«Contrainic li [pukuj]» kʼuchaʼal la spas Jesuse
«Contrainic li pucuje, jech chjatov loqʼuel ta atojolic.» (SANT. 4:7.)
1. ¿Kʼusi tsnuptan ta Balumil li Jesuse, xchiʼuk kʼusi kʼot ta pasel ta skoj?
LI JESUCRISTOE snaʼoj onoʼox ti chkontrainat yuʼun Diablo kʼalal mi tal ta Balumile. Snaʼoj lek kʼusi albat yuʼun Dios li kiletel chon ta Edene, ti jaʼ albat xkaltik ek li jtoyba Satanase, ti jaʼ itunesvan sventa xkʼopoj li kiletel chone: «Ta jpas ta atojolic ti contra xavil abaic xchiʼuc ti antse [jaʼ xkaltik, jaʼ li jvokʼ s-organisasion ta vinajel li Jeovae]. Jaʼ noʼox jech xtoc ti anitilultaque xchiʼuc snitilultac ti antse, contra ta xil sbaic. Ti snitilul ti antse [ti jaʼ Jesucristoe] ta xpechʼbot ta teqʼuel ti ajole. Ti voʼote jaʼ noʼox ta xatabe ta tiʼbel ti snucʼ [o xchak] yacane» (Gén. 3:14, 15, Ch; Apo. 12:9). Li Jesuse laj yichʼ tibel xchak yakan liʼ ta Balumil kʼalal laj yichʼ milele. Pe muʼyuk jal li vokol laj yichʼe yuʼun chaʼkuxesat yuʼun Jeova sventa chichʼ li slekilal ta vinajele. Pe jaʼuk li kiletel chone tsots ta xichʼ pechʼbel ta tekʼel sjol ti jaʼ chcham-o ta j-echʼele (kʼelo Hechos 2:31, 32 xchiʼuk Hebreos 2:14).
2. ¿Kʼu yuʼun spatoj lek yoʼonton Jeova ta stojolal Jesús ti chkuch yuʼun li prevaetik ch-akʼbat yuʼun Satanase?
2 Li Jeovae spatoj lek yoʼonton ta stojolal Jesús ti tstsʼik yuʼun skotol li ilbajinel ch-akʼbat yuʼun Diablo kʼalal mi tal ta Balumile xchiʼuk ti tspas li yabtele. ¿Kʼu yuʼun ti spatoj lek yoʼontone? Yuʼun voʼne xa onoʼox spasoj li Jesuse xchiʼuk xojtikin lek. Snaʼoj ti «pʼijil j-abtel [NM]» yuʼune, ti «jaʼ li jun noʼox Xnichʼon ti te onoʼox oy cʼalal muʼyuc toʼox cʼusitic oye», ta xchʼun mantal xchiʼuk tukʼ chakʼ sba (Pro. 8:22-31; Col. 1:15). Jaʼ yuʼun, li Diose snaʼoj lek ti chkuch yuʼun kʼalal to ta slajebal xkuxlejal li jun noʼox xNichʼon kʼalal mi la stak tal ta Balumile xchiʼuk laj yakʼ ti akʼo spase ta preva yuʼun Satanase (Juan 3:16).
Chchabi yajtuneltak li Jeovae
3. ¿Kʼu yelan ch-ilatik yuʼun Diablo li yajtuneltak Jeovae?
3 Li Jesuse laj yal ti jaʼ «jpasmantal liʼ ta [balumil]» li Diabloe xchiʼuk la spʼijubtas yajtsʼaklomtak ti ta xichʼik ilbajinel kʼuchaʼal laj yichʼ ilbajinel stuke (Juan 12:31; 15:20). Li balumil ti pasbil ta mantal yuʼun Satanase, spʼajoj li melel yajtsʼaklomtak Cristo ta skoj ti chtunik ta stojolal Jeovae xchiʼuk ti chcholbeik skʼoplal li tukʼilale (Mat. 24:9; 1 Juan 5:19). Li buchʼutik yakʼojbe lek satilal li Diabloe jaʼik li buchʼutik tʼujbilik ti liʼik to ta balumile, ti ch-ajvalilajik xchiʼuk Cristo ta vinajele. Pe yakʼojbe lek satilal xtok li smiyonal xa noʼox yajrextikotak Jeova ti smalaoj chkuxiik sbatel osil liʼ ta nichimal Balumile. Xi chpʼijubtasvan li sKʼop Diose: «Li avajcontraique, jaʼ li pucuje, [...] xjoyet noʼox jech chac cʼu chaʼal león ti xʼavet noʼox ta saʼel li bochʼo tscʼan tstiʼe» (1 Ped. 5:8).
