¿Mi oy ta melel li Diabloe?
Li kʼusi chal Vivliae
Oy ta melel li Diabloe, jaʼ jun kuxlejal ti mu xvinaj ta kʼelel ti lik sokuk xchiʼuk ti la stoy sba ta stojolal Diose. Jech xtok, jaʼ «li ajvalil ta balumile» (Juan 14:30; Efesios 6:11, 12). Li Vivliae jeltos kʼu yelan tsbiiltas sventa xakʼ ta ilel ti kʼu yelan stalelale. Xi yelane:
Satanas, jaʼ skʼan xal «Jkontrainvanej» (Job 1:6).
Diablo, jaʼ skʼan xal «Jchopolkʼoptavanej» (Apokalipsis 12:9).
Kiletel chon, li Vivlia jaʼ jech tstunes ta skoj ti jaʼ jun jloʼlavaneje (2 Korintios 11:3).
J-akʼvanej ta prevae (Mateo 4:3).
Jutkʼop (Juan 8:44).
Maʼuk skʼoplal choplejal o li kʼusi chopol oy ta koʼontontike
Oy buchʼutik xchʼunojik ti Diabloe jaʼ skʼoplal choplejal o li kʼusi chopol oy ta koʼontontike xchiʼuk la li ta yoʼonton Dios eke. Li Vivliae chal ti la xchiʼin sbaik ta loʼil xchiʼuk Dios li Diabloe. Pe li Diose tukʼ xchiʼuk chʼul. Jaʼ yuʼun chaʼa, ¿kʼuxi xa noʼox ti oy kʼusi chopol ta yoʼontone? (Deuteronomio 32:4; Job 2:1-6). ¿Kʼusi xuʼ xkaltik ta sventa li loʼil ta jtatik ta Vivlia kʼalal li Diabloe laj yakʼ ta preva Jesus ti jaʼ jun tukʼil vinike? (Mateo 4:8-10; 1 Juan 3:5). Li Vivliae jamal chakʼ ta ilel ti kuxul ta melel li Satanase xchiʼuk ti maʼuk skʼoplal li choplejale.
Ep buchʼutik xchʼunojik ti muʼyuk ta melel li Diabloe. ¿Mi labal van chkaʼitik taje? Mi jsetʼuk, yuʼun li Vivliae chal ti manya tajek li Satanas sventa spas li kʼusi oy ta yoʼontone (2 Tesalonisenses 2:9, 10). Jtos ti kʼusi tunem tajek yuʼune, jaʼ ti chakʼbe xchʼun krixchanoetik ti muʼyuk kuxule (2 Korintios 4:4).
Li kʼusitik jecheʼ chʼunbil ta sventa li Diabloe
Liʼe jaʼ melel: Ta junantik Vivliae Lucifer yiktaojik li jpʼel kʼop ta ebreo ti jaʼ skʼan xal ‹xojobinaje› (Isaias 14:12). Taje te ta jtatik ta jun albil kʼop; li stsʼak sloʼilale chakʼ ta ilel ti jaʼ chalbe skʼoplal li snitilulal ajvalil ta Babiloniae, yuʼun li Diose tsbikʼtajesbe skʼoplal ta skoj li stoyobbaile (Isaias 14:4, 13-20). Li ta albil kʼop liʼe, kʼalal laj yichʼ tsalel li snitilulal ajvaliletik ta Babiloniae laj yichʼ labanel, voʼot «ti xaxojobinaje» x-utat.
Liʼe jaʼ melel: Li Diabloe yajkontra Dios, maʼuk jun yajtunel. Li Satanase tskontrain xtok li buchʼutik chtunik ta stojolal Diose xchiʼuk tstikʼanbe smul (1 Pedro 5:8; Apokalipsis 12:10).