Li Jesuse la xchanubtas ta yakʼel perton

1. ¿Kʼu van yuʼun ti toj chopol laj yaʼi sba Pedro ti muʼyuk jech kʼotem-o ta stojolale?

MI JAʼUK xchʼay ta sjol Pedro kʼalal kʼelat yuʼun li Jesuse. ¿Mi yuʼun van laj yilbe ta sat Jesús ti loʼlabil laj yaʼi sba o xtiʼet sjole? Ta melel mu jnaʼtik, yuʼun li Vivliae kʼajomal noʼox chal ti «ijoyij li Jesuse; la sqʼuel li Pedroe» (Luc. 22:61). Pe ta skoj ti kʼuyelan kʼelat yuʼun Jesuse, laj yakʼ venta ti tsots smul la spase. Naka to kʼot ta pasel li kʼusi laj yal Jesús ti jech onoʼox chkʼote, ti mu xkʼot ta pasel xi li Pedroe: la smuk ta yoʼonton li Jchanubtasvanej yuʼun ti skʼanoj tajeke. Li kʼusi kʼot ta pasel taje, toj chopol van laj yaʼi sba ti muʼyuk jech kʼotem-o ta stojolal li Pedroe.

2. ¿Kʼusi tsots skʼoplal la xchan li Pedroe, xchiʼuk kʼuxi xuʼ tskoltautik li kʼusi kʼot ta stojolale?

² ¿Mi muʼyuk xa van kʼusi stakʼ pasel? Oy. Ta skoj ti ep xchʼunel yoʼonton li Pedroe, la stukʼibtas ta mas tsʼakal li kʼusi chopol bat yuʼun ta pasele xchiʼuk la xchan ti kʼuyelan akʼvan ta perton li Jesuse. Taje jaʼ li kʼusi tsots skʼoplal skʼan jchan jkotoltike. Li kʼusi tsots kʼot ta pasel ta stojol li Pedroe, xuʼ skoltautik ek.

Ep to kʼusitik skʼan xchan ta sventa li pertone

3, 4. 1) ¿Kʼusi la sjakʼbe Jesús li Pedroe xchiʼuk kʼusi van ti lek tspas yaloje? 2) ¿Kʼuxi akʼbat yil yuʼun Jesús li Pedro ti koʼoltik snopben kʼuchaʼal krixchanoetik ta skʼakʼalile?

³ Leʼ xa ta svakibal u kʼalal jaʼo te oyik ta Capernaume, ti bu nakal li Pedroe, xi la sjakʼbe li Jesuse: «Cajval, ¿jayib velta tscʼan ta jpasbe perdón cʼalal tsta smul ta jtojol li jchiʼile? ¿Me tscʼan cʼalal to ta vucub velta?». Li Pedroe toj lek van yoʼonton chaʼi sba, yuʼun li jnitvanejetik ta relijione chchanubtasvanik ti jaʼ noʼox oxib velta skʼan xichʼ akʼel li pertone. Li Pedroe labal sba laj yaʼi li kʼusi laj yal Jesuse: «Muʼyuc chacalbot ti cʼalal to ta vucub veltae. Jaʼ tscʼan chapasbe perdón cʼalal to ta lajuneb xchanvinic (70) ta velta chichʼ atel li vucube» (Mat. 18:21,22).

⁴ ¿Mi jaʼ van skʼan xal Jesús ti skʼan jchaptik jayib velta tsaʼ smul ta jtojolaltik li yantike? Moʼoj. Kʼalal chichʼ alel 70 ta velta ti chichʼ atel li vukube, jaʼ skʼan xal ti melel kʼanelale muʼyuk spajeb ch-akʼvan ta perton (1 Cor. 13:4, 5). Li Jesuse tskʼan ox chakʼbe yaʼi Pedro ti koʼoltik snopben kʼuchaʼal li krixchanoetik ta skʼakʼalil ti muʼyuk xkʼuxul yoʼontonike, ti nopem xaʼiik yatel batel jayib velta tspas smul li xchiʼilike. Pe li buchʼutik chchanbeik stalelal li Diose tskʼan mas to lek yoʼontonik xchiʼuk ta sjunul yoʼonton ch-akʼvanik ta perton (kʼelo 1 Juan 1:7-9).

