SVOʼVOKʼAL

Sutanik «ta stojolal li jchabichij xchiʼuk ti jaʼ jkʼelvanej avuʼunike»

¿Mi yakal chkʼot ta atojolal li vokoliletik laj yichʼ alel li ta foyeto liʼe? Mu atukuk mi jeche, yuʼun ep yajtuneltak Jeova ta voʼne xchiʼuk ta jkʼakʼaliltik ti jechtik la snuptanik eke. Koltaatik yuʼun Jeova sventa stsal yuʼunik, jaʼ me jech xuʼ skoltaot ek.

«Laj kakʼ venta ti muʼyuk yiktaojun li Jeovae, jaʼ noʼox skʼan jta sutel li be sventa xisut ta stojolale»

JPʼELUK ta avoʼonton ti tsbeiltasot sutel ta stojolal li Jeovae. Jaʼ tskoltaot ta stsalel li vul oʼontone, chpoxta kʼalal tsyayijesboxuk avoʼontone xchiʼuk ti lekuk noʼox li ajol avoʼontone. Kʼalal jun xa noʼox avoʼontone, jaʼ tstij avoʼonton xlik tunan yan velta ta stojolal Jeova xchiʼuk li tsobobbaile. Xkoʼolaj van li kʼusi kʼotem ta atojolal kʼuchaʼal la snuptanik jlom li yajtsʼaklom Kristo ta baʼyel sigloe, yuʼun xi la stsʼibabe li jtakbol Pedroe: «Yuʼun chʼayemoxuk toʼox ta be kʼuchaʼal chijetik, pe li avie lasutik xa talel ta stojolal li jchabichij xchiʼuk ti jaʼ jkʼelvanej avuʼunike» (1 Pedro 2:25).

Li kʼusi mas toj lek xuʼ xapase jaʼ ti xavakʼ persa xavamigoin yan velta li Jeovae. ¿Kʼu yuʼun? Baʼyel, yuʼun chmuyubaj avuʼun Jeova mi jech chapase (Proverbios 27:11). Jech kʼuchaʼal achanoje, li jtalelaltike xuʼ xmuyubaj-o o xuʼ xat-o yoʼonton kuʼuntik li Diose. Akʼo mi jech, muʼyuk tsujutik sventa jkʼantik mi jaʼuk tsujutik sventa xijtun ta stojolal (Deuteronomio 30:19, 20). Xi chal jun j-al-loʼil ta sventa Vivliae: «Li jun krixchanoe jaʼ noʼox xuʼ spas ta mantal yoʼonton, muʼyuk buchʼu yan xuʼ spas ta mantal». Kʼalal chijtun ta stojolal Jeova ta skoj ti jkʼanojtike, xkoʼolaj ta jpastik ta mantal koʼontontik sventa xijtun ta stojolal. Taje chmuyubaj-o tajek li Jeovae, yuʼun jaʼ jun mukʼta matanal chil kʼalal tukʼ chkakʼ jbatik ta stojolale. Muʼyuk kʼusi yan ti xijmuyubaj tajek yuʼun jech kʼuchaʼal chkichʼtik ta mukʼ Jeova kʼuchaʼal sta-oe (Echos 20:35; Apokalipsis 4:11).

Li ta tsobobbaile lek chchʼamik jun ermana ti yiktaoj sba ta mantale

Jech xtok, cha-akʼbat li kʼusi chtun avuʼun ta mantal mi lasut tale (Mateo 5:3). Yuʼun ep krixchanoetike tsjakʼbe sbaik mi oy sbalil li jkuxlejaltike xchiʼuk yan kʼusitik ti tsotsik skʼoplale, pe mu stabeik stakʼobil. Chtun onoʼox kuʼuntik mantal ta skoj ti jech la spasutik li Jeovae xchiʼuk snaʼoj ti jaʼ noʼox xijmuyubaj-o tajek mi chijtun ta stojolale. Jaʼ yuʼun, mu kʼusi xkoʼolaj-o li muyubajel chavaʼi mi chavichʼ ta mukʼ Jeova ta skoj ti akʼanoje (Salmo 63:1-5).

Li Jeovae tskʼan ti xasut tal ta steklumale. Li foyeto liʼe jaʼ skʼelobil ti jech oy ta yoʼonton li Jeovae. Laj yichʼ kʼelbel lek skʼoplal xchiʼuk laj yichʼ kʼanbel koltael Jeova ta orasion kʼalal laj yichʼ pasele. Vaʼun, laj yakʼbot van junuk mol ta tsobobbail o yan ermano li foyetoe xchiʼuk lik akʼel. Kʼotem xa van ta avoʼonton li kʼusi akʼeloj xa tale. Skotol taje jaʼ svinajeb ti muʼyuk xchʼayojot ta sjol li Jeovae xchiʼuk ti ta slekil yoʼonton chchʼamot yan veltae (Juan 6:44).