4. ¿Kʼusi chakʼ kiltik ti kuchem yuʼun steklumal Jeova li ilbajineletik chakʼ Satanase?
4 Li organisasion bu oyutike chabibil yuʼun Jeova, jech oxal kuchem yuʼun li ilbajinel chakʼ Diabloe. Jnoptik ta sventa liʼe. Li echʼem tal sien jabile, jlom li jpas mantaletik ti toj echʼ xa noʼox chopolike laj yakʼbeik yipal ta stupʼel jkʼoplaltik. Pe mi jaʼuk bu kʼotem ta pasel yuʼunik, yuʼun li avie oyutik xa jutuk mu vukubuk miyon yajrextikotak Jeova ti oy mas ta sien mil tsobobbailetik ta spʼejel Balumile. Pe ¿kʼusi kʼotem ta pasel ta stojolal li jpas mantaletik ti tslajesik ox jkʼoplaltike? Jaʼ stukik ti tupʼem skʼoplalike.
5. ¿Kʼuxi kʼotem ta pasel avi li kʼusi chal Isaías 54:17?
5 Kʼalal la skʼopon slumal Israel li Jeova ti xkoʼolaj kʼuchaʼal yajnile, xi laj yalbee: «Muʼyuc spasojic jchopuc abtejebal ti xuʼ chayulesot oe. Voʼot chamacbe yeic li bochʼotic tstiqʼuic amule. Jaʼ jech smoton chcacʼbeic li bochʼotic chtunic cuʼune; vuʼun jtuc chcacʼ tal li coltael ta stojolique» (Isa. 54:11, 17). Li ta «slajebal cʼacʼale», li steklumal Diose yilojik ti kʼotem ta pasel li kʼusi albil taje (2 Tim. 3:1-5, 13). Xchiʼuk ta me xkuch-o echʼel kuʼuntik li ilbajinel chakʼ Diabloe, yuʼun jpatoj lek koʼontontik ti te xchiʼukutik li Jeovae xchiʼuk ti muʼyuk bu chakʼ kʼotuk ta pasel li kʼusi snopoj tspas Satanás sventa tslajesutike (Sal. 118:6, 7).
6. ¿Kʼusi chal slivroal Daniel ti kʼusi chkʼot ta pasel ta stojolal li kʼusitik sventainoj Satanase?
6 Poʼot xa me xvul slajeb li kʼusitik chopol liʼe xchiʼuk chichʼ lajesel skotol li kʼusitik sventainoj Satanase. Xi akʼbat snaʼ yuʼun Dios li j-alkʼop Daniele: «Cʼalal jaʼo ochemic ta ajvalilal li ajvaliletic leʼe [li ajvaliletik avie], li Dios te oy ta vinajele ta sliques jun ajvalil [ta vinajel]; muʼyuc bochʼo xuʼ chtuchʼbat yabtel, mu junuc lum chtal tsalatuc yuʼun. Jaʼ ta stsal, jaʼ ta slajesbe scʼoplal scotol li yantic ajvaliletique; yan li stuque jʼechʼel te chcom o sbatel osil» (Dan. 2:44). Kʼalal mi kʼot ta pasel li albil kʼop liʼe, li balumile maʼuk xa me chventaine yuʼun Satanás mi jaʼuk li jpas mulil krixchanoetike. Ta me xchʼay sbatel osil li kʼusitik yuʼuntak Diabloe, vaʼun jaʼ me tsventain spʼejel Balumil li Ajvalilal yuʼun Diose (kʼelo 2 Pedro 3:7, 13).
7. ¿Kʼuxi jnaʼojtik ti xuʼ stsal kuʼuntik li Diabloe?
