Li yajsoltarotak Jeova ti xtiltun skʼakʼalike

Ep ta velta la stsak ta kʼop steklumal Israel li ajvalil ta Siria ti Ben-Adad sbie. Pe li j-alkʼop Eliseoe persa onoʼox baʼyel chalbe batel li ajvalil ta Israel sventa snakʼ sbae. Li ajvalil Ben-Adade la snop chchuk batel li Eliseoe. Vaʼun, kʼalal laj yaʼi ti te oy ta jteklum Dotan li Eliseoe, la stak batel yajsoltarotak sventa xbat xchukik talel.

Akʼobaltik xa ox kʼalal kʼotik ta Dotan li jsiriaetike. Kʼalal sakub osile, li yajtunel Eliseoe laj yil ti joyobtabil ta epal soltaroetik li jteklume. Solel xiʼ tajek, vaʼun xi tsots avane: «¡Eliseo!, ¿kʼusi me ta jpastik un?». Pe xi la stakʼ li Eliseoe: «¡Mu xaxiʼ!, yuʼun jaʼ mas ep li buchʼutik liʼ jchiʼuktike, jaʼ mu sta li stukike». Vaʼun, li Jeovae ta anil noʼox la sjambe sat li yajtunel Eliseoe, vaʼun laj yil epal kaʼetik li ta vitstike xchiʼuk karetaetik ti xtiltun skʼakʼale.

Kʼalal chbat xa ox tsakatuk yuʼun soltaroetik ta Siria li Eliseoe, la skʼanbe Jeova ti akʼo xkoltaate. Xi laj yalbee: «Avokoluk, makbo sat li soltaroetike». Jaʼ yuʼun, li Jeovae la xchʼaybe snopben li soltaroetike xchiʼuk mu xa snaʼ bu oyik. Ta tsʼakale, xi laj yalbe soltaroetik li Eliseoe: «Chʼayemoxuk chkil, yuʼun maʼuk liʼ li jteklum ti yakal chasaʼike. Batik, ta xkikʼoxuk batel bu oy li vinik ti yakal chasaʼike». Jaʼ yuʼun, li soltaroetike batik xchiʼuk li Eliseoe, kʼotik ta Samaria ti bu nakal li ajvalil ta Israele.

Tsʼakal to laj yakʼik venta ti bu oyike, pe mu xa kʼusi stakʼ spasik li soltaroetike. Jaʼ yuʼun, li ajvalile xi laj yalbe li Eliseoe: «¿Mi xuʼ jmilanan?». Yuʼun li jsiriaetike oy ox kʼusi chopol snopoj tspasbeik li Eliseoe. ¿Mi ta van spak skʼoplal li Eliseoe? Muʼyuk. Yuʼun kʼajomal xi la stakʼbe li ajvalil ta Israele: «Moʼoj, mu xamil, akʼbo noʼox sveʼelik, vaʼun akʼo batikuk». Jaʼ yuʼun, li ajvalil ta Israele la smeltsanbe lek sveʼel li jsiriaetike, vaʼun ta tsʼakale la stakan sutel ta snaik.