Tspat koʼontontik kʼalal chkaʼitik ti mu xchʼay ta sjol li xchijtak Jeova ti chʼayemike. Taje jech la xchanbe skʼoplal jun ermana ti Donna sbie. Xi chale: «Kʼunkʼun linamaj lokʼel li ta mantale, pe nopajtik noʼox ta jnopilanbe skʼoplal li kʼusi chal Salmo 139:23, 24 ti xi chale ‹Qʼuelun lec avil cʼu xiʼelan, Dios cuʼun; otquino lec li cʼusi oy ta coʼntone; qʼuelbun avil cʼu xʼelan coʼnton, otquino lec avil li cʼusitic ta jnope. Qʼuelavil me oy cʼusi chopol ta coʼntone; tuqʼuibtasun batel ta be sventa sbatel osil›. Muʼyuk onoʼox lek laj kaʼi li sbalumil Satanase, jamal chkal, mu junuk koʼonton laj kaʼi jba te. Jnaʼoj ti jaʼ jta-o te oyun li ta s-organisasion Jeovae. Laj kakʼ venta ti muʼyuk yiktaojun li Jeovae, jaʼ noʼox skʼan jta sutel li be sventa xisut ta stojolale. ¡Ximuyubaj tajek ti lisut tale!».

Jpʼeluk ta avoʼonton ti tsbeiltasot sutel ta stojolal li Jeovae

Ta jpaskutik orasion sventa xakʼupin yan velta «li xcuxetel coʼntontic chacʼ Mucʼul Diose» (Nehemías 8:10). Ta melel, muʼyuk me bu chopol chavaʼi aba ta tsʼakal mi lekub avuʼun yan velta li amigoinel avuʼun xchiʼuk li Atot ta vinajele.

Xuʼ van jech chajakʼbe aba

¿KʼUSI SKʼAN XLIK JPAS?

Kʼalal jaʼ to ch-echʼ xchamel li jun krixchanoe, mu stakʼ xlik spas ta anil li kʼusitik nopem toʼox xaʼi spasele, yuʼun ta kʼunkʼun tstsatsub sventa oyuk yipal ta spasel li kʼusi nopem toʼox xaʼi spasele. Sventa xijtsatsub ta mantal yan velta eke ta kʼunkʼun chijtsatsub batel. Li kʼusi skʼan xapase jaʼ ti ta kʼunkʼun xlik akʼel jujun kʼakʼal li mantaletike. Chʼakbo yorail jlikeluk sventa xakʼel o xachikinta jayibuk kapitulo li ta Vivliae xchiʼuk kʼelo li vunetike o kʼelo li kʼusi oy li ta jpajinatik ta Internet jw.org xchiʼuk xuʼ xakʼel programaetik ti oy ta jw.org. Jech xtok, batan noʼox me ta tsobajel mi xuʼ chavile. Pe li kʼusi mas tsots skʼoplale, kʼanbo koltael Jeova ta orasion. Li Vivliae xi ta xale: «Akʼbeik me sbain skotol li kʼusi chavul-o avoʼontonike, yuʼun oyoxuk ta yoʼonton (1 Pedro 5:7).

«Kʼalal laj kikta li mantale, chikʼexav xa ta spasel orasion. Pe laj kakʼ kipal ta spasel, ta mas tsʼakale ay svulaʼanun jun mol ta tsobobbail. Laj yakʼbun kil ti oy jchapanobil chilun li Jeovae. Laj yalbun ti akʼo jkʼel jujun kʼakʼal li Vivliae. La jpas jech, vaʼun jaʼ laj yakʼbun kipal sventa xibat yan velta li ta tsobajeletike. Ta mas tsʼakale lik jchol mantal yan velta. Ximuyubaj tajek ti la xchʼamun yan velta li Jeovae.» (Eeva)

¿KʼU VAN YELAN CHCHʼAMIKUN LI TA TSOBOBBAILE?

Jpʼeluk ta avoʼonton ti xmuyubajik li ermanoetik mi labat yan veltae. Muʼyuk chchopol kʼoptaoxuk. Jaʼ noʼox chalboxuk ti skʼanojoxuke xchiʼuk ti chakʼik persa sventa spatik avoʼontone (Evreos 10:24, 25).

