Mu snaʼ xiʼ li Jeoiadae

Li Jesabele vokʼ jun stseb, Atalia laj yakʼbe sbi. Solel toj chopol tajek kʼuchaʼal li smeʼe. Vaʼun, li Ataliae nupun xchiʼuk li ajvalil ta Judae. Kʼalal cham li smalal Ataliae, jaʼ och ta ajvalil li skereme. Pe ta tsʼakale, cham li skerem eke, vaʼun jaʼ kom ta skʼob li ajvalilal ta Judae. Pe sventa mu buchʼu xpojbat li ajvalilale, tskʼan ox tsmil skotol li buchʼutik xuʼ x-ochik ta ajvalile. Pe maʼuk noʼox, yuʼun la smil xtok li smomtake. Jaʼ yuʼun, xiʼtabil yuʼun skotol li krixchanoetike.

Li bankilal pale Jeoiada xchiʼuk li yajnil ti jaʼ li Jeosabeate, snaʼojik ti chopol li kʼusi tspas Ataliae. Jaʼ yuʼun, li Jeoiada xchiʼuk yajnile laj yakʼ ta vokol xkuxlejalik sventa snakʼik li kʼox Jeoas ti jaʼ smom li Ataliae. Tey laj yichʼ tsʼitesel ta templo.

Kʼalal vukub xa ox sjabilal li Jeoase, li Jeoiadae la stsob skotol li bankilal jchabivanejetik xchiʼuk li jlevietike, xi laj yalanbee: «Chabiik li stiʼ temploe, mu xavakʼik akʼo x-ochik tal li krixchanoetike». Ta tsʼakale, li Jeoiadae la stikʼ ta ajvalil ta Juda li Jeoase. Vaʼun, li krixchanoetik ta Judae xi tsots avanike: «¡Jaluk xkuxi li ajvalile!».

Kʼalal laj yaʼi li meʼ ajvalil Atalia ti te x-avlajetik ta templo li krixchanoetike, bat skʼel ta anil. Kʼalal laj yaʼi ti jaʼ och ta ajvalil li Jeoase, xi tsots avan li Ataliae: «¡J-akʼvanejetik ta kʼabal! ¡J-akʼvanejetik ta kʼabal!». Vaʼun, li bankilal jchabivanejetike la stsakik li chopol meʼ ajvalile xchiʼuk la smilik, yuʼun muʼyuk lek laj yakʼ ta ilel stalelal ta stojolal li jteklume. Pe ¿kʼusi van chkʼot ta pasel un?

Li Jeoiadae la skolta li jteklum sventa spasik jun trato xchiʼuk li Jeovae. Kʼalal jech la spasike, jaʼ te laj yalbeik Jeova ti jaʼ noʼox stuk chichʼik ta mukʼe. Li Jeoiadae laj yal mantal ti akʼo slilinik li stemplo Baale xchiʼuk ti slilinik li jecheʼ diosetike. Jech xtok, la svaʼanan paleetik xchiʼuk jlevietik sventa x-abtejik li ta stemplo Jeovae. Taje, jaʼ sventa teuk xlik yichʼik ta mukʼ Jeova yan velta li krixchanoetike. La stʼuj xtok krixchanoetik sventa xchabiik li stiʼ templo sventa mu x-och junuk chopol krixchanoe. Vaʼun, li Jeoiada xchiʼuk li bankilal jchabivanejetike laj yikʼik batel ta pasob mantal li Jeoas sventa xchoti li ta xchotleb ajvalile. Ta skoj ti cham xa li chopol meʼ ajvalil Ataliae xchiʼuk ti laj skʼoplal li yichʼel ta mukʼ jecheʼ dios Baale, li krixchanoetik ta Judae solel muyubajik tajek. Chʼabal xa kʼusi chmakatik-o sventa xichʼik ta mukʼ li Jeovae. ¿Mi tsots yoʼonton xanaʼ li Jeoiadae? ¿Mi laj avakʼ venta kʼuxi la stabeik sbalil li krixchanoetike?