Li Raabe la snakʼ li jpaʼivanejetike

Kʼalal ay skʼelik Jeriko li j-israeletike, te la snakʼ sbaik ta sna jun ants ti Raab sbie. Kʼalal laj yaʼi li ajvalil ta Jeriko ti te oy li chaʼvoʼ viniketik ta sna Raabe, la stak batel soltaroetik sventa xbat skʼelik mi te oyik. Pe li antse la snakʼ ta sjol sna li jpaʼivanejetike, vaʼun laj yalbe li soltaroetik ti chʼabal xa te oyike xchiʼuk ti akʼo xbat saʼik ta yan partee, ta tsʼakale xi laj yalbe jpaʼivanejetike li Raabe: «Ta jkoltaoxuk, yuʼun jnaʼoj ti xchiʼinojoxuk li Jeovae xchiʼuk ti yakʼojboxuk xa ta akʼobik li osil li’e. Avokolikuk, albeikun ta jamal ti kuxul chaviktaik li kutsʼ kalale».

Li viniketike xi laj yalbeik li Raabe: «Mi chajokʼan ta aventana li tsajal chʼojon li’e, jamal chkalbotkutik ti muʼyuk kʼusi chkʼot ta stojolalik li buchʼutik liʼ oy ta yut anae, vaʼun kuxul chkom li avutsʼ avalaltake».

Li Raabe laj yalbe li chaʼvoʼ viniketik ti akʼo xyalik ta jun chʼojon ta sventanail snae. Kʼalal skʼan to xkʼotik yoʼ bu oy Josue li jpaʼivanejetike, la snakʼ sbaik oxib kʼakʼal ta vitsetik. Ta tsʼakale, li j-israeletike la xtuchʼik jelavel li ukʼum Jordane xchiʼuk la xchapan sbaik sventa xuʼuninik li lum Jerikoe. Taje jaʼ to sba velta jech chuʼuninik jun lum. Li j-israeletike albatik yuʼun Jeova ti akʼo sjoyibtaik jun velta ta kʼakʼal li lum Jerikoe. Jech la spasik vakib kʼakʼal. Ta svukubal kʼakʼale, la sjoyobtaik vukub velta li lume. Ta tsʼakale, li paleetike lik sjupan yokʼesik, li soltaroetik ta Israele tsots lik avanikuk skotolik. Vaʼun, lik jinuk li smuroaltak Jerikoe, yan li sna Raab ti te oy ta xokon muroe muʼyuk xjin. Ta skoj ti la spat yoʼonton ta stojolal Jeova li Raabe, kʼuxul komik xchiʼuk li yutsʼ yalale.