5. ¿Bakʼin chkakʼtik venta ti tsots skʼoplal skʼan xkakʼtik pertone?

⁵ Li Pedroe muʼyuk la stakʼbe li Jchanubtasvanej yuʼune pe, ¿mi kʼot van ta yoʼonton li kʼusi albate? Melel onoʼox ti jaʼ to chkaʼitik ti tsots skʼoplal skʼan xkakʼtik perton kʼalal skʼan xkichʼtik akʼbel perton eke. Taje jech kʼot ta stojolal Pedro kʼalal poʼot xaʼox skʼan xichʼ milel li Jesuse. Ta skoj li kʼusitik la spas li Pedroe tskʼan chichʼ akʼbel ep ta velta perton yuʼun li Jesuse.

Ep ta velta laj yichʼ akʼbel perton

6. ¿Kʼu yelan laj yil Pedro kʼalal chanubtasatik yuʼun Jesús ti skʼan bikʼit xakʼ sbaik li yajtakboltake, pe kʼuxi la skolta Pedro li Jesuse?

⁶ Li avie slajebal xa akʼobal kuxul kʼuchaʼal krixchano liʼ ta Balumil li Jesuse, jaʼ jun akʼobal ti tsots skʼoplale. Pe ep to kʼusitik skʼan chakʼbe xchan li yajtakboltake. Baʼyel, laj yakʼbe xchan ti skʼan bikʼit xakʼ sbaike. ¿Kʼu yelan la xchanubtasan? La spokbe yakan li yajtakboltake, taje jaʼ yabtelik li mosoiletik ti pekʼel tajek skʼoplalike. Ta slikebale muʼyuk bu lek laj yil li kʼusi la spas Jesús li Pedroe. Ta tsʼakale mu skʼan xakʼ ta pokel li yoke, pe kʼalal albat smelolal yuʼun li Jesuse, maʼuk xa noʼox tskʼan pokbel li yoke, tskʼan xa pokbel skʼob xchiʼuk sjol xtok. Li Jesuse muʼyuk x-ilin, lek smelolal laj yalbe li yajtakboltak ti kʼu yuʼun jech la spase (Juan 13:1-17).

7, 8. 1) ¿Kʼuxi laj yakʼilan ta preva smalael yuʼun Jesús li Pedroe? 2) ¿Kʼutik yelan laj yakʼ ta ilel li slekil yoʼonton xchiʼuk ti xaʼibe smelolal li Jesuse?

⁷ Ta jlikel noʼoxe, li Pedroe laj yakʼ ta preva yan velta li smalael yuʼun Jesuse. Li jtakboletike lik yutilan sbaik ta sventa buchʼu bankilal yuʼunik. Xuʼ jnoptik ti la stikʼ sba Pedro li ta kʼexlal sba kʼop ti chakʼ ta ilel toybaile. Manchuk mi jech, li Jesuse ta slekil yoʼonton la stukʼibtasan xchiʼuk la spatbe yoʼonton ta skoj li kʼusitik lek spasojike, jech kʼuchaʼal ti tukʼ yoʼontonik ta stojolale. Pe laj yalanbe xtok ti ch-iktavanik komel ta mas jelavele. Li Pedroe, ta anil noʼox laj yalbe li Jchanubtasvanej ti muʼyuk chikta komele xchiʼuk ti chakʼ xkuxlejal ta stojolal xtoke. Li Jesuse laj yalbe ti mu jechuk chkʼot ta pasele, yuʼun li ta akʼobal taje kʼalal skʼan toʼox x-okʼ chib velta jkot kotse, laj xaʼox smuk ta yoʼonton oxib velta. Li jtakbole maʼuk noʼox la xchibal kʼopta li Jesuse, moʼoj, yuʼun xtoyet laj yal xtok ti muʼyuk chlaj stsatsal yoʼonton kʼuchaʼal li yantike (Mat. 26:31-35; Mar. 14:27-31; Luc. 22:24-28; Juan 13:36-38).

