Li Jesuse laj yichʼ akʼel ta preva yuʼun li Satanase

Kʼalal laj xa ox yichʼ voʼ li Jesuse, laj yichʼ ikʼel batel yuʼun chʼul espiritu li ta takixokol balumile. Muʼyuk bu xveʼ 40 kʼakʼal, jaʼ yuʼun solel chviʼnaj tajek. Vaʼun, te tal akʼatuk ta preva yuʼun li Satanase, xi albate: «Mi ta melel voʼot Xnichʼonot Diose, albo ti akʼo kʼatajuk ta pan li tonetik liʼe». Li Jesuse jaʼ jech la stakʼ kʼuchaʼal tsʼibabil ta Vivliae, yuʼun xi la stakʼe: «Xi tsʼibabile: ‹Maʼuk noʼox ta pan kuxul li krixchanoetike, yuʼun skʼan xchikintaik skotol li kʼusi chal Diose›».

Vaʼun, li Satanase laj yakʼ ta preva yan velta li Jesuse, xi laj yalbee: «Mi ta melel voʼot Xnichʼonot li Diose, jipo aba yalel li ta temploe, yuʼun xi tsʼibabile: ‹Ta stak talel yaj-anjeltak ta atojolal sventa mu kʼusi xanuptane›». Pe xi la stakʼ yan velta li Jesuse: «Xi tsʼibabil xtoke: ‹Mu stakʼ xavakʼ ta preva li Dios avuʼune›».

Ta slajebe, li Satanase laj yakʼbe yil skotol li mukʼtik lumetik ta balumile xchiʼuk li skʼulejalike, vaʼun xi laj yalbee: «Mi chavichʼun ta mukʼ junuk veltae, chkakʼ aventain skotol liʼe xchiʼuk chkakʼbot li yutsilalike». Pe xi laj yal li Jesuse: «¡Batan Satanas!, yuʼun xi tsʼibabile: ‹Jaʼ noʼox skʼan xavichʼ ta mukʼ li Jeova Dios avuʼune›».

Kʼalal akʼvan xa ox ta preva li Satanase, lokʼ batel. Vaʼun, tal anjeletik sventa xakʼbeik sveʼel li Jesuse. Ta tsʼakale, lik xcholbe skʼoplal Ajvalilal yuʼun Dios li Jesuse. Taje, jaʼ li abtelal akʼbat spas yuʼun Jeovae. Jech xtok, li krixchanoetike toj lek chaʼiik li kʼusi chakʼ ta chanel li Jesuse, yuʼun tstsʼakliik batel ti bu chbate.