del Reino (S-82).

Chanobvun sventa Abtelal ta Prekursor

• Kʼusi stu: Chichʼ chanubtasel li prekursoretik sventa «[spas yuʼun li abtelal] ta spuquel Lequil Aʼyeje» (2 Tim. 4:5).

• Kʼu sjalil: Chib xemana.

• Bu ch-echʼ: Jaʼ tstʼuj li Betele xchiʼuk jutuk mu skotoluk veltae ta Salon sventa Tsobobbail ti bu mas nopole.

• Kʼusitik skʼan pasel: Jaʼ ti junuk xa jabil tunemot ta prekursor regulare.

• Kʼuxi ta tael: Malao li kʼusi chal li jkʼelvanej ta sirkuitoe, ti jaʼ tstʼuj ti buchʼu xuʼ xbat li ta chanobvun taje.

Chanobvun sventa li buchʼutik Achʼik to ta Betele

• Kʼusi stu: Li chanun taje jaʼ sventa tskoltaik li buchʼutik achʼ to chkʼotik ta Betele, taje jaʼ sventa ti lekuk skʼupinik ti te chtunike.

• Kʼu sjalil: Jun ora ta xemana, taje vaklajuneb xemana chjalij.

• Bu ch-echʼ: Ta Betel.

• Kʼusitik skʼan pasel: Ti jaʼuk chtun ta Betele o ti naka noʼox chkoltavan kʼuk sjalile (jun jabil o mas).

• Kʼuxi ta tael: Jaʼ tstʼuj Betel ti buchʼu xuʼ xbat li ta chanobvun taje.

Chanobvun sventa Moletik xchiʼuk Yajkoltaobbatak

• Kʼusi stu: Xchanubtasel li moletik ta tsobobbail xchiʼuk li yajkoltaobbatak sventa spas yuʼunik lek li yabtelike, ti snaʼikuk lek xchapanel xchiʼuk skʼelele (Hech. 20:28). Taje ch-echʼ jayibuk jabil sventa x-echʼ li chanun taje, jaʼ ti kʼuxi ikʼot ta nopel yuʼun li Jtsop Jbeiltasvaneje.

• Kʼu sjalil: Oy xa ta jayibuk jabil yechʼel tale, jun kʼakʼal xchiʼuk oʼlol li chanun sventa moletike, pe li yajkoltaobbatake jaʼ jun kʼakʼal.

• Bu ch-echʼ: Jutuk mu skotoluk veltae ta Salon sventa Tsobobbail o ta Salon sventa mukʼta tsobajeletik ti bu mas nopole.

• Kʼusitik skʼan pasel: Jaʼuk mol ta tsobobbail o yajkoltaobba.

• Kʼuxi ta tael: Jaʼ tstʼuj li jkʼelvanej ta sirkuito ti buchʼu xuʼ xbat li ta chanobvun taje.

Chanobvun sventa Moletik ta Tsobobbaila

• Kʼusi stu: Skoltael sventa spas lek yuʼun yabtelik li moletik ta tsobobbaile.

• Kʼu sjalil: Voʼob kʼakʼal.

• Bu ch-echʼ: Jaʼ tstʼuj li Betele xchiʼuk jutuk mu skotoluk veltae ta Salon sventa Tsobobbail o ta Salon sventa mukʼta tsobajeletik ti bu mas nopole.

• Kʼusitik skʼan pasel: Jaʼuk mol ta tsobobbail.

• Kʼuxi ta tael: Jaʼ tstʼuj Betel ti buchʼu xuʼ xbat li ta chanobvun taje.

Chanobvun sventa Jkʼelvanejetik ta Sirkuito o Distrito xchiʼuk Yajnilik*

• Kʼusi stu: Taje jaʼ chichʼik koltael li jkʼelvanejetik ta sirkuito o distrito sventa skʼelik lek li tsobobbailetike, ti «[xakʼ ta] yoʼntonic ta xcholel scʼop Diose, xchiʼuc ta xchanubtasvanique», xchiʼuk ti tsvulaʼanik li buchʼutik oy ta sbaik skʼelele (1 Tim. 5:17; 1 Ped. 5:2, 3).

