Li olol ti albil onoʼox skʼoplale

Te oyik-o ta Belen li Jose xchiʼuk Mariae, muʼyuk bu sutik tal ta Nasaret. Vaʼun laj yichʼ sirkunsision kʼalal vaxakib xaʼox kʼakʼal yichʼoj li Jesuse, jech kʼuchaʼal chal li Smantal Jeova ta sventa li j-israeletike (Levítico 12:2, 3). Jaʼ jech nopem xaʼiik ti jaʼo chakʼbeik sbi xtok kʼalal chichʼ sirkunsision li uni kereme. Jaʼ yuʼun Jesus laj yakʼbeik sbi li yuni keremik jech kʼuchaʼal albatik yuʼun li anjel Gabriele.

Lokʼ xa 40 kʼakʼal svokʼel li Jesuse. Vaʼun ¿bu laj yikʼ batel yuni keremik li Jose xchiʼuk Mariae? Te laj yikʼik batel ta templo ta Jerusalen, ti te noʼox uni jayibuk kilometro xil Belene. Yuʼun jamal chal Mantal ti skʼan xakʼ milbil matanal ta templo mi lokʼ xaʼox 40 kʼakʼal svokʼel sneneʼ jun ants sventa tsakubtas sbae (Levítico 12:4-7).

Jaʼ jech la spas li Mariae. ¿Kʼusi laj yakʼ ta matanal? Laj yakʼ chaʼkot uni mut. Taje jaʼ chakʼ ta ilel ti povreik noʼox li Jose xchiʼuk Mariae. Jaʼ jech kʼuchaʼal chal Mantale xuʼ xakʼik jkotuk chʼiom tot chij xchiʼuk jkotuk mut. Pe mi chʼabal yuni chij li jun meʼile xuʼ xakʼ chaʼkot paloma ti staoj xa xchʼiele o chaʼkot chʼiom paloma. Abol noʼox sba li Mariae, jaʼ yuʼun jaʼ laj yakʼ taje.

Kʼalal kʼotik ta templo li Jose xchiʼuk Mariae, te nopaj tal jun mol, Simeon sbi. Albil xa onoʼox yuʼun Dios ti kʼalal mu to chchame chilbe sat li Skristo Jeovae, o li Mesiase. Jaʼ yuʼun och ta yoʼonton chʼul espiritu li vaʼ kʼakʼal sventa x-ikʼat batel ta temploe, vaʼun te la sta xchiʼuk yuni neneʼik li Maria xchiʼuk Josee. La spet uni neneʼ li Simeone.

Kʼalal te spetoj Jesus li Simeone, xi la stojbe ta vokol li Diose: «Li avie Mukʼul Jpasmantal, chavakʼ akʼo junuk yoʼonton kolem xbat li amoso jech kʼuchaʼal avaloje yuʼun laj yil jsat li kʼusi chatunes sventa chakoltavan ti achapanoj ta sat skotol li jteklumetike, jaʼ lus ti tslokʼesbe smakobil sat li jteklumetike xchiʼuk jaʼ yutsil slekilal li ateklumal Israele» (Lukas 2:29-32).

Toj labal sba laj yaʼi Jose xchiʼuk Maria li kʼusi laj yal Simeone. Jech xtok, la skʼan bendision ta stojolalik xchiʼuk xi laj yalbe Maria ta sventa li skereme: «Jaʼ ta skoj ti ep buchʼutik chyalik ta lum ta Israele [xchiʼuk] ti chlikik yan veltae». Maʼuk noʼox, yuʼun xkoʼolaj kʼuchaʼal jun natil espada ch-echʼ tuchʼbatuk yoʼonton ta skoj at-oʼonton li Mariae (Lukas 2:34).

Oy to buchʼu te oy xtok. Jaʼ jun j-alkʼop ants ti Ana sbie, 84 xa jabil yichʼoj. Mu snaʼ xikta sba ti chkʼot ta temploe. Vaʼun jaʼo te kʼot ti bu oy xchiʼuk sneneʼik li Jose xchiʼuk Mariae. Lik stojbe ta vokol Dios kʼalal laj yil li Jesuse xchiʼuk lik yalbe li buchʼutik tskʼan chaʼibeik skʼoplale.

¡Xmuyubajik tajek Jose xchiʼuk Maria ta sventa li kʼusitik kʼot ta pasel ta temploe! Jech, jaʼ la xchʼunik-o mas ti yuʼun onoʼox jaʼ ta melel li Buchʼu albil skʼoplal yuʼun Dios li yuni keremike.