Kʼoponat yuʼun Jeova li Samuele

Li pale Elie oy chib skeremtak jaʼik Ofni xchiʼuk Fineas. Xchaʼvoʼalik jaʼik paleetik xchiʼuk te ch-abtejik li ta chʼulna pasbil ta nukule. Pe muʼyuk chchʼunbeik li smantaltak Jeovae xchiʼuk chopol kʼusi tspasbeik li krixchanoetike. Jech xtok, kʼalal chbat yakʼbeik smoton Jeova li j-israeletike, li Ofni xchiʼuk Finease jaʼ chichʼik komel li lekil veʼlil chbat yakʼik j-israeletike. Akʼo mi snaʼoj Eli ti chopol kʼusi yakal tspasik li xnichʼnabtake, muʼyuk la stukʼibtasan. ¿Mi oy van kʼusi tspas xanaʼ li Jeovae?

Li Samuele mas kʼox, jaʼ bankilaletik li skeremtak Elie. Pe li Samuele muʼyuk la xchanbe li kʼusitik chopol tspasik li Ofni xchiʼuk Finease, jaʼ yuʼun xmuyubaj li Jeovae. Jun akʼobal kʼalal yakal chvay li Samuele, laj yaʼi ti chkʼoponate. Jaʼ yuʼun, bat ta anil ti bu oy li Elie xchiʼuk xi laj yalbee: «Liʼ oyune». Pe xi la stakʼ li Elie: «Muʼyuk bu la jkʼoponot, sut vayan». Jaʼ yuʼun, bat vayuk yan velta li Samuele, vaʼun kʼoponat yan velta xtok. Kʼalal kʼoponat ta yoxibal velta li Samuele, li Elie laj yakʼ venta ti jaʼ Jeova ti buchʼu yakal chkʼopoje. Jaʼ yuʼun, laj yalbe Samuel ti xiuk stakʼbe Jeova mi kʼoponat yan veltae: «Kʼusi chavalbun Jeova, albun, yuʼun avajtunelun».

Kʼalal sut batel ta stem li Samuele, laj yaʼi yan velta ti chkʼoponate, xi albate: «¡Samuel! ¡Samuel!». Xi la stakʼ li Samuele: «Albun, Jeova, yuʼun yakal ta jchikinta, voʼon li avajtunelune». Xi laj yal li Jeovae: «Albo Eli ti chkakʼbe kastigo xchiʼuk li xnichʼnabtake. Yuʼun li stuke snaʼoj ti chopol kʼusi yakal tspasik li xnichʼnabtak li ta jchʼulna pasbil ta nukule, pe muʼyuk bu ta stukʼibtasan». Ta sob yokʼomale, li Samuele ay sjam li stiʼ chʼulna pasbil ta nukule, jech kʼuchaʼal nopem onoʼox xaʼie. Pe xiʼem tajek, yuʼun skʼan xalbe bankilal pale li kʼusi albat yuʼun Jeovae. Xi la sjakʼ li Elie: «Kuni Samuel, ¿kʼusi laj yalbot li Jeovae?». Vaʼun, li Samuele lik yalbe skotol li kʼusi albat yuʼun Jeovae.

Kʼalal chʼi batel li Samuele, yamigo-o sbaik xchiʼuk li Jeovae. Jech xtok, li j-israeletik ta sjunul lume snaʼojik ti jaʼ yichʼoj tʼujel yuʼun Jeova li Samuel sventa xkʼot ta pale xchiʼuk ta j-alkʼope.