Sventa slekilal li utsʼ-alaliletike

1. ¿Kʼusi sbalil la stabeik sabado li j-israeletike?

¹ Ti chichʼ toʼox chabiel li sabadoe jaʼ svinajeb slekil yoʼonton Jeova ta stojolal li j-israeletike. Jaʼ toʼox sventa slekilal li utsʼ-alaliletike, yuʼun li jteklume chkux li ta yabtel tspasik jujun kʼakʼale xchiʼuk xokolik sventa tsnopik ta sventa slekilal yoʼonton Jeova xchiʼuk ti kʼuyelan oyik ta stojolale. Li totil-meʼiletike jaʼo lek yorail yuʼunik xtok sventa chchanubtasik ta sMantal Dios li yalab xnichʼnabike (Deu. 6:6, 7). Jech taje, li jteklume xuʼ stunesik jujun sabado sventa chichʼik ta mukʼ li Diose.

2. ¿Kʼusi chakʼ kiltik ta sventa Jeova li mantal sventa sabadoe?

² Melel onoʼox ti avie, mu xa bu smalaoj ta jchabitik sabado li Jeovae. Pe li mantal laj toʼox yakʼ taje oy kʼusi chakʼ jchantik ta sventa li Jeovae: jaʼ ti oy onoʼox tajek ta yoʼonton ti lekuk oy ta mantal li steklumale (Isa. 48:17, 18). Li avi eke, jech chakʼ ta ilel ti oy ta yoʼonton li steklumale, jech oxal akʼbilutik jun Akʼobal sventa Yichʼel ta Mukʼ Jeova ta Kutsʼ Kalaltik.

3. ¿Kʼusi stu li Akʼobal sventa Yichʼel ta Mukʼ Jeova ta Kutsʼ Kalaltike?

³ ¿Kʼusi sventa li Akʼobal sventa Yichʼel ta Mukʼ Jeova ta Kutsʼ Kalaltike? Ta enero ta 2009 li Xchanel Livro yuʼun Tsobobbaile jmoj xa skʼakʼalil kom xchiʼuk li Chanob vun sventa Kabteltik yuʼun Diose xchiʼuk li Tsobajel sventa Tunelale. Jun srasonal ti jech laj yichʼ pasele jaʼ ti xuʼ xchʼakik junuk akʼobal ta xemana sventa xchʼies sbaik ta mantal li utsʼ-alaletike xchiʼuk ti xuʼ xichʼik ta mukʼ Dios ta komone. Jech oxal, laj yichʼik albel ti akʼo xlik stunesik sventa jmoj xa xchanunajik xchiʼuk yutsʼ yalalik li yorail toʼox sventa Xchanel Livro yuʼun Tsobobbail mi jech sta-o li yorail chilike. Jech xtok, li yorail taje akʼo stunesik sventa mu aniluk xa xchan li sVivliaike o yan kʼusitik ti jtunel yuʼunik sventa li yutsʼ yalalike.

4. ¿Mi persa jun noʼox ora ta jtsob jbatik? Alo kʼu yuʼun jech cha takʼ.

⁴ Sventa chi jbat toʼox li ta Xchanel Livro yuʼun Tsobobbaile ta toʼox jchʼakbetik yorail sventa ta jchapan jkʼuʼ jpokʼtik, ti kʼu sjalil chichʼ batel jbetike xchiʼuk yan kʼusitik. Sventa taje ep toʼox tajek ta jchʼakbetik yorail manchuk mi jun noʼox ora li tsobajele. Ta skoj ti jel li kʼuyelan chichʼ pasel li tsobajeletike, li yorail skʼan jchʼaktik toʼoxe, li avie xuʼ jtunestik sventa chkichʼtik ta mukʼ Jeovae xchiʼuk kutsʼ kalaltik. Jech oxal, mu persauk jun noʼox ora ta jtsob jbatik xchiʼuk li kutsʼ kalaltike. Jaʼ lek ti jaʼ jnoptik kʼusitik mas chtun yuʼunik ta mantale, jaʼ te chvinaj kʼu sjalil xuʼ jtsob jbatik.

5. ¿Mi persa te tsobolutik-o skotol ora xchiʼuk li kutsʼ kalaltike? Alo kʼu yuʼun jech cha takʼ.