7 Jnaʼojtik lek ta melel ti muʼyuk chlaj li s-organisasion Jeova kʼalal mi laj yichʼ lajesel li kʼusitike xchiʼuk ta me x-akʼbat-o bendision yuʼun Dios (kʼelo Salmo 125:1, 2). Pe ¿kʼusi xuʼ xkaltik ta sventa li jujuntal yajtuneltak Jeovae? Li Vivliae chal ti tstsal kuʼuntik li Diablo jech kʼuchaʼal la spas Jesuse. Jech onoʼox kʼuchaʼal albat yuʼun Jesús li jtakbol Juane, kuxul chkomik epal krixchanoetik ti spatoj yoʼonton chkuxiik ta Balumil kʼalal mi laj yichʼ lajesel li kʼusitik liʼe, akʼo mi chichʼik ilbajinel yuʼun li Satanase. Xi ta xalike: «Ti pojel colel laj jtatique, jaʼ ta sventa ti Dios cuʼuntique, jaʼ ti Buchʼu chotol ta mucʼ ta chotlebale, xchiʼuc ti jcot ta Uni Chije» (Apo. 7:9-14, Ch). Li Vivliae chal kaʼitik ti tstsalik Satanás li tʼujbil jchʼunolajeletik xchiʼuk li yan chijetike (Juan 10:16; Apo. 12:10, 11). Melel onoʼox chaʼa, sventa stsal yuʼunike skʼan tsots xakʼ yipalik xchiʼuk skʼanbeik Dios ti akʼo xkoltaatik lokʼel ta skʼob Diabloe (Mat. 6:13).
Li Jesús ti jaʼ ta jchanbetik stalelale, tsal yuʼun li Diabloe
8. ¿Kʼusi ti baʼyuk la spas Diablo sventa chpasvan ta prevae, xchiʼuk kʼusi la spas li Cristoe?
8 Li xNichʼon Diose toj lek ta chanbel stalelal ti kʼuxi kuch yuʼun li ilbajinel yuʼun Diablo ti tsokesbat ox yaʼi stukʼil yoʼontone. Kʼalal jaʼo te oy ta taki xokol balumil li Jesuse, pase ta preva jayibuk velta yuʼun Satanás sventa mu xchʼunbe smantal li Jeovae. Li kʼusi baʼyuk la spase, jaʼ ti lek xa laj yil ti chlaj ta viʼnal li Jesús ta skoj ti oy xaʼox ta 40 kʼakʼal xchiʼuk 40 akʼobal muʼyuk veʼeme. Xi laj yalbee: «Me voʼot Xnichʼonot Diose, albo li tonetic liʼi, acʼo cʼatajuc ta vaj», xut. Pe li Jesuse muʼyuk la stunes li sjuʼel akʼbil yuʼun Dios sventa stabe sbalil stuke, jaʼ yuʼun xi la stakʼe: «Jech tsʼibabil ta scʼop Dios: “Muc ta vajuc noʼox ta xcuxi li cristianoe. Jaʼ ta xcuxi ta sventa scotol li scʼop chlocʼ ta ye Diose”», xi (Mat. 4:1-4; Deu. 8:3).
9. ¿Kʼu yuʼun skʼan xkuch kuʼuntik li ilbajineletik chakʼ Diablo ti jaʼ lek xa chil li kʼusitik stalel onoʼox ta jkʼantike?
9 Li avi kʼakʼale, li Diabloe lek xa chil li kʼusitik stalel onoʼox oy ta yoʼonton li yajtuneltak Jeovae. Jech kʼuchaʼal liʼe, tstunes li kʼusitik ta sventa lutsʼbail ti pʼolem tajek avi kʼakʼale. Jaʼ yuʼun chaʼa, tsots me skʼoplal ti xkakʼtik persa ti mu xi jtsʼuj li ta petsʼetik sventa mulivajele. Xi jamal chalbutik li sKʼop Dios ta sventa taje: «¿Me mu xanaʼic ti mu xuʼ ch-och yoʼ bu chventainvan Dios li bochʼotic chopol cʼusitic tspasique? Mu me xaloʼla abaic. Yuʼun mu xuʼ ch-ochic yoʼ bu chventainvan Dios li bochʼotic chmulivajique, li bochʼotic chichʼic ta mucʼ cʼusi cuybilic ta diose, li bochʼotic ta xmulivajic ta xchiʼil noʼox sbaic ta antsil xchiʼuc ta xchiʼil noʼox sbaic ta vinicale» (1 Cor. 6:9, 10). Jamal ta aʼiel chaʼa, li buchʼutik jaʼ yakʼoj ta xkuxlejalik li mulivajele xchiʼuk ti mu skʼan sjel stalelalike muʼyuk me yavilik li ta achʼ Balumil yuʼun Diose.
10. ¿Kʼusi yan la spas Satanás sventa tsokesbe yaʼi stukʼil yoʼonton Jesús jech kʼuchaʼal chal Mateo 4:5, 6?
