Ta smilal noʼox krixchanoetik tsmakʼlin

Xmuyubaj tajek ayik ta cholmantal ta Galilea li lajchaʼvoʼ jtakboletike, vul «yalbeik [Jesus] skotol li kʼusitik la spasike xchiʼuk li kʼusitik laj yakʼik ta chanele». Melel onoʼox ti lubemik tajeke. Akʼo mi jech, mi jaʼuk xakʼ ora xveʼik, yuʼun xtal xbat li krixchanoetik ta stojolalike. Jaʼ yuʼun xi laj yal li Jesuse: «Laʼik, batik ti bu nom sventa atuk oyoxuke, bat kuxik jlikeluk» (Markos 6:30, 31).

Jaʼ yuʼun bat muyikuk ta jkot varko ta jun lum ti nopol xil yaʼel li Kapernaume, jaʼ te batik ta slokʼeb Kʼakʼal ta Ukʼum Jordan ta sjelavel to Betsaida sventa xbatik ta jun lum ti stuktuk bu chʼikile. Pe ep krixchanoetik laj yaʼiik ti totsik xa batele xchiʼuk ep buchʼutik laj yilik xtok. Jaʼ yuʼun batik ta anil ta tiʼtiʼ nab, vaʼun te xaʼox oyik kʼalal kʼot svarkoalik li Jesus xchiʼuk yajtakboltake.

Kʼalal yal ta varko li Jesuse jaʼ to chile te lamal epal krixchanoetik, vaʼun kʼuxubaj ta yoʼonton, yuʼun xkoʼolaj kʼuchaʼal chijetik ti chʼabal xchabielike. Jaʼ yuʼun «ep kʼusitik lik yakʼbe xchan» ta sventa li Ajvalilale (Markos 6:34). Jech xtok la xpoxta «li buchʼutik skʼanik poxtaele» (Lukas 9:11). Vaʼun kʼalal echʼ batel orae, xi laj yalbeik Jesus li jchankʼopetike: «Stuktuk tajek bu chʼikil liʼe xchiʼuk bat xa tajek ora; tako xa batel li krixchanoetik sventa xbatik li ta bikʼtal lumetik sventa sman stukik li kʼusi tslajesike» (Mateo 14:15).

Xi la stakʼ li Jesuse: «Mu persauk xbatik, makʼlinik voʼoxuk» (Mateo 14:16). Akʼo mi snaʼoj xa onoʼox Jesus li kʼusi tspase, oy kʼusi la sjakʼbe Felipe sventa tskʼelbe yoʼonton: «¿Bu chbat jmantik tal pan sventa xveʼik li krixchanoetik liʼe?». Jaʼ jech la sjakʼbe ta skoj ti te nopol likem ta Betsaidae. Pe manchuk mi xichʼ manel pan mu onoʼox xveʼo li krixchanoetike, yuʼun te van voʼmiluk viniketik ti te oyike. Maʼuk noʼox, ¡yuʼun j-oʼlol to van yepal xjelav mi la jchaptik li antsetik xchiʼuk ololetike! Jech oxal xi la stakʼ li Felipee: «Akʼo mi jmantik chib sien denario pan, mi jaʼuk onoʼox xlokʼik-o ta jyalel, manchuk mi jujusetʼ xkakʼanbetik» (Juan 6:5-7). Li jun denarioe jaʼ ti kʼu yepal tspasik kanal ta jun kʼakʼale.

Jaʼ van sventa chakʼ ta aʼyel Andres ti mi jaʼuk xa onoʼox xmakʼlij yuʼunik epal krixchanoetik kʼalal xi laj yale: «Liʼ oy jun kʼox kerem ti yichʼoj tal voʼob pan pasbil ta sevadae xchiʼuk chaʼkot uni choy. Pe ¿kʼusi bal-o ta skoj ti toj ep li krixchanoetike?» (Juan 6:9).

Jaʼo lek yox tsʼiʼlel, yuʼun primavera xa xchiʼuk poʼot xa tajek li kʼin Koltael ta sjabilal 32 ta jkʼakʼaliltike. Vaʼun li Jesuse laj yalbe mantal yajchankʼoptak ti akʼo yalbeik krixchanoetik ti xchotiik ta yaxaltike, ti stsob sbaik ta 50 xchiʼuk ta 100 jujuvokʼe. Laje la stsak li voʼob pane xchiʼuk li chaʼkot choye, vaʼun la stojbe ta vokol li Diose. Te une la xut li pane xchiʼuk la xchʼak li choye. Vaʼun laj yakʼbe yajchankʼoptak sventa jaʼ xa xbat spukik. ¡Toj labal xa noʼox sba, pe veʼ skotol li krixchanoetike xchiʼuk noj lek xchʼutik!

Ta tsʼakale xi laj yalbe li yajchankʼoptake: «Tsobbeik li skomenal sventa mu kʼusi xichʼ ixtolanele» (Juan 6:12). Vaʼun lajcheb to moch la stsobbeik li skomenale.