Jun mosoil ti chchʼunbe smantal Diose

Li Josee jaʼ li mas kʼox li ta skeremtak Jakobe. Li sbankiltak Josee laj yakʼik venta ti jaʼ mas kʼanbil yuʼun li stotike. ¿Kʼu van yelan laj yaʼi sba xanaʼ li sbankiltake? Itʼixaj tajek yoʼontonik xchiʼuk pʼajvanik tajek. Jech xtok, kʼalal oy kʼusi la xvaychinta li Josee, laj yalbe li sbankiltake, pe li stukike la snopik ti jaʼ skʼan xal ti chkʼot yorail tskejan spatan sbaik ta stojolal li yitsʼinike. Jaʼ yuʼun, mas to la spʼajik.

Jun velta, li sbankiltak Josee yakal chchabi xchijik ta jun osil ti te nopol xil li lum Sikeme. Vaʼun, li Jakobe la stak batel li Jose sventa xbat skʼel mi lek oyik li sbankiltake. Pe kʼalal ilat batel ta nom yuʼun li sbankiltake, xi laj yalike: «¡Kʼelavilik, leʼ xa xtal li mu jvaychinajele. Jaʼ lek jmiltik!». Jaʼ yuʼun, la stsakik xchiʼuk bat sjipik ochel ta jun takin poso. Pe li Judae xi laj yalbe li sbankiltak xchiʼuk yitsʼinabtake: «Jaʼ lek mu jmiltik, jchontik batel xchiʼuk akʼo yichʼ mosoinel». Vaʼun, la xchʼunik li kʼusi laj yal Judae, jaʼ yuʼun la xchonik ta 20 ta sep plata, jaʼ la xchonbeik batel jpʼolmajeletik ta Madian kʼalal jaʼo chbatik ta Ejiptoe.

Ta tsʼakale, li sbankiltak Josee la sbonbeik ta xchʼichʼel tentsun li skʼuʼe. Vaʼun, laj yichʼbeik batel li stotike xchiʼuk xi laj sjakʼbeike: «¿Mi mu jaʼuk skʼuʼ Jose liʼe?». Li Jakobe la snop mi laj ta tiʼel ta jkot jtiʼvanej chonbolom li Josee, jaʼ yuʼun laj yat tajek yoʼonton. Muʼyuk buchʼu xuʼ yuʼun spatbel yoʼonton.

Kʼalal kʼotik ta Ejiptoe, li Josee laj yichʼ manel yuʼun jun bankilal soltaro ti Potifar sbi sventa xkʼot ta mosoile. Pe li Josee te chiʼinbil yuʼun Jeova. Ta tsʼakale, li Potifare laj yakʼ venta ti lek xtojob ta abtel li Josee xchiʼuk ti xuʼ spat yoʼonton ta stojolale. Jaʼ yuʼun, ta mas jelavel jutuke, laj yakʼbe sbain skotol li kʼusitik oy yuʼune.

Li yajnil Potifare laj yil ti toj kʼupil sba xchiʼuk ti lek tsots li Josee. Jaʼ yuʼun, chalilanbe ti akʼo xchiʼin sbaik ta vayele. ¿Kʼusi la spas li Josee? Muʼyuk la xchʼun xchiʼuk xi chalilanbee: «¡Moʼoj! Yuʼun toj chopol mi jech ta jpase, li kajvale spatoj yoʼonton ta jtojolal xchiʼuk jaʼ yajnilot. Ti mi jchiʼin jbatik ta vayele, ta jta-o jmul ta stojolal li Diose».

Jun veltae, li yajnil Potifare la suj Jose sventa xchiʼinat ta vayel. Vaʼun, la snitbe skʼuʼ, pe li Josee lokʼ batel ta anil. Kʼalal kʼot ta sna li Potifare, xi albat yuʼun li yajnile: «Tskʼan ox tstsatsal tsakun li Josee». Kʼalal jech laj yaʼi li Potifare, ilin tajek, vaʼun la stikʼ ta chukel li Josee. Pe li Jeovae muʼyuk bu laj yikta li Josee.