¿Mi oy kʼusi chal Vivlia ta sventa li yichʼel chʼichʼe?
Li kʼusi chal Vivliae
Li Vivliae chal ti mu stakʼ jlajestik li chʼichʼe. Jaʼ yuʼun, li yajtsʼaklomutik Kristoe muʼyuk ta jlajestik mi jaʼuk ta jtikʼbe jbatik li chantos smukʼta chʼakbenaltak chʼichʼe. Jkʼeltik avil junantik tekstoetik ta Vivlia.
Jenesis 9:4. Kʼalal echʼ xa ox li Nojelal ta voʼe, li Diose laj yalbe Noe xchiʼuk yutsʼ yalal ti xuʼ slajesik li sbekʼtal chonbolometike, pe skʼan xchʼunik li mantal liʼe: «Jaʼ noʼox mu stakʼ xatiʼik li bekʼet ti oy to xchʼichʼele, yuʼun li xchʼichʼele jaʼ xkuxlejal». Ta skoj ti jaʼ jnitilulaltik li Noee, jkotoltik skʼan jchʼuntik li mantal taje.
Levitiko 17:14. «Mu xatibeik xchʼichʼel jtosuk chonbolom, yuʼun li xkuxlejal kʼusiuk chonbolome jaʼ li xchʼichʼele. Persa skʼan xichʼ milel li buchʼu tstiʼe». Ta sat li Diose jaʼ kuxlejal chil li chʼichʼe xchiʼuk jaʼ yuʼun. Li mantal liʼe jaʼ albatik li voʼneal j˗israeletike, akʼo mi jech, te chakʼ kiltik kʼusi tsnop Jeova ta sventa li chʼichʼe.
Echos 15:20. Li Diose laj yalbe mantal li yajtsʼaklomtak Kristo «ti akʼo stsʼik sbaik [...] ta sventa li chʼichʼe», taje jaʼ jech albat mantal li Noe eke. Li yajtsʼaklomtak Kristo ta baʼyel sigloe, la spʼajik stunesel o slajesel li chʼichʼe xchiʼuk muʼyuk la stunesik sventa xpoxta-o sbaik.
¿Kʼu yuʼun chal Dios ti skʼan jtsʼik jbatik ta slajesel xchiʼuk ti mu jtikʼbe jbatik li chʼichʼe?
Oy doktoretik chalik ti jaʼ lek ti mu jtikʼbe jbatik li chʼichʼe. Pe li srasonal mas tsots skʼoplal ti kʼu yuʼun muʼyuk ta jchʼamtik li chʼichʼe, jaʼ ta skoj ti chʼul chil chʼichʼ li Diose (Levitiko 17:11; Kolosenses 1:20).