Li Jeovae laj yakʼbe stsatsal yoʼonton li Eliase

Kʼalal laj yaʼi Jesabel li kʼusi kʼot ta pasel ta stojolal li yaj-alkʼoptak Baale, ilin tajek. Jaʼ yuʼun, la stak batel jun j-al aʼyej ta stojolal li Eliase, xi albate: «¡Okʼom chavichʼ milel jech kʼuchaʼal la amil li yaj-alkʼoptak Baale!». Li Eliase xiʼ tajek, jaʼ yuʼun jatav batel ta takixokol balumil. Vaʼun, xi lik skʼopon li Jeovae: «¡Jeova, mu xa xkuch kuʼun chkaʼi, jaʼ lek milun ta ora!». Ta skoj ti lubem tajek li Eliase, te och svayel ta yolon teʼ.

Vaʼun, te kʼot jun yaj-anjel Jeova, xi xlamet kʼot yalbe li Eliase: «Likan, veʼan». Li Eliase laj yil ti te kajal jun set-set pan ta sba tonetik ti kʼakʼubtasbile xchiʼuk ti te vuchul jun jarra voʼe. Jaʼ yuʼun, lik veʼuk, laj yuchʼ voʼ, pe ta tsʼakale vay yan velta xtok. Jaʼ yuʼun, li yaj-anjel Jeovae la stij likel yan velta li Eliase, vaʼun xi laj yalbee: «Veʼan, yuʼun skʼan oyuk avipal, yuʼun toj nom ti bu chabate». Jaʼ yuʼun, li Eliase lik veʼuk yan velta. Ta tsʼakale, xanav batel 40 kʼakʼal xchiʼuk 40 akʼobal jaʼ to ti kʼuxi kʼot ta vits Orebe. Vaʼun, kʼalal kʼote, och vayuk ta jun chʼen. Vaʼun, xi kʼot albatuk yuʼun li Jeovae: «Elias, ¿kʼusi chapas liʼe?». Xi takʼav li Eliase: «Li j-israeletike muʼyuk la spasik li kʼusi chapanbil avuʼune, laj xa sjinesik li skajleb amotone xchiʼuk la smilik skotol li avaj-alkʼoptake. Pe li avie, yakal tsaʼikun yuʼun tskʼan tsmilikun ek».

Vaʼun, li Jeovae xi laj yalbe li Eliase: «Lokʼan tal li ta chʼene, bat vaʼan aba lek ta jtojol li ta vitse». Kʼalal laj xa ox yal taje, tal tsots ikʼ, tsots nikel xchiʼuk yal tal kʼokʼ. Ta tsʼakale, laj yaʼi jun yechʼomal eil li Eliase. Jaʼ yuʼun, la smak sat xchiʼuk te vaʼal kom ta yochebal li stiʼ chʼene. Vaʼun, li Jeovae la sjakʼbe Elias ti kʼu yuʼun yakal chjatave. Xi takʼav li Eliase: «Jtuk xa noʼox j-alkʼopun». Xi takʼbat yuʼun li Jeovae: «Mu atukuk, yuʼun oy to vukmil j-israeletik ti chichʼikun ta mukʼe. Jaʼ yuʼun, bat albo Eliseo ti jaʼ ch-och ta j-alkʼop ta tsʼakale». Kʼalal laj yaʼi li Eliase, anil bat spas li kʼusi albat yuʼun li Jeovae. Mi chachʼunbe smantal li Jeova eke, ¿mi ta van skoltaot? Tana. Jkʼeltik batel kʼusi kʼot ta pasel kʼalal jaʼo muʼyuk xakʼ voʼe.