Nopajan ta stojolal Dios
«Liʼ oy li avole»
LI TA jkuxlejaltike stuk noʼox mas toj kʼux kʼalal chcham li alab-nichʼnabiletike. Akʼo mi jech, mu jnoptik ti mu xa kʼusi stakʼ pasele. ¿Kʼu yuʼun? Yuʼun li Vivliae chal ti Jeova Diose laj yakʼbe svuʼel junantik viniketik ta voʼne sventa xchaʼkuxesik krixchanoetik ti chamemik xaʼoxe. Li jun taje jaʼ li j-alkʼop Eliseoe. Jchantik batel 2 Reyes 4:8-37 xchiʼuk jkʼeltik kʼuyelan la xchaʼkuxes jun kerem.
Li loʼil taje te kʼot ta pasel ta jun lum ti Sunem sbie, ti bu oy jun nupultsʼakal ti nopem onoʼox xaʼi chakʼbeik svayeb xchiʼuk sveʼel li Eliseoe. Jun kʼakʼale, ta skoj ti tskʼan tstojbe ta vokol li slekil yoʼontone, li j-alkʼope xi laj yalbe li antse: «Ti jabil ta xtale, jech cʼu chaʼal liʼe, apetoj xa ox avol». Ta skoj ti mu snaʼ x-alaje, mu xa bu spatoj yoʼonton ti chil yole. Pe kʼot yorail ti jech kʼot ta pasel li kʼusi laj yal li Eliseoe. Pe ti xmuyubaj tajeke muʼyuk bu xjalij. Kʼalal echʼ xaʼox jayib jabile, kʼalal jaʼo te oy ta osiltik li kereme, lik yal ti tsots tajek ch-avan li sjole. Ta anil noʼox laj yikʼik sutel ta sna, pe li olole te petbil ta sjol yakan smeʼ icham (versikulo 16, 19 xchiʼuk 20). Chat tajek yoʼonton li antse, kʼun la xmochan komel li ta vayebal ti bu ep ta velta te chvayilan li j-alkʼope.
Li antse la sjakʼbe rason li smalale, vaʼun bat saʼ ta anil li Eliseoe. Te van 30 kilometro ixanav batel kʼalal to ta vits Carmelo ti bu oy li j-alkʼope. Labal sba, pe muʼyuk ti tsmil xa sba ta okʼel ikʼote. ¿Mi jaʼ van ta skoj ti yaʼioj ti oy toʼox jun j-alkʼop ti Elías sbi ti la xchaʼkuxesbe yol jun meʼonal antse? (1 Reyes 17:17-23.) ¿Mi xchʼunoj van ti xuʼ xchaʼkuxesbat skerem yuʼun li Eliseoe? Mu jnaʼtik. Pe kʼuk xiuk, muʼyuk isut batel jaʼ to ti la xchʼun yuʼun Eliseo ti xbat chiʼinatuke.
Kʼalal kʼotike, li j-alkʼope och ti bu skuarto onoʼoxe. «Te mochol ta vaybal [laj yil] li anima quereme.» (Versikulo 32.) Xvokolet lik skʼopon Jeova. La spatan sba ta yakʼol li animae, vaʼun kʼunkʼun «lic qʼuixnajuc sbecʼtal li quereme». ¡Jech lik abtejuk yoʼonton yan velta li olole! Ta melel, li antse xkoʼolaj ti chaʼkuxi to laj yaʼi sba ek kʼalal takat ta ikʼel xchiʼuk kʼalal xi albat yuʼun li Eliseoe: «Liʼ oy li avole» (versikulo 34 xchiʼuk 36).
Li loʼil liʼe xuʼ ep spatbe yoʼonton li buchʼutik chamem yol xnichʼonike. Lek xvinaj ti xaʼi Jeova ti kʼu xa noʼox xkʼuxul chaʼiik li totil-meʼiletike. Oy tajek ta yoʼonton tskʼan tskolta li buchʼu jech yiloj svokole (Job 14:14, 15). Maʼuk noʼox taje, yaloj ti ta xchaʼkuxes li epal miyon krixchanoetike. Ta melel, li loʼil la jkʼeltike —xchiʼuk li yantik ta jtatik ta Vivliae— jaʼ svinajeb li kʼusi tspas Dios ta achʼ Balumil ti yaloj onoʼoxe.a
Pe ta melel, li chaʼkuxesel albil skʼoplal ta Vivliae maʼuk tspajes ti kʼux chkaʼitik kalal oy buchʼu chcham kuʼuntike. Jun tukʼil yajtsʼaklom Cristo, ti cham li jun noʼox xnichʼone, xi laj yale: «Li at-oʼonton chkaʼie jaʼ to te chchʼay ta jyalel mi la jmey yan velta li jnichʼone». Manchuk mi jech, kʼalal ta jnoptik li spatobil oʼontonal ti chkiltik yan velta li kutsʼ kalaltik xchiʼuk li kamigotaktike xuʼ tspat tajek koʼontontik xchiʼuk ti xkuch kuʼuntik li xkʼuxule. ¿Mi xnop van kuʼuntik ti chkʼot yorail ti ta jpetik o ta jmeytik yan velta li kutsʼ kalaltike o li kamigotaktike? Ta melel toj lek ti xi jnopaj ta stojolal li Jeovae, ti jaʼ li buchʼu yakʼojbutik li kʼupil sba spatobil koʼontontike.
[Tsʼib ta yok vun]
a Cha tabe mas yaʼyejal ta sventa li chaʼkuxesele, te ta kapitulo 7 li ta livro ¿Kʼusi chchanubtasvan ta melel li Vivliae?, ti pasbil yuʼun yajrextikotak Jeovae.