¿Kʼusi oy ta yoʼonton Dios ta jtojolal?

Li kʼusi chal Vivliae

Li kʼusi oy ta yoʼonton Diose jaʼ ti xkojtikintik leke, ti xkamigointike, ti jkʼantike xchiʼuk ti xijtunutik ta stojolal ta sjunul koʼontontike (Mateo 22:37, 38; Santiago 4:8). Sventa jchantik spasel li kʼusi oy ta yoʼonton Diose, skʼan xkojtikinbetik lek xkuxlejal li Jesuse xchiʼuk ti kʼu yelan chanubtasvane, yuʼun li stuke la spas li kʼusi oy ta yoʼonton Diose maʼuk noʼox laj yalbe skʼoplal (Juan 7:16, 17). Yuʼun laj yal li kʼusi tsots skʼoplal laj yaʼi ta xkuxlejale, xi laj yale: «Likemun tal ta vinajel, pe maʼuk sventa tal jpas li kʼusi tskʼan koʼonton jtuke, jaʼ li kʼusi tskʼan yoʼonton li buchʼu la stakun tale» (Juan 6:38).

Sventa jnaʼ kʼusi oy ta yoʼonton Dios ta jtojolale, ¿mi oy van kʼuxi chiyalbun tal o chakʼbun tal junuk senyail?

Moʼoj, yuʼun li Diose jaʼ tstunes Vivlia sventa xakʼ ta ojtikinel li kʼusi oy ta yoʼontone. Yuʼun li Vivliae jaʼ tskolta «sventa lekuk chapal li yajtunel Diose xchiʼuk sventa xtojobuk spasel skotol li lekil abtelale» (2 Timoteo 3:16, 17). Li Diose tskʼan ti jchantik Vivlia sventa jnaʼtik li kʼusi oy ta yoʼontone xchiʼuk ti jnaʼuk lek xijrasonajutike (Romanos 12:1, 2; Efesios 5:17).

¿Mi spas van kuʼun li kʼusi oy ta yoʼonton Diose?

Spas, yuʼun xi chalbutik ta Vivlia li Diose: «Mu toj tsotsuk ta chʼunbel li smantaltake» (1 Juan 5:3). Akʼo mi jech, vokol onoʼox van chkaʼitik ta spasel. Pe ep ta jtabetik sbalil mi laj kakʼtik persae. Xi laj yal li Jesuse: «Xmuyubajik li buchʼutik chaʼiik li skʼop Diose xchiʼuk ti tspasik li kʼusi chale» (Lukas 11:28).