SVOʼVOKʼAL
Lekuk me xkil jbatik xchiʼuk li kutsʼ kalaltike
«Lapik me [...] li slekil avoʼontonike, ti bikʼit chavakʼ abaike, ti manxoukoxuke xchiʼuk tsʼikuk me avuʼunik.» (Kolosenses 3:12)
Kʼalal chnupun li krixchanoetike jaʼ jech chlik jun utsʼ alalil. Jaʼ yuʼun akʼo mi akʼanoj xchiʼuk chavichʼ ta mukʼ li atot ameʼe, jaʼ xa me mas toj tsots skʼoplal chavaʼi li anup achiʼile. Xuʼ van oy buchʼutik ta avutsʼ avalal ti vokol chaʼiik ti parte xa akuxlejale. Pe jaʼ me tskoltaot li beiltaseletik ta Vivlia sventa junuk noʼox avoʼonton xchiʼuk li avutsʼ avalale xchiʼuk ti masuk to lek xavil aba xchiʼuk li anup achiʼile.
1 TA STUKʼIL SMELOLUK XAVICHʼ TA MUKʼ LI ATOT AMEʼIKE
LI KʼUSI CHAL VIVLIAE: «Ichʼo ta mukʼ atot ameʼ» (Efesios 6:2). Akʼo mi oy xa jabilaltik skʼan onoʼox me xkichʼtik ta mukʼ li jtot jmeʼtike. Jaʼ noʼox ti kʼusi une, mu me xchʼay ta ajol ti skʼan xchiʼin ta loʼil stot smeʼ li anup achiʼil eke. «Li kʼanelale mu snaʼ x-itʼixaj», jaʼ yuʼun mu me chopoluk xavaʼi ti kʼu yelan xil yutsʼ yalal li anup achiʼile (1 Korintios 13:4; Galatas 5:26).
LI KʼUSI SKʼAN XAPASE:
Mu me xiuk xavale: «Jech-o chopol kʼusi chalik ta jtojolal li avutsʼ avalale» o «Muʼyuk kʼusi lek ta jpas chil li ameʼe»
Jaʼuk jech xavaʼi aba kʼuchaʼal li anup achiʼile
2 VOʼOXUK ME ABAINOJIK SNOPEL TI KʼUSI CHAPASIKE
LI KʼUSI CHAL VIVLIAE: «Li vinique ta scomtsan stot smeʼ, yuʼun ta xicʼ yajnil. Li chibic toʼoxe jun noʼox sbecʼtal ta xcʼotic» (Génesis 2:24). Manchuk mi nupunemot xa, xuʼ van jaʼ to oy ta sbaik chaʼi atot ameʼ ti skʼan xa skʼelike, vaʼun tstikʼ sba ta akuxlejalik.
Voʼoxuk me chanopik bu to kʼalal xuʼ stikʼ sbaik xchiʼuk ti xavalbeik ta slekil avoʼontonike. Stakʼ me jamal xijkʼopoj, pe skʼan me mu tsotsikuk xa ketik xijkʼopoj un (Proverbios 15:1). Kʼalal bikʼit chkakʼ jbatike, ti oy smalael kuʼuntike xchiʼuk ti mu jsaʼtik kʼope jaʼ me tskoltautik sventa junuk noʼox koʼontontik xchiʼuk li jtot jmeʼtike xchiʼuk ti ‹jtsʼikbe jbatik ta jujuntal ta skoj ti jkʼanoj jbatike› (Efesios 4:2).
LI KʼUSI SKʼAN XAPASE:
Mi muʼyuk lek chavil ti kʼu yelan tstikʼ sba ta akuxlejalik li atot ameʼike, loʼiltaik kʼusi stakʼ xapasik kʼalal jun avoʼontonike
Nopik kʼusi skʼan xapasik kʼalal jaʼ jech chanuptanike