Ichʼo ta mukʼ Jeova xchiʼuk avutsʼ avalal

Jech kʼuchaʼal laj xa avakʼ venta li ta foyeto liʼe, oy ep beiltaseletik ta Vivlia ti jaʼ tskoltaot xchiʼuk li avutsʼ avalale. Li Jeovae tskʼan ti xijmuyubajuk noʼoxe. Jech xtok, jamal chal ti «ta me xakʼboxuk skotol li yan kʼusitik» chtun avuʼunik mi jaʼ baʼyel chavakʼ ta akuxlejalike (Mateo 6:33). Tskʼan chakʼot ta yamigo li Diose. Jaʼ yuʼun, kʼelo me kʼusi skʼan xapas jujun kʼakʼal sventa masuk lek xavil aba xchiʼuk li Diose. Yuʼun jaʼ jun mukʼta matanal ti xuʼ jtatike (Mateo 22:37, 38).

1 TSATSUBTASO TI KʼU YELAN XAVIL ABA XCHIʼUK LI JEOVAE

LI KʼUSI CHAL VIVLIAE: «‹Voʼon chikʼot ta atotik, voʼoxuk chakʼotik ta jkeremtak xchiʼuk ta jtsebetak›, jech chal Jeova» (2 Korintios 6:18). Tskʼan chakʼot ta yamigo li Diose, jaʼ yuʼun mi chapas orasione jaʼ tskoltaot sventa xanopaj ta stojolal. Xi chal li Jeovae: «Skotoluk me ora xapasik orasion» (1 Tesalonisenses 5:17). Lek tajek chaʼi ti chavalbe li avokole xchiʼuk li kʼusi chanope (Filipenses 4:6). Mi koʼol chapas orasion xchiʼuk li avutsʼ avalale, ta me xakʼik venta ti kuxul chavil ta melel li Diose.

Pe maʼuk noʼox me skʼan xakʼopon li Diose, moʼoj, yuʼun skʼan xachikintabe li kʼusi chal eke. ¿Kʼuxi ta pasel? Jaʼ ti xachanbe li Skʼope xchiʼuk li yan vunetik ti lokʼemik ta Vivliae (Salmo 1:1, 2). Nopbo skʼoplal li kʼusi yakalot xchanele (Salmo 77:11, 12). Sventa jchikintabetik xtok li kʼusi chale toj tsots me skʼoplal ti akʼo xijbat li ta tsobajeletik sventa yajtsʼaklomtak Kristoe (Salmo 122:1-4).

Oy to yan kʼusi skʼan jpastik sventa masuk to lek xkil jbatik xchiʼuk li Jeovae: jaʼ ti xkakʼtik ta ojtikinele. Kʼalal mas chkalbetik batel skʼoplale mas to me nopol chkaʼi jbatik ta stojolal (Mateo 28:19, 20).

LI KʼUSI SKʼAN XAPASE:

• Chʼakbo me yorail sventa xakʼel jujun kʼakʼal li Vivliae xchiʼuk ti xakʼopon li Jeovae

• Koltao avutsʼ avalal sventa jaʼuk mas tsots skʼoplal xaʼiik li kʼusitik sventa Diose, ti maʼuk xbat ta yoʼontonik li chʼayob oʼontonale

2 KʼUPINIK LI YICHʼEL TA MUKʼ JEOVA TA AVUTSʼ AVALALE

LI KʼUSI CHAL VIVLIAE: «Nopajanik ta stojolal Dios, vaʼun chnopaj tal ta atojolalik ek» (Santiago 4:8). Akʼbo lek skʼakʼalil xchiʼuk yorail sventa xavichʼik ta mukʼ Jeova li ta avutsʼ avalale (Génesis 18:19). Pe maʼuk noʼox me skʼan xapas taje. Yuʼun skʼan xatsak ta venta jujun kʼakʼal li Diose xchiʼuk ti xavakʼ persa sventa masuk lek xil sba xchiʼuk Dios li avutsʼ avalale. Yuʼun xi chal li Vivliae: «Alilanbo yaʼyic [ta sventa Jeova], buyuc noʼox oyot, me ta ana, me ta be, me ta avayab, o cʼalal chali[ke]» (Deuteronomio 6:6, 7). Jechuk me avoʼonton kʼuchaʼal li Josue ti xi laj yale: «Li vuʼun jchiʼuc cajnil jnichʼnabe jaʼ noʼox chituncutic o yuʼun li Mucʼul Diose», li Jeovae (Josué 24:15).

LI KʼUSI SKʼAN XAPASE:

• Kʼelo kʼusitik chtun yuʼun ta jujuntal li avutsʼ avalale, vaʼun tsʼibao ta jlikuk vun ti kʼusi skʼan xachanike