La spas ep skʼelobiltak juʼelal li Jesuse

Li Jesuse tal ta balumil sventa xcholbe skʼoplal li lekil aʼyejetik ta sventa li Ajvalilal yuʼun Diose. Jech xtok, li Jeovae laj yakʼbe xchʼul espiritu sventa spas skʼelobiltak juʼelal sventa xakʼ ta ilel li kʼusi tspas mi och ta Ajvalile. Li Jesuse xpoxtaj yuʼun kʼusuk chamelal. Jaʼ yuʼun, li buchʼutik ipike tskʼanbeik vokol Jesus sventa xpoxtaatike. La sjambe sat li maʼsatetike, la sjambe xchikin li pakʼchikinetike xchiʼuk lik xanavuk yuʼun li buchʼutik mu xanavike. Akʼo mi jaʼ noʼox tspikbeik stsitsimal skʼuʼ li Jesuse, xuʼ xpoxtajik-o. Maʼuk noʼox, yuʼun la snuts lokʼel pukujetik xtok. Ti buyuk noʼox chbate, tstsʼakliat batel yuʼun li krixchanoetike, muʼyuk bu la spʼajan akʼo mi tskʼan xa yaʼi ti stuk oye.

Jun veltae, ikʼbat tal ta stojolal Jesus jun vinik ti alubem sbekʼtale. Pe ta skoj ti noj tajek ta krixchanoetik li nae, mu xjelavik batel ti bu oy li Jesuse, jaʼ yuʼun la sjombeik sjol li na ti bu stukʼil oy li Jesuse, vaʼun la xchechik yalel xchiʼuk svayeb li vinik ti alubem sbekʼtale. Vaʼun, li Jesuse xi laj yalbe li vinike: «Vaʼlan xchiʼuk xanavan». Toj chʼayal to kʼot yoʼonton li krixchanoetik kʼalal laj yilik ti lik xanavuk li vinike.

Ta yan kʼakʼal kʼalal chkʼot xa ox ta jun jteklum li Jesuse, xi tsots laj yalik lajuneb viniketik ti ipik ta kʼaʼemal chamele: «¡Jesus, koltaunkutik!». Li vaʼ kʼakʼale, mu xuʼ xnopajik ta stojolal krixchanoetik li buchʼutik ipik ta kʼaʼemal chamele. Jech xtok, li ta Mantal yaloj Jeovae chal ti skʼan xbatik ta templo mi poxtajik xa ox li buchʼutik ipik ta kʼaʼemal chamele. Jaʼ yuʼun, li Jesuse laj yalbe ti akʼo te xbatike. Vaʼun, kʼalal yakal chanavik batel sventa xbatik ta templo li viniketike, poxtaj li xchamelike. Vaʼun, jaʼ noʼox jun vinik sut stojbe ta vokol Jesus xchiʼuk lik yichʼ ta mukʼ li Diose.

Oy jun ants ti oy xa ta 12 jabil yipajele, mu xa stsʼik chaʼi li xchamele, jaʼ yuʼun tskʼan xa chpoxtaj. Jech oxal, nopaj batel ta spat epal krixchanoetik sventa spikbe skʼuʼ li Jesuse. Vaʼun, kʼalal la spikbe skʼuʼe, kol li xchamele. Pe xi la sjakʼ li Jesuse: «¿Buchʼu la spikbun li jkʼuʼe?». Akʼo mi xiʼem tajek li antse, laj yalbe Jesus ti kʼu yuʼun jech la spase. Vaʼun, li Jesuse la spatbe yoʼonton xchiʼuk xi laj yalbee: «Jtseb, junuk avoʼonton batan».

Jech xtok, oy jun bankilal jpasmantal ti Jairo sbie xi ay skʼanbe vokol li Jesuse: «Avokoluk, batik li ta jnae, yuʼun toj ip li jtsebe». Pe kʼalal muʼyuk to bu chkʼot ta sna Jairo li Jesuse, cham li tsebe. Kʼalal kʼot li Jesuse, laj yil ti yakal ch-okʼik skotol li yutsʼ yalale. Jaʼ yuʼun, xi laj yale: «Mu xa okʼik, yuʼun jaʼ noʼox ta xvay». Vaʼun, li Jesuse la stsakbe skʼob li tsebe xchiʼuk xi laj yalbee: «Tseb, ¡likan!». Ta ora noʼox lik li uni tsebe, vaʼun li Jesuse laj yalbe li totil meʼil ti akʼo yakʼbeik sveʼele. ¡Nopo xa noʼox avaʼi ti kʼu yelan laj yaʼi sbaik li totil meʼile!