Li Jeovae muʼyuk xchʼay ta sjol li Josee

Kʼalal jaʼo tikʼil ta chukel li Josee, vaychinaj li faraon ti jaʼ ajvalil ta Ejiptoe. Pe muʼyuk buchʼu snabe smelolal li xvayiche. Xi kʼot albatuk yuʼun jun yajtunel li faraone: «Li Josee xuʼ x-al yuʼun smelolal li avayiche». Jaʼ yuʼun, li faraone anil xa laj yal mantal ti akʼo xbat yikʼik tal li Josee.

Li faraone xi la sjakʼbe li Josee: «¿Mi xuʼ xavalbun kʼusi smelolal li jvayiche?». Xi la stakʼ li Josee: «Chtal vukub jabil ti chlokʼ lek veʼlil ta Ejiptoe, pe mi echʼ li vukub jabile, chtal viʼnal vukub jabil xtok. Jaʼ yuʼun, saʼo junuk pʼijil vinik sventa stsob ep veʼlil sventa mu xcham ta viʼnal li krixchanoetike». Li faraone xi laj yalbe li Josee: «Voʼot ta jtʼujot sventa xatsob li veʼlile, voʼot chakʼot ta xchibal ajvalil li ta Ejiptoe». Pe ¿kʼu yuʼun xanaʼ ti snabe kʼusi smelolal xvayich faraon li Josee? Yuʼun koltaat yuʼun li Jeovae.

Vukub jabil la stsob veʼlil li Josee. Ta tsʼakale, tal viʼnal ta sjunul balumil jech kʼuchaʼal onoʼox laj yal Josee. Li krixchanoetike ta buyuk xa noʼox likik talel sventa xtal sman sveʼelik li ta Ejiptoe. Li stot Jose ti Jakob sbie laj yaʼi ti oy veʼlil ta Ejiptoe, jech oxal la stak batel lajunvoʼ skeremtak sventa xbat smanik tal sveʼelik.

Li sbankilal keremtak Jakobe bat skʼel li yitsʼinike, vaʼun li Josee ta anil noʼox laj yojtikinan li sbankiltake. Pe li stukike muʼyuk xojtikinik ta anil mi jaʼ li Josee xchiʼuk la skejan spatan sbaik ta lumtik ta stojolal. Taje jech onoʼox la xvaychinta ta skeremal li Josee xchiʼuk tskʼel yaʼi mi chpʼajat to yuʼun li sbankiltake, jaʼ yuʼun xi laj yalanbee: «¡Chaloʼlavanik! ¡Jaʼ tal akʼelik mi kʼun ta tsalel li jlumalkutike!». Xi la stakʼike: «¡Muʼyuk chiloʼlavankutik! Ta Kanaan likemunkutik talel xchiʼuk jchiʼil jbakutik ta vokʼel, oyunkutik 12. Pe chamem xa li june, li mas itsʼinale te kom xchiʼuk li jtotkutike». Xi takʼbatik yuʼun li Josee: «Bat ikʼik talel li avitsʼinike sventa jnaʼ ti muʼyuk chaloʼlavanike». Laje, sutik batel ta sna li stotike.

Kʼalal laj sveʼelik yan velta li Jakobe, la stak batel ta Ejipto li skeremtake. Pe laj yikʼik batel li yitsʼinik ti jaʼ li Benjamine. Sventa xakʼ ta preva xchiʼiltak ta vokʼel li Josee, la smukul tikʼbe ta xkoxtal Benjamin li skopa pasbil ta platae, vaʼun laj yal ti jaʼ laj yelkʼanik batele. Li yajtuneltak Josee te la stabeik ta xkoxtal Benjamin li kopae, vaʼun mu xa snaʼ kʼusi tspasik li xchiʼiltak ta vokʼel Josee. La skʼanbeik vokol Jose ti mu xakʼbe kastigo li Benjamine, ti jaʼ akʼo akʼbatikuk kastigo li stukike.

Jaʼ jech laj yakʼ venta Jose ti jelem xa stalelal li sbankiltake. Jaʼ yuʼun, mu xa stsʼik laj yaʼi, lik okʼuk xchiʼuk xi laj yale: «Voʼon Joseun, voʼon li avitsʼinikune, ¿mi kuxul to li jtotike?». Vaʼun, mu xa snaʼ kʼusi tspasik li xchiʼiltak ta vokʼele. Xi albatik yuʼun li Josee: «Mu chopoluk xavaʼiik li kʼusi la apasbeikune. Jaʼ la stakun talel Dios sventa mu xachamik ta viʼnal. Pe avokolikuk, bat ikʼbeikun talel ta anil li jtotike».

Li xchiʼiltak ta vokʼel Josee sutik batel ta sna stotik sventa xbat yalbeik li kʼusitik lek kʼot ta pasele xchiʼuk sventa xikʼik batel ta Ejipto. Jmoj xa oy xchiʼuk stot yan velta li Josee, yuʼun epal jabil muʼyuk xil sbaik.