⁸ Labal sba tajek ti muʼyuk laj smalael yuʼun li Jesuse. Manchuk mi yakal chil tsots svokol, jaʼ yakʼoj-o ta yoʼonton skʼelel slekil talelaltak li jpasmulil yajtakboltake. Li Jesuse snaʼoj ti ch-iktavan komel li Pedroe, pe xi laj yalbee: «Laj xa jcʼopanbot Dios ta atojol, yuʼun jech mu me xchʼay o li xchʼunojel avoʼntone. Cʼalal ta xlic asutes avoʼntone, voʼot chatsatsubtasbe yoʼnton li achiʼiltaque» (Luc. 22:32). ¡Toj echʼ xa noʼox laj yakʼ ta ilel slekil yoʼonton xchiʼuk ti chaʼibe smelolal li Jesuse! Spatoj yoʼonton ti tsta yip ta mantal yan velta xchiʼuk ti tukʼ chtun ta stojolal Dios li Pedroe.

9, 10. 1) ¿Kʼu yuʼun persa laj yichʼ tukʼibtasel Pedro li ta nichimaltik Getsemanie? 2) ¿Kʼusi chakʼ ta ilel li kʼusitik kʼot ta pasel ta stojol li Pedroe?

⁹ Ta mas tsʼakal te ta nichimaltik Getsemanie, li Pedroe oy jayibuk velta laj yichʼ tukʼibtasel. Li Jesuse la skʼanbe Pedro, Santiago xchiʼuk Juan ti vikʼiluk lek satik kʼalal jaʼo chbat spas orasione, yuʼun chat tajek yoʼonton, jech oxal tskʼan patbel yoʼonton yuʼun li yamigotake. Pe akʼo mi jech, och svayelik jayibuk velta. Pe li Jesuse laj yakʼanbe perton. Xi laj yal ta slekil yoʼontone: «Li avoʼntonique tscʼan tscʼopan Dios, pero li abecʼtalique muʼyuc stsatsal» (Mar. 14:32-41).

¹⁰ Ta tsʼakale, kʼot epal krixchanoetik ti stsakojik batel skʼokʼik, yespadaik xchiʼuk steʼik. Ta melel, taje jaʼo yorail oyuk spʼijilik li kʼusi tspasike. Pe mu jechuk la spas li Pedroe. Ta anil la slokʼes yespada; la xtuchʼbe lokʼel jun xchikin smoso li mero bankilal palee, Malco sbi li vinike. Yan velta li Jesuse muʼyuk x-ilin, ta slekil yoʼonton la stukʼibtas li Pedroe xchiʼuk la xpoxta li mosoile. Laj yalbe yajtsʼaklomtak xtok ti skʼan mu saʼik kʼope, ti jech skʼan jpastik ek li yajtsʼaklomutik Cristo avie (Mat. 26:47-55; Luc. 22:47-51; Juan 18:10, 11). ¡Ep xa noʼox ta velta laj yakʼ ta preva Pedro li smalael yuʼun li Jchanubtasvaneje! Li kʼusitik kʼot ta pasel ta stojol li jtakbol taje jaʼ senyail ti jkotoltik ep ta velta ta jpas jmultike (kʼelo Santiago 3:2). ¿Mi oy van junuk krixchano ta spʼejel Balumil ti mu persauk tskʼan perton junuk kʼakʼale? Pe oy to kʼusitik toj chopol skʼan xkʼot ta stojolal li Pedroe.

Li tsatsal mulil la spase

11, 12. 1) ¿Kʼu yuʼun xuʼ xkaltik ti laj yakʼ ta ilel stsatsal yoʼonton Pedro kʼalal laj xaʼox xchukik batel li Jesuse? 2) ¿Kʼuxi ti muʼyuk bu la spas li kʼusi yaloj li Pedroe?

