Li Jesuse ta smilal xa noʼox krixchanoetik la smakʼlin

K’alal jutuk xa ox skʼan xlik spasik li Kʼin Koltael ta sjabilal 32, li yajtakboltak Jesuse sutik tal ti bu ay xcholik mantale. Ta skoj ti lubemik tajeke, li Jesuse laj yikʼan batel ta jun kanova sventa xbat xkuxik ta Betsaida. Kʼalal jutuk xa ox skʼan xkʼotik li ta stiʼ ukʼum ta Betsaidae, li Jesuse laj yakʼ venta ti te xa ox tsobol epal krixchanoetike. Akʼo mi tskʼan ox stuk oyik xchiʼuk li yajtakboltake, kʼuxubaj ta yoʼonton li krixchanoetike. Jech oxal, la xpoxta li jchameletike xchiʼuk ep kʼusitik laj yakʼ ta chanel. Sjunul kʼakʼal laj yalbe skʼoplal li Ajvalilal yuʼun Diose. Pe kʼalal bat xa ox kʼakʼale, li jtakboletike xi laj yalbeik li Jesuse: «Yikʼaluk chviʼnajik xa li krixchanoetike, jaʼ lek albo ti akʼo xbat sman sveʼelike».

Pe li Jesuse xi la stakʼe: «Mu persauk chbatik, makʼlinik voʼoxuk». Vaʼun, xi la stakʼik li jtakboletike: «¿Mi chakʼan chbat jmanbekutik tal sveʼelik?». Xi to laj yal jun jtakbol ti Felipe sbie: «Akʼo mi ep jtakʼinkutik, mu onoʼox xlokʼ-o sventa jmanbekutik sveʼel li epal krixchanoetike».

Xi to la sjakʼ li Jesuse: «¿Kʼu yepal veʼlil oy kuʼuntik?». Xi laj stakʼ li Andrese: «Oy voʼob pan xchiʼuk chaʼkot uni choy, pe uni juteb tajek, mu xlokʼ-o sventa skotol li krixchanoetike». Xi laj yal li Jesuse: «Ichʼbeikun tal li pane xchiʼuk li choye». Ta tsʼakale, li Jesuse laj yalbe li krixchanoetik ti akʼo chotiikuk ta yaxaltike xchiʼuk ti akʼo xchʼak sbaik ta 50 jujutsop xchiʼuk ta sien jujutsope. Vaʼun, li Jesuse la stsak li pane xchiʼuk li choye, la skʼel muyel vinajel xchiʼuk la spas orasion. Kʼalal laj xa ox yoʼonton spasel orasione, laj yakʼbe yajtakboltak li veʼlil yoʼ tspukbeik li krixchanoetike. Vaʼun, veʼik li voʼmil viniketik ti jaʼ te oyike, parte li ololetike xchiʼuk li antsetike, lek noj xchʼut kom stekelik. Kʼalal laj yoʼontonike, li jtakboletike la stsobbeik skomenal li veʼlile. ¡Kom to 12 ta moch! ¿Mi mu jechuk ti toj labal sba li skʼelobil juʼelal taje?

Li krixchanoetike toj labal sba laj yilik li kʼusi kʼot ta pasele, jaʼ yuʼun tskʼan ox tstikʼik ta ajvalil li Jesuse. Pe li Jeova xchiʼuk Jesuse snaʼojik lek ti maʼuk to yoraile. Ta tsʼakale, la stakanan batel ta sna li krixchanoetike xchiʼuk laj yalbe yajtakboltak ti akʼo jelavikuk batel ta jot stiʼ Nab Galileae. Li jtakboletike muyik batel li ta kanovae, yan li Jesuse muy batel ta vits, ¿kʼu yuʼun? Yuʼun tskʼan stuk oy sventa skʼopon li Stote. Li Jesuse nopem onoʼox xaʼi chchʼakbe yorail sventa skʼopon Stot akʼo mi toj ep kʼusitik tspas.