Jun vinik ti mu snaʼ xiʼe

KʼELAVIL li krixchanoetik ti yakal ta stseʼintaik li kerem liʼe. ¿Mi xa naʼ buchʼu? Jaʼ Jeremías, jun yajchʼul alkʼop Dios ti lek ojtikinbile.

Mu toʼox sjaliluk ti kʼalal lik slilin santoetik ta jteklum li ajvalil Josiase, li Jeremiase albat yuʼun Jeova ti akʼo kʼotuk ta Yajchʼul alkʼope. Pe, li Jeremiase toj kerem to ta xaʼi sba sventa chkʼot ta jchʼul alkʼop. Pe albat yuʼun Jeova ti ta xkoltaate.

Li Jeremiase la jyalbe j-israeletik ti akʼo yiktaik spasel li kʼusitik chopole. Li diosetik ta smuyubtaik li jyan lum krixchanoetike jaʼ jecheʼ diosetik, xi. Pe ep j-israeletik jaʼ ta skʼan ta smuyubtaik li santoetike, maʼuk ta smuyubtaik li melel Dios Jeovae. Kʼalaluk ta xal Jeremías ti ta x-akʼbat stoj smulik yuʼun Dios ta skoj ti xchoplejalike, li krixchanoetike chlik stseʼintaik li Jeremiase.

Echʼ jabiletik. Li Josiase cham, ta oxib u mas tsʼakal jaʼ och ta ajvalil li xnichʼone, li Joaquime (Joacim). Li Jeremiase mu xikta ta yalbel jteklum li aʼyej liʼe: Mi mu xa jel atalelalike, li Jerusalene ta xlaj. Li paleetike la stsakik li Jeremiase, vaʼun xi avanike: Skʼan xa cham ta skoj li kʼusitik cha vale. Ta mas tsʼakal xi la jyalbeik li bankilaletike: Skʼan xcham li Jeremiase yuʼun chopol kʼopojem ta stojolal li jlumaltike, xiik.

¿Kʼusi van tspas ti Jeremiase? ¡Li stuke muʼyuk bu ta xiʼ! Xi la jyalbe skotol li krixchanoetike: Jaʼ Jeova li buchʼu la stakun tal sventa cha kalboxuk liʼe. Mi mu xa jel li achopol kuxlejalike, li Jeovae ta xakʼ lajuk li Jerusalene. Pe xuʼ cha naʼik ta melel: Mi la amilikune, jaʼ me cha milik jun vinik ti muʼyuk kʼusi chopol spasoje.

Li bankilaletike muʼyuk la smilik li Jeremiase, pe li j-israeletike muʼyuk la jyiktaik spasel li kʼusitik chopole. Ta mas tsʼakal tal Nabucodonosor, li ajvalil ta Babiloniae, tal spas leto ta skontra Jerusalén. Vaʼun, li Nabucodonosore la stsak ta smosovtak li j-israeletike. Ta smilaltak noʼox la jyikʼ batel ta Babilonia. ¡Nopo noʼox avaʼi kʼux-elan ti jech xa yikʼoxuk batel krixchanoetik ti mu xa vojtikine, xchiʼuk ti xa yakʼoxuk ta jun lum ti mu xa vojtikine!