¹¹ Li Jesuse laj yal ti akʼo xakʼik batuk li yajtakboltak mi jaʼ yakal tsaʼat li stuke. Ta skoj ti mu xpoj yuʼun Jchanubtasvanej li Pedroe, jaʼ yuʼun jatav batel xchiʼuk li yantike.

¹² Li Pedro xchiʼuk Juane jlikel noʼox jatavik. Xuʼ van jaʼ te kʼotik ti bu nopol yiloj sna li bankilal pale toʼox ti jaʼ li Anase, ti bu baʼyel laj yikʼik batel Jesús sventa xichʼ chapanele. Kʼalal yan-o bu lik yikʼik batel li Jesuse, «ta nomnomtic ibat[ik]» ta spat Jesús li Pedro xchiʼuk Juane (Mat. 26:58; Juan 18:12, 13). Mu stakʼ xkaltik ti jaʼ jun jxiʼel vinik li Pedroe, yuʼun xvinaj ti tsots yoʼontone, jech oxal la stsʼakli batel li epal krixchanoetik ti xkuchoj yespadaike. Jech xtok mu me xchʼay ta joltik ti Pedroe laj xaʼox syayijesbe jun xchiʼilik li epal krixchanoetik taje. Vaʼun chaʼa, ¿mi tukʼ van laj yakʼ sba jech kʼuchaʼal laj yale? ¿Mi laj van yakʼ xkuxlejal ta stojolal Jesús jech kʼuchaʼal laj yale? (Mar. 14:31.)

13. ¿Kʼu yelan ta tsʼakliel lek li Cristoe?

¹³ Jech kʼuchaʼal li Pedroe, ep krixchanoetik «ta nomnomtic» tstsʼakliik li Jesuse, yuʼun mu skʼan ti x-ilatik yuʼun yan krixchanoetike. Pe jech kʼuchaʼal la stsʼiba ta mas tsʼakal stuk li Pedroe, ti kʼuyelan ta tsʼakliel lek li Cristoe jaʼ mi nopol oyutik ta stojolale. Skʼan jchanbetik-o stalelal Pedro ta skotol ora, mu xijxiʼ li kʼusitik xuʼ xkʼot ta pasele (kʼelo 1 Pedro 2:21).

14. ¿Bu echʼ yuʼun akʼobal Pedro kʼalal jaʼo chichʼ chapanel li Jesuse?

¹⁴ Li Pedroe kʼot kʼalal to ta sna mero bankilal pale Caifás ti jkʼulej xchiʼuk ti oy sjuʼele, li snae stuk noʼox kʼupil xvinaj ta sjunul li Jerusalene. Li naetik kʼuchaʼal taje, oy yamakʼil ta sjoyobal li yute xchiʼuk oy jun stiʼ li ta yelovale. Kʼalal jaʼo te kʼot li ta tiʼ nae, li jchabitiʼnae muʼyuk laj yakʼ ochuk li Pedroe. Li Juane xojtikin xa onoʼox li mero bankilal palee xchiʼuk te xa onoʼox oy ta yut na, vaʼun la skʼopon li tseb te chchabi tiʼ nae sventa akʼo ochuk ek li Pedroe. Yaʼeluk li Pedroe muʼyuk bat xchiʼin li Juane xchiʼuk muʼyuk nopaj batel jutebuk ta stojolal Jesús ti te oy ta yut nae. Jaʼ lek chaʼi ti te chkom ta yamakʼil nae, te yoʼ bu chkʼatinik j-abteletik xchiʼuk mosoiletik ta skoj ti oy sike. Kʼalal jaʼo jech taje, x-och-xlokʼ noʼox jecheʼ testigoetik ti jaʼ noʼox tstikʼbeik smul li Jesuse (Mar. 14:54-57; Juan 18:15, 16, 18).

15, 16. ¿Kʼuxi kʼot ta pasel li kʼusi yaloj xa onoʼox Jesús ta sventa li Pedroe?