⁵ ¿Mi persa ta jtsob jba jkotoltik li ta kutsʼ kalaltike? Kʼalal koʼol tstsob sbaik xchiʼuk yalab xnichʼnabik li totil meʼiletike mas me tspatbe sba yoʼontonik, jech tstabeik sbalil ek li buchʼutik muʼyuk yalab xnichʼnabike (Rom. 1:12). Mas chnopajik ta jujuntal li ta utsʼ-alalile. Jech oxal, li xchanel kʼusitik ta sventa Vivliae jaʼ mas tsots skʼoplal skʼan xilik li ta Akʼobal sventa Yichʼel ta Mukʼ Jeova ta Kutsʼ Kalaltike. Pe jech xtok, xuʼ van xchʼakbeik yorail sventa chchanunajik ta jujuntal. Jech kʼuchaʼal liʼe, mi nel xaʼox avuʼunik ti cha tsob abaike, ta jujuntal xuʼ yan kʼusitik xlik achanik, manchuk mi te nopol oyoxuk. Xuʼ van xa tsutsesik xchapanel abaik ta sventa li tsobajeletike o xa tsutsesik skʼelel li revistaetike. Ta sventa taje, jlom utsʼ-alaliletike xchapojik ti muʼyuk tstsan li stelevisionike.

6. ¿Kʼuxitik van xuʼ xichʼ pasel li tsobajele?

⁶ ¿Kʼuxi van ta pasel? Mu skotoluk velta chichʼ jakʼel xchiʼuk chichʼ takʼel. Jlom utsʼ-alaliletike sventa mas kʼupil sba xchiʼuk xkʼot ta oʼontonal kʼuyelan tspasik li yichʼel ta mukʼ Jeova ta kutsʼ kalaltike, koʼoltik tspasik kʼuchaʼal ch-echʼ li tsobajel ta tsobobbaile: ta xchʼak yuni parteik xchiʼuk jelajtik kʼuyelan ta sjelubtasik. Jech kʼuchaʼal liʼe: koʼol ta skʼelik li Vivliae, koʼol ta xchapan sbaik sventa jvokʼuk mantal ti chichʼ kʼelel ta tsobobbaile xchiʼuk ta xchanilanik kʼuyelan xuʼ xcholik mantal. Li ta pajina 6 chal kʼusitik yan stakʼ pasel.

7. Li totil-meʼiletike, ¿kʼusitik xuʼ spasik sventa skʼupinik yichʼel ta mukʼ Dios li yutsʼ yalalike?

⁷ Li totil-meʼiletike, ¿kʼusitik xuʼ spasik sventa skʼupinik yichʼel ta mukʼ Dios li yutsʼ yalalike? Li alab-nichʼnabiletike mas ep kʼusitik ta xchanik kʼalal kʼanbil xchiʼuk ti jun noʼox yoʼonton chaʼi sbaike. Mi jaʼo lek kʼepele, xuʼ van cha kʼan cha chanunajik ta pana. Jech xtok, xuʼ xa kuxilanik jayibuk velta. Jlom utsʼ-alaletike ta smeltsanik kʼusi tslajesik jutuk mi laj li chanune. Li totil-meʼiletike xuʼ van xchʼakbeik yorail sloʼiltael kʼusitik mu lekuk ti yakal xa chnopik ta spasel li yalab xnichʼnabike o kʼusitik chopol ti yakal xa tspasike. Pe teuk me ta sjolik ti maʼuk yorail sventa tstukʼibtasik o chutik li yalab xnichʼnabik kʼalal jaʼo li Akʼobal sventa Yichʼel ta Mukʼ Jeova ta Kutsʼ Kalaltike. Mi oy kʼusi tsots spasoj junuk alab-nichʼnabile, jaʼ lek akʼo yichʼ tojobtasel ta yan kʼakʼal kʼalal stuk oye sventa mu chopoluk xaʼi sba ta skoj ti te kʼelbil yuʼun li xchiʼiltak ta vokʼele. Li Akʼobal sventa Yichʼel ta Mukʼ Jeova ta Kutsʼ Kalaltike skʼan me mu xakʼ chʼaj, xchiʼuk maʼuk skʼan xal ti mu xa stakʼ xi jtseʼin o ti mu xa kʼusi stakʼ jpastike, yuʼun skʼan jechukutik kʼuchaʼal li Dios chkichʼtik ta mukʼ ti xmuyubaje (1 Tim. 1:11).