• Kʼu sjalil: Chib u.

• Bu ch-echʼ: Jaʼ tstʼuj li Betele.

• Kʼusitik skʼan pasel: Jaʼuk jkʼelvanej ta sirkuito o distrito.

• Kʼuxi ta tael: Jaʼ tstʼuj Betel ti buchʼu xuʼ xbat li ta chanobvun taje xchiʼuk li yajnilike.

Chanobvun ta Vivlia sventa Ermanoetik ti Chʼabal Yajnilike*

• Kʼusi stu: Xchanubtasel li moletik ta tsobobbail xchiʼuk li yajkoltaobbatak sventa spas yuʼunik lek li yabtelike. Jutuk mu skotoluk li buchʼu chnel yuʼunik li chanobvune chtakatik batel te noʼox ta slumalik ti bu chtun mas jcholmantaletike. Jlome xuʼ van xtakatik batel ta yan lum mi laj yalik ti xuʼ yuʼunike.

• Kʼu sjalil: Chib u.

• Bu ch-echʼ: Jaʼ tstʼuj li Betele xchiʼuk jutuk mu skotoluk veltae ta Salon sventa Tsobobbail o ta Salon sventa mukʼta tsobajeletik ti bu mas nopole.

• Kʼusitik skʼan pasel: Ti muʼyukuk yajnile xchiʼuk ti yichʼojikuk 23 o 62 sjabilalike, ti mu masuk snaʼ x-ipaje, ti oyuk ta yoʼonton chtun ta stojolal li yermanotake xchiʼuk ta spasel li abtelal sventa Ajvalilal yuʼun Dios ti bu chtun mas jcholmantaletike (Mar. 10:29, 30). Jaʼ ti oyuk xa ta chib jabil ti jech-o yakal chtun ta mol ta tsobobbail o ta yajkoltaobba mole.

• Kʼuxi ta tael: Li ta junantik Mukʼta Tsobajeletik ta chib kʼakʼale, chichʼ alel ti xuʼ xbatik li ta tsobajel li buchʼu oy ta yoʼontonike, ti jaʼ te chichʼ albel mas skʼoplale.

Chanobvun ta Vivlia sventa Yajtsʼaklomtak Cristo ti Nupunemike*

• Kʼusi stu: Jaʼ ti xichʼik chapanel lek li nupultsʼakaletik sventa lek xtunik ta stojolal Jeova xchiʼuk ti xichʼik tunesel yuʼun li s-organisasione. Jutuk mu skotoluk li buchʼu chnel yuʼunik li chanobvune chtakatik batel te noʼox ta slumalik ti bu tskʼanik mas koltaele. Jlome xuʼ van xtakatik batel ta yan lum mi laj yalik ti xuʼ yuʼunike.

• Kʼu sjalil: Chib u.

• Bu ch-echʼ: Li baʼyel chanubtasele te ilik ta Smeʼ Chanubtasel yuʼun Watchtower, ta Patterson (Nueva York). Ta mas tsʼakale chichʼ akʼel chanubtasel ta yantik lumetik ti jaʼ chal Betel butik ta x-echʼe, taje te onoʼox van ta x-echʼ ta Salon sventa Tsobobbail o ta Salon sventa mukʼta tsobajeletik.

• Kʼusitik skʼan pasel: Skʼan ti 25 o 50 sjabilalike, ti mu masuk snaʼ x-ipajike, ti oyuk xa ta chib jabil ti jech-o yakal tspasbeik yabtel Dios ta tsʼakal orae xchiʼuk ti jechuk stalelalik kʼuchaʼal li Isaías ti xi laj yale: «Liʼ oyun vuʼune, tacun batel» (Isa. 6:8). Jech noxtok, skʼan ti oyuk xa ta chib jabil snupunelike xchiʼuk ti xakʼuk ti kʼuyelan xkuxlejalik sventa xbat tunikuk ti bu mas tskʼanik koltaele.