¹⁵ Pe ta skoj li xojobal kʼokʼe, li tseb ti laj yakʼ ochuk li Pedroe laj yojtikin, vaʼun xi laj yalbee: «Li voʼote jaʼ achiʼil li Jesús liquem tal ta Galilea banamile». Toj chʼayal to yoʼonton kʼot. Lik yal ti mu xojtikin li Jesuse xchiʼuk ti mu snaʼ kʼusi yakal chalbe skʼoplal li tsebe. Vaʼun nopaj batel ta tiʼ na sventa mu xichʼ ojtikinel. Yan velta, tee oy yan tseb ti xi laj yale: «Leʼe jaʼ xchiʼil li Jesús liquem ta Nazarete», li Pedroe xi la stakʼbee: «Mu xcotquin li vinic chavale» (Mat. 26:69-72; Mar. 14:66-68). Li avie xchibal xaʼox velta la smuk ta yoʼonton Jesús li Pedroe. Xuʼ van laj yaʼi ti okʼ jkot kotse, pe ta skoj ti xiʼem tajeke muʼyuk xvul ta sjol li albilkʼop laj yal Jesús ti oy xa ta jayibuk orae.

¹⁶ Li Pedroe tskʼan tajek ti mu x-ojtikinate, pe nopaj talel jtsop krixchanoetik ta stojolal. Te oy jun yutsʼ yalal Malco ek, ti jaʼ li mosoil ti la xtuchʼbe xchikin Pedro li ta Getsemanie. Xi laj yalbe li Pedroe: «¿Me muc voʼocot ti laj quilot te achiʼuc li vinic te ta tsʼunubaltique?». Li Pedroe mu skʼan tajek xakʼ sba ta ojtikinel, jech oxal sventa xchʼunbate tstʼabbe tajek sbi Dios ti melel li kʼusi chale xchiʼuk laj yal ti mi tsjute xuʼ la xichʼ kastigo. Yoxibal xaʼox velta ti la smuk ta yoʼonton li Jchanubtasvaneje. Naka to tajek jech chal kʼalal jaʼo okʼ jkot kotse, xchibal xaʼox velta ti jech laj yaʼi Pedro li akʼobal taje (Juan 18:26, 27; Mar. 14:71, 72).

17, 18. 1) ¿Kʼu yelan laj yaʼi sba Pedro kʼalal laj yakʼ venta ti tsots la saʼ smule? 2) ¿Kʼusi van la snop li Pedroe?

¹⁷ Kʼalal jaʼo jech taje, lokʼ talel ta yamakʼil jol na li Jesuse, tukʼ skʼelojbe batel sat li yamigoe, jech kʼuchaʼal laj yichʼ albel skʼoplal li ta slikebal kapitulo liʼe. Jaʼ to te laj yakʼ venta ti tsots smul la spas li Pedroe. ¡La svalopatin komel li Jchanubtasvaneje! Ta skoj ti chopol tajek chaʼi sbae, lokʼ batel li ta nae xchiʼuk mu xa xil lek sbe ta skoj ti chmak xa batel li Ue. Ta skoj ti chlokʼ yalel sate mu xa xil lek sbe sventa xanav batel. Mu xa stsʼik yuʼun, vaʼun lik smil sba ta okʼel (Mar. 14:72; Luc. 22:61, 62).

¹⁸ Kʼalal oy buchʼu jech chopol tspas smul kʼuchaʼal li Pedroe, xuʼ ta anil ta snop ti mu xa sta-o pertone. Ta melel, jech van la snop li Pedro eke. Pe, ¿mi ch-akʼbat van perton yuʼun li Jchanubtasvaneje?

¿Mi mu xa van sta-o perton?

19. ¿Kʼu van yelan laj yaʼi sba Pedro ta skoj li kʼusi la spase, pe kʼuxi jnaʼojtik ti muʼyuk te chibaj-o yoʼontone?

