Chpʼajat yuʼun sbankiltak li Josee

¡KʼELAVIL ti ta xat tajek yoʼonton xchiʼuk muʼyuk spatobil yoʼonton li kerem liʼe! Liʼe jaʼ José. Naka to la jyichʼ chonel yuʼun sbankiltak ta stojolal li viniketik liʼe, ti chbatik ta Egiptoe. Te chbat yakʼik ta mosovil ti Josee. ¿Kʼu yuʼun la spasik li kʼusi toj chopol li xchabankiltake? Yuʼun itʼix chaʼiik ti Josee.

Li totil Jacobe, skʼanoj tajek li Josee. La spasbe jlik natil alakʼ sba kʼuʼil, jech la jyakʼ ta ilel ti lek skʼanoje. Kʼalal li lajunvoʼ sbankiltak la jyakʼik venta ti kʼanbil tajek yuʼun Jacob li Josee, lik itʼixajuk yoʼontonik xchiʼuk lik spʼajik ti Josee. Pe taje maʼuk noʼox ta skoj ti la spʼajik ti Josee.

Ti Josee la jyil chib xvayich. Li ta xvayichtak ti Josee te la jyil ti tsnijan sba sbankiltak ta stojolale. Kʼalal la jyalbe sbankiltak li xvayichtak ti Josee mas to la jyichʼ-o pʼajel.

Jun kʼakʼal, jaʼo kʼalal tskʼelbeik xchij stotik li sbankiltak Josee, li Josee la jyichʼ takel batel yuʼun Jacob sventa chbat skʼel kʼu x-elan oyik li sbankiltake. Kʼalal li bankilaletik la jyilik ti te xtal li Josee, oy jayvoʼ xi la jyalike: ¡Jaʼ lek jmiltik!, xiik. Pe li bankilal yuʼunike, li Rubene, xi la jyale: ¡Moʼoj, mu xa pasik jech! Jech oxal, la stikʼik ochel ta taki poso ti Josee. Vaʼun chotiik sventa chchapik kʼusi chut li yitsʼinike.

Kʼalal yakal chchapike, jaʼo te xtal jayvoʼ j-ismaeletik. Ti Judae xi la jyalbe li xchaʼchiʼiltak ta vokʼele: Jchonbetik batel li j-ismaeletike. Jech oxal la xchonik batel. ¡Jtob ta sep sakil takʼin stojol la jyakʼik batel! ¡Taje toj chopol xchiʼuk maʼuk kʼanel maʼ taje!

¿Kʼusi chalbe stotik li bankilaletike? La smilik jkot tentsun, vaʼun li ta xchʼichʼele te lik stsʼajilanbeik li alakʼ sba skʼuʼ Josee. Ta tsʼakal ne la jyichʼbeik batel ti stotike, vaʼun xi kʼot yalike: La jtakutik liʼe. Kʼelavil, kʼelo mi mu jaʼuk skʼuʼ li Josee.

Ti Jacobe la jyakʼ venta ti jaʼe. Laj van ta tiʼel ta jkot teʼtikal chonbolom li Josee, xi la jyal ti Jacobe. Taje jaʼ li kʼusi tskʼan chakʼbeik snop li stotike. Ti Jacobe lik yat tajek yoʼonton. Ep kʼakʼal la jyokʼta ti Josee. Pe ti Josee muʼyuk bu chamem. Jkʼeltikik kʼusi kʼot ta stojolal ti bu la jyikʼik batele.