8, 9. ¿Kʼu yelan skʼan xchapan sbaik li joliletik ta utsʼ-alalile?

⁸ ¿Kʼu yelan xuʼ xchapan sbaik li joliletik ta utsʼ-alalile? Kʼalal baʼyel tsnop stuk xchiʼuk tsnop kʼuxi ta xetʼes li kʼusi chchanik ta Akʼobal sventa Yichʼel ta Mukʼ Jeova ta Kutsʼ Kalaltik li joliletike, mas me tstabeik sbalil li yutsʼ yalale (Pro. 21:5). Lek xtok ti sjakʼbe yajnil kʼusi tsnop ta sventa taje (Pro. 15:22). Jech xtok, ¿kʼu yuʼun mu xa jakʼbeik avalab anichʼnabik bateltik kʼusi to yan skʼan pasel chilik? Mi jech la apasike, mas me chavakʼik venta kʼusi ti tskʼupinike xchiʼuk kʼusi ti mas chat-o yoʼontonike.

⁹ Mas ep ti bu mu persauk jal tajek ta xchʼakbe yorail chchapan sba li totil o meʼiletike. Jlom utsʼ-alaletike mas lek chaʼiik ti jtos noʼox kʼusi ta skʼelik jujun xemanae, kʼalal jech taje mu persauk oy kʼusi achʼ ta xchapan jujun xemana li totil o meʼiletike. Jech xtok, mi laj li jujukoj chanun tspasike xuʼ van mas lek chilik ti kak xa noʼox chchapanik li kʼusi tskʼelik ta yan xemanae, yuʼun mas to lek xvul ta sjolik li kʼusi chtun yuʼun yutsʼ yalalike. Jlom joliletik ta utsʼ-alalile tspasik jun slistail li kʼusitik tskʼan tsloʼiltaike xchiʼuk te tspakʼik ti bu xil skotol li yutsʼ yalale, jech kʼuchaʼal ta stiʼrefrijerador. Kʼalal jech tspasike mas xmuyubajik xchiʼuk smalaojik xa chichʼ chanel, jech xtok xuʼ kak xchapan sbaik ta jujun tal ta sventa li loʼil taje.

10. ¿Kʼusi xuʼ spasik li ta Akʼobal sventa Yichʼel ta Mukʼ Jeova ta Kutsʼ Kalaltik li buchʼu stuk oyike?

¹⁰ ¿Kʼusi xuʼ jpas mi jtuk oyune? Li buchʼu stuk oyike xuʼ stunesik sventa xchanunaj stukik li Akʼobal sventa Yichʼel ta Mukʼ Jeova ta Kutsʼ Kalaltike. Li buchʼu lek snaʼ xchanunaje ta skʼel sVivlia, ta xchapan sba sventa li tsobajeletike xchiʼuk ta xchʼakbe yorail skʼelel li ¡Despertad! xchiʼuk Li Jkʼel osil ta toyole. Jlom ermanoetike ta to xchʼakbeik yan yorail sabel lek skʼoplal junuk loʼil. Bateltike xuʼ van xikʼik junuk jcholmantal o junuk utsʼ-alalil sventa komon skʼupinik xchanel junuk mantal.

11, 12. Albo jlomuk sbalil li Akʼobal sventa Yichʼel ta Mukʼ Jeova ta Kutsʼ Kalaltike.

¹¹ ¿Kʼusitik sbalil chichʼ tabel mi skotol xemana jech ta jpastike? Mi ta sjunul koʼontontik ta jpastik li Akʼobal sventa Yichʼel ta Mukʼ Jeova ta Kutsʼ Kalaltike mas to me chi jnopaj ta stojolal Jeova. Jech xtok, mi tsobol tspasik li utsʼ-alaliletike mas tskʼan sbaik. Xi laj yal jun nupultsʼakal ta sventa li bendisionetik chichʼ taele: «Prekursorunkutik jchaʼvoʼalkutik xchiʼuk muʼyuk kalab jnichʼnabkutik, jech oxal jmalaojkutik ta sjunul koʼontonkutik li Akʼobal sventa Yichʼel ta Mukʼ Jeova ta Kutsʼ Kalaltike. Mas tsnopajesunkutik ta jujuntal chkaʼikutik xchiʼuk ta stojolal li jTotik ta vinajele. Kʼalal jaʼ skʼakʼalil chi chanunajkutike xi chkalbe jbakutik ta jujun sobe: “¿Mi xvul ta ajol kʼusi ta jpastik tana? ¡Chkichʼtik ta mukʼ Jeova ta kutsʼ kalaltik!”».

