Laj yichʼ lajesel li Jerusalene

Ep ta velta laj yiktaik yichʼel ta mukʼ Jeova li judaetike, yuʼun jaʼ lik yichʼik ta mukʼ li jecheʼ diosetike. Kʼalal jaʼo jech kʼot ta pasel taje, li Jeovae la stak batel yaj-alkʼoptak sventa skolta li steklumale. Pe li krixchanoetike muʼyuk la stsakik ta mukʼ li j-alkʼopetike, yuʼun jaʼ noʼox lik slabanik. Li kʼusi oy ta yoʼonton Jeovae jaʼ ti slajesbe skʼoplal li yichʼel ta mukʼ jecheʼ diosetik ta Judae. Pe ¿kʼuxi van tspas?

Li ajvalil ta Babilonia ti jaʼ li Nabukodonosore yakal tstsal komel epal jteklumetik. Kʼalal la stsal ta baʼyel velta li Jerusalene, la xchuk batel ta Babilonia li ajvalil Joakine, li buchʼutik tsots yabtelike, li buchʼutik lek xtojobik ta paskʼope xchiʼuk li j-abteletik ti lek chanemik ta spasel abtelaletike. Jech xtok, li Nabukodonosore laj yichʼ batel li kʼusitik ep sbalil ti oy ta stemplo Jeovae. Ta tsʼakale, laj yal ti jaʼuk x-och ta ajvalil ta Juda li Sedekiase.

Laj toʼox xchʼunbe smantal Nabukodonosor li Sedekiase. Pe li jecheʼ j-alkʼopetik xchiʼuk li krixchanoetik ti nopol nakalik ta Judae laj yalbeik Sedekias ti akʼo stoy sba ta stojolal li jbabiloniaetike. Pe li Jeremiase xi jamal laj yalbe li Sedekiase: «Mi chatoy abae, ep me buchʼu xuʼ xcham, chtal me tsots viʼnal xchiʼuk chameletik li ta Judae».

Kʼalal echʼ vaxakib jabil yochel ta ajvalil li Sedekiase, la stoy sba ta stojolal li ajvalil ta Babiloniae xchiʼuk jaʼ la skʼanbe koltael li soltaroetik ta Ejiptoe. Jaʼ yuʼun, li Nabukodonosore la stak batel yajsoltarotak sventa xbat stsakik ta kʼop li Jerusalene, vaʼun kʼot setuik sjunul li Jerusalene. Li Jeremiase xi laj yalbe li Sedekiase: «Mi chavakʼ aba ta stojolal li jbabiloniaetike, kuxul chakom xchiʼuk kuxul chkom li krixchanoetik ta jteklume. Yan mi muʼyuke, ta xchikʼik li Jerusalene xchiʼuk ta xchukikot batel». Pe xi la stakʼ li Sedekiase: «¡Muʼyuk ta xkakʼ jba ta stojolal!».

Kʼalal echʼ xa ox jun jabil xchiʼuk oʼlole, li jbabiloniaetike la sjinesik jot smuroal li Jerusalene, vaʼun ochik batel xchiʼuk la xchikʼik li jteklume, la xchikʼik li temploe xchiʼuk la smilik epal krixchanoetik. Jech xtok, ep buchʼutik ikʼbil batik ta mosoil.

Akʼo mi jatav lokʼel ta Jerusalen li Sedekiase, laj yichʼ nutsel batel yuʼun li jbabiloniaetike, vaʼun te xa nopol laj yichʼ tael ta Jeriko xchiʼuk ikʼat batel ta stojolal li ajvalil Nabukodonosore. Vaʼun, li ajvalile laj yal mantal ti akʼo teuk skʼeloj Sedekias kʼalal chmilbat li xnichʼnabtake. Ta tsʼakale, pitsbat sbekʼ sat xchiʼuk laj yichʼ tikʼel ta chukel. Vaʼun, te cham ta yut chukinab. Li Jeovae xi laj yal ta sventa li jteklum Judae: «Mi echʼ 70 jabile, ta xkikʼoxuk sutel tal li ta Jerusalene».

¿Kʼusi van chkʼot ta stojolalik li kerem tsebetik ti chukbilik batel ta Babiloniae? ¿Mi tukʼ-o van chakʼ sbaik ta stojolal li Jeovae?