10 Li Vivlia chalbe skʼoplal yan preva ti akʼbat yuʼun Satanás li Jesús te ta taki xokol balumile: «Li pucuje laj yicʼ batel ta chʼul lum li Jesuse; te cʼot svaʼan ta mero sjol chʼulna. Jech laj yalbe: “Me voʼot Xnichʼonot Diose, jipo aba yalel liʼi. Yuʼun jech tsʼibabil ta scʼop Dios: «Jaʼ ta stacbot tal yajʼalmantaltac, jaʼ chaxchabiot. Jaʼ chastsaquicot batel ta scʼobic, yuʼun jech mu xabosi avacan ta ton»”» (Mat. 4:5, 6). Ta alele, ti lajuk la spas li kʼusi laj yal Satanás li Jesuse toj labal sba laj yakʼ ta ilel jechuk ti jaʼ li albil Mesiase. Pe mu lekuk ti jechuk la spase xchiʼuk chakʼ ta ilel ti tstoy sba li Jesuse xchiʼuk muʼyuk me lek laj yil Dios ti jechuke. Pe li Jesuse tukʼ yoʼonton laj yakʼ ta ilel ta stojolal Jeova yan velta xtok, yuʼun xi laj yal li kʼusi chal Vivliae: «Jech tsʼibabil ta scʼop Dios noxtoc: “Mu me xaqʼuelbe yoʼnton li Cajvaltique, jaʼ li Dios avuʼune”» (Mat. 4:7; Deu. 6:16).
11. ¿Kʼuxi xuʼ tspasutik ta preva li Satanase, xchiʼuk kʼusi xuʼ xkʼot ta pasel mi li jtsʼuje?
11 Li avi eke, li Satanase xuʼ stij koʼontontik ta spasel ta preva li Jeovae. ¿Kʼuxi? Xuʼ van stij koʼontontik ti akʼo jkʼantik ti lekuk xilutik li balumile. Xuʼ van stij koʼontontik ta xchanel li stalelal balumil ta sventa ti kʼuyelan ta jlap jkʼuʼ jpokʼtike, ti kʼuyelan ta jmeltsan jbatike o ti ta jchʼay koʼontontik ta kʼusitik ti mu masuk leke. Pe mi la jnop muʼyuk ta jchʼuntik li tojobtaseletik ta Vivliae xchiʼuk ti ta jchanbetik stalelal li balumile, ¿mi xuʼ to van jpat koʼontontik ti chkichʼtik koltael ta jvokoltik ta skoj ti jech la jpastike? ¿Mi mu jechuk ti muʼyuk ta jpat koʼontontik tskoltautik Jeova ta stojolal li yaj-anjeltake? Akʼo mi la sutes yoʼonton li ajvalil David ta skoj ti mulivaj xchiʼuk Betsabee (Bat-seba), li Jeovae muʼyuk bu la slokʼesbe li kʼusitik chopol la snuptan ta skoj smule (2 Sam. 12:9-12). Jaʼ yuʼun chaʼa, mu me xkamigointik li balumil sventa mu xkakʼtik ta preva li Jeovae (kʼelo Santiago 4:4 xchiʼuk 1 Juan 2:15-17).
12. ¿Kʼusi prevail chal li Mateo 4:8, 9, xchiʼuk kʼusi la spas li xNichʼon Diose?
12 Li ta yoxibal veltae, li Satanase laj yalbe Jesús ti tsvaʼan ta ajvalile. Laj yakʼbe yil skotol li ajvalilal ta balumile xchiʼuk li yutsilaltake, vaʼun xi laj yalbee: «Scotol leʼe, voʼot chacacʼbot scotol me chaquejan aba ta jtojole, me chavichʼun ta muqʼue», xi (Mat. 4:8, 9). Liʼe chakʼ kiltik ti muʼyuk xkʼexlal tskʼan ichʼel ta mukʼ li Diabloe ti jaʼ noʼox sta-o li Jeovae xchiʼuk tskʼan ti akʼo mu tukʼuk yoʼonton ta stojolal Dios li Jesuse. Jaʼ onoʼox li kʼusi oy ta yoʼonton taje, ti jaʼ namaj-o ta stojolal Jeova xchiʼuk ti kʼataj ta chopol anjele, ti lik skʼan li kʼusi maʼuk yuʼune (Sant. 1:14, 15). Yan li Jesuse, oy ta yoʼonton ti tukʼ chakʼ sba ta stojolal li sTot ta vinajele. Xi laj yalbee: «Batan, Satanás. Yuʼun jech tsʼibabil ta scʼop Dios: “Jaʼ noʼox xavichʼic ta mucʼ stuc li Cajvaltique, jaʼ li Dios avuʼune, jaʼ noʼox xaquejan aba ta stojol”». Li xNichʼon Diose ta sjunul yoʼonton la spʼaj xtok li kʼusi ox ch-akʼbat yuʼun Diabloe, yuʼun mu skʼan mi jsetʼuk li kʼusi jaʼ yuʼun Satanase. ¡Mi jaʼuk onoʼox bu chichʼ ta mukʼ li jloʼlavaneje! (Mat. 4:10; Deu. 6:13; 10:20.)
