Li Jakob xchiʼuk Esaue la xchapan li skʼopike

Li Jakobe albat yuʼun Jeova ti ta xchabiate, jech kʼuchaʼal la xchabi li Abraan xchiʼuk Isaake. Li Jakobe te kom ta naklej ta Aran. Te nupun xchiʼuk ayan ep xnichʼnabtak xchiʼuk pas ta jkʼulej.

Ta tsʼakale, xi albat yuʼun Jeova li Jakobe: «Sutan batel ta yosilal li atot ameʼe». Jaʼ yuʼun, li Jakobe nat tajek xanavik xchiʼuk li yutsʼ yalale. Li ta bee, xi tal albatuk yuʼun li yajtuneltake: «Li abankil Esaue chtal xa snupot ta be xchiʼuk chanib sien sviniktak». Li Jakobe xiʼ tajek, yuʼun la snop mi oy kʼusi chopol tspasbat xchiʼuk li yutsʼ yalale. Jaʼ yuʼun, xi la skʼanbe ta orasion li Jeovae: «Avokoluk, mu me xavakʼ smilun li jbankil Esaue». Vaʼun, li ta yokʼomale li Jakobe la stakbe batel smoton li sbankile, la stakbe batel epal chijetik, tentsunetik, vakaxetik, kameyoetik xchiʼuk vuroetik.

Li ta akʼobaltik kʼalal stuk kom li Jakobe, laj yil jun anjel, te lik spas kʼop xchiʼuk. Jech-o la spasik kʼop kʼalal to ta sob yokʼomal. Akʼo mi toj kʼux chaʼi ti pitkʼunbat lokʼel li sbakil yoʼe, muʼyuk bu laj yikta sba. Xi albat yuʼun li anjele: «Koltaun batel». Pe xi takʼav li Jakobe: «Mi muʼyuk chavakʼbun bendisione, muʼyuk ta jkoltaot batel».

Vaʼun, li yaj-anjel Jeovae laj yakʼbe bendision li Jakobe. Te laj yakʼ venta Jakob ti chchabiat yuʼun Jeova sventa mu kʼusi chopol spasbat yuʼun li sbankile.

Li vaʼ sob taje, li Jakobe te laj yil batel ta nom li Esau ti xchiʼinoj tal chanib sien sviniktake. Jaʼ yuʼun, li Jakobe jaʼ baʼyel bat ta anil sventa xbat snup ta be li Esaue. Kʼalal la sta sbaike, te la skejan sba vukub to velta ta stojolal li sbankile. Vaʼun, li Esaue te la smey li yitsʼine. Te okʼ xchaʼvoʼalik xchiʼuk la xchapan li skʼopike. ¿Mi lek van laj yil Jeova li kʼusi la spas Jakobe?

Kʼalal laj xa ox yoʼontonike, li Esaue sut batel ta sna. Yan li Jakobe bat li ta yosilal stot smeʼe. Li Jakobe oy 12 xnichʼnabtak jaʼik: Ruben, Simeon, Levi, Juda, Dan, Neftali, Gad, Aser, Isakar, Sabulon, Jose xchiʼuk Benjamin. Ta mas tsʼakale, li Jeovae la stunesbe jun xnichʼon Jakob ti Jose sbi sventa spoj li steklumale. ¿Mi chakʼan chanaʼ kʼuxi la spas? Jchantik batel li ta yan xchanobile.