¹⁹ Mas to van chopol laj yaʼi sba Pedro kʼalal laj yil kʼusi kʼot ta stojolal Jesús li ta yokʼomale. ¡Jaʼ xa van ta smul laj yaʼi ti oy jayibuk ora laj yil svokol Jesús xchiʼuk ti kʼalal chame! ¡Solel lik van nikuk ta xiʼel ta skoj ti laj yakʼbe mas svokol li slajebal kʼakʼal kuxul kʼuchaʼal jun krixchano li Jchanubtasvaneje! Ta melel lajem van laj yaʼi sba li Pedroe, pe, ¿mi te van chibaj-o yoʼonton? Li loʼil ta Vivliae chal ti mu jechuk kʼot ta pasele, yuʼun lik stsob sba xchiʼuk li yermanotake (Luc. 24:33). Xuʼ jnoptik ti te van xvulajetik ta skoj ti xiʼik li akʼobal taje, pe ta skoj ti te stsoboj sbaike la spatbe sba yoʼontonik.

20. ¿Kʼusi xuʼ jchantik ta sventa li kʼusi lek la snop tspas ta xkuxlejal li Pedroe?

²⁰ Xuʼ xkaltik ti vaʼ kʼakʼal taje, li Pedroe oy kʼusi lek la snop tspas li ta xkuxlejale. Kʼalal tstsʼuj ta mulil jun yajtunel Diose, mu ventauk kʼu to stsatsal la spas li smule, moʼoj, li kʼusi mas tsots skʼoplale jaʼ ti mi oy ta yoʼonton tstukʼibtas li xkuxlejale (kʼelo Proverbios 24:16). Li Pedroe laj yakʼ ta ilel ti oy lek xchʼunel yoʼonton kʼalal la stsob sba xchiʼuk yermanotake, akʼo mi chibajem laj yaʼi sba. Kʼalal chkat tajek koʼontontik xchiʼuk chopol tajek chkaʼi jbatik ta skoj jmultike xuʼ van mas lek chkaʼitik ti jchʼak jbatik ta stojolal li yantike, pe taje toj xibal sba (Prov. 18:1, TNM). Sventa xijtsatsub ta mantale skʼan nopol oyutik li ta tsobobbaile (Heb. 10:24, 25).

21. ¿Kʼusi labal sba aʼyej laj yaʼi Pedro ti jaʼ koliyal ti te tsobol xchiʼuk li yermanotake?

²¹ Ta skoj ti te xchiʼuk yermanotak li Pedroe, laj yaʼi ti sak-chʼay la sbekʼtal Jesús li ta mukinale, akʼo mi lek bajal li stiʼe. Ta anil lokʼik batel li Pedro xchiʼuk Juane. Yaʼeluke jaʼ toʼox mas kerem li Juane, jaʼ yuʼun baʼyuk kʼot. Pe kʼalal jamal laj yil li smukinal Jesuse, muʼyuk x-och. Pe jaʼuk li Pedroe muʼyuk la snop chib velta, yuʼun tukʼ och batel, manchuk mi mu xa xichʼ lek ikʼ. Jech ta melel, xokol xaʼox li mukinale (Juan 20:3-9).

22. ¿Kʼuxi chʼay batel yuʼun Pedro skotol li kʼusitik mu toʼox xchʼun leke xchiʼuk li at-oʼonton chaʼie?

²² Ta slikebe muʼyuk la xchʼun ti chaʼkuxiem xaʼox Jesús li Pedroe. Mi jaʼuk la xchʼun kʼalal oy jayibuk tukʼil antsetik laj yalik ti albatik yuʼun anjeletik ti chaʼkuxi xa li Jesuse (Luc. 23:55–24:11). Pe li ta mal kʼakʼale, skotol li kʼusi mu toʼox xchʼun leke xchiʼuk li at-oʼonton chaʼie, chʼay batel. ¡Kuxul xa li Jesuse! Li avie jaʼ xaʼox jun kuxlejal ti oy sjuʼele, sventa chakʼ ta ilel taje, laj yakʼ sba ta ilel ta stojolal li yajtakboltake. Pe baʼyele, oy kʼusi lek la spas ta stojolal li Pedroe. ¿Kʼusi jaʼ taje? Li stakʼobile te ta jtatik ta Vivlia. Li vaʼ kʼakʼal taje xi laj yalik li jtakboletike: «Ta melel chaʼcuxem xa li Cajvaltique. Laj xa yacʼ sba ta ilel ta stojol li Simone» (Luc. 24:34). Ta mas tsʼakal li jtakbol Pablo eke laj yal ta sventa ti «laj yacʼ sba ta ilel ta stojol li Pedroe. [Ti] tsʼacal laj yacʼ sba ta ilel ta stojol xlajchabali[ke]» (1 Cor. 15:5). Li Pedroe ojtikinbil kʼuchaʼal Cefas xchiʼuk Simón xtok. Jaʼ yuʼun li loʼiletik ta Vivlia taje jaʼ chalbe skʼoplal li kʼusi tsots skʼoplal kʼot ta xkuxlejal li Pedroe, laj yakʼ sba ta ilel Jesús ta stojolal kʼalal jaʼo stuk te oye.