«Contrainic li pucuje, jech chjatov loqʼuel ta atojolic»
13, 14. 1) Kʼalal akʼbat yil yuʼun Diablo skotol ajvalilal ta spʼejel balumil li Jesuse, ¿kʼusi ti albat ch-akʼbat ta melele? 2) ¿Kʼuxi tskʼan tsokesutik yaʼi avi li Diabloe?
13 Kʼalal akʼbat yil yuʼun Diablo skotol ajvalilal ta balumil li Jesuse, yakal ch-albat ti xuʼ tsta sjuʼel ti muʼyuk bu ilbil-o jeche. Li Satanase yaloj mi chʼayal to chkom yoʼonton Jesús kʼalal chile, ti tskʼan xa ch-och yaʼi ta mukʼta ajvalil ta spʼejel Balumile. Li avie muʼyuk bu chakʼbutik ajvalilal li Diabloe, pe tsok yaʼi koʼontontik ta sventa li kʼusi chkiltike, li kʼusi chkaʼitike xchiʼuk li kʼusi ta jnoptike.
14 Li Diablo spetoj ta skʼob li balumile, jaʼ yuʼun xuʼ xkaltik ti sventainoj xtok li radio, li television xchiʼuk kʼusitik yantik. Muʼyuk bu labal chkaʼitik ti jaʼ sventa mulivajel xchiʼuk majbail li kʼusi chapta, tskʼel xchiʼuk chaʼi li krixchanoetike. Chakʼbeik tajek yipal ta spukbel skʼoplal li kʼusitike, sventa jsaʼtik li kʼusi mu xa jtuneluk kuʼuntike. Taje jaʼ jech tspas Diablo sventa tstij koʼontontik ta saʼel mas li kʼulejale. Jaʼ yuʼun chaʼa, kʼalal muʼyuk chkaptatik, ta jkʼeltik o chkaʼitik li kʼusi mu xtun ta sventa jun yajtsʼaklom Cristoe, xkoʼolaj xchiʼuk xi yakal chkalbetik li Diabloe: «Batan, Satanás». Kʼalal jpʼel koʼontontik ta jpʼajtik li kʼusi chakʼ balumile, chkakʼtik ta ilel ti ta jchanbetik stalelal Jesuse. Jech xtok, kʼalal muʼyuk chi jxiʼ chkalbetik jchiʼiltaktik ta abtel, ta chanun, jlakʼnatik xchiʼuk kutsʼ kalaltik ti jaʼutik yajrextiko Jeova xchiʼuk ti jaʼutik yajtsʼaklom Cristoe jaʼ me jech chkakʼtik ta ilel ti maʼukutik ta sbalumil Satanase (kʼelo Marcos 8:38).
15. ¿Kʼu yuʼun skʼan julavemukutik-o?
15 Kʼalal oxib xaʼox velta muʼyuk xkʼot ta pasel sventa tsokesbe stukʼil yoʼonton li Jesuse, «jech ibat li pucuje» (Mat. 4:11). Pe muʼyuk bu xikta sba, yuʼun xi chal li Vivliae: «Cʼalal laj yoʼnton ta sqʼuelbel yoʼnton [ta taki xokol balumil] Jesús li pucuje, ibat. La smala cʼusi ora xuʼ ta sqʼuelbe yoʼnton yan velta» (Luc. 4:13). Akʼo mi tsal xaʼox kuʼuntik junuk preva —ti ta jtojbetik ta vokol Jeovae—, skʼan me jkʼanilantik-o ti akʼo skoltautik li Diose. Mu me jchʼay ta joltik ti chakʼutik-o ta preva li Satanase, jaʼ ti kʼusi ora sta-o chile, mu me jaʼuk-o tspasutik ta preva kʼalal jaʼo jmalaojtike. Jech oxal, skʼan me julavemukutik-o, chapalukutik ta stsalel li prevaetike xchiʼuk jpʼeluk-o ta koʼontontik chi jtun ta stojolal Jeova.