¹² Li utsʼ-alaliletik ti mu noʼox xokobike, tstabeik sbalil ek mi chchʼakbeik skʼakʼalil sventa chichʼik ta mukʼ Jeova ta yutsʼ yalalike. Jun meʼil ti chtun ta prekursoral ti stuk tstsʼites chaʼvoʼ skereme, xi la stsʼibae: «Leʼ toʼox tale muʼyuk toʼox mas tsobol chi chanunajkutik. Yuʼun toj lubem noʼox chkaʼi jba, jech oxal nomtik tajek ta jpaskutik. Mu noʼox xi xokob chkaʼi. Jech oxal ta jtsʼibaboxuk ti kolaval tajek cha kalboxuk ta sventa li Akʼobal sventa Yichʼel ta Mukʼ Jeova ta Kutsʼ Kalaltike. Li avie jujun xemana xa ta jpaskutik xchiʼuk yakal xa chkilbekutik li sbaliltake».

13. ¿Kʼusi skʼan spasik li utsʼ-alaliletik sventa stabeik sbalil li yichʼel ta mukʼ Jeova ta kutsʼ kalaltike?

¹³ Li Akʼobal sventa Yichʼel ta Mukʼ Jeova ta Kutsʼ Kalaltike jaʼ jun matanal yakʼojbutik li jTotik ta vinajel sventa slekilal li utsʼ-alaliletike, jech kʼuchaʼal li mantal sventa chichʼ toʼox chabiel li sabadoe (Sant. 1:17). Li ta voʼnee, ti kʼuyelan tstunes jujun sabado li jun utsʼ-alalil ta Israele jaʼ jech tstabe sbalil ta mantal ek. Jech li avie, xuʼ me lek jtabetik sbalil mi lek ta jtunestik sventa chkichʼtik ta mukʼ Dios xchiʼuk kutsʼ kalaltik li akʼobal taje (2 Cor. 9:6; Gál. 6:7, 8; Col. 3:23, 24). Mi skotol xemana cha pasilan xchiʼuk li avutsʼ avalalike, xuʼ jech chavaʼi abaik kʼuchaʼal li jtsʼibajom yuʼun salmo ti xi laj yale: «Pero li vuʼune chinopaj ta atojol, yuʼun jaʼ toj lec chcaʼay. Voʼot noʼox cacʼoj jba o ta acʼob, Mucʼul Dios, voʼot li Cajvalote» (Sal. 73:28).

[Tsʼib ti mukʼtik sletraile ta pajina 5]

Li Akʼobal sventa Yichʼel ta Mukʼ Jeova ta Kutsʼ Kalaltike skʼan me mu xakʼ chʼaj, xchiʼuk maʼuk skʼan xal ti mu xa stakʼ xi jtseʼin o ti mu xa kʼusi stakʼ jpastike, yuʼun skʼan jechukutik kʼuchaʼal li Dios chkichʼtik ta mukʼ ti xmuyubaje

[Rekuadro ta pajina 6]

SVENTA XICHʼ TUNESEL

Ti kʼusitik stakʼ pasel li ta Akʼobal sventa Yichʼel ta Mukʼ Jeova ta Kutsʼ Kalaltike

Vivlia:

• Jchantik jun chibuk kapitulo li kʼuyepal smakoj li ta skʼelel Vivlia ta jujun xemanae. Mi sta-o li loʼil bu cha chanike, xuʼ xa sabeik yajval jujun li buchʼutik te chloʼilajike.

• Jpastik ti jech xa yakal chkʼot ta pasel yilel li loʼil ta jchantik li ta skʼelel Vivlia ta jujun xemanae.

• Jkʼeltik jkotoltik li jayib kapitulo chʼakbil sventa li skʼelel Vivlia ta jujun xemanae xchiʼuk ta jujuntal jtsʼibatik jun o chib sjakʼobil ta sventa li loʼile. Ta tsʼakale ta komon jsabetik stakʼobil.

