Ep buchʼutik chopol laj yaʼi li kʼusi laj yal Jesuse

Te chchanubtasvan ta nail tsobobbail ta Kapernaum li Jesuse, yakal chakʼ ta chanel ti jaʼ li batsʼi pan likem tal ta vinajele. Jamal xvinaj ti jaʼ la stsʼak batel li kʼusi onoʼox laj yalbe li krixchanoetik ta Kapernaum ti sutik tal ta slokʼeb Kʼakʼal ta xokon Nab Galilea ti la sveʼik li pan xchiʼuk ti la stiʼik li choy akʼbatike.

Xi to laj yalbe smelolal li Jesuse: «La sveʼik mana ta takixokol balumil li amoltotakik ta voʼnee, akʼo mi jech, chamik onoʼox». Pe «liʼe jaʼ li pan ti likem tal ta vinajele, vaʼun muʼyuk ta xcham li buchʼu ta sveʼe. Voʼon li kuxul panun ti likem tal ta vinajele. Chkuxi sbatel osil mi oy buchʼu tsveʼ li pan liʼe; yuʼun ta melel, li pan chkakʼe jaʼ li jbekʼtal ta sventa xkuxlejal li krixchanoetike» (Juan 6:48-51).

Kʼalal la xchiʼin ta loʼil Nikodemo ta primavera ta sjabilal 30 ta jkʼakʼaliltik li Jesuse te laj yalbe skʼoplal ti chakʼ ta Jpojvanej Xnichʼon li Dios ta skoj ti skʼanoj tajek li krixchanoetike. Pe li avi une jaʼ chal ti toj tsots skʼoplal xichʼ tibel li sbekʼtale, jaʼ xkaltik, ti xakʼ xchʼunel yoʼontonik ta sventa ti chakʼ sba ta matanale, yuʼun jaʼ noʼox jech xuʼ staik li kuxlejal sbatel osile.

Pe muʼyuk lek laj yaʼi krixchanoetik li kʼusi laj yal Jesuse. Xi tsjakʼbe sbaike: «¿Kʼuxi xa noʼox ti chakʼ jtibetik sbekʼtal li vinik liʼe?» (Juan 6:52). Oy ta yoʼonton Jesus ti akʼo xaʼibeik lek smelolal ti maʼuk skʼan xal ti yuʼun chtibat ta melel li sbekʼtale. Moʼoj, yuʼun oy kʼusi yan skʼan xal ti jaʼ onoʼox skʼoplal stuke.

Xi chal li Jesuse: «Chkalboxuk avaʼiik ta batsʼi melel: mi muʼyuk bu chatibeik sbekʼtal li Xnichʼon krixchanoe xchiʼuk mi muʼyuk bu chavuchʼbeik li xchʼichʼele, muʼyuk me akuxlejalik un bi. Oy me xkuxlejal sbatel osil li buchʼu jaʼ tsmakʼlin-o sba ta jbekʼtale xchiʼuk ti chuchʼ li jchʼichʼele, [...] yuʼun jaʼ batsʼi veʼlil li jbekʼtale xchiʼuk jaʼ batsʼi uchʼbolal li jchʼichʼele. Te me oy-o ta jtojolal li buchʼu jaʼ tsmakʼlin-o sba ta jbekʼtale xchiʼuk ti chuchʼ li jchʼichʼele» (Juan 6:53-56).

¡Batsʼi chopol van tajek laj yaʼiik judaetik li kʼusi naka to laj yaʼiike! Yuʼun li kʼusi tsnopike jaʼ ti chal Jesus ti akʼo stibeik sbekʼtal li jun krixchanoe o ti mu xchʼunbeik Smantal Dios ta sventa ti mu stakʼ tiʼel li chʼichʼe (Génesis 9:4; Levítico 17:10, 11). Yuʼun ti kʼusi skʼan spasik sventa staik li kuxlejal sbatel osile, jaʼ ti xakʼ xchʼunel yoʼontonik ta stojolal li stukʼil bekʼtal Jesus xchiʼuk xchʼichʼel mi kʼot skʼakʼalil chakʼ ta matanale. Ta melel, ep yajchankʼoptak ti mu onoʼox xaʼibeik smelolal eke. Jaʼ yuʼun xi laj yalik jlome: «Toj chopol ta aʼiel li mantal chale, ¿buchʼu xa noʼox tskʼan chchikinta?» (Juan 6:60).

Laj yakʼ venta Jesus ti lik bikʼtal kʼopojikuk jlom yajchankʼoptake, jech oxal xi la sjakʼe: «¿Mi yuʼun chamak-o avokik taje? ¿Kʼusi van chavalik ti tauk xavilik chmuy batel ti bu toʼox oy li Xnichʼon krixchanoe? [...] Li kʼusitik laj xa kalboxuke jaʼ te likem tal ta chʼul espiritu xchiʼuk chakʼ kuxlejal. Pe oy buchʼutik avuʼunik ti mu xchʼunike». Vaʼun ep buchʼutik ti sutik batele, ti muʼyuk xa bu la stsʼakliik batel li Jesuse (Juan 6:61-64).

Xi la sjakʼbe li lajchaʼvoʼ yajtakboltake: «¿Mi chakʼan chabatik ek?». Pe xi laj yal li Pedroe: «Kajval, ¿buchʼu xa noʼox chbat jchiʼinkutik? Yuʼun voʼot chavalbe skʼoplal li kʼusitik ch-ikʼvan batel ta kuxlejal sbatel osile. Jchʼunojkutik xchiʼuk jnaʼojkutik ti voʼot li Buchʼu chʼul yuʼun Diose» (Juan 6:67-69). Manchuk mi mu xaʼibe lek smelolal li Pedro xchiʼuk li yan jtakboletik li kʼusi chakʼ ta chanel Jesuse, ¡batsʼi tukʼ yoʼontonik ta stojolal!

Kʼalal jaʼo xmuyubaj chchikinta kʼusi chal Pedro li Jesuse, xi laj yale: «Voʼon la jtʼujoxuk alajchaʼvoʼalik, ¿mi mu jechuk? Pe oy jun avuʼunik ti jaʼ jun jchopolkʼoptavaneje» (Juan 6:70). Jaʼ chalbe skʼoplal li Judas Iskariotee. Yikʼaluk van laj yil Jesus ti oy xa kʼusitik chopol ta yoʼonton li Judase.

Akʼo mi jech, xmuyubaj Jesus ta sventa ti tstsʼakliat-o batel yuʼun li Pedro xchiʼuk yan jtakboletike. Jech xtok, xmuyubaj ta skoj ti chcholbeik-o batel skʼoplal li aʼyej sventa kuxlejal kʼuchaʼal tspas stuke.