23. ¿Kʼu yuʼun skʼan svules ta sjolik li kʼusi kʼot ta stojolal Pedro li yajtsʼaklomtak Cristo ti tsots smul spasojike?

²³ Li Vivliae muʼyuk chalbe skʼoplal kʼusitik kʼot ta pasel kʼalal la sta sbaik li Pedro xchiʼuk Jesuse. Pe xuʼ jnoptik kʼu to yelan xmuyubaj jtakbol kʼalal laj yil ti kuxul li Jchanubtasvanej yuʼune, xchiʼuk ti te laj yalbe ti laj yat yoʼonton xchiʼuk ti la sutes yoʼonton ta skoj li kʼusitik la spase. Li kʼusi mas oy ta yoʼontone jaʼ ti x-akʼbat perton yuʼun li Jesuse. Melel onoʼox ti ta sjunul yoʼonton akʼvan ta perton li Jesuse. Li yajtsʼaklomtak Cristo avi ti tsots smul spasojike, skʼan svules ta sjolik li kʼusi la spas li Pedroe xchiʼuk akʼo mu snopik ti mu xa staik-o x-akʼbatik perton yuʼun li Diose. Mu me xchʼay ta joltik ti Jesuse lek chakʼ ta ilel li stalelal Stot ti «toj ep perdón yuʼun[e]» (Is. 55:7).

Ta sjunul yoʼonton akʼvan ta perton

24, 25. 1) ¿Kʼu yelan echʼ yuʼun Pedro li akʼobal kʼalal bat stsak choy li ta nab Galileae? 2) ¿Kʼusi la spas Pedro kʼalal laj yil li skʼelobil juʼelal la spas Jesús kʼalal poʼot xaʼox sakube?

²⁴ Li Jesuse laj yalbe yajtakboltak ti akʼo xbatik ta Galilea sventa te tsta sbaik yan velta. Kʼalal kʼotike, li Pedroe la snop chbat stsak choy ta nab, jech koʼol batik xchiʼuk li yan jtakboletike. Yan velta xtok, li Pedroe te oy li ta nab ti bu jal abteje. Xpatet xa onoʼox van yoʼonton ta skoj ti chaʼi kʼuyelan chbakʼ steʼel li skanovae, li xtal-xbat yok nabe xchiʼuk ta skoj li yalal snutiʼ sventa tsak choye. Akʼo mi laj yakʼ persa, mu jkotuk choy la sta sjunul akʼobal (Mat. 26:32; Juan 21:1-3).

²⁵ Kʼalal poʼot xaʼox sakube, oy buchʼu albatik ta tiʼ nab ti akʼo stenik batel ta jot kanova li snutiʼike. Jech la spasik... ¡vaʼun la staik 153 ta kot choyetik! Li Pedroe laj yojtikin li buchʼu kʼoponatike, vaʼun ta anil la sjip sba lokʼel ta skanova xchiʼuk nuxinaj batel kʼalal to ta tiʼ nab. Kʼalal te xaʼox oy skotolik ta tiʼ nabe, li Jesuse laj yakʼanbe vobil choy li yamigotak ti tukʼ laj yakʼ sbaike. Vaʼun jaʼ lik skʼopon li Pedroe (Juan 21:4-14).