«Solel chikʼexav chkaʼi ti chibat yan velta li ta Salon sventa Tsobobbaile. Jaʼ toʼox ta jvul-o koʼonton ti kʼu van yelan chilikun mi libat yan veltae. Pe oy jun ermana ti ep xa sjabilal xchiʼuk ti oy xa ta 30 jabil muʼyuk kiloje, xi laj yalbune: ‹¡Kerem, lek chʼambilot yan velta!›. Kʼot tajek ta koʼonton taje. Xkoʼolaj ti lisut tal yan velta ta kutsʼ kalal laj kaʼie.» (Javier)

«Libat li ta Salon sventa Tsobobbaile, pe ta spatil to lichoti sventa mu buchʼu xilun. Akʼo mi jech, laj yojtikinikun ta skoj ti chikʼot toʼox ta jbikʼtal tee. Lek la xchʼamikun xchiʼuk solel jun tajek koʼonton laj kaʼi ta skoj ti ta slekil yoʼonton la smeyikune. Xkoʼolaj ti lisut tal yan velta ta kutsʼ kalal laj kaʼie.» (Marco)

¿KʼU YELAN CHILIKUN LI MOLETIKE?

Ta slekil yoʼonton tskʼoponoxuk li moletike. Chalboxuk van ta melel ti toj lek ti oy ta avoʼonton chlik akʼan yan velta li mantale (Apokalipsis 2:4). Ta stsakik ta venta ti kʼu yelan chavaʼi abae xchiʼuk ‹ta slekil me yoʼontonik› tskoltaoxuk sventa xatukʼibtas li kʼusitik chopol apasoje (Galatas 6:1; Proverbios 28:13). Xuʼ xchapbeik skʼoplal ti chchanubtasot ta Vivlia jun ermano ti jaʼ tstunes li livro ¡Kʼupino akuxlejal ta sbatel osil! Li moletike tskoltaoxuk ta sventa li kʼusitik chapase (Isaías 32:1, 2).

«Li ta xvaxakibal jabil ti laj kikta mantale laj onoʼox skoltaikun li moletike. La svulaʼanun jun mol ta tsobobbail, vaʼun laj yakʼ kil fotoetik ti bu koʼol jlokʼtaoj jbakutike. Lekik tajek li kʼusi la svulesbun ta jole, jaʼ yuʼun ta jkʼan xa jech chimuyubaj yan velta, yuʼun ximuyubaj toʼox chitun ta stojolal Jeova. Laj yakʼ ta ilel slekil yoʼontonik li moletike xchiʼuk la skoltaikun sventa jchaʼpas li kʼusitik sventa mantale.» (Victor)

«Tskoltaot Jeova sventa tsotsukot-o»

Li ta svunal jkʼejojtik Nichimuk koʼontik jkʼejintatik li Jeovae te chata epal kʼejoj ti chkʼot ta avoʼonton xchiʼuk tstij avoʼonton sventa xlik apas yan velta li kʼusitik sventa mantale. Jun noʼox skʼelobile jaʼ li numero 38 ti lokʼesbil ta 1 Pedro 5:10 ti jaʼ sbi «Tskoltaot Jeova sventa tsotsukot-o», nopbo skʼoplal avaʼi li sletraile.

Laj yikʼot tal Jeova yuʼun ep skʼanojot,

jaʼ la snit tal akʼob ta sak osil.

Ta avoʼnton ayan spasel kʼusi tskʼanbot,

vaʼun solel toj kʼupil sba laj yil.

«Ta jpas li kʼusi chakʼane», xavut,

vaʼun chalbot ti chkʼuxubinote.
Oy ta yoʼnton Jeova ti lek xamuyubaj,

vaʼun la stak talel skʼanbil Nichʼon.

Akʼo mi ep skʼanoj, laj yakʼ ta matanal,

¿mi jaʼ xa mu xakʼ stsatsal avoʼnton?

Muʼyuk chchʼay ta sjol ti akʼanoje,

vaʼun jujun kʼakʼal ta skoltaot.

(ESTRIVIYO)

La stoj amul Xnichʼon Dios, yuʼun ep skʼanojot.

Jeova tstsatsubtasot xchiʼuk ta xchabiot.

Muʼyuk bu chayikta Dios toj toyol la stojot.

Chakʼ avipal Jeova xchiʼuk lek chchabiot.

Mi chakʼan chachikinta sonal li kʼejoj 38 xchiʼuk yan kʼejojetik sventa Ajvalilal yuʼun Diose. Akʼbo klik ta «VUNETIK XCHIʼUK YAN KʼUSITIK», ta tsʼakale ta «SON».