¿Kʼu yelan spat xokon li Diabloe?
Ti kʼu yelan tstakʼ li Vivliae
Li Diabloe jaʼ jun kuxlejal ti mu xvinaj ta kʼelele. Taje jaʼ skʼan xal ti chʼabal sbekʼtal stakopale, jaʼ yuʼun mu xvinaj (Efesios 6:11, 12).
Li jbonolajeletike ep ta velta slokʼtaojik kʼuchaʼal jun krixchano ti xkoʼolaj ta tentsun li Diabloe, ti oy la xulubtake, ti oy la snee xchiʼuk ti stsakoj la jun smukʼta trinchee. Li slokʼoltak pukuje chalik ti jaʼo la lik sbonik junantik jbonolajeletik ta Edad Media (ti tetik van ta sjabilal 500 kʼalal ta 1500 ta jkʼakʼaliltike) ti mas xa ta jmil jabil yechʼele. Ti jech la sbonike xuʼ van jaʼ ta skoj li kʼusi chakʼik ta chanel li krixchanoetik xchiʼuk li kʼusi xchʼunojik ta voʼnee.
¿Kʼu yelan chalbe skʼoplal Diablo li Vivliae?
Kʼalal chalbe skʼoplal Diablo li Vivliae, ep ta tos kʼusi tskoʼoltas-o, taje jaʼ tskoltautik sventa jnaʼtik kʼu yelan ta melel, maʼuk ti kʼu yelan spat xokone. Liʼe jaʼ junantik ti kʼu yelan chalbe skʼoplale:
Jun anjel ti xojobaj noʼoxe. Oy kʼusitik lekik chakʼbe yilel li krixchanoetik sventa jaʼ xchʼunik li chanubtasel yuʼune, ti maʼukuk xchʼunik li kʼusi chakʼ ta chanel Diose (2 Korintios 11:14).
Jkot leon ti x-avete. Muʼyuk xkʼuxul yoʼonton chilbajin o tskontrain li yajtuneltak Diose (1 Pedro 5:8).
Li mukʼta dragone. Chakʼ xiʼel, tsots sjuʼel xchiʼuk chakʼ tajek vokolil (Apokalipsis 12:9).