26, 27. 1) Li Jesuse, ¿kʼusi oxib velta la sjakʼbe li Pedroe? 2) ¿Kʼuxi laj yakʼ ta ilel Jesús ti ta sjunul yoʼonton laj yakʼbe perton li Pedroe?

²⁶ Li Jesuse xi la sjakʼbe Pedro kʼalal jaʼo xbech kʼobtaoj li epal choyetik la staik ta tsakele: «¿Mi yepal noʼox cʼux ta xavaʼiun ta avoʼnton, mi jaʼ mu sta ti yan leʼe?». ¿Mi mas van skʼanoj tsak choy li Pedroe, ti jaʼ xkom to ti kʼuyelan skʼanoj li Jesuse? Oy xaʼox ta sjayibaluk kʼakʼal ti la smuk ta yoʼonton oxib velta li Jesuse. Li avie, oxib velta la sjakʼbe ta sat xchiʼiltak mi ta melel skʼanoj li Jesuse, li Pedroe laj yal ti skʼanoje. Li Jchanubtasvaneje laj yal ti akʼo xakʼ ta ilele. ¿Kʼuxi? Jaʼ la mi baʼyel laj yakʼ ta xkuxlejal li yabtel Diose, ti xchabibe li xchijtak Cristoe, jaʼ xkaltik, ti akʼo skʼel xchiʼuk stsatsubtasbe yoʼonton li yermanotake (Luc. 22:32; Juan 21:15-17, Ch).

²⁷ Taje, li Jesuse jech laj yakʼbe snaʼ Pedro ti ep-o sbalil ta xile xchiʼuk ti ep sbalil ta x-ilat yuʼun li Stot eke. Li jtakbole toj jtunel chkʼot li ta tsobobbail ti jaʼ tsbeiltasvan stuk li Cristoe. ¡Jaʼ sprevail ti ta sjunul yoʼonton laj yakʼ ta perton Pedro li Jesuse! Ta melel, li xkʼuxul yoʼonton Jesuse kʼot ta yoʼonton.

28. ¿Kʼuxi laj yakʼ ta ilel Pedro ti jech la spas kʼuchaʼal smelolal li sbie?

²⁸ Ep jabil lek tukʼ la spas yabtel li Pedroe. La stsatsubtasbe yoʼonton yermanotak jech kʼuchaʼal laj yal Jesús kʼalal poʼot xaʼox xchame. Ta slekil yoʼonton xchiʼuk oy smalael yuʼun la xchabi li xchijtak Cristoe. Li Simón, ti Pedro xi biiltasat yuʼun li Jesuse, jech la spas kʼuchaʼal smelolal li achʼ sbie —yuʼun jaʼ skʼan xal «ton»— lek tsots xchiʼuk lek tukʼ yoʼonton la spas sba ta tsʼakal, li tsobobbaile lek la spat yoʼontonik ta stojolal. Taje lek xvinaj li ta chib karta la stsʼibae xchiʼuk ti te oy li ta Vivliae. Li kartaetik taje chakʼ ta ilel xtok ti muʼyuk xchʼay ta sjol li kʼusi akʼbat xchan yuʼun Jesús ta sventa li yakʼel pertone (kʼelo 1 Pedro 3:8, 9; 4:8).

29. ¿Kʼuxi xuʼ jchanbetik xchʼunel yoʼonton Pedro xchiʼuk li xkʼuxul yoʼonton laj yakʼ ta ilel li Jchanubtasvanej yuʼune?

²⁹ ¡Toj tsots skʼoplal ti jechuk jpastik jkotoltik eke! ¿Mi ta jkʼanbetik perton Dios ta sventa li kʼusitik chopol chbat kuʼuntik ta pasele? ¿Mi ta sjunul koʼontontik ta jchʼuntik ti ta stupʼ jmultik li Diose? ¿Mi chkakʼbetik perton li yantik eke? Mi jech ta jpastike, jech me ta jchanbetik xchʼunel yoʼonton Pedro xchiʼuk li xkʼuxul yoʼonton laj yakʼ ta ilel li Jchanubtasvanej yuʼune.