Li Davide la spas tsots smul

Kʼalal chamem xa ox li Saule, jaʼ och ta ajvalil li David ti 30 xa ox sjabilale. Kʼalal echʼ xa ox jayibuk jabile, oy kʼusi kʼot ta pasel. Jun akʼobal kʼalal jaʼo te oy ta sjol sna li Davide, te laj yil batel jun alakʼ sba ants. Jaʼ yuʼun, lik sjakʼ kʼusi sbi li antse, vaʼun albat ti Bat-Seba sbie xchiʼuk ti nupunem xchiʼuk jun soltaro ti Urias sbie. Ta tsʼakale, li Davide la stak ta ikʼel li Bat-Sebae, kʼalal te xa ox oy li ta snae, la xchiʼin sbaik ta vayel, vaʼun la xchiʼin yol li Bat-Sebae. Li Davide muʼyuk laj yal ta anil li kʼusi la spase. Jaʼ yuʼun, laj yalbe li bankilal soltaro ti jaʼ akʼo yakʼik ta jbabe li Urias li ta paskʼope xchiʼuk ti akʼo xiktaik komel stuke. Kʼalal jech la spasike, te cham li Uriase, vaʼun li Davide nupun xchiʼuk li Bat-Sebae.

Li Jeovae laj yil skotol li kʼusitik chopol kʼot ta pasele. Pe ¿kʼusi van tspas li Jeovae? La stak batel li j-alkʼop Natan sventa xbat skʼopon li Davide. Vaʼun, li Natane xi kʼot yalbe li Davide: «Oy chib viniketik, li june jkʼulej, yuʼun oy ep xchij xchiʼuk xvakax. Yan li meʼon vinike jkot no’ox yuni me’ chij ti skʼanoj tajeke, pe li jkʼulej vinike bat spojbe tal». Kʼalal laj yaʼi li Davide, tsots ilin, vaʼun xi laj yalbe li Natane: «¡Skʼan xichʼ milel li jkʼulej vinike!». Pe li Natane xi la stakʼe: «¡Voʼot li vinik taje!». Vaʼun, li Davide laj yat tajek yoʼonton xchiʼuk xi laj yale: «Laj xa jta jmul ta stojolal li Jeovae». Ta skoj li mulil la spas Davide, la sta-o ep svokol xchiʼuk li yutsʼ yalale. Jaʼ yuʼun, li Jeovae laj yakʼbe stoj smul li Davide, pe ta skoj ti jamal laj yal li smule xchiʼuk ti bikʼit laj yakʼ sbae, akʼbat to jal xkuxlejal yuʼun li Jeovae.

Li Davide oy tajek ta yoʼonton spasbel stemplo li Jeovae. Pe li Jeovae jaʼ la stʼujbe li skerem David ti jaʼ li Salomon sventa jaʼuk smeltsan li temploe. Jaʼ yuʼun, li Davide lik xchapan li kʼusitik tstunes li Salomone, vaʼun xi laj yale: «Li stemplo Jeovae skʼan lek mukʼ xchiʼuk ti junuk yutsile. Pe li jnichʼon Salomone toj kerem to. Jaʼ yuʼun, ta jkolta xchapanel li kʼusitik chtune». Vaʼun, li Davide laj yakʼ epal takʼin, la saʼ j-abteletik ti lek xtojobike, la stsob epal plata, oro xchiʼuk epal sedro teʼ ti te yichʼojik tal ta Sidon xchiʼuk ta Tiroe. Kʼalal jutuk xa ox skʼan xcham li Davide, laj yakʼbe komel Salomon li svunal ti bu chal kʼu yelan chichʼ vaʼanel li temploe xchiʼuk xi laj yalbe li skereme: «Li Jeovae laj yalbun kʼu yelan skʼan pasel, jaʼ yuʼun la jtsʼiba xchiʼuk ti xkakʼbot li svunale. Jaʼ tskoltaot, jaʼ yuʼun tsotsan me xchiʼuk junuk me avoʼonton abtejan, mu me xaxiʼ».