Akʼbat sparte li Jakobe

Kʼalal 40 xa ox sjabilal li Isaake, nupun xchiʼuk li Rebekae, solel skʼanoj tajek. Ta mas tsʼakale, ayan skeremik ti vachetike.

Li bankilale Esau sbi, li itsʼinale Jakob. Li Esaue tskʼupin tajek ti xbat ta paxyal ta osiltike xchiʼuk xchanoj lek nutsol. Pe li Jakobe lek chaʼi ti tey noʼox chkoltavan li ta snaike.

Li vaʼ kʼakʼaletik taje, kʼalal mi cham li totile, jaʼ mas ep ch-akʼbat komel osil xchiʼuk takʼin li baʼyel nichʼonile, jaʼ mu sta jech yepal tsta li itsʼinaletike. Taje ojtikinbil kʼuchaʼal parteil o rextoil. Jaʼ yuʼun, kʼalal mi yichʼ xrextoik li yutsʼ yalal Isaake, tey skʼoplal ek li kʼusi yaloj chakʼbe Abraan li Jeovae. Pe li Esaue muʼyuk sbalil laj yil li kʼusi yaloj Jeovae, yan li Jakobe snaʼoj ti toj tsots skʼoplale.

Jun veltae, li Esaue toj lubem kʼot ta snaik, yuʼun sjunul kʼakʼal nutsolaj. Vaʼun, kʼalal laj yaʼi ti toj lek mu yikʼ li veʼlil yakal tsmeltsan li yitsʼine, xi laj yale: «Avokoluk, akʼbun jutuk li aveʼel chameltsane, yuʼun chicham xa ta viʼnal». Xi la stakʼ li Jakobe: «Lek, jaʼ noʼoxe albun kaʼi baʼyuk mi ta jeltik-o xchiʼuk li aparte chavichʼe». Pe xi takʼav li Esaue: «Mu kʼusi stu kuʼun li jparte chkichʼe, yuʼun chiviʼnaj xa tajek, xuʼ voʼot xavichʼ komel». ¿Mi lek van li kʼusi la spas Esaue? ¡Muʼyuk!, muʼyuk lek li kʼusi la spase. Yuʼun la sjel ta veʼlil li kʼusi toj ep sbalile.

Kʼalal mol xa ox li Isaake, la snop chakʼbe bendision li sbankilal kereme. Li Rebekae la skolta Jakob sventa jaʼuk xichʼ li bendisione akʼo mi jaʼ itsʼinal. Pe kʼalal laj yaʼi li Esaue, kap tajek sjol xchiʼuk la snop kʼuxi tsmil li yitsʼine. Li Isaak xchiʼuk Rebekae, xi laj yalbeik li Jakob sventa mu kʼusi chopol snuptane: «Jaʼ lek bat chiʼino li ajuntot Laban ti jaʼ sbankil li ameʼe. Jaʼ to xasut tal mi laj xa ox skʼakʼal yoʼonton li abankile». Li Jakobe la xchʼun li kʼusi albat yuʼun stot smeʼe, jaʼ yuʼun jatav batel sventa mu xmilat yuʼun li sbankile.