Take batel ta cholmantal li Jeremiase

Li Jeovae la stʼuj Jeremias sventa xkʼot ta j-alkʼop li ta jteklum Judae. Vaʼun, albat yuʼun Jeova ti akʼo xcholbe mantal li krixchanoetik sventa xalbe ti akʼo skomtsanik li kʼusitik chopol nopem xaʼiik spasele. Pe xi la stakʼ li Jeremiase: «Toj keremun to, mu to jnaʼ xiloʼilaj ta yeloval li krixchanoetike». Vaʼun, li Jeovae xi jamal laj yalbe li Jeremiase: «Mu xaxiʼ, yuʼun voʼon ta jkoltaot xchiʼuk voʼon ta xkalbot li kʼusi chaval ta cholmantale».

Li Jeremiase albat yuʼun Jeova ti akʼo stsob li bankilaletik ta jteklume xchiʼuk ti akʼo svokʼ jpʼejuk pʼin ta yeloval li bankilaletike xchiʼuk ti xiuk xalanbee: «Jaʼ jech chkʼot ta stojolal li Jerusalene». Kʼalal jech la spas li Jeremiase, ilinik tajek li bankilaletik ta jteklume. Oy jun pale ti Pasjur sbie la smaj li Jeremiase xchiʼuk la slatsʼbe yok skʼob ta jun latsʼobteʼ, ta skoj taje muʼyuk xbakʼ sjunul akʼobal. Vaʼun, li Pasjure jaʼ to ta sob yokʼomal la skolta ta latsʼobteʼ li Jeremiase. Kʼalal laj xa ox yichʼ koltael li Jeremiase, xi laj yale: «Mu xa xuʼ kuʼun chkaʼi, jaʼ lek muʼyuk xa ta jchol-o mantal». Pe ¿mi laj onoʼox yikta li cholmantale? Muʼyuk. Yuʼun la snop lek xchiʼuk xi laj yale: «Li smantal Jeovae xkoʼolaj kʼuchaʼal kʼokʼ ti xtiltun ta koʼontone, jaʼ yuʼun mu xuʼ xkikta li cholmantale». Jech oxal, li Jeremiase la xcholbe-o batel mantal li krixchanoetike.

Kʼalal echʼ xa ox jayibuk jabile, och jun achʼ ajvalil li ta Judae. Li paleetik xchiʼuk li jecheʼ j-alkʼopetike chopol chaʼiik li mantal chchol batel Jeremiase. Jaʼ yuʼun, xi laj yalbeik li buchʼu tsots yabtelik ta jteklume: «Li vinik liʼe skʼan xichʼ milel». Pe xi la stakʼ li Jeremiase: «Muʼyuk jmul ti chakʼan chamilikune, yuʼun jaʼ tal kal li kʼusi yalojbun Jeovae, maʼuk li kʼusi tskʼan koʼontone». Kʼalal laj yaʼiik li kʼusi laj yal Jeremias li buchʼutik tsots yabtelike, xi laj yalike: «Li vinik liʼe mu sta-o ti xichʼ milele».

Li Jeremiase muʼyuk xkechan li cholmantale, jaʼ yuʼun ilinik tajek li buchʼutik tsots yabtelik ta jteklume, vaʼun laj yalbeik ajvalil ti akʼo xichʼ milel li Jeremiase. Jech oxal, li ajvalile laj yal mantal ti akʼo spasik li kʼusi xal yoʼontonike. Jaʼ yuʼun, la stsakik li Jeremiase xchiʼuk ay sjipik ta jun poso ti noj ta achʼel sventa teuk xchame, jech ta kʼunkʼun lik mukuk yalel li ta achʼele.

Vaʼun, li Ebed-Melek ti tsots yabtel yichʼoj li ta pasob mantale xi kʼot yalbe li ajvalile: «Li bankilaletike laj xa sjipik ochel ta jun poso li Jeremiase, ta xcham mi tey chkiktatike». Jaʼ yuʼun, li ajvalile laj yalbe Ebed-Melek ti akʼo yikʼ batel 30 viniketik sventa xbat slokʼesik tal ta poso li Jeremiase. Li j-alkʼop Jeremiase muʼyuk kʼusi pajtsanat-o ta xcholel li mantale. ¿Mi chakʼan ti jaʼuk jechot kʼuchaʼal li Jeremiase?