• Ta uni bikʼtal vun jtsʼibatik junuk teksto jujun xemana xchiʼuk jkomes ta joltik, vaʼun jnaʼtikuk yalbel smelolal. Jtsobtik batel li uni bikʼtal vunetike xchiʼuk jchaʼkʼelilantik jujun xemana sventa xkiltik jayib xa teksto jnaʼ ta joltik.

• Kaʼitik junuk gravasion sventa li skʼelel Vivlia jujun xemanae xchiʼuk jtsʼaklitik batel ta jVivliatik ek.

Tsobajeletik:

• Komon jchapantik junuk parte sventa li tsobajele.

• Komon jchantik skʼejintael li kʼejojetik chapanbil sventa li xemana chtale.

• Mi oy buchʼu junukal oy sparte li ta Chanob vun sventa Kabteltik yuʼun Diose o ti oy buchʼu ch-echʼ yakʼ skʼelobil chol mantal li ta Tsobajel sventa Tunelale, xuʼ xichʼ albel kʼuyelan xuʼ sjelubtas o xuʼ te skʼeloj yutsʼ yalal xchanilan.

Li kʼusitik chtun yuʼun li utsʼ-alalile:

• Xuʼ xichʼ chanel li kʼusitik chal li livro Los jóvenes preguntan o Jchanbetik li Mukʼta Jchanubtasvaneje.

• Akʼo yichʼ chanilanel kʼusitik stakʼ pasel sventa kʼusitik xuʼ xkʼot ta pasel ta mas jelavel li ta chanob vune.

• Akʼo sjelilan yabtelik: li totil-meʼile jaʼikuk li alab-nichʼnabiletike, jech xtok li alab-nichʼnabiletike jaʼikuk li totil-meʼiletike. Vaʼun li alab-nichʼnabiletike ta sabeik skʼoplal junuk loʼil xchiʼuk chakʼbeik snop li totil-meʼiletike.

Chol mantal:

• Akʼo yichʼ chanilanel skʼelobiltak chol mantal ti chichʼ tunesel li ta sabado xchiʼuk domingoe.

• Akʼo yichʼ loʼiltael lek kʼusi xuʼ xichʼ pasel sventa mas ep xcholik mantal li kutsʼ kalaltik kʼalal jaʼo yorail sNaʼobil slajel Cristo o kʼalal jaʼo vakasione.

• Jchʼaktik jayibuk minuto sventa jsabetik smelolal ta jujuntal junuk stakʼobil ti xuʼ xkichʼtik jakʼbel ta chol mantale, ta tsʼakale jchanilantik kʼuyelan xuʼ jtakʼtik.

Yan kʼusitik stakʼ pasel:

• Jchantik ta komon junuk mantal ti lokʼ ta achʼ revistae.

• Ta jujuntal kak jchantik junuk mantal ti lek laj kaʼitik li ta achʼ revistaetike, vaʼun jloʼiltabetik li kutsʼ kalaltike.

• Kikʼtik batel junuk jcholmantal o junuk nupultsʼakal kʼalal chkichʼtik ta mukʼ Dios xchiʼuk kutsʼ kalaltike, vaʼun xuʼ van jakʼbetik sloʼilik.

• Jkʼeltik xchiʼuk jchanbetik skʼoplal li videoetike.

• Ta komon jchantik li jvokʼ bu chal «Los jóvenes preguntan» o «Actividades para la familia» ti chlokʼ ta revista ¡Despertad!

• Ta komon jchantik li jvokʼ bu chal «Chanubtaso avalab anichʼnabik» o «Sventa kerem-tsebetik» ti chlokʼ ta revista Li Jkʼel osil ta toyole.

• Jkʼeltik xchiʼuk jchantik jvokʼuk li Anuario li ta jabil oyutike o jlikuk vun ti laj yichʼ akʼel li ta mukʼta tsobajel ta oxib kʼakʼal jaʼ to jelave.

• Jchaʼkʼeltik li kʼusitik tsotsik skʼoplal la jchantik talel ta junuk mukʼta tsobajele.

• Jkʼelbetik li spasbentak Jeovae xchiʼuk jloʼiltatik kʼusi chchanubtasutik ta sventa li Jpasvaneje.

• Komon jpastik junuk mapa, jtsʼibatik ta vun kʼuxi chʼi talel li abtelal ta baʼyel sigloe o yan kʼusitik xchiʼuk jpastik ta teʼ o ta achʼel junuk neneʼ arka, chʼulna o yan kʼusitik.