16. ¿Kʼusi juʼelal toj tsots xuʼ chakʼbutik li Jeovae, xchiʼuk kʼu yuʼun skʼan jkʼanbetik?
16 Jtos ti kʼusi tskoltautik sventa xkuch kuʼuntik li preva chakʼ Diabloe jaʼ ti jkʼanbetik xchʼul espiritu li Jeovae, jaʼ li juʼelal ti mas toj tsots ta sjunul vinajel-balumile, ti jpatoj lek koʼontontik chakʼbutike. Koliyal li chʼul espiritue ta me spas kuʼuntik li kʼusi mu spas ta kipal jtuktike. Li Jesuse laj yalbe ta melel yajtsʼaklomtak ti ch-akʼbatik chʼul espiritu yuʼun Dios kʼalal xi laj yale: «Voʼoxuc ti [jpas muliloxuk xchiʼuk] chopoloxuc onoʼox [jutuke], xanaʼic cʼusi lec chavacʼbeic li anichʼnabique. ¡Buuc xa li Atotic te oy ta vinajele Chʼul Espíritu chacʼbe li bochʼotic ta scʼanique!» (Luc. 11:13). Mu me xkiktatik ta skʼanbel Jeova li xchʼul espiritu ti toj echʼem xa noʼox yipe, yuʼun me jaʼ tstsatsubtas koʼontontik ti akʼo jkontraintik li Diabloe xchiʼuk jaʼ me tskoltautik ta stsalel. Mi ta jkʼan «chcuch [kuʼuntik] li loʼlael chacʼ tal li pucuj» xchiʼuk li spetsʼtake, maʼuk noʼox me skʼan nopajtik jpastik orasion, moʼoj, yuʼun skʼan jlaptik skotol xtok li kabtejebtik ta mantale (Efe. 6:11-18).
17. ¿Kʼusi koltaat-o li Jesús sventa tskontrain li Diabloe?
17 Li Vivliae oy to kʼusi chal xtok ti kʼusi koltaat-o ta skontrainel Diablo li Jesuse xchiʼuk ti xuʼ tskoltautik eke: «Li bochʼo laj yichʼ vocol ta cruze [«jtel teʼ», NM], ti muʼyuc scʼoplal laj yaʼay li qʼuexlale, yuʼun la snaʼ ti xcuxet noʼox yoʼnton ta tsʼacale. Jech ibat chotluc ta sbatsʼicʼob Dios yoʼ bu tspas mantale» (Heb. 12:2). Jaʼ me jech xi jmuyubaj ek mi te oyutik ta stojolal li pas mantal yuʼun Jeovae, mi chkichʼbetik ta mukʼ li xchʼul bie xchiʼuk mi te-o ta joltik li spatobil koʼontontik ta sventa kuxlejal sbatel osile. Mu x-al kuʼuntik yaʼel kʼu to yelan chkaʼitik li muyubajel kʼalal mi laj li Satanase, li sbalumile xchiʼuk mi kʼot ta pasel li albil kʼop liʼe: «Li bochʼotic biqʼuit chacʼ sbaique jaʼ chuʼuninic o li yosilalique; jun noʼox yoʼnton te oyic o» (Sal. 37:11). Jaʼ yuʼun chaʼa, jchanbetik-o me echʼel stukʼil talelal li Jesuse xchiʼuk jkontraintik me ta skotol kipaltik li Diabloe (kʼelo Santiago 4:7, 8).
¿Mi xa nabe li stakʼobile?
• ¿Kʼusi svinajeb ti chchabi steklumal li Jeovae?
• ¿Kʼu yuʼun chkaltik ti toj lek ta chanbel stalelal Jesús ti kʼuxi la skontrain li Diabloe?
• ¿Kʼuxi ta jkontraintik li Diablo eke?
[Lokʼol ta pajina 29]
Ta me jpas jbatik ta yajkontra Dios mi chkamigointik li balumile
[Lokʼol ta pajina 31]
Kʼalal albat ch-akʼbat yuʼun Satanás skotol li ajvalilal ta balumile, li Jesuse la spʼaj