• Kʼuxi ta tael: Li ta junantik Mukʼta Tsobajeletik ta jun kʼakʼale, chichʼ alel ti xuʼ chbatik ta tsobajel li buchʼu oy ta yoʼontonike, ti jaʼ te chichʼ albel mas skʼoplale.

Chanobvun sventa Vivlia ta Galaad yuʼun Watchtower

• Kʼusi stu: Jaʼ ti xichʼik chapanel lek li prekursoretik xchiʼuk yan jcholmantaletik ta tsʼakal ora sventa xtunik ta misioneroal.

• Kʼu sjalil: Voʼob u.

• Bu ch-echʼ: Ta Smeʼ Chanubtasel yuʼun Watchtower, ta Patterson (Nueva York).

• Kʼusitik skʼan pasel: Jaʼ noʼox xuʼ xbat li buchʼutik nupunemik xae. Skʼan snaʼ xkʼopojik ta inglés, skʼan ti oyuk xa ta chib jabil ti jech-o yakal tspasbeik yabtel Dios ta tsʼakal orae, ti oyuk xa ta oxib jabil yichʼojik voʼe, oyuk xa ta xchibal jabil snupunelik xchiʼuk ti 21 o 38 sjabilalik kʼalal mi laj yakʼ li baʼyel solisitudike. Skʼan ti mu masuk snaʼ x-ipajike. Mi spas yuʼun li kʼusitik skʼan pasele, xuʼ xbatik ek li prekursoretik ti te chtunik ta yan lume (ti te tsakal skʼoplalik ti xkoʼolajik kʼuchaʼal misioneroetike), jkʼelvanejetik ta sirkuito xchiʼuk distrito, li buchʼu chtun ta Betele, li buchʼutik nelem xa yuʼunik li Chanobvun ta Vivlia sventa Ermanoetik ti Chʼabal Yajnilike o li Chanobvun sventa Xchanubtasel Jtuneletike xchiʼuk li buchʼutik nelem xa yuʼunik li Chanobvun ta Vivlia sventa Yajtsʼaklomtak Cristo ti Nupunemike.

• Kʼuxi ta tael: Li ta junantik Mukʼta Tsobajeletik ta oxib kʼakʼale, chichʼ alel ti xuʼ xbatik li ta tsobajel li buchʼu oy ta yoʼontonike, ti jaʼ te chichʼ albel mas skʼoplale. Pe mi muʼyuk ta x-echʼ li tsobajel li ta alumale xchiʼuk ti chakʼan chabat li ta chanubtasel taje, xuʼ xatsʼibaj batel li ta Betel ti jaʼ oy ta sba skʼelel li alumal sventa xakʼanbe mas yaʼyejale.

Chanobvun sventa Buchʼutik Sbainojik Betel xchiʼuk Yajnilik

• Kʼusi stu: Taje jaʼ chichʼik koltael li Komite sventa Betel sventa snaʼikuk xchapanel li abtelaletik te ta Betele, ti snaʼikuk kʼusi xuʼ spasik li ta tsobobbailetike, ta sventa li jkʼelvanejetik ta sirkuito o distritoe, ta sventa li sjelubtasel ta yan kʼopetik li vunetike, spasel imprimir vunetik, stakel batel li vunetike xchiʼuk li skʼelel li jeltos abtelaletike (Luc. 12:48 ta xchaʼvokʼal).

• Kʼu sjalil: Chib u.

• Bu ch-echʼ: Ta Smeʼ Chanubtasel yuʼun Watchtower, ta Patterson (Nueva York).

• Kʼusitik skʼan pasel: Ti jaʼuk Komite sventa Betel o mi jaʼ Komite ta Mukʼta lum o mi laj yichʼ akʼbel li yabtelik jech kʼuchaʼal taje.

• Kʼuxi ta tael: Jaʼ tstʼuj li Jtsop Jbeiltasvanej ti buchʼu xuʼ xbat li ta chanobvun taje xchiʼuk li yajnilike.

[Tsʼibetik ta yok vun]