¿Kʼusi skʼan xapas mi atuk chavaʼi aba xchiʼuk mi chaxiʼe?

Kʼelavil li uni kerem te ta lokʼole. Stuk chaʼi sba xchiʼuk chiʼ yilel, ¿mi mu jechuk? ¿Mi oy bu jech xavaʼi aba ek?... Jkotoltik oy bu jech kaʼiojtik. Li Vivliae chalbe skʼoplal yamigotak Jeova ti stuk laj yaʼi sbaike xchiʼuk ti chiʼik eke. June jaʼ li Eliase. Jkʼeltik avil kʼusi la snuptan.

Voʼne xa tajek ti te naki ta Israel li Eliase, skʼan toʼox xvokʼ li Jesuse. Li ajvalil ta Israele Acab sbi, jaʼ Jesabel sbi li yajnile, muʼyuk chichʼik ta mukʼ li melel Dios Jeovae. Jaʼ chichʼik ta mukʼ li jecheʼ dios Baale. Jaʼ yuʼun, jutuk mu skotoluk li krixchanoetik ta Israele lik yichʼik ta mukʼ li Baale. Toj echʼ xa noʼox chopol li meʼ ajvalil Jesabele, yuʼun tskʼan tsmil skotol li krixchanoetik ti chichʼik ta mukʼ Jeovae. Ta skoj ti chichʼ ta mukʼ Jeova li Eliase, ¡chmilat yaʼi ek! ¿Kʼusi la spas li Eliase? ¿Kʼusi la apas ti voʼotuke?...

¡Jatav li Eliase! Nom tajek bat, te bat ta takixokol balumil, vaʼun te la snakʼ sba ta yut chʼen. ¿Kʼu yuʼun la snakʼ sba?... Jaʼ jech, yuʼun ta xiʼ. Pe muʼyuk srasonal ti chiʼe. ¿Kʼu yuʼun? Yuʼun snaʼoj ti xuʼ xkoltaat yuʼun li Jeovae. Yilojbe xa onoʼox yip li Jeovae. Jun veltae, la stakʼbe s-orasion Elias kʼalal laj yakʼ taluk kʼokʼ ta vinajel li Jeovae. Toj echʼem yip li Jeovae, ¿mi mu jechuk? Jaʼ jech. Jaʼ yuʼun, ¡xuʼ spat yoʼonton li Eliase!

Kʼalal jaʼo te oy ta yut chʼen li Eliase, xi jakʼbat yuʼun li Jeovae: ‹¿Kʼusi chapas liʼe?›. Xi la stakʼ li Eliase: ‹Kʼajomal xa noʼox jtuk ti chkichʼot ta mukʼe. Jtuk xa noʼox kuxulun, chixiʼ mi smilikun›. Yaloj mi lajemik xa ta milel skotol li buchʼutik chichʼik ta mukʼ li Jeovae. Pe xi albat li Eliase: ‹Mu jechuk. Oy vukmil krixchanoetik ti chichʼikun ta mukʼe. Mu xaxiʼ. ¡Oy to kʼusi chkakʼ apas!›. ¿Mi xmuyubaj van xanaʼ kʼalal laj yaʼi Elias taje?...

¿Kʼusi chakʼ achan li kʼusi la snuptan Eliase?... Jaʼ ti mu atukuk xavaʼi abae xchiʼuk ti mu xaxiʼe. Oy avamigotak ti skʼanojik li Jeovae xchiʼuk ti skʼanojoxuk eke. Jech noxtok, toj tsots yip li Jeovae, ¡ta onoʼox skoltaot! ¿Mi mu xamuyubajuk kʼalal chavaʼi taje?...