XCHANOBIL 5
Jaʼ la spas kʼusi lek li Samuele
Ta sbikʼtal onoʼox te naki xchiʼuk te abtej ta chʼulna pasbil ta nukul li Samuele. Jaʼ te ti bu chichʼik ta mukʼ Jeova li krixchanoetike. ¿Mi xanaʼ kʼuxi kʼot li ta chʼulna pasbil ta nukule? Baʼyuk kalbetik jutuk skʼoplal li smeʼ Samuel ti jaʼ sbi Anae.
Voʼne xa onoʼox tskʼan yuni neneʼ li Anae, pe mu snaʼ x-alaj. Jaʼ yuʼun xi la skʼanbe vokol li Jeovae: ‹Avokoluk, koltaun›. Xchiʼuk xi laj yalbee: ‹Mi laj kil junuk jkereme te chbat kakʼ nakluk xchiʼuk abtejuk li ta chʼulna pasbil ta nukule›. La stakʼbe s-orasion li Anae, jaʼ yuʼun laj yil jun skerem. Samuel laj yakʼbe sbi. Kʼot ta pasel yuʼun li kʼusi laj yal ta melel li Anae. Yuʼun laj yikʼ batel ta chʼulna pasbil ta nukul sventa te xbat tunuk ta stojolal Dios li Samuel kʼalal oxib o chanib xaʼox sjabilale.
Jaʼ te yakal chtun ta mero bankilal pale ta chʼulna pasbil ta nukul li Elie. Te ch-abtej ek li chaʼvoʼ skeremotak ti mukʼtik xae. Te chichʼik ta mukʼ Jeova li ta chʼulna pasbil ta nukule, jaʼ yuʼun naka lek li kʼusitik chichʼ pasel te ti jechuke. Pe ep kʼusitik chopol tspasik li skeremotak Elie. Laj yil Samuel li kʼusitik yakal tspasike. ¿Mi laj van spas kʼusitik chopol xanaʼ li Samuel eke?... Moʼoj, yuʼun jaʼ tspas li kʼusi leke, jech kʼuchaʼal chanubtasat yuʼun stot smeʼe.
¿Kʼusi van skʼan spas li Elie? ¿Mi mu skʼanuk xakʼbe mantal skeremotak xanaʼ?... ¡Skʼan! Muʼyuk xa xakʼ abtejuk jechuk li ta chʼulna pasbil ta nukule. Pe mu jechuk la spas li Elie, jaʼ yuʼun kap sjol Jeova ta stojolalik. Jech oxal akʼbatik kastigo yuʼun Jeova.
Li Samuele chalbe Elí li kʼusi albat yuʼun Jeovae
Kʼalal jaʼo yakal chvay li Samuele, laj yaʼi ti oy buchʼu xi chale: ‹¡Samuel!›. Bat skʼel ta anil li Elie, pe xi albate: ‹Muʼyuk bu jkʼoponot›. Chib to velta jech kʼot ta pasel. Kʼalal kʼoponat xaʼox ta yoxibal veltae, albat yuʼun Elí ti akʼo xi xtakʼave: ‹Kʼopojan avokoluk Jeova, ta xkaʼi kʼusi chaval›. Jaʼ jech la spas li Samuele. Vaʼun xi albat yuʼun Jeova li Samuele: ‹Albo Elí ti chkakʼbe kastigo yutsʼ yalal ta skoj ti oy kʼusi chopol la spasike›. ¿Mi kʼun van laj yaʼi Samuel xanaʼ kʼalal laj yalbe Elí taje? ¿Kʼu xachi?... Muʼyuk, mu kʼunuk laj yaʼi. Akʼo mi chiʼ ta spasel li Samuele la spas li kʼusi albat yuʼun Jeovae. Kʼot onoʼox ta pasel li kʼusi yaloj tspas Jeovae: cham xchaʼvoʼal skeremotak li Elie xchiʼuk cham li stuk eke.
Toj lek me ti jchanbetik stalelal li Samuele. Yuʼun jaʼ la spas kʼusi lek li stuke, akʼo mi oy buchʼutik jaʼ tspas li kʼusitik chopole. ¿Li voʼot une? ¿Mi jaʼ van jech chapas kʼuchaʼal li Samuel ti jaʼ chapas li kʼusi leke? Mi jaʼ jech chapase, ta me xmuyubaj avuʼun li Jeovae xchiʼuk li atot ameʼe.